XƏBƏRLƏR

“Azərbaycan Televiziya və Radio Verilişləri” QSC-nin “Azərbaycantelefilm” Yaradıcılıq Birliyi 1993-cü ildə Kəlbəcər rayonunun işğalı zamanı Başlıbel kəndində törədilmiş faciə ilə bağlı sənədli film hazırlayıb.

QSC-nin İctimaiyyətlə əlaqələr və sosial media şöbəsinin AZƏRTAC-a verdiyi məlumata görə, “Başlıbel: mühasirə gündəliyi” filmi erməni silahlılardan qaçaraq dağlara sığınmış 29 azərbaycanlının xatirələri əsasında lentə alınıb.

Belə ki, rayonun işğalı zamanı doğma torpaqlarını tərk etməyən 62 nəfər dağlara sığınıb. Lakin onlar cəmi 17 gün gizlənə biliblər. 1993-cü il aprelin 18-də erməni quldurları qadın, uşaq və yaşlıların gizləndiyi yeri aşkarlayıb. Bu insanlar cəmi iki ov tüfəngi və əhalini qoruyan əsgərlərdə olan bir neçə avtomat silahla düşmənə müqavimət göstəriblər. Başlıbelin işğalı zamanı erməni quldurları 27 nəfəri güllələyib, 1 nəfəri diri-diri yandırıb, ruhi xəstəlikdən əziyyət çəkən 1 kənd sakinini işgəncə ilə qətlə yetiriblər. 19 kənd sakini isə girov götürülüb. Düşmən gülləsindən canını qurtara bilən 30 nəfər yenidən dağlara çəkilib və daha 113 gün mühasirə həyatı yaşayıb. Sağ qalan həmin şəxslər dəfələrlə ölümlə üz-üzə gəlib, günlərlə kahalarda ac-susuz qalıblar. Onlar 113 gündən sonra iyulun 17-də sığınacağı tərk edərək yalnız gecələr hərəkət etməklə gizli dağ yolları ilə Ermənistan ordusunun mühasirəsindən çıxa biliblər. 93 yaşlı Ələsgər Kazımov isə doğma kəndini tərk etməyərək sığınacaqda qalıb. Filmdə düşmən əlindən sağ qurtulmağı bacaran azərbaycanlılar yenidən həmin yerlərə qayıdır, qorxu dolu günlərinin keçdiyi kahaları tapır, özlərindən qalma əşyalara baxır və həmin dəhşətləri danışırlar.

Qeyd edək ki, filmin ssenari müəllifi Elxan Salahov, rejissoru Pərviz Həsənovdur. “Başlıbel: mühasirə gündəliyi” sənədli filmi oktyabrın 31-də və noyabrın 1, 2, 3-də saat 21:00-da AzTV-də yayımlanacaq. Filmi AzTV-nin sosial şəbəkə hesablarında da izləmək mümkündür.

Bakı Şəhər Mədəniyyət Baş İdarəsinin Xətai rayon Mərkəzləşdirilmiş Kitabxana Sisteminin Mərkəzi Kitabxanasının “Əbədi yaşayanlar” adlı şəhidlərin xatirəsinə həsr olunan layihəsi davam edir.

Baş İdarədən AZƏRTAC-a bildirilib ki, layihənin budəfəki təqdimatı Vətən müharibəsi şəhidi, kapitan Kənan İsrafilova həsr olunub.

Kənan İsrafilov 1990-cı il noyabrın 8-də Şəki rayonunun Şirinbulaq kəndində dünyaya göz açıb. Cəmşid Naxçıvanski adına hərbi liseydən məzun olan Kənan 2008-2012-ci illərdə Heydər Əliyev adına Azərbaycan Ali Hərbi Məktəbində (indiki Milli Müdafiə Universiteti) təhsilini davam etdirib. 2013-2018-ci illərdə Murovdağda komandir vəzifəsini icra edib. 2018-ci ildən qərargah rəisi kimi fəaliyyətini davam etdirib. 2018-ci ildə Müdafiə Nazirliyinin Hərbi Akademiyasında təhsilini davam etdirən Kənan İsrafilov 2020-ci ilin iyun ayından Goranboy rayonunun Aşağı Ağcakənd qəsəbəsində tabor komandiri kimi fəaliyyətini davam etdirib. O, xidməti dövründə "Azərbaycan Silahlı Qüvvələrinin 95 illiyi", "Azərbaycan Ordusunun 100 illiyi" yubiley medalları ilə təltif edilib.

