Almalı - İrəvan quberniyasının Şərur-Dərələyəz qəzasında, keçmiş Paşalı (Vayk) rayonunda, indi Vayotsdzor vilayətində kənd. Vilayət mər­kəzi Yeğeqnadzor (Keşişkənd) şəhərindən 45 km cənub-şərqdə, dəniz səviyyəsindən 1600 m hün­dürlükdə yerləşir. Kənddə ermənilərlə yanaşı, 1831-ci ildə 6, 1897-ci ildə 14, 1926-cı ildə 5 nəfər azərbaycanlı yaşamışdır (415, s. 88-89, 158). Hazırda kənddə ermənilər yaşayır. Almalı adlı toponimlərə indiki Ermənistanın Sünik, Vayo­tsdzor, Geğarkunik vilayətləri (keçmiş Keşişkənd (Yeğeqnadzor), Kəvər (Kamo), Paşalı (Vayk) və Qafan rayonlarında) ilə yanaşı, Azərbaycanda, Türkiyədə geniş şəkildə rast gəlmək olur (427, s. 96-97). Almalı toponimlərinin meyvə adı ilə bağlılığı yoxdur. Bu, türk etnonimidir. Hələb türk­mənlərinin tayfa birliyinə daxil olan tayfalardan biri "almalı" adlanır (407, s. 90). Kəndin adı "al­malı" etnonimi əsasında yaranmışdır. Erm. SSR AS RH-nin 12 noyabr 1946-cı il tarixli qərarı ilə kəndin adı dəyişdirilərək "Xndzorud" qoyulmuş­dur. "Ermənistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Vayotsdzor vilayətinin inzibati ərazisinə daxil edilmişdir (416, s. 97).

Coğrafi koordinatları: 39°33' şm. e., 45°24' ş. u

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/