Təkərli - İrəvan quberniyasının Eçmiəd­zin qəzasında, keçmiş Abaran rayonunda, indi Araqatsotn vilayətində kənd. Vilayət mərkəzi Aştarak (Əştərək) şəhərindən 16 km şimal-qərb­də, Alagöz dağının ətəyində, Abaran çayının sağ qolu üzərində, dəniz səviyyəsindən 1950 m hün­dürlükdə yerləşir. 1590-cı ildə tərtib edilmiş "İrə­van əyalətinin müfəssəl dəftəri"ndə (143, s. 174), Qafqazın 5 verstlik xəritəsində (348, s. 236) qeyd edilmişdir. Ədirnə müqaviləsinə (1829) əsasən ermənilərin köçürülüb məskunlaşdırılmasından sonra kənddə yaşayan azərbaycanlılar tədricən kəndi tərk etmişlər. 1829-cu ildə kənddə Tür­kiyənin Ələşkirt və Diadin şəhərlərindən, 1877-ci ildə isə Muş və Sasun bölgələrindən gələn er­mənilər məskunlaşdırılmışlar (416, s. 100). Topo­nim "təkəli" türk etnonimi (erməni müəlliflərinin əsərlərində təkəli tayfasının adı həm də "təkərli" kimi qeyd edilir, 415, s. 16) əsasında (175, s. 16; 238, s. 185) əmələ gəlmişdir. Təkəli qızılbaş tay­falarından birinin adıdır (175, s. 16). F.Sümər təkəli tayfasının oğuzların dülqədirli elindən olduğunu göstərir (238, s. 184-185). Etnotoponimdir. Erm. SSR AS RH-nin 19 aprel 1950-ci il tarixli qərarı ilə kəndin adı dəyişdirilərək "Tsağ- kaşen" qoyulmuşdur. "Ermənistan Respublikası­nın inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Araqat­sotn vilayətinin inzibati ərazisinə daxil edilmişdir (416, s. 100).

Coğrafi koordinatları: 40°30' şm. e., 44°20' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/