Facebook Pixel Code
GoMap XƏRITƏ

XƏBƏRLƏR


  • Hüseyn Cavidin 140 illiyi ilə bağlı tədbir təşkil edilib

    Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin 3 nömrəli filialında “Mənim tanrım gözəllikdir, sevgidir” adlı tədbir keçirilib. Tədbir Azərbaycan şairi və dramaturqu Hüseyn Cavidin 140 illiyinə həsr olunub.

    Baş İdarədən AZƏRTAC-a bildirilib ki, kitabxananın əməkdaşları H.Cavidin zəngin yaradıcılığından, onun ədəbiyyata əvəzsiz töhfələrindən söhbət açıblar. Həmçinin şairin Azərbaycan ədəbiyyatında mənzum dram və faciə janrlarının əsasını qoyduğu da qeyd edilib.

    Sonda oxucular Hüseyn Cavidin əsərlərindən ibarət sərgi ilə tanış olublar.

  • Ölkəmiz Asiya Hekayəçilik Komitəsinin daimi üzvü seçilib

    Koreya Respublikasının Kvanju şəhərində Asiya Hekayəçilik Komitəsinin 14-cü iclası keçirilib.

    Asiya Mədəniyyət Mərkəzinin dəvəti ilə Azərbaycan Respublikası Mədəniyyət Nazirliyinin nümayəndəsi Akif Marifli Komitənin iclasında müşahidəçi qismində iştirak edib.

    Nazirlikdən AZƏRTAC-a bildirilib ki, İclasın gündəliyində olan məsələlərin müzakirəsi aparılıb, komitənin son bir il ərzində fəaliyyətinə dair hesabatı dinlənilib. Eyni zamanda iclas zamanı Azərbaycan komitənin daimi üzvü seçilib.

    Məlumat üçün bildiririk ki, Asiya Hekayəçilik Komitəsi Koreya Respublikasının Mədəniyyət, İdman və Turizm Nazirliyinin nəzdindəki Asiya Mədəniyyət Mərkəzinin vasitəçiliyi ilə 2009-cu ildə Mərkəzi Asiya ölkələrinin (Qazaxıstan, Qırğızıstan, Özbəkistan, Türkmənistan, Tacikistan) mədəniyyət nazirlikləri ilə əməkdaşlıq çərçivəsində yaradılıb.

    Beynəlxalq incəsənət və mədəniyyət mübadiləsi təşkilatı olan Asiya Mədəniyyət Mərkəzi fəaliyyətini Asiya mədəniyyəti ilə bağlı mübadilə, təhsil, tədqiqat və digər istiqamətlər üzrə Asiya ölkələri ilə qarşılıqlı anlaşma və əməkdaşlıq çərçivəsində həyata keçirir.

    Mərkəz eyni zamanda Asiyadan, o cümlədən dünyanın müxtəlif hissəsindən iştirakçılar üçün sərbəst birləşmək və fikirlərini mübadilə etmək üçün inteqrasiya olunmuş platforma rolunu oynayır.

  • Dramatik obrazların mahir ifaçısı

    Bu gün Xalq artisti Nəcibə Məlikovanın anadan olmasından 101 il ötür

    Bu gün Azərbaycan teatr və kino aktrisası, dramatik obrazların mahir ifaçısı, Xalq artisti Nəcibə Məlikovanın anadan olmasından 101 il ötür.

    AZƏRTAC xəbər verir ki, Azərbaycan kino və teatr sənəti tarixində müstəsna xidmətləri olan aktrisa yaratdığı bir sıra yaddaqalan obrazlarla ürəklərə yol tapıb və böyük tamaşaçı sevgisi qazanıb.

    Əvvəlcə kino aktrisası kimi şöhrət qazanmış sənətkarın yaradıcılığının əsas qolu teatr sənəti ilə bağlıdır. Kino tariximizdə bir-birindən bənzərsiz rollar ifa etmiş Nəcibə Məlikova 1921-ci il oktyabrın 25-də Bakının Buzovna kəndində anadan olub. 1943-cü ildə Bakı Teatr Məktəbində Xalq artisti Fatma Qədrinin sinfini bitirərək istəyi ilə Gəncə Dövlət Dram Teatrında işləməyə gedib. Burada bir neçə tamaşada çıxış edərək Bakıya qayıdıb və təzə təşkil olunmuş Azərbaycan Dövlət Teatr İnstitutuna daxil olaraq 1951-ci ildə oranı bitirib.

    Təhsil aldığı illərdə Akademik Milli Dram Teatrının tamaşalarında epizodik rollar oynayan aktrisa 1952-ci ildən (kinolara çəkilişlə bağlı kiçik fasilələrlə) yenə bu teatrda işləyib.

    Nəcibə Məlikova Azərbaycan və dünya dramaturqlarının əsərlərinin səhnə həyatında rol alıb. Eyni zamanda, kinoda bir sıra uğurlu rollar ifaçısı kimi yadda qalıb. Onların sırasında “Ögey ana”da Dilarə, “Aygün”də Aygün, “Arşın mal alan”da Cahan xala, “Əhməd haradadır?”da Nərgiz xala rollarının ifası aktrisanın yaradıcılıq nailiyyətləri kimi dəyərlidir.

