XƏBƏRLƏR

Ədəbi-publisistik, elmi-nəzəri yaradıcılığı, eləcə də ictimai-siyasi fəaliyyəti ilə tariximizdə xüsusi yeri olan görkəmli ədib Mirzə İbrahimov XX əsrin 30-cu illərindən başlayaraq ömrünün sonunadək Azərbaycanın mədəni və ideoloji siyasi həyatında silinməz izlər qoyub. O da Mirzə Fətəli Axundzadə, Həsən bəy Zərdabi, Cəlil Məmmədquluzadə, Əli bəy Hüseynzadə, Hacı Zeynalabdin Tağıyev kimi millət və Vətən fədaisi idi.

AZƏRTAC xəbər verir ki, bu gün Xalq yazıçısı, Sosialist Əməyi Qəhrəmanı, Dövlət mükafatları laureatı, akademik Mirzə İbrahimovun anadan olmasının 111-ci ildönümü tamam olur.

Mirzə Əjdər oğlu İbrahimov 1911-ci il oktyabrın 28-də Cənubi Azərbaycanın Sərab şəhərinin yaxınlığında olan Eyvaq kəndində doğulub. 1918-ci ildə atası və qardaşı ilə Bakıya gəlib. Bir ildən sonra atasını itirən 9 yaşlı Mirzə Balaxanı və Zabrat kəndlərində muzdurluq edərək öz zəhməti hesabına dolanmağa başlayıb.1926-1930-cu illərdə Balaxanıdakı fabrik-zavod məktəbində oxumaqla yanaşı, bir parça çörək qazanmaq məqsədilə işləyib. Həmin vaxtlarda qəlbində ədəbiyyata maraq hiss edən yeniyetmə oğlan Zabratda fəhlə ədəbiyyat dərnəyinə gedib.

Mirzə İbrahimovun “Qazılan buruq” adlı ilk şeiri 1930-cu ildə “Aprel alovları” məcmuəsində dərc olunub. İlk şeirinin mətbuatda dərc olunması onu fərəhləndirib, elə həmin vaxtdan da ədəbi-bədii yaradıcılıqla böyük ilhamla məşğul olub. Hələ gənclik illərindən keçmiş sovetlər birliyində olan şəhərlərə səfərlərində əməkçi insanların həyatı, ictimai fəaliyyəti, mənəvi aləmi ilə yaxından tanış olub, yazdığı əsərlərində onların obrazını yaratmağa, həyat gerçəkliklərini təsvir etməyə çalışıb. M.İbrahimov yaradıcılığın bir çox janrında (oçerk, publisistika, nəsr, dramaturgiya, ədəbi tənqid), əsərlər ərsəyə gətirib, eyni zamanda, ədəbi tənqidlə də ciddi məşğul olub.

M.İbrahimov 1935-37-ci illərdə SSRİ Elmlər Akademiyasının Leninqrad (indiki Sankt-Peterburq) Şərqşünaslıq İnstitutunun aspiranturasında təhsil alır və görkəmli Azərbaycan yazıçısı C.Məmmədquluzadənin həyat və fəaliyyətini tədqiq edərək namizədlik dissertasiyasını müdafiə edir. 1945-ci ildə Azərbaycan Elmlər Akademiyası təsis olunarkən onun ilk seçilən 15 həqiqi üzvündən biri də 34 yaşlı Mirzə İbrahimov olub və bundan sonra elmi fəaliyyətini də bədii yaradıcılığı ilə birlikdə qoşa qanadlar kimi davam etdirib. Təsadüfi deyildir ki, yazıçı elm, təhsil, mədəniyyət sahələrində də mühüm vəzifələrdə çalışıb, bununla da təhsilin, mədəniyyətin inkişafına öz töhfəsini verib.

1941-ci ildə o, Cənubi Azərbaycanda “Vətən yolunda” qəzetində məsul redaktor vəzifəsində işləyib. 1942-ci ildə isə Uzaq Şərqdə Xabarovsk, Vladivostok hərbi dairələrində 416-cı diviziyanın döyüşçüləri ilə görüşüb, özünün alovlu çıxışları ilə onlarda ruh yüksəkliyi yaratmağa çalışıb. Bu dövrdən başlayaraq yazıçı əsasən Cənubi Azərbaycan mövzusunda bir çox hekayələr – “Qorxulu səs”, “Sənət aşiqləri”, “Zəhra”, “Yol ayrıcında”, “Mələk”, “On iki dekabr”, “Azad”, “Tonqal başında”, “İztirabın sonu”, eləcə də “Xosrov Ruzbeh”, “Güləbətin”, “Pərvizin həyatı” povestlərini, “Gələcək gün”, “Böyük dayaq”, “Pərvanə” romanlarını yazır. Bundan sonra bir-birinin ardınca səhnə əsərlərini – “Kəndçi qızı”, “Yaxşı adam” komediyalarını, yazıçı, dramaturq, doktor Nəriman Nərimanovun mübarizələr içində keçən həyatından bəhs edən “Közərən ocaqlar” dram əsərini də ictimaiyyətə təqdim edir.

