XƏBƏRLƏR

“Avatar”ın çoxdan gözlənilən davamının yeni treyleri yayımlanıb.

AZƏRTAC xəbər verir ki, “Avatar Su Yolu” bu il dekabrın 16-da bütün dünyada yayımlanacaq. Burada hadisələr ilk filmdəkilərdən 10 illiklər sonra baş verir. Hekayəyə görə, əsgər Ceyk Salli avatara çevrildikdən sonra Navi xalqının lideri olur və yeni dostlarını Yerdən gələn muzdlu iş adamlarından qorumaq missiyasını üzərinə götürür.

Baş rolları Sem Uortington, Zoi Saldana, Stiven Leng, Covanni Ribizi, Coel David Mur və Keyt Uinslet oynayır.

Qeyd edək ki, elmi-fantastik filmin ilk hissəsi 2009-cu ildə nümayiş olunub. Film insanların və Navi adlı yadplanetlilərin qarşılıqlı əlaqələri, Navi aləminə xətərli müdaxilə barədədir. Üç “Oskar” və bir “Qızıl Qlobus” mükafatını almış “Avatar” dünyanın ən gəlirli filmi olub.

Məlumata görə, üçüncü, dördüncü və beşinci hissə müvafiq olaraq 2024-cü, 2026-cı və 2028-ci illər üçün planlaşdırılıb.

Noyabrın 3-də Dünya Fudokan Federasiyasının Azərbaycan üzrə rəsmi nümayəndəliyinin təşkilati dəstəyi ilə Nizami Kino Mərkəzində Vətən müharibəsi şəhidi, baş leytenant Muxtar Qasımlıya həsr olunan "Qəhrəman Muxtar Qasımlı" sənədli filminin qala gecəsi keçirilib. Tədbirdə şəhidin ailə üzvləri, şəhid ailələri, qazilər, Milli Məclisin deputatları, gənclər, məktəblilər, incəsənət, ictimaiyyət, kütləvi informasiya vasitələrinin nümayəndələri iştirak ediblər.

AZƏRTAC xəbər verir ki, tədbirdə açılış nitqi ilə çıxış edən şəhidin valideynləri Əli Qasımov və Almaz Qasımova övlad itkisinin çox ağır olduğunu, lakin Muxtarla qürur duyduqlarını deyiblər. Muxtarın 27 illik ömrünə həm idmanda nailiyyətlər, həm də şəhidlik kimi əlçatmaz zirvəni sığışdırdığını bildirən şəhidin valideynləri onun şərəfli həyat yolunun gənclərə örnək olduğunu qeyd ediblər. Övladlarının xatirəsinə çəkilən filmdə əziyyəti keçən hər kəsə minnətdarlıq bildirən valideynlər Vətənə layiqli övlad yetişdirilməsi üçün qəhrəmanların tanıdılmasının vacibliyini vurğulayıblar.

Milli Məclis sədrinin müavini, parlamentin Gənclər və idman komitəsinin sədri Adil Əliyev 44 günlük Vətən müharibəsində Prezident İlham Əliyevin rəhbərliyi ilə Azərbaycan Ordusunun parlaq Qələbə qazandığını, neçə-neçə qəhrəman oğulların ərazi bütövlüyümüzün bərpası uğrunda canından, qanından keçdiyini qeyd edib. Şəhidliyin ən ali zirvə olduğunu bildirən A.Əliyev Muxtar kimi qəhrəmanların sayəsində Azərbaycan xalqının dünyada başının uca olduğunu, tənələrdən, iradlardan qurtulduğunu vurğulayıb.

Ulu öndər Heydər Əliyevin ikinci dəfə hakimiyyətə qayıdışından sonra ordu quruculuğuna xüsusi diqqət yetirildiyini qeyd edən A.Əliyev Prezident İlham Əliyevin hakimiyyəti dövründə bu sahənin yeni mərhələyə qədəm qoyduğunu diqqətə çatdırıb. Qeyd olunub ki, bu da Qələbəni şərtləndirən amillərdən biri olub.