    Deyilənlərə görə, “Ögey ana” filmindəki Dilarə rolu Nəcibə xanımın öz taleyinə bənzəyir. Film ekranlara çıxandan sonra keçmiş SSRİ-nin bütün şəhərlərindən Nəcibə Məlikovanın adına yüzlərlə məktub ünvanlanaraq onun ifa tərzi haqqında geniş fikir mübadiləsi aparılıb. Aktrisanın oynadığı ögey ana rolu yaxşı mənada müzakirəyə çıxarılıb.

    Nəcibə Məlikova məlahətli, emosional, lirik-dramatik aktrisa idi. Mənən saf qəlbli qəhrəmanları, məhəbbət yolunda mürəkkəb vəziyyətlərdə gücsüz görünüb kövrələn, ancaq xeyirxah insanların köməyi ilə mətanətini qoruyub saxlayan personajları uğurla oynayıb. Aktrisanın yumorunda da həzin və kövrək lirizm üstünlük təşkil edib.

    Ümumiyyətlə Azərbaycan kino və teatr sənəti tarixində müstəsna xidmətləri olan Nəcibə Məlikovanın istər teatr səhnəsində, istərsə də kinoda oynadığı rollar böyük tamaşaçı rəğbəti qazanıb.

    O da təsadüfi deyil ki, aktrisa teatra nə qədər çox bağlı olsa da, onun kino yaradıcılığı tamam fərqli bir xətt üzrə inkişaf edib. Kino onun həyatının bir parçasına çevrilib. Kino və teatr sahəsində xidmətlərinə görə aktrisa 1959-cu ildə Azərbaycanın Əməkdar artisti, 1974-cü ildə isə Xalq artisti fəxri adlarına layiq görülüb.

    Görkəmli sənətkar 1992-ci il iyulun 27-də vəfat edib və ikinci Fəxri xiyabanda dəfn olunub.

    İllər keçir ancaq o, hər birimizin qəlbində yaşayır, baxdığımız filmlərində bizlərlə bərabər addımlayır.

  • Bu gün Müslüm Maqomayevin anım günüdür

    Səksən il bundan öncə avqustun 17-də dünyaya göz açan Müslüm bütün bu yer üzünə sadədən sadə, adidən adi gəldi. İkinci cahan savaşının o qanlı-qadalı illərində bütün narahatlıqlara, gərginliklərə baxmayaraq, gəlişi ilə sanki doğmalarının qəlbinə bir sakitlik, həlimlik gətirdi. Hamı kimi o da müharibənin ağrısını-acısını daddı, doğma, əziz atasını itirdi. Amma özünü itirmədi, hər addımda, hər yerdə özü olmağı bacardı.

    Azərbaycanın görkəmli opera və estrada müğənnisi Müslüm Maqomayev 1942-ci il Bakı şəhərində anadan olub. Birinci dəfə 14 yaşında dənizçilər klubunda çıxış edən M.Maqomayev ilk uğurunu 1962-ci ildə qazanıb. Maestro Niyazinin tövsiyəsi ilə tələbə və gənclərin Helsinkidə keçirilən VIII Ümumdünya Festivalına yollanan Müslüm oradan medalla qayıdıb. Bu münasibətlə populyar "Oqonyok" jurnalı onun portretini və "Bakılı gənc dünyanı fəth edir" başlıqlı məqalə dərc etmişdi. M.Maqomayev XX əsrin 60-cı illərində Azərbaycan Dövlət Opera və Balet Teatrının solisti olub, "La Skala" Milan teatrında təcrübə keçib. Enriko Pyatsa ilə "Sevilya bərbəri" operasından Fiqaronun, "Toska" operasından Skarpianın partiyalarını hazırlayıb.

    1963-cü ildə Moskvanın P.Çaykovski adına salonunda onun ilk solo konsertinə bilet tapmaq mümkün deyildi. 1960-70-ci illərdə Müslüm Maqomayevin məşhurluğunun hüdudu yox idi, konsert salonlarındakı yerlər azlıq edir, o, stadionlarda minlərlə dinləyici qarşısında çıxış edir, daim qastrol səfərlərində olurdu. Mahnıları yazılmış vallar çox böyük tirajla buraxılırdı. Məhz buna görə də onu sovet estradasının son yarım əsrdəki ən parlaq ulduzu, kralı, rəmzi adlandırırdılar. Keçmiş SSRİ-də klassik ariyaları və mahnıları estradaya məhz Müslüm gətirmişdi. Bütün bunlara görə ona 31 yaşında SSRİ Xalq artisti adı verilmişdi. Onun repertuarında 600-dək əsər var. Böyük müğənni həm də gözəl mahnılar müəllifidir. Onun Xalq şairi Nəbi Xəzrinin sözlərinə bəstələdiyi və dillər əzbəri olan əzəmətli "Azərbaycan" mahnısı ölkəmizə ithaf olunmuş ən gözəl əsərdir. Müğənni həm də "Oxuyur Müslüm Maqomayev", "Nizami", "Moskva notlarda" filmlərində çəkilib.

