Bitticə - İrəvan quberniyasının İrəvan qəza­sında, keçmiş Qəmərli (Artaşat) rayonunda, indi Ararat vilayətində kənd. Vilayət mərkəzi Artaşat (Qəmərli) şəhərindən 20 km şimal-şərqdə, dəniz səviyyəsindən 1100 m hündürlükdə yerləşir. Qaf­qazın 5 verstlik xəritəsində (348, s. 39) qeyd edilmişdir. Kənddə 1897-ci ildə 246, 1914-cü ildə 198, 1916-cı ildə 195 nəfər yalnız azərbay­canlı yaşamışdır (415, s. 46-47, 126-127). 1918-ci ildə azərbaycanlılar erməni silahlı birləşmələri­nin təcavüzünə məruz qalaraq deportasiya olunmuş və kəndə xaricdən köçürülüb gətirilən ermənilər yerləşdirilmişdir. İndiki Ermənistan ərazisində sovet hakimiyyəti qurulduqdan sonra azərbaycanlılar öz kəndlərinə qayıda bilmişdir. Burada ermənilərlə yanaşı, 1922-ci ildə 73, 1926-cı ildə 60, 1931-ci ildə 85 nəfər azərbay­canlı yaşamışdır (415, s. 45, 127). SSRİ Nazirlər Sovetinin Ermənistan ərazisindən azərbaycanlı əhalinin Azərbaycanın Kür-Araz ovalığına köçü­rülməsi haqqında 23 dekabr 1947-ci il tarixli qə­rarına əsasən, azərbaycanlılar 1948-1950-ci il­lərdə tarixi-etnik torpaqlarından çıxarılaraq Azər­baycana köçürülmüşdür. Hazırda orada yalnız ermənilər yaşayır. Toponim türk mənşəli "bitli" etnoniminə (271, s. 33) "-cə" şəkilçisinin artırıl­ması yolu ilə düzəlmişdir. Erm. SSR AS RH-nin 20 avqust 1954-cü il tarixli qərarı ilə kəndin adı dəyişdirilərək "Bartsraşen" qoyulmuşdur. "Ermə­nistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qa­nuna əsasən, Ararat vilayətinin inzibati ərazisinə daxil edilmişdir (416, s. 44).

Coğrafi koordinatları: 40°05' şm. e., 44°34' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/