Şahvarid - İrəvan quberniyasının Eçmiədzin qəzasında, keçmiş Qurduqulu (Hoktemberyan) rayonunda, indi Armavir vilayətində kənd. Vi­layət mərkəzi Armavir (Sərdarabad) şəhərindən 11 km cənub-qərbdə, Araz çayının sol sahilində, dəniz səviyyəsindən 900 m hündürlükdə yerləşir. Qafqazın 5 verstlik xəritəsində qeyd edilmişdir (348, s. 293). Kənddə 1831-ci ildə 59, 1873-cü ildə 72,1886-cı ildə 116,1897-ci ildə 153,1908-ci ildə 96, 1914-cü ildə 128, 1916-cı ildə 132 nəfər yalnız azərbaycanlı yaşamışdır (415, s. 64- 65, 138-139). 1918-ci ildə kənd erməni silah­lı birləşmələrinin təcavüzünə məruz qalmış və azərbaycanlılar qırğınlar nəticəsində deporta­siya olunmuşlar. İndiki Ermənistan ərazisində sovet hakimiyyəti qurulandan sonra kəndi tərk etmiş azərbaycanlılardan sağ qalanlar ata-baba yurdlarına qayıtmışlar. Kənddə 1922-ci ildə 108, 1926-cı ildə 106, 1931-ci ildə 96 nəfər yalnız azərbaycanlı yaşamışdır (415, s. 64-65, 138- 139). SSRİ Nazirlər Sovetinin "Kolxozçuların və digər azərbaycanlı əhalinin Ermənistan SSR-dən Azərbaycan SSR-in Kür-Araz ovalığına köçü­rülməsi haqqında" 23 dekabr 1947-ci il tarixli qərarına əsasən, kənd sakinləri olan azərbay­canlılar 1948-1949-cu illərdə zorla tarixi-etnik torpaqlarından Azərbaycana deportasiya olun­muşlar. Kəndə xaricdən köçürülüb gətirilən er­mənilər yerləşdirilmişdir. Hazırda kənddə yalnız ermənilər yaşayır. Toponim fars dilində "qaya, möhkəm, bərk" mənasında işlənən "şah" sözü ilə (339, s. 625) Azərbaycan dilində "möhkəm­ləndirilmiş kənd, qala" mənasında işlənən "var" sözünə (339, s.113) "-ud" şəkilçisinin qoşulması nəticəsində əmələ gəlmişdir. Erm. SSR AS RH- nin 3 iyul 1968-ci il tarixli qərarı ilə kəndin adı dəyişdirilərək "Huşakert" qoyulmuşdur. "Ermə­nistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanu­na əsasən, Armavir vilayətinin inzibati ərazisinə daxil edilmişdir (416, s. 125).

Coğrafi koordinatları: 40°04' şm. e., 43°55' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/