Doqquz - İrəvan quberniyasının İrəvan qə­zasında, keçmiş Qəmərli (Artaşat) rayonunda, indi Ararat vilayətində kənd. Vilayət mərkəzi Ar­taşat (Qəmərli) şəhərindən 49 km şimal-qərb­də, Gərni çayının yanında, dəniz səviyyəsindən 2070 m hündürlükdə yerləşir. "İrəvan əyalətinin icmal dəftəri"ndə "Doqquz" (143, s. 100), Qafqa­zın 5 verstlik xəritəsində isə "Dokkuz" forma­sında (348, s. 88) qeyd edilmişdir. Kənddə ta­rixən yalnız azərbaycanlılar yaşamışdır. 1828-1829-cu illərdə buraya İranın Xoy və Səlmas vilayətlərindən ermənilər köçürülmüşdür (386, s. 551-554). 1828-ci ilə qədər Doqquz kəndində cəmi 8 yerli erməni (коренных армян) olmuş­dur (386, s. 551-553). Kənddə ermənilərlə ya­naşı, 1831-ci ildə 127, 1873-cü ildə 159, 1886-cı ildə 178, 1897-ci ildə 161 nəfər azərbaycanlı ya­şamışdır (415, s. 48-49, 128-129). 1918-ci ilin fevral ayında azərbaycanlılar erməni silahlı bir­ləşmələrinin törətdikləri soyqırımına məruz qa­laraq deportasiya olunmuşdur (309, s. 216). Sağ qalan kənd sakinləri indiki Ermənistan ərazi­sində sovet hakimiyyəti qurulandan sonra öz yurdlarına qayıda bilmişdir. Burada 1922-ci ildə 75, 1926-cı ildə 78, 1931-ci ildə 97 nəfər azər­baycanlı yaşamışdır (415, s. 48-49, 128-129). SSRİ Nazirlər Sovetinin Ermənistan ərazisindən azərbaycanlı əhalinin Azərbaycanın Kür-Araz ovalığına köçürülməsi haqqında 23 dekabr 1947-ci il tarixli qərarına əsasən, azərbaycanlılar 1948-1950-ci illərdə tarixi-etnik torpaqlarından Azərbaycana köçürülmüşdür. Hazırda orada ermənilər yaşayır. Toponim oğuzların dülqədirli tayfasından olan "doqquz" etnonimi (238, s. 301) əsasında əmələ gəlmişdir. Erm. SSR AS RH-nin 20 avqust 1945-ci il tarixli qərarı ilə kəndin adı dəyişdirilərək "Kanaçut" qoyulmuşdur. "Ermənistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Ararat vilayətinin inzibati ərazisinə daxil edilmişdir (416, s. 107).

Coğrafi koordinatları: 40°00' şm. e., 44°32' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/