A.Əliyev çıxışının sonunda Azərbaycanda şəhid ailələri və qazilərin xüsusi diqqət və qayğı ilə əhatə olunduğunu, xalqımızın öz qəhrəmanlarını hər zaman dərin ehtiram və hörmətlə yad etdiyini deyib.

Qala gecədə çıxış edən gənclər və idman naziri Fərid Qayıbovun sözlərinə görə, kiçik yaşlarından döyüş idman növləri ilə məşğul olan Muxtar Qasımlı dəfələrlə yarışlarda iştirak edərək bir sıra mükafatlara layiq görülüb. Bildirilib ki, Muxtar Qasımlı 2019-cu ildə fitnes üzrə Azərbaycan çempionu adına layiq görülüb və fitnes müəllimi kimi gənclərin fiziki tərbiyəsi ilə məşğul olub. O, Vətən müharibəsində neçə-neçə idmançının iştirak etdiyini, onların fiziki gücünün şəxsi heyətin döyüş qabiliyyətinə müsbət təsir etdiyini deyib.

"Şəhid idmançıların xatirəsinə yarışlar, turnirlər təşkil olunur, onların qəhrəmanlığı yetişən nəsilə, gənclərə aşılanır. Sevindirici haldır ki, azyaşlılar Muxtar Qasımlı kimi qəhrəmanları özlərinə örnək götürərək sağlam həyat tərzi vərdişlərinə yiyələnir, böyük həvəslə idmanla məşğul olurlar. Odur ki, bu cür tədbirlərin davamlı olmasını diləyir, Gənclər və İdman Nazirliyi olaraq belə təşəbbüslərə dəstək olduğumuzu bildiririk", - deyə F.Qayıbov fikirlərinə yekun vurub.

"AzerGold" Qapalı Səhmdar Cəmiyyətinin İdarə Heyətinin sədri Zakir İbrahimov qurumun şəhid əməkdaşı Muxtar Qasımlının mehriban, ünsiyyətcil, gülərüz biri olduğunu, kollektiv arasında xüsusi hörmət qazandığını qeyd edib: "Vətən müharibəsində "AzerGold" QSC-nin iki əməkdaşı ən uca zirvəni fəth etdi. Hər səhər işə gələndə şəhid əməkdaşlarımız Muxtar Qasımlı və Rauf Əsgərovun xatirə lövhəsinin qarşısından keçir, onları salamlayaraq işə başlayırıq. Biz fəxr edirik ki, elə qəhrəmanlarla çiyin-çiyinə çalışmışıq. Şəhidlərimizin xatirəsini yaşatmaq, onların şücaətini gələcək nəsillərə ötürmək hər birimizin vəfa borcudur".

Rəsmi hissədən sonra tədbir bədii hissə ilə davam edib, incəsənət xadimləri vətənpərvər musiqi nümunələri təqdim ediblər.

Sonra "Qəhrəman Muxtar Qasımlı" sənədli filmi nümayiş etdirilib. Filmdə şəhidin ailə üzvləri, yaxın dostları, müəllimləri, döyüş yoldaşlarının onunla bağlı xatirələri, o cümlədən şəhidin müxtəlif vaxtlarda çəkilən şəkil və videoları yer alıb.

Şəhidin ailə üzvləri filmin ərsəyə gəlməsinə və övladlarının xatirəsinə göstərilən ehtirama görə hər kəsə minnətdarlığını bildirib, xalqımızı qarşıdan gələn Zəfər Günü münasibətilə təbrik ediblər.

Qeyd edək ki, filmin ssenari müəllifi və quruluşçu rejissoru Ruslan Mollayev, baş sponsoru "AzerGold" Qapalı Səhmdar Cəmiyyətdir.

Xatırladaq ki, Vətən müharibəsi zamanı Füzuli uğrunda gedən döyüşlərdə iştirak edən Azərbaycan Silahlı Qüvvələrinin baş leytenantı Muxtar Qasımlı oktyabrın 2-də şəhidlik zirvəsinə ucalıb.

