Şəki - Yelizavetpol (Gəncə) quberniyasının Zəngəzur qəzasında, keçmiş Sisian rayonun­da, indi Sünik vilayətində kənd. Vilayət mərkəzi Qapan şəhərindən 103 km şimal-qərbdə, də­niz səviyyəsindən 1710 m hündürlükdə yerləşir. Məşhur Şəki şəlaləsi kəndin ərazisindədir. 1921-ci il avqustun 31-də sovet Ermənistanında Zən­gəzur qəzasının yaradılmasından sonra yaşayış məntəqəsi Ermənistanın inzibati ərazisinə daxil edilmişdir. 1728-ci il tarixində tərtib edilmiş "İrə­van əyalətinin icmal dəftərində Sisian nahiyə­sinə daxil olan kəndlər siyahısında "Şəki kəndi" adı ilə qeyd edilmiş və illik gəlirinin 5959 ağça təşkil etdiyi göstərilmişdir (143, s. 150). Kənd­də 1831-ci ildə 48, 1873-cü ildə 445, 1886-cı ildə 657, 1897-ci ildə 1191, 1908-ci ildə 1605, 1914-cü İldə 1584 nəfər azərbaycanlı yaşamış­dır (415, s. 76-77, 146-147). 1918-ci ilin avqust ayında azərbaycanlılar erməni silahlı birləşmələri tərəfindən soyqırımına məruz qalaraq depor­tasiya edilmişlər (309, s. 205). Xaricdən köçürü­lüb gətirilən ermənilər kənddə yerləşdirilmişlər. İndiki Ermənistan ərazisində sovet hakimiyyəti qurulandan sonra sağ qalanlar öz kəndlərinə qayıtmışlar. Kənddə 1922-ci ildə 282 nəfər azər­baycanlı, 12 erməni, 1926-cı ildə 385 nəfər azər­baycanlı, 407 nəfər erməni, 1931-ci ildə 557 nəfər azərbaycanlı, 510 nəfər erməni yaşamışdır (415, s. 76-77, 146-147). 1988-ci ilin əvvəllə­rində Şəkidə 1930 nəfər (190 ailə) azərbaycan­lı yaşamışdır (244 a, s. 310). 1988-ci ilin noyabr ayında azərbaycanlılar Ermənistan dövləti tərə­findən tamamilə deportasiya olunmuşdur. Ha­zırda kənddə yalnız ermənilər yaşayır. Toponim kimmerlərə mənsub olan "sak" etnonimi (402, s. 66-80; 23, s. 102-104) əsasında əmələ gəlmiş­dir. Şəki "sak/saka" etnoniminin fonetik varian­tıdır. "Ermənistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Sünik vilayətinin inzibati ərazisinə daxil edilmişdir (416, s. 157).

Coğrafi koordinatları: 39°33' şm. e., 45°59' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/