XƏBƏRLƏR

Oktyabrın 28-də Abdulla Şaiq adına Azərbaycan Dövlət Kukla Teatrında tanınmış rejissor, istedadlı səhnə xadimi Namiq Ağayevin 60 illik yubiley gecəsi keçiriləcək.

Teatrdan AZƏRTAC-a bildirilib ki, gecədə kuklaçı rejissorun sənət yoluna nəzər salınacaq, quruluş verdiyi tamaşalardan səhnəciklər nümayiş olunacaq.

Xatırladaq ki, yaradıcılığa başladığı ilk vaxtlardan fərqli üslubu və quruluşları ilə seçilən Namiq Ağayev kukla teatrı tarixində xüsusi yeri olan rejissorlardandır.

O, Azərbaycan Dövlət Kukla Teatrının baş rejissoru kimi fəaliyyət göstərdiyi illərdə (1987-1993) bir-birindən maraqlı səhnə işlərinə imza atıb, teatral təcrübələrilə daim seçilib.

Quruluş müəllifi olduğu “Bakı həyatının rekviyemi”, “Qar qızı”, “Yeddi gözəl”, “Əhmədin ları xoruzu”, “Oxaq və Əhməd”, “Göy saqqal”, “Xəlifə və hacıleylək”, “Məlikməmməd”, “Keçəlin toyu”, “Son əhvalat”, “Bülbül” kimi tamaşalar ilə Rusiya, İran, Türkiyə, İtaliya, Yunanıstan, İngiltərə, Polşa və digər ölkələrdə keçirilən nüfuzlu beynəlxalq festivallarda iştirak edib, teatra müxtəlif mükafatlar qazandırıb.

Namiq Ağayev 1993-2001-ci illərdə Türkiyədə yaşayıb, oradakı dövlət və şəhər teatrlarında tamaşalara quruluş verib. 2002-ci ildən fəaliyyətini televiziya rejissoru kimi davam etdirən N.Ağayev kino sahəsində də özünü sınayıb və bir sıra uğurlu işlərə imza atıb. Uzun illərdən sonra yenidən Kukla Teatrı ilə əməkdaşlığa cəlb olunan rejissor hazırda repertuarda olan “Qara balığın nağılı” (S.Behrəngi) tamaşasını hazırlayıb.

Noyabrın 7-də Bakıda dünyaca məşhur xoreoqraf və performer Şahar Binyamini tərəfindən ustad dərsləri keçiriləcək.

YARAT-dan AZƏRTAC-a bildirilib ki, noyabrın 12-də davam edəcək müasir rəqs üzrə ustad dərsləri YARAT Müasir İncəsənət Mərkəzində reallaşacaq.

Ustad dərsləri Şahar Binyamini və onun assistenti Cozef Kudra tərəfindən keçiriləcək.

Şahar Binyamini əslən İsraildən olan xoreoqraf və performerdir. 2006-2013-cü illərdə "Batsheva Dance Company" kollektivinin tərkibində çıxışlar edib. Həmçinin Şahar Binyamini beynəlxalq səviyyəli quruluşların yaradıcısı kimi sayılır.

İsrailli xoreoqraf, müasir rəqqas, "Qaqa" adlı unikal rəqs sisteminin, dilinin, pedaqogikasının yaradıcısı və müəllimi Ohad Naharinin assistenti kimi Şahar Binyamini bütün dünya üzrə rəqs kollektivləri ilə işləyir. 2013-cü ildə Şahar Binyamini Veysman Elm İnstitutunun professoru Atan Qross ilə birgə, rəqqaslar, elm adamları və xoreoqraflardan ibarət "TNUDA" elmi-tədqiqat qrupunu təsis edib. Elə həmin Veysman İnstitutunda yerləşən qrupun əsas məqsədi elm və hərəkət arasında əlaqələri araşdırmaqdır. 2020-ci ildə Şahar, Veysman Elm İnstitutu tərəfindən təşkil edilmiş unikal art-rezidentura proqramında iştirak etmək üçün dəvət edilən ilk artist oldu. Rezidentura ərzində o, "EVOLVE" quruluşunu yaratdı. Bu əsərin premyerası institutda baş tutdu və dünyanın bir çox ölkələrində nümayiş etdirildi.

Şahar Binyamini İsrail Mədəniyyət Nazirliyi tərəfindən təsis edilmiş 2021-ci ilin ən uğurlu xoreoqrafı mükafatına layiq görülüb.

