XƏBƏRLƏR

"Yelo Bank" ASC müştəriləri üçün innovativ həlləri tətbiq etməyə davam edir. Bank bu dəfə kart müştərilərinə "Apple Pay" təmassız ödəmə üsulunu əlçatan etdi. Bunun üçün "iPhone" smartfonunu, "Apple Watch" saatını və yaxud "iPad" planşetini ödəmə terminalına yaxınlaşdırmaq kifayətdir. "Apple Pay" ilə təmassız ödəmə nişanı olan istənilən market, aptek, taksi, kafe, restoran, pərakəndə satış mağazaları və bir çox digər yerlərdə ödənişlər etmək mümkündür.

"Apple Pay"in əsas üstünlüyü onun təhlükəsizliyi və məxfiliyindədir. Bu üsulla həyata keçirilən hər bir əməliyyat etibarlı qorunur, çünki istifadəçi ödənişi "Face ID", "Touch ID" və yaxud cihazın parolu ilə təsdiq etməlidir. "Apple Pay"ə əlavə edilmiş kart məlumatları nə cihazda, nə də "Apple" serverlərində saxlanılmır. Əvəzində karta unikal cihaz qeydiyyat nömrəsi verilərək şifrələnir və cihazın yüksək standartlara cavab verən sertifikasiya edilmiş “Təhlükəsiz element” çipində əminliklə saxlanılır.

"Yelo kart"ı "Apple Pay"də aktivləşdirmək çox asandır:

"Yelo" mobil tətbiqinə daxil olub, istədiyiniz kartı seçin;

“Apple Wallet”ə əlavə etmək üçün müvafiq təlimatları yerinə yetirin.

Prosesi yekunlaşdırdıqda seçdiyiniz kartı "iPhone", "Apple Watch", "iPad", "Mac" cihazları vasitəsilə "Apple Pay" ödənişlərində istifadə edə biləcəksiniz.

"Apple Pay" xidmətinə qoşulmuş Yelo kart sahibləri Bankın təklif etdiyi cashback və endirimlərdən faydalanmağa davam edə biləcəklər.

Noyabrın 2-də Rus Evində Özbəkistanın opera müğənnisi Xursand Şerovun konserti keçiriləcək.

Bu barədə AZƏRTAC-a Rusiya İnformasiya Mədəniyyət Mərkəzinin mətbuat xidmətindən məlumat verilib.

Müslüm Maqomayev fenomeni ondan ibarətdir ki, onun səsinə, şəxsiyyətinə olan məhəbbət tükənməzdir. Bunu onun mahnılarını dinləyən insanlar və bu mahnıları oxuyan ifaçılar bir daha sübut edir. Bu insanlardan biri də Özbəkistandan olan opera müğənnisi, “Registan” ansamblının rəhbəri Xursand Şerovdur. O, velosipedlə 14 min kilometr yol qət edərək, Müslüm Maqomayevin xatirəsini ehtiramla yad edib, məzarı üzərinə gül dəstələri düzmək üçün Daşkənddən Bakıya gəlib.

Müğənni doğma Özbəkistan və Azərbaycan bayraqları ilə velosipedlə dünyanı gəzir. Artıq 7 ildir ki, musiqiçi dünyanı gəzir və kumirinin mahnılarını ifa edir.

Azərbaycan tərəfi noyabrın 1-də Türkiyənin Bursa şəhərində start götürəcək “Qorqud Ata” Türk Dünyası Film Festivalında geniş tərkibdə iştirak edəcək.

AZƏRTAC təşkilat komitəsinə istinadla xəbər verir ki, festival çərçivəsində Azərbaycanın kino yaradıcılığında mühüm yeri olan “Həyat, deyəsən, gözəldir” və “Dalan” filmləri müsabiqələrdə iştirak edəcək. Bundan başqa, müsabiqədən kənar “Dəli Kür” (bərpa olunmuş versiya) və “Otel otağı” filmləri kinosevərlərin görüşündə olacaq.

