Bakıdakı Rus evində Sankt-Peterburqun xarici əlaqələr Komitəsinin təqdim etdiyi və Leninqradın blokadasına son qoyulmasının 80 illiyinə həsr olunmuş “Ladoqa” və “Klooqa – ölüm düşərgəsi” sənədli filmlərinin tamaşası olub.

Bu barədə AZƏRTAC-a Rusiya İnformasiya-Mədəniyyət Mərkəzinin (RİMM) mətbuat xidmətindən bildirilib.

“Ladoqa” filmi “Həyat yolu” (qeyd-İkinci Dünya müharibəsində Leninqradın blokadası şəraitində Ladoqa gölündən keçən yeganə nəqliyyat marşrutu) və 1942-ci il oktyabrın 22-də Suxo adaş yaxınlığında baş verən əfsanəvi döyüşdən bəhs edir.

“Klooqa – ölüm düşərgəsi” sənədli filmi Tallinin 36 kilometrliyində yerləşən eyniadlı qəsəbədəki toplama düşərgəsində faşistlərin vəhşilikləri haqqındadır. Bu ekran əsərinin kadrları Nürnberq prosesində ittiham sənədləri qismində istifadə olunub.

Sovet qoşunları 1944-cü il yanvarın 27-də Leninqradın blokadasını yara biliblər. Blokadaya son qoyulması sovet xalqının İkinci Dünya müharibəsində igidliyinin və dözümlüyünün rəmzinə çevrilib. Şəhər sakinlərinin 872 gün ərzində ən sərt şəraitdə göstərdiyi rəşadət də mətanət və qəhrəmanlıq örnəyi olub.

Sənədli filmlərin nümayişi və müzakirəsində gənclər təşkilatlarının nümayəndələri iştirak ediblər.