Başkənd - İrəvan quberniyasının Novo-Bəyazid qəzasında, keçmiş Kəvər (Kamo) rayo­nunda, indi Geğarkunik vilayətində kənd. Vi­layət mərkəzi Qavar (Kəvər) şəhərindən 8 km cənubda, Kəvər çayının yanında, dəniz səviyyə­sindən 2075 m hündürlükdə yerləşir. Qafqazın 5 verstlik xəritəsində qeyd edilmişdir (348, s. 34). Ermənilər buraya 1828-1829-cu, 1914-1919-cu illərdə Türkiyənin Ələşkirt və Muş vilayətlərin­dən köçürülmüşdür (427, s. 827). Kənddə 1873-cü ildə 191 azərbaycanlı, 272 erməni, 1886-cı ildə 243 azərbaycanlı, 385 erməni, 1897-ci ildə 357 azərbaycanlı, 440 erməni, 1914-cü ildə 410 nəfər azərbaycanlı, 704 nəfər erməni yaşamışdır (415, s. 68-69, 144-145). 1918-ci ildə azərbay­canlılar erməni silahlı birləşmələri tərəfindən vəhşicəsinə qırğınlarla qovulmuşdur. Sağ qalan azərbaycanlılar 1920-ci ildə indiki Ermənistan ərazisində sovet hakimiyyəti qurulandan sonra öz doğma kəndlərinə dönmüşdür. Burada 1922-ci ildə 96 azərbaycanlı, 763 erməni, 1926-cı ildə 112 azərbaycanlı, 928 erməni, 1931-ci ildə 194 nəfər azərbaycanlı, 1156 erməni yaşamışdır (415, s. 69, 145). Azərbaycanlılar 1930-cu illərin so­nunda Ermənistanın Qarabağlar rayonuna, Qara- bağlar rayonu ləğv edildikdən sonra SSRİ Nazir­lər Sovetinin qərarı ilə tarixi-etnik torpaqlarından çıxarılaraq 1948-1950-ci illərdə Azərbaycana kö­çürülmüşdür. Hazırda orada yalnız ermənilər məskunlaşmışdır. Kəndin ilk adı Göyçə Başkəndi olmuşdur. Yəni Göyçə mahalında yerləşən Baş­kənd. Sonradan Göyçə sözü atılmış, kənd Baş­kənd adlandırılmışdır. Toponim Azərbaycan di­lində "böyük", "əsas", "yuxarı" mənasında işlənən "baş" sözü ilə (339, s. 77) "kənd" sözünün birləş­məsindən əmələ gəlmişdir. Erm. SSR AS RH-nin 4 aprel 1946-cı il tarixli qərarı ilə kəndin adı də­yişdirilərək "Geğarkunik" qoyulmuşdur. "Ermənis­tan Respublikasının inzibati-ərazi bölgüsü haq­qında" 7 noyabr 1995-ci il tarixli yeni Qanuna əsasən, Geğarkunik vilayətinin inzibati əra­zisinə daxil edilmişdir (416, s. 55-56).

Coğrafi koordinatları: 40°15' şm. e., 45°08' ş. u.