XƏBƏRLƏR

Hacıqabul rayonunda yerləşən “Pir Hüseyn Xanəgahı” Tarix-Memarlıq Qoruğunda Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti və Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin təşkilatçılığı ilə 8 Noyabr – Zəfər Gününə həsr olunmuş ağacəkmə aksiyası təşkil olunub.

Dövlət Xidmətindən AZƏRTAC-a bildirilib ki, aksiyada Dövlət Xidmətinin rəisi Azad Cəfərli, Mədəniyyət üzrə Elmi-Metodiki və İxtisasartırma Mərkəzinin direktoru Səadət Xələfbəyli və sözügedən qurumların əməkdaşları iştirak ediblər.

Tədbir iştirakçıları qoruğun mühafizə zonasında müxtəlif növ ağaclar əkiblər.

Aksiya çərçivəsində ölkəmizin azadlığı və müstəqilliyi uğrunda şəhid olan Vətən övladlarının xatirəsi anılıb. Həmçinin Vətən müharibəsində qazanılan Qələbənin əhəmiyyəti bir daha vurğulanıb. Eləcə də işğaldan azad olunmuş ərazilərdə yerləşən tarixi abidələrin monitorinqi, inventarlaşdırılması və bərpası istiqamətində atılan addımlardan söz açılıb.

Dövlət Xidmətinin əməkdaşları olan Birinci və İkinci Qarabağ müharibələri iştirakçıları da ürək sözlərini ifadə ediblər.

Sonda tədbir iştirakçıları “Pir Hüseyn Xanəgahı” Tarix-Memarlıq Qoruğu ilə tanış olublar.

8 Noyabr - Zəfər Günü münasibətilə M.F.Axundzadə adına Azərbaycan Milli Kitabxanasında “Zəfər Günü şanlı tariximizdir!” adlı elektron məlumat bazası hazırlanıb.

Kitabxanadan AZƏRTAC-a bildirilib ki, elektron məlumat bazası “Rəsmi sənədlər”, “Zəfər paradında Prezident İlham Əliyevin nitqi”, “Zəfərlərimiz”, “II Qarabağ müharibəsi şəhidləri”, “Nəşrlər”, “Xatirəsinin əbədiləşdirilməsi”, “Müharibə iştirakçılarına verilən orden və medallar”, “Fotoqalereya” və “Videoqalereya” bölmələrindən ibarətdir.

44 gün davam edən haqq mübarizəsi sayəsində bütün dünya gördü ki, Azərbaycan bir yumruq kimidir. Azərbaycan xalqının və dövlətinin qüdrətinin rəmzinə çevrilmiş bu möhtəşəm Zəfərin tarixi əhəmiyyəti bir əsrin hüdudlarına sığmır. 44 günlük Vətən müharibəsi nəticəsində Azərbaycan torpaqlarının 30 illik işğalına son qoyulması, dövlətimizin ərazi bütövlüyünün təmin edilməsi ilə birlikdə, son iki yüz ilə yaxın dövrdə Azərbaycan xalqına çoxsaylı milli fəlakətlər gətirən erməni şovinizminə və ekspansionizminə sarsıdıcı zərbə endirilmiş və xalqımızın tarixi taleyi ilə bağlı olan son dərəcə mühüm bir məsələ həll edilmişdir.

Elektron məlumat bazası ilə tanış olmaq istəyənlər http://anl.az/el/emb/Zefer_gunu/index.html linkindən istifadə edə bilərlər.

Azərbaycanın maddi-mədəniyyət nümunələri, o cümlədən zərgərlik əşyaları hər zaman öz orijinallığı və zərifliyi ilə diqqəti cəlb edir. Belə ki, Azərbaycan Milli İncəsənət Muzeyi dünyaca məşhur “Cartier” zərgərlik evinin dəstəyi ilə muzeyin kolleksiyasında qorunan üç sənət əsərini bərpa edib.

Mədəniyyət Nazirliyindən AZƏRTAC-a bildirilib ki, dünyaca məşhur “Cartier” brendi Azərbaycanın ən nüfuzlu muzeylərindən olan – Milli İncəsənət Muzeyi ilə birgə əməkdaşlığa başlayıb, eksponatların bərpa layihəsini dəstəkləyərək xalq sənətkarları və zərgərlərin əsərlərini bərpa etməyə yardım edib. Restavrasiya işləri XX əsrə məxsus rəngli daşlarla bəzədilmiş, gümüş və metaldan hazırlanmış qadın kəməri, “buta” elementləri ilə bəzədilmiş tacşəkilli baş bəzəyi, gəlinin toy ərəfəsində bəzək əşyalarını saxladığı mücrü üzərində aparılıb. “Azərsuvenir” MMC-də “şəbəkəçi zərgər” vəzifəsində çalışan peşəkar mütəxəssis muzeyin dəvəti ilə predmetlərin bərpası üzərində işləyərək tarixi əşyaları üç ay ərzində bərpa edib.

