Avtomobil satışı və texniki xidməti sahəsində 20 illik təcrübəyə malik peşəkarların təsis etdiyi ONVOLT MMC Bakıda Çinin premium elektromobil brendləri arasında dinamik inkişafı ilə seçilən “SKYWELL” brendinin yeni “SKYWELL ET5” modelini təqdim edib.

Report xəbər verir ki, Azərbaycanda ilk və eksklüziv rəsmi elektromobil idxalçısı olan ONVOLT şirkəti eyni zamanda ilk dəfə olaraq yalnız elektrik avtomobili satışı həyata keçirən satış-sərgi salonunu da müştərilərin istifadəsinə verib.

Tədbirdə SKYWELL konserninin regional satış direktoru Çen Quanrong, Çinin Nanjing İqtisadi Zonasının nümayəndəsi Çen Kay və Çinin Azərbaycandakı səfirinin müşaviri Ma Çi iştirak ediblər.

Təqdim edilən avtomobil və satış-sərgi salonunu qonaqlar və media nümayəndələri böyük maraqla qarşılayıb.

Açılış mərasimindən əvvəl şirkətin direktor müavini Nəzmi İsmayılov media nümayəndələrinə və qonaqlara satış salonunun özəllikləri və SKYWELL ET5 avtomobili haqqında əhatəli məlumat verib.

Daha sonra jurnalistlərin suallarını cavablandıran şirkət rəsmiləri qeyd ediblər ki, Azərbaycanda SKYWELL avtomobillərinə texniki xidmət “Motor House” texniki xidmət mərkəzində həyata keçirilir.

“Motor House” TXM öz texniki imkanları və müasir texnoloji təchizatına, eyni zamanda sahəsinə görə Azərbaycanın ən böyük texniki xidmət mərkəzidir. Burada elektrik avtomobillərinə texniki xidmət göstərmək üçün xüsusi təlim keçmiş peşəkar ustalar və müasir avadanlıqlarla təchiz olunmuş xüsusi xidmət sahəsi mövcuddur.

ONVOLT SKYWELL avtomobillərinə hər növ texniki xidmət göstərilməsi üçün böyük ehtiyat hissələri anbarı təşkil edib. Bütün bunlar SKYWELL avtomobillərinin sahiblərinə yüksək səviyyəli xidmət göstərilməsinə zəmanət verir.

Təqdim edilən SKYWELL ET5 avtomobili, müasir lüks avtomobillərə məxsus bütün konfiqurasiyalar ilə tam təchiz olunub. Azərbaycana ONVOLT-un gətirdiyi SKYWELL ET5 avtomobilləri Avropa ölkələrinə ixrac üçün nəzərdə tutulmuş variantdadır və Avropa standartlarına tam cavab verir.

Ölçüləri 4,698×1,908×1,696 mm olan, SUV seqmentinə aid SKYWELL ET5 avtomobili 204 at gücünə malikdir. Bu avtomobil tam dolu batareya ilə 520 km məsafəni qət edir.

Avtomobilin batareyası 30 dəqiqə ərzində 70% enerji toplaya bilir. "Azərbaycan Avtomobil Dilerləri Assosiasiyası" (AADA) İctimai Birliyinin bu ilin may ayında Bakı-Mingəçevir marşrutu üzrə təşkil etdiyi “yaşıl ölkə” eko-avto yürüşü zamanı, SKYWELL ET5 öz texniki göstəricilərini tam təsdiq edib.

Təsadüfi deyil ki, SKYWELL ET5 avtomobili 2022-ci ildə Türkiyədə “ilin elektrik avtomobili” nominasiyasının qalibi seçilib.

Xatırladaq ki, Türkiyədə, İsraildə, Avropada və Amerikada satışa çıxarıldığı ilk gündən SKYWELL ET5 avtomobili alıcıların xüsusi rəğbətini qazanıb.

Avtomobillərə 5 il və ya 150.000 km, batareyasına isə 8 il zəmanət verilir. Avtomobil müştərilərə 5 ilə qədər sərfəli kredit şərtləri ilə təklif olunur.

SKYWELL ET5 avtomobillərinin satış və sərgi salonu Ceyhun Hacıbəyli küçəsi, 194 ünvanında yerləşir.