Azərbaycan Turizm Bürosu Asiya-Sakit Okean Turizm Assosiasiyasının (PATA) illik sammitində iştirak edir.

Dövlət Turizm Agentliyindən AZƏRTAC-a bildirilib ki, Birləşmiş Ərəb Əmirliklərinin Ras-əl-Xaym şəhərində keçirilən sammit “Dünya və dayanıqlı turizm” mövzusuna həsr olunub. Sammitin əsas məqsədi turizm üzrə dünya liderləri ilə pandemiyadan sonrakı dövrdə dayanıqlı turizm istiqamətində atılan real addımlara dair öhdəlikləri müzakirə etməkdir.

Azərbaycan Turizm Bürosunun Baş icraçı direktoru Florian Zenqstşmid “Dayanıqlı səyahət istiqamətində turizm strategiyaları: turizmə yeni baxış” adlı sessiyada panel spikeri qismində iştirak edib.

Florian Zenqstşmid çıxışı zamanı dayanıqlı turizmin formalaşdırılması istiqamətində son illər ölkədə inkişaf etdirilən quş müşahidəçiliyi, haykinq, “Slou Fud”, mədəni irs marşrutları və s. kimi turizm məhsulları və layihələr haqqında məlumat verib. O, həmçinin turizmin inkişafında ölkənin sahib olduğu mədəni və tarixi irsin qorunmasının əhəmiyyətini vurğulayıb.

Sessiyada, həmçinin Yaponiya, Hindistan, İndoneziya və Maldivin Turizm və İqtisadiyyat nazirliklərinin nümayəndələri təmsil olunublar.

Sammit çərçivəsində keçirilən sərgidə Azərbaycanın turizm potensialını əks etdirən broşürlər, milli şirniyyatlarımızdan nümunələr ziyarətçilərə təqdim olunub.

Tədbir Asiya-Sakit Okean, Şimali Amerika, Avropa və Yaxın Şərq regionlarının turizm liderlərini bir araya gətirir.

Azərbaycan PATA-ya 2019-cu ildən etibarən üzvdür.

Yaradıcı sənayelərdə qabaqcıl təcrübələrin öyrənilməsi və beynəlxalq əməkdaşlığın gücləndirilməsi istiqamətində Azərbaycan Yaradıcı Sənayelər Federasiyasının fəaliyyəti davam edir.

Federasiyadan AZƏRTAC-a bildirilib ki, bu yaxınlarda Avropa İttifaqı tərəfindən maliyyələşdirilən, Höte İnstitutu tərəfindən icra olunan #EU4Culture layihəsi çərçivəsində fərdi mobillik proqramının birinci mərhələsinin qalibi kimi Azərbaycan Yaradıcı Sənayelər Federasiyasının İdarə Heyətinin sədr müavini Telman Məlikzadə Çexiyanın Kreativ Praqa (Kreativní Praha) təşkilatının dəvəti ilə bir həftə ərzində Çexiya Respublikasında təcrübə və öyrənmə səfərində olub.

Səfər proqramı çərçivəsində Çexiyanın Mədəniyyət Nazirliyində, UNESCO yaradıcı şəhəri kimi Praqa ədəbiyyat şəhərinin layihə əlaqələndirmə ofisində (https://www.prahamestoliteratury.cz/en/about/), Ostrava şəhərinin kreativ klasteri olan Dolni Vitkovica məkanında, Praqa İnnovasiyalar Platformasında, Çarls Universitetinin Kampus Hybernska kreativ habında , Art&Digital Lab H40 yaradıcılıq inkubator mərkəzində, Çexiyanın Sənaye və Ticarət Nazirliyi nəzdindən fəaliyyət göstərən “Çexİnvest” şirkətinin Yaradıcı Sənayelər üzrə Texnoloji İnkubasiya mərkəzində görüşlər keçirilib. Bundan başqa, T.Məlikzadə Brno şəhərində kreativ günlər festivalının açılışında iştirak edərək Kumst kreativ habın təşkilatçılığı ilə keçirilən şəbəkələşmə görüşündə Azərbaycan Yaradıcı Sənayelər Federasiyası, ölkəmizdə yaradıcı sənayelərin inkişafı istiqamətində atılan addımlar, #EU4Culture layihəsinin bu istiqamətdə açdığı imkanlar, yerli şəhərlər üçün mədəni inkişaf strategiyalarının inkişafı üzrə müsabiqənin qalibi olmuş “Lənkəran mədəni inkişaf strategiyası” layihəsi haqqında çıxış edib.