“Cartier” şirkətinin Rusiya və MDB üzrə idarəedici direktoru Yanina Novitskaya bildirib ki, “Cartier” evi uzun və zəngin tarixi boyunca müxtəlif incəsənət formalarından, dünya mədəni irsindən ilham alıb və ilham mənbəyi olan bu dəyərli irsi gələcək nəsillər üçün saxlamağa çalışıb. İslam mədəniyyəti “Cartier”in estetik dəyərlərinə böyük təsir göstərib. O, Azərbaycan Milli İncəsənət Muzeyi ilə əməkdaşlıqdan qürur duyduğunu və bu layihənin Şərqin zərif tətbiqi sənətinə diqqət cəlb edəcəyini vurğulayıb.

XIX və XX əsrlərdə yaradılan bu eksponatlar xalq ustalarının, mahir zərgərlərin əl işləridir. Tədqiqatlar göstərir ki, Azərbaycanın milli geyim mədəniyyətində qadın zinət əşyaları xüsusi yerə malik olub. Gəlin toya zinət əşyalarında çıxır və onun üzərindəki bəzəklər ailəsinin cəmiyyətdəki statusunu vurğulayırdı. Zinət əşyaları arasında kəmər və baş bəzəyi xüsusi əhəmiyyət kəsb edirdi. Kəmər gənc qadının həyatının bir mərhələdən digərinə keçidini simvolizə edirdi. Adətlərə görə toy günü kəməri gəlinin belinə ya qardaşı, ya da atası taxırdı. Gəlinə cehiz kimi mücrü də verilməli idi. Gəlin ərinin ona verdiyi zinət əşyalarını orada saxlayırdı. Bu mücrülərdə təkcə XIX əsr zərgərləri tərəfindən hazırlanmış və gələcək nəsillərə ötürülən zinət əşyaları deyil, həm də uzun tarixə malik qiymətli xatirə əşyaları saxlanılırdı. Mücrü nə qədər dəbdəbəli görünüşə malik olardısa, onun içindəki zinət əşyaları da bir o qədər qiymətli olardı.

“Toy mərasimi Azərbaycan xalqının ölməz və unudulmaz adət-ənənələrindən biridir. Bu ənənələrdə xalqın gözəllik sevgisi özünü aşkar şəkildə ifadə edir. Bu əşyaların hər biri öz dövrünün estetikasını simvolizə edir, xalq adətlərinin gözəlliyindən xəbər verir. Bu zinət əşyaları həm ailələrin tarixini, həm də əbədiyaşar xalq yaradıcılığını özündə təcəssüm etdirir”, - deyə Azərbaycan Milli İncəsənət Muzeyinin direktoru, Azərbaycanın Əməkdar İncəsənət Xadimi, rəssam, professor Çingiz Fərzəliyev bildirib.

Bakı muzeyi üçün bu əlamətdar hadisə fərqli mədəniyyətlərin bədii üslubunun qəbul edilməsi yaradıcı interpretasiyasına can atan Paris Zərgərlik Evinin tarixinin 175 illik yubileyinin yeni sətri oldu. Bu yaxınlarda Parisin Dekorativ İncəsənət Muzeyində keçirilən “Cartier və İslam incəsənəti: Müasirlik axtarışında” sərgisi bunu bir daha sübut edir ki, şərq mədəniyyəti evin üslub və repertuarının inkişafına ciddi təsir göstərib. Parisdə keçirilən genişmiqyaslı ekspozisiyada Şərqin XX əsrin əvvəllərindən bu günə qədər fransız zərgərlik evinin üslubuna təsirini əks etdirən 500-dən çox eksponat təqdim olunub.

“Dekorativ-tətbiqi sənət əsərlərində: xalçalarda, tikmələrdə, bədii işləməyə malik metalda, zərgərlikdə xalqın dünyagörüşü, fəlsəfəsi özünü ən bariz şəkildə göstərir. İncəsənət əsərlərinin düzgün bərpası və konservasiyası muzeylərin ən mühüm vəzifələrindən biridir və “Cartier evi”nin buna köməklik göstərməsi çox yaxşı haldır. Təbii ki, bu eksponatların hər birinin yüksək bədii, elmi və tarixi əhəmiyyəti var”, - deyə Azərbaycan Respublikası Mədəniyyət Nazirliyinin Muzey, qalereya və sərgilər şöbəsinin müdiri Nərgiz Abdullayeva bildirib.

