Horbadığ - İrəvan quberniyasının Şərur- Dərələyəz qəzasında, keçmiş Keşişkənd (Yeğeqnadzor) rayonunda, indi Vayotsdzor vilayətində kənd. Vilayət mərkəzi Yeğeqnadzor (Keşişkənd) şəhərindən 20 km şimalda, Erdəpin kəndinin yaxınlığında, dəniz səviyyəsindən 1880 m hün­dürlükdə yerləşir. Kəndin adı erməni müəllifləri­nin əsərlərində "Xorvadeğ" formasında da qeyd edilmişdir. (415, s. 92). Kənddə 1831-ci ildə 35, 1873-cü ildə 263, 1886-cı ildə 342, 1897-ci ildə 406, 1904-cü ildə 592, 1914-cü ildə 651, 1916-cı ildə 503 nəfər yalnız azərbaycanlı yaşamışdır (415, s. 92-93, 160-161). 1918-ci ildə kənd er­məni silahlı birləşmələrinin təcavüzünə məruz qalmış, kəndin köklü sakinləri olan azərbaycanlı­lar deportasiya olunmuş, buraya xaricdən köçü­rülüb gətirilən ermənilər yerləşdirilmişdir. Sağ qalanlar indiki Ermənistan ərazisində sovet ha­kimiyyəti qurulandan sonra öz yurdlarına qayıda bilmişdir. Burada ermənilərlə yanaşı, 1922-ci ildə 38, 1926-cı ildə 65, 1931-ci ildə 100 nəfər azər­baycanlı yaşamışdır (415, s. 92-93, 160-161). SSRİ Nazirlər Sovetinin Ermənistan ərazisindən azərbaycanlı əhalinin Azərbaycanın Kür-Araz ovalığına köçürülməsi haqqında 23 dekabr 1947-ci il tarixli qərarına əsasən, kəndin əhalisi zorla Azərbaycana köçürülmüşdür. Hazırda orada ermənilər yaşayır. Kəndin adı türk dilində "çuxur, xəndək, yarğan" mənalarında işlənən "or" sözü ilə (365, s. 466-467) fars dilində "kənd, qışlaq" mənasında işlənən "değ" (dex) sözünün (339, s. 177; 104, s. 139) birləşməsin­dən əmələ gəlmişdir. Türk dilində "yarğan, çuxur, xəndək" mənasında işlənən "or" (hor) sözü er­məni dilində "xor, xorf" formalarında işlənir (339, s. 596). Toponimin əvvəlindəki "h" samiti əlavə edilmiş səsdir. "Or" (hor) və "değ" sözlərinin ara­sındakı "ba" isə bitişdiricidir. Hazırda erməni di­lində rəsmi sənədlərdə yaşayış məntəqəsinin adı "Horbateğ" kimi yazılır. "Ermənistan Respublikası­nın inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Vayotsdzor vilayətinin inzibati ərazisinə daxil edilmişdir (416, s. 124).

Coğrafi koordinatları: 39°53' şm. e., 45°20' ş. u

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/