2020-ci il sentyabrın 27-də başlayan Vətən müharibəsində kapitan Kənan İsrafilov tabor komandiri olaraq iştirak edib. Füzulinin, Cəbrayılın və Suqovuşanın azad edilməsi uğrunda gedən döyüşlərdə döyüş tapşırığını yerinə yetirən kapitan Kənan İsrafilov oktyabrın 5-də Suqovuşan istiqamətində gedən döyüşlərdə həlak olub.

Prezident İlham Əliyevin müvafiq sərəncamlarına əsasən, Kənan İsrafilov ölümündən sonra “Vətən uğrunda”, “Suqovuşanın azad olunmasına görə” medalları ilə təltif edilib.

Cəfər Cabbarlı adına “Azərbaycanfilm” kinostudiyası “Start-2023” adlı film layihəsi müsabiqəsi elan edib.

Kinostudiyadan AZƏRTAC-a bildirilib ki, milli kinematoqrafiya sahəsində fəaliyyət göstərən yaradıcı şəxslərə dəstək olmaq və bu istiqamətdə çalışan gənc rejissorların fəaliyyətini stimullaşdırmaq, eləcə də kino mühitinə yeni adlar qazandırmaq məqsədilə keçirilən müsabiqəyə tammetrajlı bədii, qısametrajlı bədii və qısametrajlı animasiya film layihələri qəbul olunur. Film müraciət olunan kateqoriyada debüt (birinci və ya ikinci) filmini çəkmək istəyən rejissorlar üçün nəzərdə tutulub. Müsabiqədə janr və mövzu məhdudiyyəti yoxdur.

Sənədlərin qəbulu noyabrın 1-dən yanvarın 31-dək elektron şəkildə musabiqe@azerbaijanfilm.az poçt ünvanı vasitəsilə aparılır. Müsabiqənin reqlamenti ilə daha ətraflı bu link vasitəsilə tanış olmaq mümkündür: https://azerbaijanfilm.az/news/start-2023-film-lahiyesi-musabiqesinin-reqlamenti

Qeyd edək ki, qalibləri kinostudiya nəzdində yaradılmış ekspert şurası müəyyən edəcək və onların adları 2023-cü il aprelin əvvəlində elan olunacaq. Qalib layihələrin növbəti illər ərzində kinostudiyada istehsala buraxılması nəzərdə tutulur.

“Sönməz Məşəl” Mədəni Əlaqələr İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Şuşa tarixi ingilis dilində” adlı layihənin icrasını başa çatdırıb.

Bu barədə AZƏRTAC-a İctimai Birliyin sədri Şəhla Nağıyeva məlumat verib.

O bildirib ki, bundan əvvəl “Sönməz Məşəl” Mədəni Əlaqələr İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Şuşanın dağları başı dumanlı” adlı bədii-sənədli film hazırlayıb. İctimai Televiziyanın texniki dəstəyi ilə çəkilən filmin ssenari müəllifi Müsəllim Həsənov, quruluşçu rejissoru Nəsimi Məmmədoğludur. Film İctimai Televiziyada bir neçə dəfə yayımlanıb və tamaşaçıların rəğbətini qazanıb.

İctimai birlik Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Şuşa tarixi ingilis dilində” adlı yeni layihə çərçivəsində həmin filmin ingilis dilində dublyaj olunmasını da başa çatdırıb.

Filmin mətnini BBC televiziyasının məşhur aparıcılarından olan Devid Soys səsləndirib.

Zəfər Günü ərəfəsində - noyabrın 4-də ADA Universitetində oxuyan əcnəbi tələbələr, xarici ölkələrin Bakıdakı diplomatik nümayəndələrinin iştirakı ilə filmin təqdimatı keçiriləcək.

Bundan başqa filmin Amerika Birləşmiş Ştatlarında da təqdimatı nəzərdə tutulur.

Bakı–Quba–Rusiya ilə dövlət sərhədi avtomobil yolunun 16-cı km-də, "VAZ dairəsi" kimi adlanan ərazidə yerləşən yol qovşağında hərəkətin təşkili ilə bağlı layihənin davamı olaraq Saray-Novxanı yolunda daha yaxın məsafədə yeni geriyə dönmə hissəsi yaradılıb.