Muxtar Qasımlı Azərbaycan ərazilərinin işğaldan azad olunması zamanı döyüş tapşırıqlarını yerinə yetirərkən şəxsi mərdlik və igidlik göstərdiyinə görə Prezident İlham Əliyevin müvafiq sərəncamları ilə ölümündən sonra “Vətən uğrunda” və “Füzulinin azad olunmasına görə” medalları ilə təltif edilib.

“Azərbaycan Dəmir Yolları” QSC Bakı-Gəncə-Bakı dəmir yolu xətti üzrə iki əlavə reys təyin edib.

Report bu barədə səhmdar cəmiyyətinə istinadən xəbər verir.

Məlumata görə, qurumun bütün strukturları 8 Noyabr - Zəfər Günü və 9 Noyabr – Dövlət Bayrağı Günü ilə əlaqədar gücləndirilmiş iş rejimində çalışacaq. Bununla bağlı Bakı-Gəncə-Bakı istiqamətində artan sərnişin tələbatını nəzərə alaraq, xətt üzrə əlavə reyslər təyin olunub.

Əlavə olunan bir reys 6 noyabr tarixində saat 08:15-də Bakıdan yola düşəcək və Gəncəyə saat 11:55-də çatacaq. İkinci əlavə reys 9 noyabr tarixində saat 17:30-da Gəncədən yola düşəcək və saat 21:05-də Bakıya çatacaq.

Bakı-Gəncə-Bakı sürətli sərnişin qatarının cari qrafikində heç bir dəyişiklik edilmir. Yəni, hər gün saat 08:45-də Bakıdan yola düşən qatar saat 12:25-də Gəncəyə, Gəncədən isə saat 18:00-da yola düşən qatar saat 21:35-də Bakıya çatır.

Xatırladaq ki, Bakı-Sumqayıt-Bakı elektrik qatarları isə bayram günlərində istirahət günlərindəki qrafikə uyğun hərəkətdə olacaq.

“Azərxalça” ASC-nin Vətən müharibəsində əldə edilən möhtəşəm Qələbənin ildönümünə həsr etdiyi “Zəfər” kolleksiyası üçün ən yaxşı xalça müsabiqəsinə müraciət edən yüzlərlə gənc sırasından yalnız 15-i seçmə mərhələni keçərək təlimlərə qatıldı. Bir ay davam edən təlimlər zamanı gənc dizayner və rəssamlar həm yerli, həm də xarici mütəxəssislərlə təcrübələrini bölüşüblər. Təlimlər həm nəzəri, həm də praktik yöndə keçirildi. Bu gün həmin kolleksiya artıq hazırdır.

AZƏRTAC xəbər verir ki, bu sözlər “Azərxalça”nın Zəfər Gününə həsr etdiyi “Zəfər” xalça kolleksiyasının təqdimat mərasimində səslənib.

“Azərxalça” ASC-nin İdarə Heyətinin sədri Emin Məmmədov rəhbəri olduğu müəssisədə Birinci və İkinci Qarabağ müharibəsi iştirakçılarından 17 nəfərin çalışdığını söyləyib. Bildirib ki, tədbirdə, həmçinin “Azərxalça”nın regionlarda yerləşən emalatxanalarında müxtəlif vəzifələrdə çalışan Vətən müharibəsi iştirakçıları, qazi işçiləri də iştirak edirlər.

Bir il əvvəl “Zəfər” adlı xalça müsabiqəsinə start verildiyini deyən Emin Məmmədov bildirib ki, qısa müddətdə müsabiqəyə 60-a yaxın müraciət daxil olub. Münsiflər tərəfindən 15 çeşni seçilib. 15 iştirakçı “Azərxalça”nın bölgələrdəki müəssisələrinə baş çəkib, emalatxanalardakı yaradıcı heyətlə tanış olub, Azərbaycan Milli Xalça Muzeyinə ekskursiya ediblər və Azərbaycanın tanınmış xalçaçı-rəssamı Eldar Mikayılzadədən ustad dərsləri alıblar. Bir ay ərzində müsabiqə iştirakçıları üçün xüsusi təlimlər təşkil olundu. Bu gün isə layihə qaliblərinin adları açıqlandı.

