Dəstəgird (Dəstəkert) - Yelizavetpol (Gən­cə) quberniyasının Zəngəzur qəzasında, keçmiş Sisian rayonunda, indi Sünik vilayətində kənd. Vilayət mərkəzi Qapan şəhərindən 122 km şi­mal-qərbdə, Bərgüşad dağlarının ətəklərində, dəniz səviyyəsindən 1900 m hündürlükdə yerlə­şir. 1921-ci il avqustun 31-də Sovet Ermənista­nında Zəngəzur qəzasının yaradılmasından sonra yaşayış məntəqəsi Ermənistanın inzibati əra­zisinə daxil edilmişdir. 1590-cı il tarixli "İrəvan əyalətinin müfəssəl dəftəri"ndə (143, s. 183) qeyd edilmişdir. Kəndin adı erməniləşdirilərək Dastakert formasında salınmışdır (419, s. 79; 416, s. 65). Ermənilər kənddə 1905-1906-cı il­lərdə qırğınlar törətmişlər. Burada 1908-ci ildə 555, 1914-cü ildə 400 nəfər azərbaycanlı yaşa­mışdır (415, s. 146-147). 1918-ci ildə erməni si­lahlı birləşmələri azərbaycanlıları qırğınlarla qovmuşdur. İndiki Ermənistan ərazisində sovet hakimiyyəti qurulandan sonra kənd sakinləri öz evlərinə qayıda bilmişdir. Burada 1922-ci ildə 358, 1926-cı ildə 338, 1931-ci ildə 434 nəfər yal­nız azərbaycanlı yaşamışdır (415, s. 76-77, 146- 147). 1950-ci illərdə mis-molibden kombinatının yaradılması ilə əlaqədar buraya ermənilər köçü­rülmüşdür. 1987-ci ildə burada 1700 nəfər əhali olmuşdur ki, bunun da 80%-ni azərbaycanlılar təşkil edirdi. 1988-ci ilin noyabr ayında azərbay­canlılar Ermənistan dövləti tərəfindən tarixi-et­nik torpaqlarından deportasiya edilmişdir. Ha­zırda orada yalnız ermənilər yaşayır. Toponim qaraçorlu türk tayfasından olan bərgüşad tayfa­sına mənsub dəstəgird etnonimindən (286, s. 73) əmələ gəlmişdir. "Ermənistan Respublikasının in­zibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Sünik vilayətinin in­zibati ərazisinə daxil edilmişdir (416, s. 65).

Coğrafi koordinatları: 39°22' şm. e., 46°02' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/