Report xəbər verir ki, bu barədə Azərbaycan Avtomobil Yolları Dövlət Agentliyi məlumat yayıb.

Məlumata görə, bu, sıxlıq və tıxacın aradan qaldırılması məqsədilə edilib.

Ərazidə zəruri yol nişanları quraşdırılıb və üfiqi nişanlanma xətləri çəkilib.

Noyabrın 3-də “Azərxalça” ASC-nin İçərişəhərdə yerləşən nümayiş və satış salonunda Zəfər gününə həsr olunmuş “Zəfər” xalça kolleksiyasının təqdimatı olacaq.

“Azərxalça” ASC-dən AZƏRTAC-a bildirilib ki, Azərbaycanın Vətən müharibəsində əldə etdiyi möhtəşəm Qələbənin ildönümünə həsr olunmuş “Zəfər” kolleksiyası müsabiqə qaliblərinin əsərləri əsasında toxunub.

Müsabiqənin nəticələrinə görə ilk dördlüyə daxil olan xalçaların təqdimat mərasimində ictimai xadimlər, incəsənət nümayəndələri iştirak edəcək.

“Cultural Network House" (“Mədəniyyət Şəbəkələr Evi”) İctimai Birliyinin və Bakı Şəhər Mədəniyyət Baş İdarəsinin birgə təşkilatçılığı ilə yeni “Ustad dərsləri” layihəsinə start verilib.

AZƏRTAC xəbər verir ki, dünyaşöhrətli pianoçu Şahin Növrəslinin “Ustad dərsləri” layihəsi oktyabrın 29-da başlayıb və dekabrın 3-dək həftədə bir dəfə olmaqla həyata keçiriləcək. Layihə 3 mərhələdən ibarətdir. İlkin mərhələdə Bakı Şəhər Mədəniyyət Baş İdarəsinin tabeliyində olan uşaq musiqi və incəsənət məktəblərində təhsil alan şagirdlər arasında seçim turu keçirilib. Daha sonra Vaqif Mustafazadə adına 2 nömrəli Uşaq İncəsənət Məktəbində “Ustad dərsləri”nə başlanılıb. Həmçinin ustad dərsləri keçən şagirdlərin Şahin Növrəslinin rəhbərliyi ilə konsert proqramı və onlara sertifikatların təqdim edilməsi nəzərdə tutulur.

Layihənin məqsədi Bakı Şəhər Mədəniyyət Baş İdarəsinin tabeliyində olan Uşaq musiqi və incəsənət məktəblərində təhsil alan şagirdlərin klassik repertuarına daxil olan proqramlardan əlavə, ifaçılıq bacarığının ahəngdar inkişaf yollarını özündə cəmləşdirən kamil və universal musiqiçi hazırlamaqdır. Həmçinin caz musiqisinin uşaqlar arasında geniş təbliğini gerçəkləşdirməklə onların bədii estetik zövqünü yüksəltmək, istedadlı şagirdləri üzə çıxarmaq və onların yaradıcılıq qabiliyyətlərini inkişaf etdirməkdir. Eyni zamanda, şagirdlərin hərtərəfli şəxsiyyət kimi formalaşmasına dəstək olmaq, eləcə də musiqi təhsilində Avropa standartlarını tətbiq edib ustad dərsləri vasitəsilə onlara daha bir yeni ustad töhfəsi verməkdən ibarətdir.

Qeyd edək ki, “Cultural Network House" İctimai Birliyinin təşkil etdiyi mədəniyyət və incəsənət layihələri ölkəmizdə və ölkəmizin hüdudlarından kənarda Azərbaycan mədəniyyətinin təmsili və təbliğinə xidmət edir.

İtalyan rəssamı Tiziano Vecellionun “Venera və Adonis” adlı kətan üzərindəki rəsm əsəri dekabrın 7-də Londonda “Sotheby's” hərrac evində hərraca çıxarılacaq.

AZƏRTAC lenta.ru saytına istinadla xəbər verir ki, lot ilkin olaraq 12 milyon funtsterlinq dəyərində qiymətləndirilib.

Rəsm əsəri ustadın qədim Roma şairi Ovidinin “Metamorfozalar” poemasının qəhrəmanları Venera və Adonisin faciəvi hekayəsini əks etdirən yeddi əsərdən ibarət silsiləsinin bir hissəsidir. “Sotheby's” hərrac evinin qərarına görə, əsər rəssamın indiki dövrdə satılacaq ən qiymətli rəsmidir.