M.İbrahimov U.Şekspirin "Kral Lir", "On ikinci gecə, yaxud hər nə istəsəniz", A. N. Ostrovskinin "Quduz pullar", "Müdrik olan hər kəsə kifayətdir sadəlik", A.P.Çexovun "Üç bacı", A. Satramovun "Kişilərə inanmayın", Molyerin "Don Juan" pyeslərini Azərbaycan dilinə tərcümə edib.

Görkəmli yazıçı “Həyat və ədəbiyyat”, “Gələcək gün” “Böyük dayaq”, “Pərvanə” və digər kitabları ilə ədəbiyyatımızı bir-birindən maraqlı əsərlərlə zənginləşdirib.

M.İbrahimov hekayə, povest və romanlarla yanaşı, səhnə əsərlərini də qələmə alıb, “Həyat”, “Madrid”, “Məhəbbət”, “Kəndçi qızı”, “Yaxşı adam”, “Közərən ocaqlar” pyesləri ilə Azərbaycan dramaturgiyasını zənginləşdirib.

Dünya ədəbiyyatı klassiklərinin əsərlərini ana dilimizə çevirmiş Xalq Yazıçısı Mirzə İbrahimovun bu günədək aktuallığını itirməyən kitabları müxtəlif dillərə tərcümə olunaraq keçmiş Sovet İttifaqının hüdudlarından kənarda da oxunub, əsərləri əsasında bədii və sənədli filmlər çəkilib. O, həm də görkəmli ictimai xadim idi. Ən böyük amalı xalqına xidmət etmək olan M.İbrahimov çoxşaxəli fəaliyyəti dövründə ana dilimizin saflığı uğrunda dönmədən mübarizə aparıb.

Dövrünün milli ruhlu şəxsiyyəti olan ədibin əsərlərində doğulduğu torpağa, el-obaya, klassik ədəbi irsimizə, folklor qaynaqlarımıza, bütövlükdə Azərbaycan mədəniyyətinə dərin məhəbbət, soy-kökünə, milli adət-ənənələrimizə sıx bağlılıq var.

Mirzə İbrahimov 1993-cü il dekabrın 17-də Bakıda vəfat edib, Fəxri xiyabanda dəfn olunub.

Məşhur ingilis müğənnisi Ed Şeranın həyatından bəhs edən film çəkiləcək.

AZƏRTAC xəbər verir ki, “Qremmi” və “Bilboard” mükafatları laureatı müğənni “The Sun” qəzetinə verdiyi müsahibədə filmin çəkilişləri barədə danışıb.

Qeyd edək ki, sənədli film 31 yaşlı müğənninin həyatından və yaradıcılığından bəhs edəcək.

Beynəlxalq Türk Akademiyasının sədr müavini Füzuli Məcidli TÜRKSOY-un baş katibi Sultan Raev ilə görüşüb.

AZƏRTAC xəbər verir ki, görüşdə tərəflər gündəlikdə duran mühüm layihələri müzakirə edib, memorandum çərçivəsində birgə fəaliyyətlə bağlı fikir mübadiləsi aparıblar.

Akademiyanın vitse-prezidenti birgə layihələrin həyata keçirilməsi üçün yol xəritəsi ilə bağlı fikirlərini bölüşüb.

Baş katib Raev isə TÜRKSOY təşkilatının gələcək fəaliyyəti haqqında məlumat verib və Türk Akademiyasının layihələrdə iştirakını təklif edib. O, Akademiyanın Türk Dünyasının elmi əməkdaşlıq təşəbbüslərini də dəstəklədiyini bildirib.

Britaniya Kral Sikkəxanası üzərində Böyük Britaniyanın yeni kralı III Çarlzın təsviri olan 50 pens nominalında sikkələrin buraxılmasına başlayıb.

"Report" TASS-a istinadən xəbər verir ki, bu barədə "The Daily Telegraph" məlumat yayıb.

Bu il dizaynı heykəltəraş Martin Cenninqs tərəfindən hazırlanmış 9,6 milyon sikkə zərb ediləcək. Bu sikkələr dekabr ayında dövriyyəyə buraxılacaq.

Britaniya tarixində rekord 70 il 7 ay hakimiyyətdə olmuş Kraliça II Yelizavetanın xatirəsinə hörmət əlaməti olaraq sikkələrin reversində onun portreti əks olunacaq.