Vacib görüşlər sırasında Avropa Yaradıcı Biznes Şəbəkəsinin direktoru Gerin Trautenberger ilə görüş baş tutub və Federasiyanın Avropa Yaradıcı Biznes Şəbəkəsinə üzvlüyü Trautenberger ilə müzakirə edilib. Nəticə olaraq, Azərbaycan Yaradıcı Sənayelər Federasiyası Avropa Yaradıcı Biznes Şəbəkəsinə (ECBN) üzv qəbul olunub. 

Azərbaycan Yaradıcı Sənayelər Federasiyası ölkəmizdə mədəniyyət, incəsənət və yaradıcılıq sahəsində fəaliyyət göstərən menecerləri və yaradıcı gəncləri #EU4Culture proqramının növbəti mərhələlərində fəal olmağa və faydalı öyrənmə və təcrübə qazanma imkanlarından istifadə etməyə dəvət edir.

“Qazaxıstan-Azərbaycan marşrutu üzrə Xəzərin dibi ilə fiber-optik xətlərin çəkilişinə 2023-cü ildə başlanılacaq”.

“Report” Qazaxıstan mətbuatına istinadən xəbər verir ki, bunu Qazaxıstanın rəqəmsal inkişaf, innovasiya və aerokosmik sənaye naziri Bağdat Musin deyib.

Bu layihə region ölkələrini alternativ internetə çıxışla təmin edəcək, həmçinin Avropa və Asiya arasında trafikin tranzitini genişləndirəcək.

Layihənin tərəfdaşı qismində Qazaxıstan tərəfində “Qazaxtelecom”, Azərbaycan tərəfdən isə “AzerTelecom” çıxış edəcək.

Təxminən, 340 kilometrlik fiber-optik xəttin əsas marşrutu Qazaxıstanın Aktau şəhərindən başlayacaq və Azərbaycanın Siyəzən rayonuna qədər uzanacaq. Uzunluğu, təxminən, 330 kilometr olan ehtiyat xətt isə Qazaxıstanın Kurık dəniz limanından Bakının Buzovna qəsəbəsinə qədər çəkiləcək.

Nazir vurğulayıb ki, Mərkəzi Asiya ölkələri layihənin həyata keçirilməsində maraqlıdır, çünki rezidentlərin internetə zəmanətli çıxışının təmin edilməsində alternativ marşrutların mövcudluğu böyük rol oynayır.

Bu gün "Bakı Metropoliteni" QSC-nin “Gənclik” stansiyasının keçidlərində qurumun 55 illik yubileyinə həsr olunmuş sərgi açılıb.

Report xəbər verir ki, “Bakı metropoliteni-55. Yolları qovuşduran illər” adlanan sərginin təşkilatçıları Azərbaycan Dövlət İnformasiya Agentliyi (AZƏRTAC) və Milli Arxiv İdarəsinin tabeliyindəki Dövlət Kino-Foto Sənədləri Arxividir.

Sərginin 92 stendində xronoloji ardıcıllıqla 117 nadir fotoşəkil təqdim olunub. Hər stenddə onillik üzrə təqdim olunan metropolitenin tarixi təsvirində izləyicilərə müfəssəl məlumat almaq imkanı yaradılıb.

Sərginin 6 aya yaxın davam etdirilməsi nəzərdə tutulub. İzləyicilərə nümayiş olunan fotolarla virtual qaydada da tanış olmaq imkanı yaradılıb. Bunun üçün izləyicilər fotostendlərdə yerləşdirilmiş QR-kodları mobil cihazlarına yükləyərək, metropolitenin rəsmi saytında yaradılmış bölməyə daxil olaraq, hər bir stend barədə ətraflı məlumat ala bilərlər.

Bakı Şəhər Mədəniyyət Baş İdarəsinin Yasamal rayon Heydər Əliyev Mərkəzində şəhid ailələrinin iştirakı ilə tədbir keçirilib.

Baş İdarədən AZƏRTAC-a bildirilib ki, tədbirdə Yasamal Rayon İcra Hakimiyyəti başçısının müavini Təravət Muradova, şəhid anaları, şəhidlərin ailə üzvləri, Vətən müharibəsi iştirakçıları və icra hakimiyyətinin şəhid ailələri ilə işin təşkili şöbəsinin müdiri Samir İsmiyev, Mərkəzin direktoru Naminə Ömərova və digər qonaqlar iştirak ediblər.

