Dərəçiçək - İrəvan quberniyasının Novo-Bəyazid qəzasında, keçmiş Axta (Hrazdan) rayo­nunda, indi Kotayk vilayətində şəhər tipli qəsəbə. Vilayət mərkəzi Hrazdan (Axta) şəhərin­dən 6 km şimal-qərbdə, dəniz səviyyəsindən 1710 m hündürlükdə yerləşir. "İrəvan əyalətinin icmal dəftəri"ndə (143, s. 53), Qafqazın 5 verstlik xəritəsində (348, s. 75) qeyd edilmişdir. Dərəçiçək İrəvan xanlarının yaylaq yerləri olmuşdur. Burada 1897-ci ildə rus və ermənilərlə yanaşı, 10 nəfər də azərbaycanlı yaşamışdır (415, s. 16-17). XX əs­rin əvvəllərində azərbaycanlılar erməni silahlıları tərəfindən deportasiya olunmuş və burada yalnız ermənilər və ruslar yaşamağa başlamışdır. Sonralar ruslar da deportasiya olunmuşdur. Hazırda orada yalnız ermənilər yaşayır. Toponim Azərbay­can dilində "iki dağ arasında dərin çuxur" məna­sında işlənən "dərə" sözü ilə Azərbaycan dilində "çiçəkləri olan bitki", "gül" mənasında işlənən "çiçək" sözünün (12, s. 438) birləşməsindən əmə­lə gəlmişdir. Yaşayış məntəqəsi güllü, çiçəkli, gözəl mənzərəli dərədə yerləşdiyi üçün Dərə­çiçək adlandırılmışdır. Kəndin adı 1847-ci ildə də­yişdirilərək "Konstantinovka" adlandırılmışdır. 1920-ci illərdə yaşayış məntəqəsinin adı kalka edilərək "Tsaxqadzor" qoyulmuşdur. "Ermənistan Respublikasının inzibati-ərazi bölgüsü haqqın­da" 7 noyabr 1995-ci il tarixli yeni Qanuna əsasən, Kotayk vilayətinin inzibati ərazisinə daxil edilmişdir (416, s. 99).

Coğrafi koordinatları: 40°31' şm. e., 44°43' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/