Aralıq - İrəvan quberniyasının Aleksandro- pol qəzasında, keçmiş Düzkənd (Axuryan) rayo­nunda, indi Şirak vilayətində kənd. Vilayət mərkəzi Gümrü şəhərindən 13 km cənub - qərbdə, dəniz səviyyəsindən 1480 m hündür­lükdə yerləşir. 1937-ci ilə kimi keçmiş Leninakan rayonunun tabeliyində olmuşdur. Kənddə azər­baycanlıların etnoqrafik qruplarından olan    qarapapaqlar yaşamışdır (415, s. 40). Burada 1886-cı ildə 300, 1897-ci ildə 397, 1908-ci ildə 441, 1914-cü ildə 510 nəfər qarapapaqlar (azərbay­canlılar) yaşamışdır (415, s. 40-41, 122-123). 1918-ci ildə azərbaycanlılar erməni soyqırımına məruz qalaraq deportasiya olunmuş, 1921-ci ildə Türkiyənin Muş vilayətinin Ardon kəndin­dən ermənilər köçürülərək burada yerləşdiril­mişdir (416, s. 74). Hazırda kənddə ermənilər yaşayır. Toponim "hüdud, sərhəd, iki torpağı, mülkü və s.    birbirindən ayıran xətt, mərz" (9, s. 114), "iki yaşayış məntəqəsi arasındakı mə­safə", "ortalıq" (339, s. 52) mənasında işlənən "ara" sözünə Azərbaycan dilində məkan anlayışı bildirən "-lıq" şəkilçisinin artırılmasından əmələ gəlib "aralıqda, iki yaşayış kəndinin arasında, iki kəndin sərhədində yerləşən kənd" mənasını bil­dirir. Erm. SSR AS RH-nin 7 dekabr 1945-ci il ta­rixli qərarı ilə adı dəyişdirilərək "Yerezqavors" qoyulmuşdur. "Ermənistan Respublikasının inzi­bati-ərazi bölgüsü haqqında" 7 noyabr 1995-ci il tarixli yeni Qanuna əsasən, Armavir vilayətinin inzibati ərazisinə daxil edilmişdir (416, s. 74).

Coğrafi koordinatları: 40°42' şm. e., 43°46' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/