Təravət Muradova çıxışı zamanı Azərbaycanın ərazi bütövlüyü uğrunda öz canından keçmiş şəhidlərimizin ailələrinə, qazilərə dövlət tərəfindən göstərilən böyük diqqət və qayğıdan danışıb.

Tədbir zamanı şəhid Şahin Əsgərovun anası Rəfiqə xanım və şəhid ailə üzvləri şəhidlərimizin vətən sevgisindən, döyüşlərdə göstərdikləri şücaətlərdən danışıb, onlarla qürur duyduqlarını söyləyiblər.

Bakı Şəhər Mədəniyyət Baş İdarəsi Xətai rayon Mərkəzləşdirilmiş Kitabxana Sisteminin Mərkəzi Kitabxanasında “Əbədi yaşayanlar" başlığı altında şəhidlərə həsr olunan layihə davam edir. Layihənin növbəti təqdimatı Xüsusi Təyinatlı Qüvvələrin leytenantı, şəhid Elnur Vəliyevə həsr olunub.

Baş İdarədən AZƏRTAC-a bildirilib ki, layihədə Azərbaycanın bütövlüyü, toxunulmazlığı və azadlığı uğrunda canından keçən şəhidlərimizin ömür yolundan bəhs edilib. Qeyd olunub ki, şəhidlərimizi tanımaq, xatirələrini əbədi tutmaq hər bir azərbaycanlının vətəndaşlıq borcudur.

Diqqətə çatdırılıb ki, Ucar rayonunda anadan olan Elnur Vəliyev 2014-cü ildə Heydər Əliyev adına Ali Hərbi Məktəbə qəbul olub. 2018-ci ildə hərbi məktəbə bitirdikdən sonra Xüsusi Təyinatlı Qüvvələrin (XTQ) təlimlərinə qatılıb. Azərbaycan Ordusunun leytenantı olan E.Vəliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Xocavəndin azadlığı uğrunda gedən döyüşlərdə iştirak edib. Oktyabrın 26-da Xocavənd döyüşləri zamanı şəhid olub və Ucar şəhərinin Şəhidlər xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq, hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin sərəncamlarına əsasən Elnur Vəliyev ölümündən sonra “Vətən Uğrunda”, "Vətən müharibəsi iştirakçısı”, “Kəlbəcərin azad edilməsinə görə”, “Cəbrayılın azad edilməsinə görə”, “Xocavəndin azad edilməsinə görə”, “Füzulinin azad edilməsinə görə” və "Şücaətə görə” medalları ilə təltif edilib.

Mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən, mədəniyyət naziri Anar Kərimov tərəfindən noyabrın 29-da saat 10:00-da Yevlax şəhər Heydər Əliyev Mərkəzində (Yevlax şəhəri, Nizami prospekti 61) Yevlax və Mingəçevir şəhərlərindən, eləcə də Bərdə və Tərtər rayonlarından olan vətəndaşları qəbul edəcək.

Bu gün Bakıda fəaliyyətə başlayan E1 ekspres marşrut xəttində gediş haqqı daha əvvəl elan edildiyi kimi 60 qəpik deyil 50 qəpik olacaq.

Bu barədə Reporta Bakı Nəqliyyat Agentliyindən (BNA) məlumat verilib.

Bildirilir ki, bu addım E1 xəttinin cəlbediciliyini daha da artırmaq və vətəndaşların qanunsuz sərnişindaşımalardan çəkindirmək məqsədilə edilib.

Xatırladaq ki, yeni xətt üzrə avtobuslar metronun “Xalqlar Dostluğu” stansiyasından başlayaraq Qara Qarayev prospekti - “Koroğlu” metro stansiyası - Heydər Əliyev prospekti - Yusif Səfərov küçəsi - Neftçilər prospekti – “Azneft” dairəsi - Bibiheybət -Lökbatan Nəqliyyat Mübadilə Mərkəzi istiqamətində hərəkət edəcək.

Marşrut xətti üzrə sərnişindaşımaları “BakuBus” MMC-nin istismarında olan avtobuslarla icra ediləcək. İlkin mərhələdə daşımalara 10 ədəd avtobus cəlb ediləcək. Xətt üzrə avtobuslar səhər saat 06:30-dan axşam saat 18:30-a qədər fəaliyyət göstərəcək. Avtobuslar hərəkət sxemi üzrə bütün dayanacaq məntəqələri üzrə deyil, yalnız əvvəlcədən müəyyən edilmiş sərnişin təlabatı daha çox olan məntəqələrdə dayanacaq.