“Toxunan xalçalar müsabiqədən xatirə kimi “Azərxalça”nın nümayiş və sərgi salonunda saxlanılacaq. Gün ərzində xalçalara baxmaq istəyən hər kəs salona baş çəkib rahatlıqla bu sənət əsərlərindən həzz ala bilər. Yaxın zamanlarda qalib olan xalçaların çeşniləri əsasında yeni xalçalar toxunacaq və hər kəs bu xalçaları əldə etmək imkanı qazanacaq”, - deyə Emin Məmmədov əlavə edib.

Sonra kolleksiyaya daxil olan xalçalar haqqında müəlliflərin özləri məlumat veriblər.

Birinci yerin qalibi Fidan İlham toxuduğu “Zəfəri bizə gətirənlər” xalçasının ideyası haqqında danışıb: “Təqdim etdiyim xalçanın əsas elementləri bir-birinə bənd olan Qarabağ atlarıdır. Toxuduğum xalçada Qarabağ atlarının timsalında mübarizlik və döyüşkənlik ştrixlərini əlaqələndirməyə çalışmışam”.

Fidan İlhamın sözlərinə görə, xalça üzərində yaratdığı təsvirdə əsgərlərimizin 44 gün ərzində çiyin-çiyinə döyüşməsi, möhtəşəm həmrəylik nümayiş etdirmələri əksini tapıb. Burada, həmçinin şəhidlərimizin adlarının və soyadlarının baş hərfləri əks olunub. Atların arasında olan boşluqda isə stilizə olunmuş alov elementi var. Bu, Azərbaycanda heç vaxt sönməyəcək ocaq mənasına gəlir. Ən əsası, xalçanın mərkəzində ərəbcə yazılmış “Allah” sözü şəhidlərimizin ən uca zirvəyə, yəni cənnətə ucalmasını göstərir.

İkinci yerin qalibi Aytac Ələkbərlinin yaratdığı “Dəmir yumruq” xalçası da maraqla qarşılanıb.

O, müəllifi olduğu əsər haqqında deyib: “Quranı-Kərim”də Ən-nəhl, yəni Arı surəsi var. Mən hazırladığım xalçada məhsuldar və zəhmətkeş arıları PUA kimi təsvir etmişəm. Xalçadakı buludlar hər zaman səmadan döyüşə hazır vəziyyəti əks etdirir. Ocağı qoruyan əllər isə Şəhidlər xiyabanındakı “Əbədi məşəl”dir. Şölələnən alov şəhidləri unutmamağı və unutdurmayacağımızı simvolizə edir”.

Üçüncü yerin qalibi Təhminə Məmmədova toxuduğu “Dönüş” xalçası haqqında danışıb: “Zəfər” mənim üçün yenilənmək deməkdir. Mən toxuduğum xalçanın dizaynını bu ideyaya əsəsən verdim. Ana haşiyədə alovu buta şəklində stilizə etmişəm. Alovun içində olan ornament döyüşçülərdir. Eyni zamanda, alov təmizlənmə mərhələsinin işarəsidir. Günəbaxan günəşin və məhsuldarlığın simvoludur, yəni torpaqlarımız bizə qayıtdıqdan sonra təbiətimiz dirçəlib. Buludu spiral şəklində stilizə etmişəm ki, bu da inkişaf və hərəkatın simvoludur. Ağacı isə xilaskar və təbii fəlakətlərdən qoruyucu kimi simvollaşdırmışam. Ümumiyyətlə, Azərbaycan xalçaları qədim rəmzlərlə zəngin olduğu üçün mən toxuduğum xalçanı müasir simvollarla zənginləşdirmişəm”.

Xalçaçı Maya İbadlı isə sosial şəbəkələrin nəticələri üzrə qalib seçilib. Müəllif bildirib ki, Azərbaycanın cənnət guşəsi Qarabağa, alınmaz qala olan Şuşaya neçə illik həsrətdən sonra atdığımız addımı “Cənnətə giriş” adlı xalça-kompozisiyasında əks etdirib: “Cənnətə giriş”i öz canları, qanları bahasına bizə Zəfəri bəxş edənlərə həsr edirəm. Bu kompozisiyada öz hisslərimi, duyğularımı, Vətənə olan sevgimi göstərməyə çalışmışam”.

