Vahid poeziya eviVahid poeziya evi 1995 ildə Əliağa Vahidin anadan olmasının 100 illiyi ərəfəsində təşkil olunmuşdur. Bakıda yerləşir. Qədim Bakının görməli yerlərindən biri olan keçmiş “Qubernator bağı” ərazisindədir. Həmin bağa Əliağa Vahidin adı verilmiş və bağın ən görkəmli yerində Əliağa Vahidin büstü qoyulmuşdur. Fəaliyyət göstərdiyi müddətdə Vahid Poeziya evində Azərbaycan poeziya və ədəbiyyatında, mədəniyyət və incəsənətində xidmətləri olan insanların xatirə gecələri, yubileyləri, yeni kitabların təqdimat mərasimləri keçirilir və bu ənənə bu gün də davam etdirilir. Yarandığı gündən Vahid Poeziya evinin direktoru tarzən, ictimai xadim Şahin Verdiyevdir. Vahid Poeziya evində “Vahid” şairlər məclisi yaradılmışdır. Məclisə Əliağa Vahidin şəxsi həkimi və yaxın dostu olmuş, Vahidin poetik ənənələrinin davamçısı, gözəl qəzəllər müəllifi Həkim Qəni rəhbərlik etmişdir. Onun vəfatından sonra hal-hazırda məclisə şair, jurnalist Hacı Rafiq Əliyev başçılıq edir. Vahid Poeziya evi sənətkarların sevimli ocağına çevrilmişdir. Azərbaycan görkəmli mədəniyyət xadimləri, ziyalılar, şairlər və muğam ustadları buraya toplaşır, sənət, şeir və musiqi haqqında maraqlı söhbətlər aparırlar.