Başlıca vəzifəsi kitabın təbliği, reklamı, yayımı və satışı olan  respublika Kitabxana Kollektoru Azərbaycan Respublikası Mədəniyyət Nazirliyinin tərkibində  geniş fəaliyyət göstərən qurumlardan biridir. 

Müəssisə yarandığı gündən  respublika kitabxanaları arasında kitabın yayımının təşkili işində  müstəsna əhəmiyyətə malikdir. 

1920-ci  ildən fəaliyyət göstərir - 100 yaşı bu ilin  iyununda tamamlanacaq. Kitabın təbliği sahəsində uzun bir  yol keçən Kollektor yarandığı  gündən Xalq  Maarif  Komissarlığının nəzdində  fəaliyyət göstərib. İlk vaxtlarda əsas  vəzifəsi  müxtəlif  mağazalardan, təşkilatlardan, şəxslərdən  kitablar  alıb  kitabxanalar  arasında  bölüşdürmək idi. Kollektorun Azərbaycan, rus və xarici dillər şöbələri vardı.

Kitab təbliği və yayımı sahəsində yüz ilə zaman məsafəsi qət edən   Respublika Kitabxana Kollektoru bu gün də kitabın oxuculara çatdırılması işində fəallıq göstərir. Bu qurumun iş prinsiplərinə gəldikdə, Mədəniyyət Nazirliyinin sifarişi ilə nəşr olunmuş kitabların  respublika kitabxanalarına hədiyyə şəklində çatdırılmasını təmin etməklə və ilin əvvəlində bağlanılan müqavilə əsasında kitab satışını həyata keçirməklə fəaliyyətini tənzimləyir. Kollektorun fondunda tariximiz,  dövlət quruculuğumuz, elmin müxtəlif sahələri, iqtisadiyyat  və turizmlə bağlı kitabların sayı  artmaqdadır, oxucuların marağından çıxış edərək müxtəlif sahələrə aid ədəbiyyat nümunələri ilə daha da zənginləşir. Respublikadakı kitabxanaların kitablarla təminatı ilə yanaşı həm də müəlliflərlə oxucular arasında yaradıcı münasibətlərin qurulmasında əhəmiyyətli işlər görür.  Hər il müəlliflərdən minlərlə kitab satın alınaraq kitabxanalara paylanılır, nəticədə ölkəmizin dörd bir tərəfindəki oxucular istədikləri kitabları kitabxanalardan əldə edib oxuya bilirlər. Beləcə Kitabxana Kollektoru tərəfindən kitabları satın alınan müəlliflər həm dövlətdən maddi dəstək görür, həm də əsərləri ölkənin əsas kitabxanalarına göndərilərək oxuculara qovuşur. Hər il ardıcıl şəkildə reallaşan bu proses regionlardakı kitabxanaların yeni nəşrlərlə təminatı prosesini dayanıqlı edir. Nəticədə kollektorun köməyi ilə ən son, gərəkli və maraqlı nəşrləri ən ucqar  kitabxanalardan da tapmaq olur.