“Qorqud Ata” Türk Dünyası Film Festivalında münsiflər heyətində Elxan Cəfərov və Mehriban Ələkbərzadə yer alırlar.

Festivalın bağlanış mərasimi noyabrın 5-də nəzərdə tutulub. Sonda qaliblər mükafatlandırılacaq.

Türkiyə Cümhuriyyətinin yaranmasının 100-cu ildönümü münasibətilə "Disney" şirkəti tərəfindən istehsal olunan “Atatürk” serialının ilk təqdimatı tamaşaçılar tərəfindən maraqla qarşılanıb.

AZƏRTAC xəbər verir ki, emosional səhnələrlə yaddaşlarda qalan treylerdə Atatürkin əzəmətli səslə “Vətənin bağrına düşmən dayasın xəncərini, tapılar qurtaracaq bəxti qara madərini” ifadəsini işlətdiyi eşidilir.

Ekran əsərində böyük türk xalqının xilaskarı, qazi Mustafa Kamal obrazını tanınmış aktyor Aras Bulut İynemli canlandırır. Altı seriyadan ibarət olacaq ekran işinin rejissoru Mehmet Ada Öztekindir. Serialın musiqilərini isə “Oskar” mükafatçısı Hans Zimmer bəstələyib.

“Azercell Telekom” MMC “FemTech” tərəfdaşlığı ilə "Her Improvement" layihəsi çərçivəsində yeniliyə açıq, öyrənmə həvəsli və startap ideyası olan qadınları növbəti uzunmüddətli inkişaf proqramına dəvət edir.

Bu aydan başlayaraq gələn il aprel ayına qədər davam proqramda iştirakçılar üçün müasir texnologiyalar və bizneslə bağlı təlimlər nəzərdə tutulub. Eyni zamanda xanımlar proqramlaşdırma dərslərində iştirak etmək, peşəkar mentorlarla, yerli və beynəlxalq bazarda real təcrübəsi olan Informasiya Texnologiyaları (İT) liderləri və startap təsisçiləri ilə görüşmək şansı qazanacaqlar. Layihə çərçivəsində iştirakçılar startap ideyalarının inkişafı üçün inkubasiya proqramını keçmək, öyrəndiklərini praktiki olaraq icra etmək, professional əlaqələr qurmaq imkanı əldə edəcəklər. Proqramın sonunda qalib komandaya pul mükafatı təqdim olunacaq.

Layihəyə 16-29 yaş arası xanımlardan ibarət 5 nəfərlik komandalar müraciət edə bilər. Proqrama qoşulma tam ödənişsizdir. 6 ay müddətində aktiv iştirak mütləqdir. Qeydiyyatın son tarixi: 20.11.2022. 

"Azercell Telekom" uzunmüddətli "Her Improvement" layihəsinin inkişaf mərhələləri barədə KİV vasitəsilə ictimaiyyəti məlumatlandıracaq və proqramın gedişatı ilə bağlı xəbərləri paylaşacaq.

ABŞ və Birləşmiş Ərəb Əmirliyi (BƏƏ) təmiz enerji sektoruna 100 milyard dollar həcmində sərmayə qoyacaq.

“Report” xəbər verir ki, bu barədə Ağ Evin saytında yerləşdirilən məlumatda deyilir.

Bildirilir ki, hər iki ölkə təmiz enerji sektoru ilə bağlı strateji tərəfdaşlıq haqqında saziş imzalayıb. Bu sənədlə təmiz enerji sektoruna 100 milyard dollar həcmində investisiya cəlb ediləcək.

Tərəflər bu saziş çərçivəsində 2035-ci ilə qədər dünyada 100 giqavatt təmiz enerji istehsal etmək niyyətindədir.

