Bizimlə Şuşada səfərdə olan dünya şöhrətli müğənni, amerikalı vokalçı Della Milesin Qarabağı, muğamı çox sevdiyini bilirik. O, bir ABŞ vətəndaşı olaraq Qarabağın Azərbaycanın əzəli torpağı olduğunu dünya mətbuatında səsləndirir və bu yolla dünya ictimaiyyəti Ermənistanın işğalçı, terrorçu ölkə olduğunu görür. Biz onunla birlikdə Azərbaycanın 44 günlük Vətən müharibəsindəki Zəfərinə həsr olunmuş "Qarabağ Azərbaycandır!" adlı klipi əvvəlcə Türkiyədə, bu günlərdə isə Azərbaycanda ictimaiyyətə təqdim etdik. Məqsədimiz Azərbaycan həqiqətlərini musiqinin dili ilə dünyaya çatdırmaqdır.

AZƏRTAC xəbər verir ki, bu fikirləri xanəndə, Əməkdar artist, tanınmış muğam ifaçısı Qoçaq Əsgərov Şuşaya səfəri çərçivəsində deyib.

Xanəndə diqqətə çatdırıb ki, Della Milesin digər layihə çərçivəsində ifa edəcəyi Heydər Əliyev Fondunun vitse-prezidenti Leyla Əliyevanın Şuşaya həsr olunmuş “Xarıbülbül” şeirinə bəstələnən eyniadlı musiqi əsəri üzərində iş gedir: “Mahnı hələ ki, hazırlıq mərhələsindədir. Ümid edirəm ki, bu layihəmiz də uğurlu olacaq. “Xarıbülbül” musiqi əsərinin müəllifi Azərbaycan Bəstəkarlar İttifaqının üzvü, Beynəlxalq müsabiqələr laureatı bəstəkar Tural Məmmədlidir”.

Qoçaq Əsgərov Füzuli rayonundan olduğunu diqqətə çatdıraraq, ermənilərin işğalı nəticəsində 1 milyondan artıq azərbaycanlı kimi onun da uzun illər ata-baba yurduna həsrət qalmasının yanğısından danışıb. Xanəndə əminliklə bildirib ki, dövlətimizin gücü və qüdrəti sayəsində işğaldan azad edilmiş ərazilərdə həyat tezliklə öz əvvəlki axarına qayıdacaq və sakinlər doğma evlərinə dönəcəklər.