Hazırladığımız “Bir damla günəş, bir nəfəs külək və bir az da sevgi” tamaşasının eyniadlı pyesi İsmayıl İman tərəfindən yazılıb. Əsas mövzu gender bərabərliyi və selektiv abortlara həsr olunub.

Bu sözləri AZƏRTAC-a açıqlamasında tamaşanın quruluşçu rejissoru Tərlan Rəsulov bildirib.

Səhnə əsərinin yeniyetmə və gənc qızın, həmçinin gənc qadının monoloqları üzərində qurulduğunu bildirən rejissor, tamaşanın ümumi məzmunu barədə deyib: “Tamaşa boyu eyni adamın üç müxtəlif yaş qrupu dövründə - 10 və 20-25 yaşlarında, eləcə də 40-45 yaşında olan dövrü təqdim olunur. Detalları uyğunlaşdıraraq izləyici bu insanların müxtəlif yaşlarda eyni qəhrəman olduğunu təxmin edir. Sonda da məlum olur ki, bu insan dünyaya gəlməyib, çünki valideynləri onu qız övladı olduğuna görə abort ediblər”.