Aşağı Türkmənli - İrəvan quberniyasının Eçmiədzin qəzasında, keçmiş Üçkilsə (Vağarşabad) rayonunda, Armavir vilayətində kənd. Vilayət mərkəzi Armavir (Sərdarabad) şəhərindən 35 km cənub-şərqdə, Böyük Qarasu çayının yanında, dəniz səviyyəsindən 835 m hündürlükdə yerləşir. Qafqazın 5 verstlik xəritəsində "Türkmənli" formasında qeyd edilmişdir (348, s. 248). Ermənilər kəndə 1915-1920-ci illərdə Türkiyənin Sürməli vilayətinin Baharlı kəndindən köçürülüb yerləşdirilmişdir (416, s. 93). Toponim Azərbaycan dilində fərqləndirici əlamət bildirən "aşağı" sözü ilə "-li" mənsubluq şəkilçisi qəbul etmiş qızılbaşların "türkmən" etnonimindən (175, s. 18) əmələ gəlib, "Türkmən tayfasının yaşadığı kənd" anlamını verir. Erm. SSR AS RH-nin 3 yanvar 1935-ci il tarixli qərarı ilə kəndin adı dəyişdirilərək "Lusagyuğ" qoyulmuşdur. "Ermənistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Armavir vilayətinin inzibati ərazisinə daxil edilmişdir (416, s. 93).
Coğrafi koordinatları: 40°05' şm. e., 44°15' ş. u.
Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/