Saçlı - İrəvan quberniyasının Eçmiədzin qə­zasında, keçmiş Abaran rayonunda, indi Araqat­sotn vilayətində kənd. Vilayət mərkəzi Aştarak (Əştərək) şəhərindən 61 km şimal-qərbdə, Aba­ran çayının sol qolu üstündə, dəniz səviyyəsin­dən 1950 m hündürlükdə yerləşir. "İrəvan əyalə­tinin icmal dəftəri"ndə (143, s. 113), Qafqazın 5 verstlik xəritəsində (348, s. 22) adı qeyd edil­mişdir. Kəndin digər adı "Sacılı" olmuşdur (415, s. 4). Kənddə əvvəlcə azərbaycanlılar yaşamış, Ədirnə müqaviləsinə (1829) əsasən, ermənilərin Türkiyədən köçürülüb məskunlaşdırılmasından sonra əhali tədricən kəndi tərk etmişdir. Topo­nim "sacilər" (saclı, saçlı) tayfa adı əsasında for­malaşmışdır (63, s. 196). Erm. SSR AS RH-nin 15 iyul 1946-cı il tarixli qərarı ilə kəndin adı dəyiş­dirilərək "Noraşen", Ermənistan parlamentinin 4 iyul 2006-cı il tarixli qərarı ilə yenidən dəyişdi­rilərək "Şoğakn" qoyulmuşdur. "Ermənistan Res­publikasının inzibati-ərazi bölgüsü haqqında" 7 noyabr 1995-ci il tarixli yeni Qanuna əsasən, Araqatsotn vilayətinin inzibati ərazisinə daxil edilmişdir (416, s.160).

Coğrafi koordinatları: 40°28' şm. e., 44°28' ş. u.