Kərimarxı - İrəvan quberniyasının Eçmiəd­zin qəzasında, keçmiş Qurduqulu (Hoktemberyan) rayonunda, indi Armavir vilayətində kənd. Vilayət mərkəzi Armavir (Sərdarabad) şəhərin­dən 7 km cənubda, dəniz səviyyəsindən 855 m hündürlükdə yerləşir. Kənddə 1831-ci ildə 311, 1873-cü ildə 1215, 1886-cı ildə 1357, 1897-ci ildə 1474, 1904-cü ildə 1700, 1914-cü ildə 1802 (415, s. 64-65, 140-141), 1919-cu ildə 1840 nəfər (309, s. 221) yalnız azərbaycanlı yaşamış­dır. 1919-cu ilin sonunda azərbaycanlılar erməni silahlı birləşmələrinin təcavüzünə məruz qalmış və deportasiya olunmuşlar (309, s. 221). Kəndə xaricdən köçürülüb gətirilən ermənilər yerləş­dirilmişdir. İndiki Ermənistan ərazisində sovet hakimiyyəti qurulandan sonra kəndi tərk etmiş azərbaycanlılardan sağ qalanlar tarixi-etnik tor­paqlarına qayıda bilmişlər. Kənddə ermənilər­lə yanaşı, 1922-ci ildə 239, 1926-cı ildə 303, 1931-ci ildə 268 nəfər azərbaycanlı yaşamışdır (415, s. 64-65, 140-141). SSRİ Nazirlər Sovetinin "Kolxozçuların və digər azərbaycanlı əhalinin Er­mənistan SSR-dən Azərbaycan SSR-in Kür-Araz ovalığına köçürülməsi haqqında" 23 dekabr 1947-ci il tarixli qərarına əsasən, kəndin azər­baycanlı əhalisi zorla Azərbaycana deportasiya edilmişdir. Hazırda kənddə ermənilər yaşayır. Toponim "Kərim" şəxs adı ilə "arx" sözünün bir­ləşməsi əsasında əmələ gəlmişdir. Erm. SSR AS RH-nin 3 aprel 1991 -ci il tarixli qərarı ilə kəndin adı dəyişdirilərək "Arpunk", 7 aprel 2006-cı il ta­rixli qərarı ilə bu ad da dəyişdirilərək "Alaşkert" qoyulmuşdur. Ermənistan Respublikası inzibati- ərazi bölgüsü haqqında 7 noyabr 1995-ci il ta­rixli yeni qanuna əsasən, Armavir vilayətinin inzi­bati ərazisinə daxil edilmişdir (416, s. 9).

Coğrafi koordinatları: 40°06' şm. e., 44°03' ş. u.  

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/