Bundan başqa, Vaşinqton ilə Əbu-Dabi zərərli emissiyaların idarə olunmasına, qabaqcıl nüvə texnologiyalarının inkişafına və sənaye-nəqliyyat sektorlarında karbon emissiyalarının azaldılmasına sərmayə qoymağı planlaşdırırlar.

Azərbaycan Avtomobil Yolları Dövlət Agentliyi Xocasən-Lökbatan yolundakı Xocəsən elektrik stansiyasının qarşısında yeni yerüstü piyada keçidi tikir.

Report xəbər verir ki, bu barədə Agentlik məlumat yayıb.

Məlumata görə, layihə üzrə keçidin ümumi uzunluğu 30 metr, daxili eni 3,8 metr, pilləkənlərin eni 3 metrdir. Yol səviyyəsindən hündürlüyü 5,5 metr təşkil edən keçid orta dayaqsız metal konstruksiyadan ibarət olacaq. Hazırda keçiddə montaj işləri görülür.

İki giriş-çıxışdan ibarət olması nəzərdə tutulan keçiddə fiziki məhdudiyyətli insanların rahat hərəkətini təmin etmək üçün müasir lift sistemləri quraşdırılacaq.

Layihə çərçivəsində yolun hər iki tərəfində yeni avtobus ciblikləri, avtobus dayanacağının, keçidin istismarına nəzarət edən işçilər üçün nəzarət otağının tikintisi, piyada keçidinin ətrafında abadlaşdırılma işlərinin görülməsi nəzərdə tutulub.

Beynəlxalq Türk Mədəniyyəti və İrsi Fondu ilə Litva Respublikasının ölkəmizdəki səfirliyinin birgə əməkdaşlığı çərçivəsində “Litva Karaimləri” adlı konfrans və sərgi təşkil edilib.

AZƏRTAC xəbər verir ki, konfrans Beynəlxalq Türk Mədəniyyəti və İrsi Fondu və Litva Respublikası arasındakı əlaqələrin tarixini əks etdirən videoçarxın nümayişi ilə başlayıb.

Beynəlxalq Türk Mədəniyyəti və İrsi Fondunun prezidenti Günay Əfəndiyeva tarixi şəraitlərdən asılı olaraq, bir sıra türk xalqlarının müxtəlif ölkələrə köçərək, orada məskunlaşmasından söz açıb. O, hazırda azsaylı türk etnik kökənli xalqlarla münasibətlərin bərpa olunmasının və genişlənməsinin müşahidə olunduğunu qeyd edib. Fondun prezidenti türk xalqlarının inteqrasiyasına türk dövlət başçıları, eləcə də Türk Əməkdaşlıq Təşkilatları tərəfindən diqqətin və dəstəyin göstərildiyini vurğulayıb. Günay Əfəndiyeva türk xalqlarının məskən saldığı ölkələrdən biri olan Litva Respublikasının ərazisində yaşayan türk etnik kökənli milli azlıqlara – tatar və karaimlərə göstərilən münasibəti təqdirəlayiq hal kimi qiymətləndirib: “Təsadüfi deyil ki, ötən il Litva Respublikası tərəfindən ölkədə “Litva tatarlarının İli”, bu il isə “Litva karaimlərinin İli” elan olunub. 2021-ci ildə Fond ilə Litva Respublikası arasında Litva tatarlarının və karaimlərinin tarixi və mədəni irsinin qorunması, həmçinin daha da geniş təbliği məqsədilə Əməkdaşlıq Memorandumu imzalanıb. Fondda Litva Respublikasının xarici işlər naziri Qabrielius Landsberqisin iştirakı ilə Litva tatarlarının yetişdirdiyi görkəmli şəxsiyyətlərin nadir portretlərini, onların adət-ənənələrini əks etdirən tarixi fotoşəkillərin nümayiş edildiyi “Litva Tatarları” sərgisi açılıb”.

