Soyuqbulaq - Tiflis quberniyasının Borçalı qəzasında, keçmiş Kalinino rayonunda, indi Lori vilayətində kənd. Vilayət mərkəzi Vanadzor (Bö­yük Qarakilsə) şəhərindən 57 km şimal-qərbdə, Qaraarxac (Qaraxaç) dağının ətəklərində, də­niz səviyyəsindən 1750 m hündürlükdə yerləşir. 1937-ci ilə kimi keçmiş Cəlaloğlu (Stepanavan) rayonunun tərkibində olmuşdur. Kənddə 1886-cı ildə 159, 1897-ci ildə 154, 1904-cü ildə 230, 1914-cü ildə 125, 1916-cı ildə 375 nəfər azər­baycanlı yaşamışdır (415, s. 80-81, 150-151). 1918-ci ildə erməni silahlı birləşmələrinin soyqı­rımına məruz qalan azərbaycanlılar deportasiya olunmuşlar. İndiki Ermənistan ərazisində sovet hakimiyyəti qurulandan sonra sağ qalanlar ye­nidən öz kəndlərinə qayıda bilmişlər. Kənddə 1922-ci ildə 402, 1926-cı ildə 405, 1931-ci ildə 420 (415, s. 80-81, 150-151), 1938-ci ildə 382, 1959-cu ildə 419, 1979-cu ildə 695 nəfər (416, s. 166) azərbaycanlı yaşamışdır. 1988-ci ilin son­larında azərbaycanlılar erməni terrorçu dəstələ­rinin təcavüzünə məruz qalaraq kənddən de­portasiya olunmuşlar. Hazırda kənddə yalnız ermənilər yaşayır. Toponim Azərbaycan dilində "sərin" mənasında işlənən "soyuq" sözü ilə "bu­laq" sözünün birləşməsindən əmələ gəlmişdir. Erm. SSR AS RH-nin 3 aprel 1991-ci il tarixli qə­rarı ilə kəndin adı dəyişdirilərək "Pağağbyur" qoyulmuşdur. "Ermənistan Respublikasının inzi­bati-ərazi bölgüsü haqqında" 7 noyabr 1995-ci il tarixli yeni Qanuna əsasən, Lori vilayətinin inzi­bati ərazisinə daxil edilmişdir (416, s. 166).

Coğrafi koordinatları: 4Г10' şm. e., 44°07' ş. u.