Kralın təsviri olan yeni sikkələrlə yanaşı, II Yelizavetanın təsviri olan sikkələr də dövriyyədə qalacaq. Hazırda Böyük Britaniyada üzərində mərhum Kraliça II Yelizavetanın təsviri əks olunmuş 27 milyard sikkə dövriyyədədir.

Oktyabrın 28-də mədəniyyət naziri Anar Kərimov, Xalq artisti, Azərbaycan Dövlət Simfonik Orkestrinin bədii rəhbəri və baş dirijoru Rauf Abdullayevlə görüşüb.

Nazirlikdən AZƏRTAC-a bildirilib ki, Rauf Abdullayevi anadan olmasının 85 illiyi münasibətilə təbrik edən Anar Kərimov ona yeni yaradıcılıq uğurları arzulayıb.

Azərbaycan mədəniyyətində xüsusi yeri olan sənətkar, yeni layihələr və gənc nəslin musiqi zövqünün formalaşmasında həyata keçirilən tədbirlərdən, gənc və istedadlı musiqiçi nəslinin doğru istiqamətləndirilməsi yönündə aparılan işlərdən söhbət açıb.

Bu il görkəmli Azərbaycan bəstəkarı, ictimai xadim Fikrət Əmirovun anadan olmasının 100 illiyi tamam olur və Prezident İlham Əliyevin müvafiq Sərəncamı ilə bəstəkarın yubileyinə həsr edilmiş bir sıra silsilə tədbirlər keçirilir. Məlum olduğu kimi, Fikrət Əmirovun anadan olmasının 100 illiyi UNESCO-nun 2022-2023-cü illər üzrə yubileylər proqramına daxil edilib və bu yubiley noyabrın 9-dan 24-dək Parisdə keçirilən UNESCO-nun 41-ci Baş Konfransı çərçivəsində beynəlxalq miqyasda qeyd ediləcək.

AZƏRTAC xəbər verir ki, noyabrın 3-də Azərbaycan Respublikası Mədəniyyət Nazirliyinin və UNESCO-nun birgə təşkilatçılığı ilə Fikrət Əmirovun 100 illik yubileyinə həsr edilmiş musiqi axşamı Parisdə, UNESCO-nun baş qərargahının konsert zalında keçiriləcək.

Konsertdə Azərbaycan Respublikasının Xalq artisti, dirijor Fəxrəddin Kərimovun rəhbərliyi ilə Üzeyir Hacıbəyli adına Azərbaycan Dövlət Simfonik Orkestri, SSRİ və Azərbaycanın Xalq artisti Fərhad Bədəlbəyli, Əməkdar artistlər Səbinə Əsədova, Babək Niftəliyev, gənc müğənnilər Selcan Nəsibli, Orxan Cəlilov çıxış edəcəklər. Konsert proqramına bəstəkarın “Azərbaycan kapriççiosu”, “Gülüstani Bayatı-Şiraz”, “Azərbaycan süitası”, Fikrət Əmirov ilə Elmira Nəzirovanın həmmüəllifliyi ilə bəstələnmiş “Ərəb mövzuları əsasında Fortepiano konserti” və digər əsərlər daxil edilib.

Turizm sahəsində əlaqələrin inkişafı və əməkdaşlığın genişləndirilməsi məsələləri oktyabrın 28-də Azərbaycan Turizm Agentlikləri Assosiasiyasının (ATAA) İdarə Heyətinin sədri Göydəniz Qəhrəmanovla İsveçrə Konfederasiyasının Azərbaycandakı səfiri Muriel Peneveyra ilə keçirilən görüşdə müzakirə olunub.

ATAA-dan AZƏRTAC-a bildirilib ki, görüşdə Assosiasiya ilə İsveçrə Konfederasiyasının turizm subyektləri arasında qarşılıqlı əməkdaşlıq imkanlarının artırılması, kommunikasiya əlaqələrinin qurulması, birgə işbirliyinin yaradılması, tanışlıq məqsədli infoturların təşkili, eləcə də təcrübə mübadiləsinin aparılması, birgə layihələrin hazırlanması məsələləri ətrafında fikir mübadiləsi aparılıb.

Həmçinin birbaşa aviareyslərin təşkili, turist cəlbediciliyinin artırılması, isveçrəli turistlər üçün Azərbaycan-Gürcüstan-Türkiyə birgə səyahət marşrutunun yaradılması təklifləri üzərində müzakirələr aparılıb.

Görüşdə Azərbaycanın turizm bazarı üçün Avropa ölkələri ilə əməkdaşlığın vacibliyi vurğulanıb.

Bakı Şəhər Mədəniyyət Baş İdarəsi Xətai rayon Mərkəzləşdirilmiş Kitabxana Sisteminin Mərkəzi Kitabxanası “Əbədi yaşayanlar" adlı şəhidlərə həsr olunan layihəni davam etdirir. Layihənin növbəti təqdimatı Vətən müharibəsi şəhidi baş çavuş Ruslan Sadıqova həsr olunub.