Fondun prezidenti diqqətə çatdırıb ki, karaimlər Litvada yaşayan ən kiçik türk mənşəli etnik qrupdur. Trakayda məskunlaşan karaim icması əsrlər boyu öz adət-ənənələrini, inanclarını və ən əsası dilini qoruyub saxlayıblar. Onların dili qıpçaq qrupuna aiddir və BMT tərəfindən qorunan dillərdən biridir. Karaimlərin sayının az olmasına baxmayaraq, türk dünyasında özünəməxsus yerə sahibdirlər və Litva cəmiyyətinin də önəmli parçasıdırlar.

Günay Əfəndiyeva Fondun “Litva karaimlərinin İli”nin açılışı çərçivəsində keçirdiyi tədbiri xatırladaraq, deyib: “Tədbir Litva Respublikasının birinci xanımı Diana Nausedienenin Fondu ziyarət etməsi ilə gerçəkləşdi. Diana Nausediene ilə xalqlararası integrasiyanın önəmindən, hər bir xalqın ümumbəşəri irsə bəxş etdiyi töhfələrdən, multikultural və tolerant dəyərlərin əhəmiyyətindən bəhs etdik. Daha sonra isə Litvanın Azərbaycandakı səfirliyi ilə birgə əməkdaşlıq çərçivəsində karaimlərə həsr etdiyimiz sərgiyə baxış keçirdik. Bu gün yenidən karaim irsini tanımaq və tanıtmaq üçün konfrans təşkil edirik, sərgi açırıq, bir araya gəlirik. Karaimlərin əsrlərin dərinliyindən gələn tarixi-mədəni irsini öyrənir, onların keçmişinə bir daha nəzər salırıq”.

Tədbirdə çıxış edən Litva Respublikasının Azərbaycandakı səfiri Egidius Navikas Fondun fəaliyyətini türk dünyası ilə digər mədəniyyətləri təmsil edən xalqlar arasında dialoqun təşviqi və inkişafına töhfə kimi qiymətləndirib. Səfir Litva Respublikasının Azərbaycandakı səfirliyi ilə Fondun bir sıra birgə layihələrinin həyata keçirilməsinin önəminə toxunaraq, uğurlu əməkdaşlıqdan böyük məmnunluq duyduğunu dilə gətirib.

Litva Karaimləri Mədəniyyət Assosiasiyasının sədri Karina Firkaviciute konfransda təqdimatla çıxış edərək, karaimlərin qədim tarixi, mədəniyyəti, keçmişdən bu günə keçdiyi yol barədə tədbir iştirakçılarına ətraflı məlumat verib. K.Firkaviciute karaimlərin dili, dini inancları, sayı, eləcə də rəhbərlik etdiyi icmanın özünəməxsusluğunun qorunması və gələcək nəsillərə ötürülməsi istiqamətində gördüyü işlərdən danışıb.

Konfransın sonunda qarşılıqlı şəkildə hədiyyələr təqdim olunub.

Tədbir çərçivəsində karaimlərin adət-ənənələrini, yaşayış tərzini, milli geyimlərini əks etdirən rəsmlərdən ibarət sərgi açılıb. Sərgi Litva karaimlərinin sənətçiləri Rytas Linge və Augusta Firkovic tərəfindən ifa edilən milli musiqi və mahnılarla müşayiət olunub.

Tədbirdə rəsmilər, Fonda üzv və müşahidəçi ölkələrin, eləcə də digər dövlətlərin səfirləri, Litva karaimlərinin təmsilçiləri, ictimai xadimlər iştirak ediblər.

Mədəniyyət Nazirliyinin “Şuşa mədəniyyətinin inciləri” layihəsi müxtəlif bölmələr üzrə təqdimatlarla davam edir.

Nazirlikdən AZƏRTAC-a bildirilib ki, “Şuşa İli” münasibətilə həyata keçirilən layihənin “Şuşanın simaları” bölməsinin növbəti təqdimatı Süleyman Sani Axundova həsr olunub.