Füzuli şəhərinin planlaşdırılması ilə bağlı hədəflərdə dayanıqlı inkişaf, "Ağıllı şəhər" modelinin qurulması əsas istiqamətlər içərisində yer alıb. 

Report xəbər verir ki, bunu Dövlət Şəhərsalma və Arxitektura Komitəsinin sədr müavini İlqar İsbatov Bakıda keçirilən Zəfər Gününə həsr olunmuş elmi-praktiki konfransda deyib.

Onun sözlərinə görə, şəhərin mərkəzi hissəsində "Blue Zone" yanaşmalarının tətbiqi təklif edilir: "Blue Zone" planlaşdırmada yeni bir istiqamət olaraq nəzərdən keçirilir. Şəhər ərazilərində mütəxəssislərin araşdırması nəticəsində uzun ömürlüyü şərtləndirən kriteriyalar müəyyənləşib və bu kriteriyalar əsasında şəhər planlaşdırmaları həyata keçirilir". 

Sədr müavini əlavə edib ki, Füzuli şəhərinin Baş Planında dəmir yolu və avtovağzal əraziləri də nəzərdən keçirilib: "Füzuli şəhərinin bir xüsusiyyəti budur ki, burda Zəfər yolundan başqa, Füzuli-Şuşa avtomobil yolu şəhərə bitişik ərazidən keçir, həmçinin Füzuli -Şuşa dəmir yolu xətti də burdan keçəcək ".

Bakının Qaradağ rayonunda Külək Elektrik Stansiyasının (KES) inşası ilə bağlı Anlaşma Memorandumu imzalanıb.

Report xəbər verir ki, bunu iqtisadiyyat naziri Mikayıl Cabbarov özünün "Twitter" hesabında yazıb.

Onun sözlərinə görə, sənədi nazirliyə məxsus "Azərbaycan İnvestisiya Şirkəti" ASC , "Caspian HDG" MMC, İspaniyanın alternativ və bərpa olunan enerji sahəsində ixtisaslaşmış "Elecnor" şirkəti imzalayıb.

Təqdim etdiyim xalçanın əsas elementləri bir-birinə bənd olan Qarabağ atlarıdır. Ona görə də toxuduğum xalçada Qarabağ atlarının timsalında mübarizlik və döyüşkənlik ştrixlərini əlaqələndirməyə çalışmışam.

Bu sözləri “Azərxalça”nın “Zəfər” kolleksiyasının təqdimatı zamanı “Zəfəri bizə gətirənlər” xalçasının müəllifi Fidan İlham AZƏRTAC-a müsahibədə deyib.

“Xalça üzərində yaratdığın bənzərlikdə döyüşçülərimizin 44 gün ərzində çiyin-çiyinə döyüşməsi, möhtəşəm həmrəylik nümayiş etdirmələri əksini tapıb. Burada həmçinin şəhidlərimizin adlarının və soyadlarının baş hərfləri əks olunub. Atların arasında olan boşluqda isə stilizə olunmuş alov elementi var. Bu, Azərbaycanda heç vaxt sönməyəcək ocaq mənasına gəlir. Ən əsası, xalçanın mərkəzində ərəbcə yazılmış “Allah” sözü şəhidlərimizin ən uca zirvəyə, yəni cənnətə ucalmasını göstərir”,- deyə müəllif bildirib.

Rejissoru Stiven Spilberq olan məşhur fantastik “Yadplanetli” filminin pərəstişkarları ekran əsərində istifadə edilmiş baş qəhrəmanın mexaniki modelinə sahib olmaq şansını əldə edəcəklər.

AZƏRTAC kinonews saytına istinadla xəbər verir ki, 1981-ci ildə Karlo Rambaldinin emalatxanasında yaradılan bənzəri olmayan bu qeyri-adi kinematoqrafik model 85 hərəkət nöqtəsinə malikdir və mühəndisliyin şah əsəri hesab olunur.