Azərbaycan Milli İncəsənət Muzeyinin “Cartier” evi ilə yaradıcı əməkdaşlığı diqqəti bir daha Şərq tətbiqi sənətinə cəlb edəcək. Ekspozisiyaya gələn ziyarətçilərin bərpa olunmuş əşyalardan mənəvi zövq alması və müxtəlif dövrlərin ustad sənətkarları ilə tanış olması üçün gözəl fürsətdir, çünki layihənin əsas məqsədi sənətkarlıq və mədəni irsin gələcək nəsillər üçün qorunub saxlanılmasıdır.

Qeyd edək ki, “Cartier” evi və Azərbaycan Mədəniyyət Nazirliyinin dəstəyi ilə 2019-cu ildə Abdulla Şaiq adına Azərbaycan Dövlət Kukla Teatrında "Yeddi nar çubuğu" xalq nağılının motivlərinə əsaslanan tamaşa səhnələşdirilib. 2021-ci ildə Azərbaycan Xalça Muzeyinin iştirakı ilə Dövlət Ermitajında “Görünməyən incəsənət. İmkanların sərhədlərini genişləndirərək” adlı inklüziv sərgi təşkil olunub və sərgi inklüziv muzey işi sahəsində inqilabi çevrilişə səbəb olub. Həmçinin, 2021-ci ildə Bakının möhtəşəm tarixi və memarlıq abidələri haqqında onlayn bələdçi sistemi yaradılıb.

Bakı Şəhər Mədəniyyət Baş İdarəsi Nərimanov rayon Mərkəzləşdirilmiş Kitabxana Sisteminin (MKS) Mərkəzi Kitabxanasında dünyaşöhrətli azərbaycanlı alim, qeyri-səlis məntiq nəzəriyyəsinin banisi, Kaliforniya Berkli Universitetinin professoru Lütfi Zadə haqqında videoçarx hazırlanıb.

AZƏRTAC xəbər verir ki, videoçarxda görkəmli alimin ömür yolu və elmi irsi ardıcıllıqla işıqlandırılıb.

Lütfi Zadə fundamental nəzəriyyələri ilə elm tarixində ciddi dəyişikliklərə yol açmış görkəmli şəxsiyyətlərdəndir. Alimin ardıcıl tədqiqatlarının nəticəsi olaraq irəli sürdüyü qeyri-səlis məntiq nəzəriyyəsi müxtəlif elm sahələrinin inkişafında dərin iz qoyub və yeni yanaşma üsulları meydana gətirib. Bu nəzəriyyə üstün intellektual texnologiyalara güclü təsir göstərib, müasir idarəetmə və informasiya-kommunikasiya sistemlərinin əsaslarının formalaşdırılmasında mühüm rol oynayıb.

Lütfi Zadə dünya miqyasında əsərlərinə ən çox istinad olunan alimlərdəndir. Onun yaratdığı elmi məktəb və laboratoriyalar bir sıra ölkələrdə yarım əsrdən artıqdır ki, uğurla fəaliyyət göstərməkdədir. Azərbaycanlı olduğunu fəxrlə bildirən və ürəyi daim doğma Vətəni ilə bir döyünən Lütfi Zadə elm və texnologiyaların inkişafında, eləcə də mədəniyyətlərarası dialoqun qurulmasında misilsiz xidmətlərinə görə Azərbaycan Respublikasının ali mükafatlarından olan “Dostluq” ordeninə layiq görülüb.

Lütfi Zadə 2017-ci il sentyabr 6-da ABŞ-ın Kaliforniya ştatında 96 yaşında dünyasını dəyişib. Alim sağlığında Bakıda dəfn olunmasını vəsiyyət edib. Onun cənazəsi sentyabrın 29-da Bakıya gətirilərək I Fəxri xiyabanda torpağa tapşırılıb.

Nazirlər Kabineti “Azərbaycan Hava Yolları” QSC-nin Nizamnaməsinin və strukturunun təsdiq edilməsi haqqında” 30 aprel 2008-ci il tarixli qərarında dəyişiklik edib.

Report xəbər verir ki, bununla bağlı qərarı Baş Nazir Əli Əsədov imzalayıb.

Qərara əsasən, AZAL-ın İdarə Heyətinin (İH) tərkibi 7 nəfərdən — Cəmiyyətin prezidenti, iki birinci vitse-prezidenti və dörd vitse-prezidentlərindən ibarətdir.