Süleyman Sani Axundov dramaturq, jurnalist, uşaq yazıçısı və pedaqoq kimi tanınır. Onun əsərləri bu gün də böyük maraqla oxunur.

Azərbaycan dramaturqu, nasir, maarif xadimi S.S.Axundov 1875-ci il oktyabrın 3-də Şuşa şəhərində anadan olub. 1885-1894-cü illərdə Qori Müəllimlər Seminariyasında təhsil aldıqdan sonra III dərəcəli rus-tatar məktəbində müəllim işləyib. 1920-1921-ci illərdə Qarabağ vilayətinin maarif şöbəsinin müdiri, 1922-1930-cu illərdə Bakıda məktəb müdiri vəzifələrində çalışıb. 1922-ci ildə Azərbaycan “Ədib və Şairlər” İttifaqının ilk sədri seçilmiş ədib ədəbi və pedaqoji fəaliyyətinə görə 1932-ci ildə "Əmək qəhrəmanı" adına layiq görülüb. 1921-1930-cu illər ərzində, keçmiş sovetlər ittifaqında Bakı Sovetinin üzvü olsa da, ömrünün sonuna kimi pedaqoji fəaliyyətlə məşğul olub, yazıçı, jurnalist kimi tanınıb. Onun XX əsr Azərbaycan uşaq ədəbiyyatının inkişafında böyük xidmətləri olub.

İlk əsəri "Tamahkar" komediyasi ilə tanınmış yazıçı bu əsərini böyük dramaturq Mirzə Fətəli Axundzadənin "Hacı Qara" əsərinin təsiri ilə qələmə alıb. Bundan başqa, yazıçı "Dibdat bəy", "Türk birliyi" komediyalarının, "Laçın yuvası", Qaranlıqdan işığa", "Şahsənəm və Gülpəri", "Səadət zəhmətdədir", "Molla Nəsrəddin Bakıda", "Eşq və intiqam" kimi pyeslərin və bir sıra uşaq əsərlərinin də müəllifidir. Bir nasir kimi 1905-ci ildə yazdığı "Qonaqlıq", "Kövkəbi-hürriyyət", "Yuxu" kimi hekayələri də müəllifin maraqlı hekayələrindəndir.

O, 1912-1914-cü illərdə “Qorxulu nağıllar” adı altında “Əhməd və Məleykə”, “Abbas və Zeynəb”, “Nurəddin”, “Qaraca qız”, “Əşrəf” hekayələrini yazıb. Bu hekayələrdə valideynlərini itirmiş uşaqların acı taleyindən söhbət açılır.

Onun XX əsr Azərbaycan uşaq ədəbiyyatının, inkişafında böyük xidmətləri var. 1920-ci ildən sonra yazdığı əsərlərdə də geriliyi və mühafizəkarlığı tənqid edən Süleyman Sani Axundov 1939-cu il martın 29-da vəfat edib.

"Black Adam" ekran əsəri ötən həftə olduğu kimi bu həftə də birincilik titulunu qoruyub saxlayır.

AZƏRTAC xəbər verir ki, ekran işi nümayişinin ikinci həftəsində 27,7 milyon dollar qazanc əldə edib. Bu göstərici isə ötən həftə ilə müqayisədə 59 faiz azdır. Xatırladaq ki, film nümayişinin ilk həftəsində 67 milyon gəlir qazanıb.

Qeyd edək ki, rejissoru Jaume Kolyet-Serradır olan filmdə baş rollarda Dueyn Conson, Sara Şahi və Pirs Brosnan çəkilib.

Film qədim Misir tanrılarının qüdrətinə bərabər xüsusi güclər qazanan sonra isə düşmənləri tərəfindən əbədi həbs olunan “Black Adam”ın (Conson) inanılmaz hekayəsinə fokuslanır. 5000 il sonra azad edilən Adam müasir dünyaya düşür və burada özünəməxsus unikal ədalət forması yaradır.