Darğalı - İrəvan quberniyasının İrəvan qə­zasında, keçmiş Qəmərli (Artaşat) rayonunda, indi Ararat vilayətində kənd. Vilayət mərkəzi Ar­taşat (Qəmərli) şəhərindən 6,5 km şərqdə, Gərni çayından axan arxın yanında, Araz çayının yaxın­lığında, Yuva kəndinin kənarında, dəniz səviyyə­sindən 870 m hündürlükdə yerləşir. "İrəvan əyalətinin icmal dəftəri"ndə (143, s. 100), Qafqa­zın 5 verstlik xəritəsində (348, s. 75) qeyd edilmiş­dir. Burada tarixən, 1828-ci ilə kimi azərbaycanlı­lar yaşamışdır. Kəndə ermənilər 1828-1830-cu illərdə İranın Xoy və Səlmas vilayətlərindən köçü­rülmüşdür (427, s. 226). Erməni ədəbiyyatında kəndin 1831-ci ildə salındığı göstərilir (416, s. 17). Erməni tədqiqatçıları tarixi həqiqəti saxtalaşdırmış­lar. Çünki 1728-ci il tarixində tərtib edilmiş "İrəvan əyalətinin icmal dəftəri"ndə Mustafanın adına olan timarda Gərni nahiyəsinə tabe olan Darğalı kəndinin adı qeyd edilmişdir. Darğalı kəndinin gəliri 6000 ağça təşkil etmişdir (143, s. 100). Kənd­də ermənilərlə yanaşı, 1831-ci ildə 125, 1873-cü ildə 22, 1886-cı ildə 36, 1897-ci ildə 11 nəfər azərbaycanlı yaşamışdır (415, s. 48-49, 128-129). 1918-ci ildə azərbaycanlılar soyqırımına məruz qalaraq deportasiya olunmuşdur. Hazırda ora­da ermənilər yaşayır. Toponim qədim türk dillə­rində "şəhər, qəza, mahal, vilayət hakimi" məna­sında işlənən "darğa" sözünə (10, s. 36) Azər­baycan dilində mənsubluq bildirən "-lı" şəkilçi­sinin artırılması əsasında əmələ gəlib, "şəhər, qəza, mahal, vilayət hakiminə mənsub kənd" mənasını bildirir. "Aşağı" fərqləndirici əlamət bil­dirir. Erm. SSR AS RH-nin 1 dekabr 1949-cu il ta­rixli qərarı ilə kəndin adı dəyişdirilərək "Anasta- savan", 30 dekabr 1957-ci il tarixli qərarı ilə yenidən dəyişdirilərək "Aygezard" qoyulmuşdur. "Ermənistan Respublikasının inzibati-ərazi böl­güsü haqqında" 7 noyabr 1995-ci il tarixli yeni Qanuna əsasən, Ararat vilayətinin inzibati ərazi­sinə daxil edilmişdir (416, s. 17).

Coğrafi koordinatları: 39°56' şm. e., 44°36' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/