Kiçik Zeyvə - İrəvan quberniyasının Eçmiəd­zin qəzasında, keçmiş Eçmiədzin (Vağarşapad) ra­yonunda, indi Armavir vilayətində kənd. Eçmiəd­zin yaşayış məntəqəsindən 5 km cənub-şərq­də yerləşir. Kəndin digər adı "Türk Zeyvəsi" (415, s. 82), "Tatar Zeyvəsi" (Сборник сведений о Кав­казе, т. V, Тифлис, 1892, № 393) olmuşdur. Qafqazın 5 verstlik xəritəsində qeyd edilmişdir (348, s. 97). Kənddə 1831-ci ildə 234,1873-cü ildə 492, 1886-cı ildə 516, 1897-ci ildə 580, 1904-cü ildə 550, 1914-cü ildə 598, 1916-cı ildə 491 nəfər yalnız azərbaycanlı yaşamışdır (415, s. 82-83, 150-151). 1920-ci ildə azərbaycanlılar erməni si­lahlı birləşmələrinin təcavüzünə məruz qalaraq tarixi-etnik torpaqlarından deportasiya olun­muşlar. Toponim Azərbaycan dilində fərqləndi­rici əlamət bildirən "kiçik" sözü ilə ərəb dilində "guşə, künc, bucaq" mənasında işlənən "zaviyə" (104, s. 207) sözünün birləşməsindən əmələ gəlmişdir. Relyef əsasında yaranan mürək­kəb quruluşlu toponimdir. Erm. SSR AS RH-nin 25 yanvar 1978-ci il tarixli qərarı ilə kəndin adı dəyişdirilərək "Arataşen" qoyulmuşdur. "Ermə­nistan Respublikasının inzibati-ərazi bölgüsü haqqında" 7 noyabr 1995-ci il tarixli yeni Qanu­na əsasən, Armavir vilayətinin inzibati ərazisinə daxil edilmişdir (416, s. 24).

Coğrafi koordinatları: 40°07' şm. e., 44°11' ş. u.

Ədəbiyyat:
1. İ.Bayramov, N.Mustafa Həqiqətin Onomastikasi, İndiki Ermənistan Respublikası ərazisində tarixi-coğrafi adların dəyişdirilməsi və saxtalaşdırılması 2021
2. Əziz Ələkbərli Qərbi Azərbaycanlıların 1988-ci il soyqırımı 2010
3. Əziz Ələkbərli Qərbi Azərbaycan abidələri 2007
4. Əziz Ələkbərli Qərbi Azərbaycanda soyqırımına məruz qalmış Toponimlərimiz
5. https://erevangala500.com/