Azərbaycan Respublikasının GoMap.az interaktiv elektron xəritəsi Azərbaycan Respublikası Mədəniyyət Nazirliyi tərəfindən 2010-cu ilin aprelində ictimaiyyətə təqdim edilmişdir.

Hazırda GoMap.az elektron xəritəsinə 110 mindən artıq maraq nöqtəsi (POI), 8,4 mindən artıq yaşayış məntəqəsi, 90 şəhər və qəsəbə üzrə ünvan məlumatları, 1 milyondan artıq bina və tikililər, 115 min km-dən artıq yol və yol qovşaqları (xarakteristikaları və yol hərəkət qaydaları daxil olmaqla), 3 mindən çox Tarixi-Mədəniyyət abidəsi və s. daxildir. Eləcə də GoMap.az xəritəsi üzərində bazada olan  obyeklərin əksəriyyətinin foto və 360 panoramalı şəkillərini seyr etmək olar.

Qlobal geoinformasiya servislərindən, o cümlədən Google Maps servisindən GoMap elektron xəritəsinin üstünlüyü onun daha dürüst və məlumatlı olmasıdır. Xəritənin Azərbaycan, ingilis və rus dillərində olması elektron xəritəni həm ölkə vətəndaşları, həm də xarici qonaqlar da rahat istifadə edə bilər.

GoMap xəritəsinin müxtəlif funksionalları hər bir istifadəçinin tələbatını ödəyə bilər. Gürcüstanın elektron xəritəsi  yaradılması bu ölkəyə səyahət edən Azərbaycan vətəndaşları  və xarici vətəndaşlar üçün effektiv bir virtual bələdçisinə çevrilmişdir.    

Orta hesabla GoMap.az elektron xəritəsinə ayda 670 mindən çox istifadəçi daxil olur. Məsələn, 2019-cü il ərzində GoMap.Az elektron xəritəsinə dünyanın 186 ölkəsindən 6 510 mindən çox, istifadəçi daxil olmuşdur. Azərbaycandan Gomap.az elektron xəritəsindən istifadə edənlərlə yanaşı, Rusiya, Gürcüstan, Türkiyə, ABŞ, Böyük Britaniya, Fransa, Kazaxstan, Almaniya, Ukrayna ərazisindən daha çox istifadəçi daxil olur. Ümumiyyətlə, statistikaya görə Gomap.az-a istifadəçilərin 83%-i Azərbaycandan daxil olur.

Qeyd etmək lazımdır ki, GoMap.az hazırda Gürcüstanı da əhatə edir.

GoMap elektron xəritəsi aşağıdakı funksionalları özündə birləşdirir:

• Azərbaycan və Gürcüstan üzrə bir sətirli universal axtarış sistemi,
• Hər bir obyekt haqda tam məlumat almaq, rəy yazmaq, reklam sifariş etmək, reytinq qoymaq, şəkil əlavə etmək və s. üçün ayrıca interfeys,
• Xəritəyə daxil olan obyektlər arasında axtarış üçün, məxsusi strukturlaşdırılmış "Müəsissələrin Kataloqu" funksiyası,
• Xəritə üzərində "Yaxınlıqda axtar" funksiyasının köməyi ilə ətrafda, müəyyən uzaqlıqda və müəyyən tiplər arasında axtarış aparmaq imkanı.
• Xəritəyə yeni obyekt əlavə etmək funksiyası,
• Saytın administratoru ilə interaktiv əlaqə funksiyası,
• "Mənim obyektlərim" funksiyasından istifadə edərək hər kəs öz xəritəsini yarada bilər,
• Bakı və Sumqayıt şəhərləri üzrə avtobus marşrutlarının hərəkət sxemlərinin xəritə üzərinə çıxarılması funksiyası,
• "Xəritədə göstər" funksiyasının köməyi ilə xəritə üzərinə tipindən asılı olaraq obyektlərin ikonlarının çıxarılması yolu ilə vizual axtarış sistemi,
• "Xəritələr" funksiyasının köməyi ilə saytda alternativ xəritə kimi başqa xəritələrin də istifadə oluna bilməsi imkanı,
• Dünyada baş verən mədəniyyət və turizm xəbərləri haqda məlumat almaq imkanı,
• Müxtəlif Faydalı məlumatlar(indekslər, tel kodları, viza rejimi, avtomobil kodları və s.) almaq imkanı.
• Xəritədən başqa veb resurslarda istifadə etmək üçün xüsusi yaradılmış "APİ GoMap" funksiyası,
• Xəritə üzərindən müxtəlif obyektlərdə keçirilən kampaniyalar(endirim, eksklyuziv və s.) haqda məlumat almaq imkanı.
• Xəritə üzərində bir məntəqədən digər məntəqəyə, bir neçə aralıq məntəqələrdən keçməklə, avtomobil və ya piyada marşrutlarının qurulması funksiyası,

GoMap.az Online Navigator portalının, Android platformasında işləyən mobil versiyası istifadəyə verilmişdir. 2013-cü ildən  GoMap.Az elektron xəritəsinin Android və iOS platformalarında işləyən nativ tətbiqləri də hazırlanıb və Apple Stor və Play Market endirilərək müstəqil proqram kimi işləyirlər.

GoMap.Az xəritəsinin üzərindən yaradılmış bir məhsul kimi AzNav və YollarPRO.Az offline GPS Naviqator proqramı da istifadədədir.  Android və iOS tabanlı cihazlrda (smartfon və tablet PC) və naviqator cihazlarında (PND) işləyir.

GoMap.az elektron xəritəsinin yaradılmasında əsas məqsədlərdən biri virtual məkanda Azərbaycanın milli maraqlarınin qorunmasıdır. Belə ki, mövcud qlobal elektron xəritələrdə Azərbaycanın işğal altında olan ərazilərində toponim adlarının erməniləşdirilməsinın qarşısını almaqla yanaşı, Azərbaycana maraq göstərən dünya ictimaiyyətinə dəqiq alternativ geoinformasiya platforması təqdim olunmuşdur. 100-dən çox ölkədən olan istifadəçilərin GoMap.az elektron xəritəsinə olan marağı bu siyasətin effektivliyini təsdiqləyir.

Bununla yanaşı qeyd etmək lazımdır ki, Azərbaycan öz ərazisinə və əhalinin sayına görə bir bazar seqmenti kimi qlobal geoinformasiya servislərinin maraq dairəsində prioritet deyildir və ona görə həmin servislər Azərbaycanın xəritəsinın təkmilləşdirilməsi üzrə zəruri aktivlik göstərmirlər. 

GoMap.az elektron xəritəsi təkmilləşdirilməsi davamlı prosesdir və bu istiqamətdə fəaliyyət daimidir. Saytın proqram platformasının və axtarış sisteminin təkmilləşdirilməsi, yeni servislərin işə salınması ilə yanaşı, ünvan və obyekt bazasının da yenilənməsi prosesi həyata keçirilir. Beləki, hazırda GoMap.Az elektron xəritəsi Əmlak Məsələləri Dövlət Komitəsinin Ünvan Reyestri ilə inteqrasiya olunmuş və ölkəmizdə tətbiq edilən yeni ünvan konsepsiyasına uyğun yeni ünvanlar köhnə ünvanlarla birlikdə verilənlər bazasına daxil edilmiş və GoMap.az xəritəsində öz əksini tapmışdır. Belə yanaşma, GoMap.az elektron xəritəsini mövcud qlobal geoinformasiya sistemlərindən əhəmiyyətli dərəcədə fərqləndirir.