İndiyə qədər isə İH-nin tərkibi 7 nəfərdən — Cəmiyyətin prezidenti, birinci vitse-prezidenti və digər vitse-prezidentlərindən ibarət olub.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tarix-mədəniyyət abidələrinə mühafizə lövhələrinin vurulması ilə bağlı yeni layihəyə başlayıb.

Bu barədə Reporta Dövlət Xidmətindən məlumat verilib.

Layihə çərçivəsində ilkin olaraq Səbail rayonunda yerləşən 252 tarix-memarlıq abidəsinə mühafizə lövhələri vurulacaqdır. Artıq paytaxtın Azadlıq prospekti, Üzeyir Hacıbəyli, Zərifə Əliyeva və Səməd Vurğun küçələrində yerləşən tarixi abidələrə mühafizə lövhələrinin vurulmasına başlanılıb.

Mühafizə lövhələrinin vurulması Dövlət Xidmətinin Bakı Regional İdarəsi və Səbail Rayon İcra Hakimiyyətinin müvafiq strukturları tərəfindən təmin edilir.

Layihə çərçivəsində həm Bakıda, həm də regionlarda yerləşən tarix-mədəniyyət abidələrinə yeni mühafizə lövhəsinin vurulması nəzərdə tutulur.

F.Köçərli adına Respublika Uşaq Kitabxanasının təşkilatçılığı ilə Xətai Sənət Mərkəzində “8 Noyabr - Zəfər Günü”nə həsr olunmuş “Kiçik ürəklərdə Zəfər rəngləri” adlı uşaq və yeniyetmələrin rəsm və əl işlərindən ibarət sərgi açılıb.

AZƏRTAC xəbər verir ki, sərgidə əbədi, əzəli Azərbaycan torpaqlarını, Şuşa, Xudafərin körpüsü, üç rəngli bayrağımızı, xarıbülbülü, qəhrəman Azərbaycan əsgərlərini özündə əks etdirən 80-dən çox əsər nümayiş olunub.

Sərgi çərçivəsində 201, 144 nömrəli tam orta məktəbin, 43, 49 nömrəli liseyin, 3 və 5 nömrəli Uşaq–Gənclər İnkişaf Mərkəzinin, Zəngi liseyinin şagirdlərinin, Azərbaycan Gəncliyə Yardım Fondunun, İncəsənət Gimnaziyasının dərnək üzvlərinin rəsmləri və əl işləri nümayiş edilib.

Respublika Uşaq Kitabxanasının direktoru Şəhla Qəmbərova 44 günlük Zəfər tarixini tərənnüm edən istənilən layihənin vacib hesab etməklə yanaşı, Azərbaycan əsgərinin döyüş rəşadətinin gənc nəslə örnək olduğunu söyləyib. O qeyd edib ki, torpaqlarımızın azadlığı uğrunda şəhadətə ucalan bütün qəhrəman oğullarımız daim Azərbaycan xalqının qəlbində yaşayacaq, onların göstərdikləri qəhrəmanlıq tarixdə əbədi izlər qoyacaq.

Tədbirin bədii hissəsində 5 nömrəli Uşaq-Gənclər İnkişaf Mərkəzinin dərnək üzvləri musiqi nömrələri ilə çıxış ediblər.

Sonda uşaqlara Akademik Milli Dram Teatrı və Gənc Tamaşaçılar Teatrında “Zəfər yolu” və “Sindbad” tamaşalarını izləmək üçün bilet hədiyyə olunub.

Dövlət Miqrasiya Xidməti tərəfindən 50 saxlama vahidi fotosənəd Dövlət Kino– Foto Sənədləri Arxivinə təhvil verilib.

Milli Arxiv İdarəsindən AZƏRTAC-a bildirilib ki, daimi dövlət mühafizəsinə təhvil verilən fotosənədlər Dövlət Miqrasiya Xidmətinin 2010-2022-ci illərdəki fəaliyyəti haqqındadır.

Sözügedən fotosənədlər əsasən ölkədə miqrasiya xidməti sahəsində görülən işləri, o cümlədən qurumun inzibati - idarəetmə mexanizmilərinin yaradılmasını, regional miqrasiya idarələrində işin təşkilini, beynəlxalq əməkdaşlıq sahəsində görülən işləri, beynəlxalq əlaqələri, miqrasiya xidməti istiqamətində icra olunan maarifləndirici tədbirləri, gənc könüllülərin işə cəlb edilməsini əks etdirir.