Baş İdarədən AZƏRTAC-a bildirilib ki, tədbirdə Azərbaycanın bütövlüyü, toxunulmazlığı və azadlığı uğrunda canından keçən şəhidlərimizin ömür yolundan bəhs edilib. Qeyd olunub ki, şəhidlərimizi tanımaq, xatirələrini əbədi tutmaq hər bir azərbaycanlının vətəndaşlıq borcudur.

Diqqətə çatdırılıb ki, Şəki rayonunun Cəfərabad kəndində anadan olan Azərbaycanın Daxili İşlər Nazirliyinin Daxili Qoşunlarının baş çavuşu Ruslan Sadıqov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib. Suqovuşanın, Cəbrayılın, Füzulinin, Xocavəndin və Şuşanın azadlığı uğrunda gedən döyüşlərdə vuruşub. Ruslan Sadıqov 2020-ci il noyabrın 7-də Şuşa döyüşləri zamanı həlak olub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin sərəncamlarına əsasən Ruslan Sadıqov ölümündən sonra "Vətən uğrunda", "Şuşanın azad olunmasına görə” medalları ilə təltif edilib.

Bakı Şəhər Mədəniyyət Baş İdarəsi Nərimanov rayon Mərkəzləşdirilmiş Kitabxana Sisteminin Mərkəzi Kitabxanası Bakı Avrasiya Universitetində “Narkomaniyaya yox deyək” adlı maarifləndirici tədbir keçirib.

Baş İdarədən AZƏRTAC-a bildirilib ki, tədbirin təşkilində məqsəd, gənclərin sağlam həyat tərzi barədə dünyagörüşünün formalaşdırılması, narkotik vasitələrin, psixotrop maddələrin qanunsuz dövriyyəsinə və narkomanlığa qarşı maarifləndirmənin aparılması olub.

Kitabxananın əməkdaşları G.Süleymanova və G.Eyvazova çıxış edərək, narkotik asılılığın yaranma səbəbləri, narkotik maddələrdən psixi və fiziki asılılıq, davranışlarda baş verən dəyişikliklər, eyni zamanda psixoaktiv maddələrdən istifadənin risk amilləri, narkotik asılılığın formalaşma mərhələləri, onların sağlamlığa zərərli təsiri barədə məlumatlar veriblər.

Sonda gənclərə sağlam həyat tərzi seçmək, zərərli vərdişlərdən uzaq olmaq tövsiyə edilib.

Gələn il Şuşada beynəlxalq "Dədə Qorqud Türk Dünyası Film Festivalı” təşkil olunacaq.

AZƏRTAC xəbər verir ki, bu barədə Türkiyənin mədəniyyət və turizm nazirinin müavini Ahmet Misbah Demircan bildirib.

"Festival çərçivəsində ortaq istehsal üçün zəmin yaratmağı, müsabiqə çərçivəsində yeni filmlərin mükafatlandırılmasını və türk respublikalarının nazirlərini bir araya gətirməyi qarşımıza məqsəd qoymuşuq. Bu il türk dünyasının mədəniyyət paytaxtı Bursada təşkil etdiyimiz üçüncü festivalı gələn il Azərbaycanın Şuşa şəhərində keçirəcəyik. Bu, ortaq irsimizin birgə istehsala çevrilməsinə zəmin yaradacaq”, - deyə nazir müavini deyib.

Bursa şəhərində bu il ikinci dəfə noyabrda 1-5-də keçiləcək "Dədə Qorqud Türk Dünyası Film Festivalı"na hazırlıqlar davam edir. Festivalla bağlı məlumat verən Ahmet Misbah Demircan nazirlik olaraq maddi və qeyri-maddi mədəni irsin yaşadılması, qorunması və gələcək nəsillərə təhvil verilməsi üçün çalışdıqlarını bildirib. “Bursa Böyükşəhər Bələdiyyəsi də daxil olmaqla bir çox qurum və təşkilatların dəstəyi ilə Türkiyənin Mədəniyyət və Turizm Nazirliyinin himayəsi altında təşkil ediləcək festival türk respublikalarından və toplumlarından bir çox peşəkar kino xadimlərini və mədəniyyət xadimlərini bir araya gətirəcək”.

Qeyd edək ki, festivalda Azərbaycandan 22, Özbəkistandan 43, Qırğızıstandan 23, Qazaxıstandan 21, Türkmənistandan 5 və muxtar respublikalardan 17 kino mütəxəssisi iştirak edəcək. Festivala həmçinin türk kino sənayesinin tanınmış prodüserləri, rejissorları, ssenaristləri və aktyorlarından ibarət 200-ə yaxın qonaq dəvət edilib.