Hallavar - İrəvan quberniyasının Aleksandropol qəzasında, keçmiş Quqark (Qarakilsə) ra­yonunda, indi Lori vilayətində kənd. Vilayət mərkəzi Vanadzor (Böyük Qarakilsə) şəhərindən 10 km cənub-qərbdə, Yuxarı Kilsə və Haydarlı (Heydərli) kəndləri arasında, Hallavar çayının ya­nında, Pəmbək çayının sağ sahilində, dəniz sə­viyyəsindən 1650 m hündürlükdə yerləşir. Qaf­qazın 5 verstlik xəritəsində qeyd edilmişdir (348, s. 55). Kənddə 1831-ci ildə 111, 1873-cü ildə 625, 1886-cı ildə 664, 1897-ci ildə 913, 1908-ci ildə 1062, 1914-cü ildə 445, 1916-cı ildə 781, 1919-cu ildə 455 nəfər azərbaycanlı yaşamışdır (415, s. 52-53, 130-131). 1919-cu ilin martında kənd erməni silahlı birləşmələrinin təcavüzünə məruz qalmış və azərbaycanlılar qırğınlarla ta­mamilə deportasiya olunmuşdur. Azərbaycanlı­lardan sağ qalanlar indiki Ermənistan ərazisində sovet hakimiyyəti qurulandan sonra öz ata- baba torpaqlarına qayıda bilmişdir. Burada 1922-ci ildə 644, 1926-cı ildə 709, 1931-ci ildə 902 nəfər (415, s. 52-53, 130-131), 1939-cu ildə 951,1959-cu ildə 1020, 1970-ci ildə 1838, 1979-cu ildə 2181 nəfər (416, s. 116) azərbaycanlı yaşa­mışdır. 1988-ci ilin noyabr-dekabr aylarında azərbaycanlılar qırğınlarla kənddən qovulmuş­lar. Hazırda orada ermənilər yaşayır. Toponim türk dilində "müxtəlif rəngli bitki və torpaq olan düzənlik" mənasında işlənən "ala" sözünə (365, s. 129-130; 339, s. 44) "möhkəmləndirilmiş is­tehkamı olan kənd, qala, bənd" mənasında iş­lənən "var" sözünün (339, s. 113) birləşməsi yolu ilə əmələ gəlmişdir. Toponimin əvvəlinə "h" səsi artırılmışdır. Belə ki Azərbaycan dilində bəzi saitlə başlanan sözlərə tələffüzdə "h" səsi əlavə edilir: araba-haraba, açar-haçar, elə-helə və s. Erməni ədəbiyyatında kəndin adı "Halavar" fo­netik formasında əksini tapır. "Ermənistan Res­publikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Lori vilayətinin inzibati ərazisinə daxil edilmişdir (416, s. 116).

Coğrafi koordinatları: 40°46' şm. e., 44°23' ş. u.