Azərbaycan mədəniyyət paytaxtı Şuşanın 2023-cü ildə ev sahibliyi edəcəyi “Qorqud Ata” (Dədə Qorqud) Türk Dünyası Film Festivalının açılışı ölkəmizin iştirakı ilə noyabrın 1-də Türkiyənin Bursa şəhərində keçirilib.

AZƏRTAC xəbər verir ki, İkinci “Qorqud Ata” Türk Dünyası Film Festivalının direktoru, kino tənqidçisi İhsan Kabil, Bursa Böyükşəhər Bələdiyyəsinin sədri Alinur Aktaş, Türkiyənin mədəniyyət və turizm nazirinin müavini Ahmet Misbah Dəmircan açılış mərasimindəki çıxışlarında keçirilən festivalın tarixi əhəmiyyətindən, türk xalqlarının mədəni inteqrasiyasına təsir imkanlarından danışıblar.

Noyabrın 5-dək davam edəcək festival çərçivəsində nümayiş olunacaq filmlər türk dünyasının ortaq milli mədəniyyət sərvəti kimi dəyərləndirilib. Əminliklə ifadə olunub ki, bu festival qısa zaman kəsiyində beynəlxalq film festivalları sırasında özünə əzəmətli yer qazanacaq.

Festivalda 17 ölkədən 52 film nümayiş olunacaq. Açılış mərasimində nümayişdə nəzərdə tutulan kinoların fraqmentləri təqdim edilib. Artıq filmlərin nümayişinə başlanılıb.

Qeyd edək ki, Azərbaycanın “Həyat, deyəsən, gözəldir” və “Dalan” filmlərinin müsabiqələrdə iştirakı təsdiqlənib. Bundan başqa, müsabiqədən kənar “Dəli Kür” (bərpa olunmuş versiya) və “Otel otağı” filmləri kinosevərlərin görüşündə olacaq.

“Qorqud Ata” Türk Dünyası Film Festivalında münsiflər heyətində Elxan Cəfərov və Mehriban Ələkbərzadə yer alırlar.

Festivalın bağlanış mərasimi noyabrın 5-də nəzərdə tutulub. Qalib filmlər mükafatlandırılacaq.

Festivalın keçirildiyi Merinos Atatürk Konfrans və Mədəniyyət Mərkəzində Beynəlxalq Türk Mədəniyyəti Təşkilatı-TÜRKSOY-un nəşrlərindən ibarət kitablar, eləcə də türk dünyasının rəssamlarının əsərləri sərgilənir.

Noyabrın 8-i Azərbaycan tarixinin şanlı səhifəsinə - Qələbə Günü kimi qızıl hərflərlə yazıldı. Vətən müharibəsi tariximizin ən parlaq səhifəsinə, Azərbaycan xalqının iftixar və qürur mənbəyinə çevrildi.

AZƏRTAC xəbər verir ki, bu münasibətlə Azərbaycan Milli İncəsənət Muzeyində azyaşlı məktəblilər üçün “Zəfərin mübarəkdir, ey Vətən!” adlı tədbir təşkil olunacaq.

Tədbirin məqsədi məktəblilərə ölkənin tarixini, müstəqilliyini, suverenliyini təbliğ etmək, gələcək nəsillərə vətənimizin keşiyində layiqincə durmağa, müstəqil dövlətimizin qədrini bilməyə səsləməkdir.

Tədbir proqramı Azərbaycan Respublikasının Dövlət Himni ilə başlayıb, “Qələbə Günü” adlı mühazirə ilə davam edəcək. Uşaqlar seçimdən asılı olaraq Azərbaycan Respublikasının siyasi-inzibati xəritəsini “Puzzle-panno” şəklində və ya quruda, suda və havada daim Vətənin keşiyində dayanan Azərbaycan Silahlı Qüvvələrinin simvollarından ibarət kompozisiyanı quaş boyalarla rəngləyəcəklər. Eləcə də, Azərbaycan ordusunun zəfər simvolu kimi tanınan “Xarıbülbül” pannosunu, milli motivlərlə bəzədilmiş kompozisiyanı şüşə üzərində boyamaq fürsəti əldə edəcəklər. Habelə, azyaşlı qonaqlarımız “Mədəniyyətimizin incisi- Qarabağ” adlı tematik sərgi ilə tanış olacaq, Qarabağın xalça və xalça məmulatları, bədii tikmələr, milli geyimlər, məişət əşyaları ilə tanış olacaq, dilbər guşəmizin füsunkar təbiətinin təcəssüm olunduğu mənzərələrə səyahət edəcəklər.