Toxluca - İrəvan quberniyasının Novo-Bəyazid qəzasında, keçmiş Krasnoselsk rayonunda, indi Geğarkunik vilayətində kənd. Vilayət mərkə­zi Qavar (Kəvər) şəhərindən 61 km şimal-şərqdə, Göyçə gölünün sahilində, dörd tərəfi dağlarla əhatə olunmuş bir ərazidə, dəniz səviyyəsin­dən 1980 m hündürlükdə yerləşir. 1728-ci İl ta­rixli "İrəvan əyalətinin icmal dəftəri"ndə (143, s. 115), Qafqazın 5 verstlik xəritəsində (348, s. 246) adı qeyd edilmişdir. Kənddə XV-XIX əsrlərə aid tarixi abidələrin xarabalıqları indi də qal­maqdadır. Kəndin ərazisində oğuzlara aid qə­birlər var. Kənddə 1831-ci ildə 296, 1873-cü ildə 466, 1886-cı ildə 681, 1897-ci ildə 935, 1914- cü ildə 1373, 1916-cı ildə 1330, 1919-cu ildə 1199 nəfər azərbaycanlı yaşamışdır (415, s. 30- 31, 114—115). 1919-cu ilin mart ayının ortala­rında azərbaycanlılar erməni silahlı birləşmələri tərəfindən kənddən vəhşicəsinə qovulmuşlar. İndiki Ermənistan ərazisində sovet hakimiyyəti qurulandan sonra kəndin keçmiş sakinləri doğ­ma evlərinə dönə bilmişlər. Kənddə 1922-ci İldə 1176, 1926-cı ildə 1403, 1931-ci ildə 1723 (415, s. 30-31, 114-115), 1939-cu ildə 1840, 1959-cu ildə 1528, 1970-ci ildə 2469, 1979-cu ildə 2664 (416, s. 70-71), 1987-ci ildə 2985 nəfər (85, s. 90) yalnız azərbaycanlı yaşamışdır. 1988-ci ilin no­yabr-dekabr aylarında kənd sakinləri bir daha ermənilərin təcavüzünə məruz qalmış və Ermə­nistan dövləti tərəfindən tarixi-etnik torpaqla­rından deportasiya olunmuşlar. Hazırda kənddə yalnız ermənilər yaşayır. Toponim Azərbaycan dilində "dağlıq yer" mənasını ifadə edən "dağ- lıca" sözünün fonetik forması əsasında əmələ gəlmişdir. Toponimin birinci komponenti olan "tox" sözü türk dillərində "dağ" mənasında iş­lənən "to", "toğ" sözlərinin fonetik formasıdır. Eyni zamanda qədim türk dilində "toğ (tuğ)" sözü "bənd", "sədd", "çəpər" mənalarında da iş­lənir (299, s. 570, 584) və "dağlıq ərazi" mənasını ifadə edir. Erm. SSR AS RH-nin 3 aprel 1991-ci il tarixli qərarı ilə kəndin adı dəyişdirilərək "Draxtik" qoyulmuşdur. "Ermənistan Respublikasının inzibati-ərazi bölgüsü haqqında" 7 noyabr 1995- ci il tarixli yeni Qanuna əsasən, Geğarkunik vi­layətinin inzibati ərazisinə daxil edilmişdir (416, s. 70-71).

Coğrafi koordinatları: 40°34' şm. e., 45°13' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/