Qeyd edək ki, rəssamın sonradan yaratdığı rəsmlərin bir neçə variantı London Milli Qalereyasında, Los-Ancelesdəki “Getti” Muzeyində, Madriddəki “Prado” Muzeyində, Nyu-Yorkdakı Metropoliten İncəsənət Muzeyində, Oksforddakı “Eşmol” Muzeyində, Vaşinqton Milli İncəsənət Qalereyasında və Romadakı Milli Qədim İncəsənət Qalereyasında saxlanılır.

Bu gün Beynəlxalq Animasiya Günüdür.

AZƏRTAC xəbər verir ki, 2002-ci ildən ASİFA (Beynəlxalq Animasiya Kino Assosiasiyası) tərəfindən təsis edilən Animasiya Günü münasibətilə müxtəlif ölkələrdən tanınmış rəssamlar bir araya toplaşır.

Multiplikasiya filmlərini ilk dəfə Çarliz Emil Reno lentə alıb. Dünyanın 50-dən çox ölkəsində fərqli tədbirlərlə keçirilən animasiya günündə bu sahəyə həvəsi olan tələbələrin yeni filmləri nümayiş olunur.

Beynəlxalq Animasiya Günü Beynəlxalq Kino Assosiasiyası tərəfindən animasiya sənətinin yaradılmasında iştirak edən rəssamları, alimləri və texniki işçiləri tanımaq üçün təşkil edilir.

Bakı Şəhər Mədəniyyət Baş İdarəsinin Xəzər rayon Mərkəzləşdirilmiş Kitabxana Sisteminin 2 nömrəli filialı İkinci Qarabağ müharibəsi şəhidi baş leytenant Vüsal Babayevin xatirəsinə həsr olunmuş videoçarx hazırlayıb.

Baş İdarədən AZƏRTAC-a bildirilib ki, videoçarxda şəhidin həyat və döyüş fəaliyyəti barədə məlumat verilir.

Vüsal Babayev 1992-ci il yanvarın 8-də Bakı şəhərinin Pirallahı rayonunun Pirallahı adasında anadan olub. O, Pirallahı rayon 186 nömrəli tam orta məktəbini bitirib.

Vüsal Babayev orta məktəbi bitirdikdən sonra elə həmin il Heydər Əliyev adına Azərbaycan Ali Hərbi Məktəbinə (indiki Milli Müdafiə Universiteti) daxil olub. 2014-cü ildə hərbi məktəbi leytenant rütbəsi ilə bitirib. Daha sonra baş leytenant rütbəsinə layiq görülüb. Həmin il Silahlı Qüvvələrin Təlim və Tədris Mərkəzinə daxil olub. 2015-ci ildə Yerüstü artilleriya taqım komandiri kursunu bitirib.

Vüsal Babayev 2015-ci ildə Goranboy rayonunda “N” saylı hərbi hissədə, sonuncu dəfə, 2018-ci ildə isə Abşeron rayonunun Pirəkəşkül qəsəbəsində ağır artilleriya hissəsində komandir vəzifəsində xidmət göstərib. Bu müddətdə məsuliyyətli, peşəkar hərbçi mütəxəssis kimi fəxri fərman və medalla təltif olunub. Vüsal bir çox hərbi təlimlərdə də iştirak edib.

2020-ci il 27 sentyabr tarixində Vətən müharibəsi başlayan kimi Vətəni canından artıq sevən cəsur zabit öz vəzifə borcunu yerinə yetirmək üçün ön cəbhəyə yollanır. Cəsur komandir Vüsal Babayev 2020-ci il oktyabrın 21-i Füzuli rayonunun Gecəgözlü kəndində yaralı döyüş yoldaşını xilas edərkən yanına mərmi düşməsi nəticəsində ən ali məqama - şəhidlik zirvəsinə ucalır.

Ailəli idi, iki övladı yadigar qalıb.

Azərbaycan Respublikasının Prezidenti İlham Əliyevin müvafiq sərəncamlarına əsasən, Vüsal Babayev ölümündən sonra “Vətən uğrunda”, “Füzulinin azad olunmasına görə” medalı ilə təltif edilib.

Ailəsi şəhid Vüsal Babayevin xatirəsini əbədiləşdirmək məqsədilə onun şəxsi əşyalarını Azərbaycan İstiqlal Muzeyinə bağışlayıb.