Mexaniki maneken kuklanın yaradılması təxminən üç ay çəkib və onun dəyəri 1,5 milyon dollara başa gəlib. Bu da filmin ümumi büdcəsinin təxminən onda birini təşkil edir. Bundan əlavə, modelin bir sıra illüstrasiya və çertyojları da hərraca çıxarılacaq. Təşkilatçılar yadplanetli modelinin yekun dəyərinin iki milyondan üç milyon dollara qədər olacağını gözləyirlər. Hərrac dekabrın 17-də başlayacaq.

Qeyd edək ki, "Yadplanetli" fantastik filmi 1982-ci ildə ekranlara çıxıb. S.Spilberqin filmində əsas rolları Henri Tomas, Di Uolles və Dryu Berrimor canlandırıblar. Süjetin mərkəzində yer üzündə unudulmuş mehriban yadplanetliyə evə qayıtmağa kömək edən oğlan Elliot və onun bacısı Gertidir.

Film “Ən yaxşı orijinal musiqi” və “Ən yaxşı vizual effektlər” nominasiyası daxil olmaqla dörd “Oskar” mükafatı qazanıb.

Fransanın “Luvr” muzeyi kolleksiyasının əsas incilərindən biri olan Leonardo da Vinçinin ən gözəl əsərlərindən “Vəftizçi Yəhya” rəsmini “Əbu-Dabi Luvr” muzeyinə təqdim edib.

AZƏRTAC xarici KİV-lərə istinadla xəbər verir ki, noyabrın 8-dən etibarən rəsm Birləşmiş Ərəb Əmirlikləri (BƏƏ) muzeyinin daimi sərgisində nümayiş etdiriləcək və iki il orada qalacaq. Bu aksiya “Əbu-Dabi Luvr” muzeyinin açılış ildönümünə həsr olunub. Muzey 2017-ci ildə açılıb.

Qeyd edək ki, “Vəftizçi Yəhya" Leonardo da Vinçi yaradıcılığının ən məşhur şah əsərlərindən biridir. Bu əsərdə böyük rəssam sfumato texnikasını mükəmməlliyə çatdırıb. Leonardo da Vinçi izləyicinin diqqətini yalnız qəhrəmana yönəltmək üçün müqəddəs Yəhya personajını qaranlıq, sönük fonda yerləşdirib və sfumato texnikasının köməyi ilə özünəməxsus effekt əldə edib.

Xətai Sənət Mərkəzində Vətən müharibəsində qazandığımız möhtəşəm tarixi Zəfərə həsr olunmuş “ZƏFƏR – 44” uşaq rəsm yaradıcılıq turnirinin bağlanış sərgisi açılıb.

AZƏRTAC xəbər verir ki, sərgini giriş sözü ilə Xətai Sənət Mərkəzinin direktoru Zahid Əvəzov açaraq turnir haqqında ətraflı məlumat verib.

Xalq rəssamı Arif Hüseynov, Xətai Rayon İcra Hakimiyyətinin əməkdaşı Pənah İmanov, Azərbaycan Dövlət Rəsm Qalereyasının muzey və ekspozisiya şöbəsinin müdiri Elçin Hüseynli və böyük elmi işçisi Ziyarət Cabarova çıxış edərək sərgidə nümayiş edilən əsərlər haqqında danışıblar.

Sonda iştirakçılara sertifikat və hədiyyələr təqdim olunub.

Qeyd edək ki, uşaq rəsm yaradıcılıq turnirində 500-dən çox yeniyetmə və gənc iştirak etmişdi və təyin olunan seçim heyəti ərsəyə gələn əsərlərin arasından müəllifin yaşı nəzərə alınmaqla 44 günlük zəfərin şərəfinə 44 əsər sərgilənmək üçün seçilmişdi.

Xatırladaq ki, turnir Mədəniyyət Nazirliyi, Elm və Təhsil Nazirliyi, “Azərbaycan Televiziya və Radio Verilişləri” Qapalı Səhmdar Cəmiyyəti, Azərbaycan Rəssamlar İttifaqı, Xətai Rayon İcra Hakimiyyətinin dəstəyi, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə təşkil olunub.