Hacı Xəlil - İrəvan quberniyasının Aleksandropol qəzasında, keçmiş Araqats (Alagöz) rayonunda, indi Araqatsotn vilayətində kənd. Vilayət mərkəzi Aştarak (Əştərək) şəhərindən 51 km şimal-qərbdə, Alagöz dağının ətəyində, Düzkənd kəndinin yaxınlığında, dəniz səviyyəsindən 2100 m hündürlükdə yerləşir. Keçmiş Araqats (Alagöz) rayonu təşkil edilənədək (15 mart 1972) keçmiş Abaran rayonunun inzibati-ərazi bölgüsünə daxil olmuşdur. 1728-ci ildə tərtib edilmiş "İrəvan əyalətinin icmal dəftərində (143, s. 109-111), Qafqazın 5 verstlik xəritəsində (348, s. 55) qeyd edilmişdir. 1728-ci ildə tərtib edilmiş "İrəvan əyalətinin icmal dəftərində bu kəndin Abaran nahiyəsində yerləşdiyi göstərilir. Kəndin sakinləri azərbaycanlılar olmuşdur. Türkmənçay müqaviləsindən sonra - 1830-cu illərdə xaricdən köçürülüb gətirilən ermənilər bu kənddə yerləşdirilmişdir (Erməni Sovet Ensiklopediyası, V c., İrəvan, 1976, s. 110). Toponim Hacı Xəlil şəxs adı əsasında formalaşmış antropotoponimdir. Erm. SSR AS RH-nin 15 iyul 1946-cı il tarixli qərarı ilə adı dəyişdirilərək "Tsaxkahovid" qoyulmuşdur. "Ermənistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Araqatsotn vilayətinin inzibati ərazisinə daxil edilmişdir (416, s. 99).
Coğrafi koordinatları: 40°38' şm. e., 44°13' ş. u.
Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/