Cəfər Cabbarlı adına Respublika Gənclər Kitabxanasında Azərbaycan təsviri sənətinin görkəmli nümayəndəsi, Xalq rəssamı, Dövlət mükafatları laureatı Tahir Salahovun anadan olmasının 95 illiyi münasibətilə virtual kitab sərgisi hazırlanıb.

AZƏRTAC xəbər verir ki, virtual sərgidə Azərbaycanda özünəməxsus milli rəngkarlıq məktəbinin formalaşmasında müstəsna xidmətləri olan rəssamın həyat və yaradıcılığı, yaratdığı bənzərsiz əsərləri haqqında məlumat verilir, müəllifi olduğu tablolar sərgilənir.

Kitabxana əməkdaşları tərəfindən hazırlanan materialda Tahir Salahovun ölkəmizdə və beynəlxalq aləmdə layiq görüldüyü mükafatlardan, haqqında qələmə alınan kitablardan bəhs edilib. Virtual kitab sərgisində “Tahir Salahov. Həyat və yaradıcılığı”, “Təsviri incəsənətin ifadə vasitələri”, “Böyük yaşantının naxışları” kimi kitabların biblioqrafik təsviri, “Rənglər dünyasının hökmdarı: Tahir Salahov”, “Görkəmli rəssam Tahir Salahovla “Dialoq” - Yeni kitab”, “Zenitdəki istedad Tahir Salahov” kimi dövrü mətbuat məqalələrinin nümunələri təqdim edilib.