    Müslüm Maqomayev çoxşaxəli sənətkar idi. Belə geniş diapazona malik səs çox az müğənnilərə qismət olur. Müslüm Maqomayev ifa etdiyi hər mahnıda, ariyada bir dünya yaradırdı.

    Azərbaycan musiqi mədəniyyətinin inkişafında müstəsna xidmətləri olan böyük müğənninin gözəl tembrli gözəl səsi, təkrarolunmaz səhnə ustalığı və nadir musiqi duyumu sənət aləmində atdığı ilk addımlardan onu milyonların sevimlisinə çevirmişdir.

    Azərbaycan xalqının zəngin musiqi ənənələrinin qorunub saxlanılmasında və müasir dövrdə layiqincə inkişaf etdirilməsində Müslüm Maqomayevin yaratdığı və rəhbərlik etdiyi Azərbaycan Dövlət estrada-simfonik orkestri mühüm rol oynayıb. Orkestrin rəngarəng proqramlarında M.Maqomayev əsl sənətkara xas əzmkarlıqla hər bir ifasını bir aktyorun teatrı səviyyəsinə qaldırmağa nail olub.

    M.Maqomayevin milli musiqi mədəniyyətimizin inkişafı sahəsində mühüm nailiyyətləri hər zaman yüksək qiymətləndirilib və o, müstəqil Azərbaycan Respublikasının ali mükafatları - "Şöhrət" və "İstiqlal" ordenləri ilə təltif edilib.

    Müslüm Maqomayev 2008-ci ildə 66 yaşında vəfat edib və Bakıdakı Birinci Fəxri xiyabanda dəfn olunub.

    Dünyaşöhrətli opera və estrada müğənnisi, bəstəkar, SSRİ Xalq artisti Müslüm Maqomayevin 70 və 75 illik yubileyləri dövlət səviyyəsində keçirilib.

    Bu il sənətkarın anadan olmasının 80 illiyi ölkəmizdə silsilə tədbirlərlə qeyd olunmaqdadı. 2022-ci il avqustun 17-də Bakının Dənizkənarı Milli Parkında Müslüm Maqomayevin abidəsinin açılışı olub. Azərbaycan Respublikasının Prezidenti İlham Əliyev və birinci xanım Mehriban Əliyeva açılışda iştirak ediblər.

    Dünyanı fəth edən bariton Müslüm Maqomayevin ölümündən on dörd il ötsə də, onun əziz xatirəsi unudulmur. Zəmanəmizin musiqi aləminin ən parlaq ulduzlarından olan Müslümlə bağlı xatirələr Azərbaycan xalqının qəlbində özünə əbədi yuva salıb.

     

  • "Şuşa - Qarabağın dünəni, bu günü, sabahı": Şuşa bəyləri

    "Şuşa İli" ilə əlaqədar Azərbaycan İstiqlal Muzeyi tərəfindən həyata keçirilən "Şuşa - Qarabağın dünəni, bu günü, sabahı" adlı layihə davam edir.

    Muzeydən AZƏRTAC-a bildirilib ki, layihə çərçivəsində növbəti təqdimat Şuşa bəylərinə həsr olunub.

    XX əsrin əvvəllərində Şuşada və Şuşa qəzasında 500-dən çox irsi bəy yaşayırdı. Şuşada daha məşhur bəy nəsilləri - Usmiyevlər, Ağaoğlular, Cavanşirlər, Mehmandarovlar, Uğurlubəyovlar, Qalabəyovlar, Misirxanovlar, Həsənbəyovlar, Mirzəlibəylilər, Əlibəyovlar, Bədəlbəyovlar, Ağayevlər, Sarıcalinskilər, Vəlibəyovlar, Nəsirbəyovlar, Bəylərbəyovlar, Ağabəyovlar, Zöhrabbəyovlar və Vəzirovlar olub. İran şahından titul alan bəylər əsilli-nəcabətli sayılırdılar, daha sonra Qarabağ xanları tərəfindən titul verilən bəylər gəlirdi. Demək olar ki, Şuşa bəylərinin hamısının torpaq sahələri, kəndləri, meyvə bağları, mal-qarası, qoyun sürüləri, at tövlələri və atçılıq təsərrüfatları var idi. Bəylər yayda Şuşada öz gözəl imarətlərində yaşayırdılar. Qışda bəziləri öz kənddəki mülklərində qalırdılar. Şuşa bəyləri iki qrupa ayrılırdı.

    Birinci qrup Qarabağın yüksək milli mədəniyyətini saxlayan çox savadlı bəylər idi. Onlar Şuşanın mədəni həyatının inkişafında fəal iştirak edir, öz övladlarını hər vasitə ilə Avropa mədəniyyətinə cəlb etməyə çalışırdılar. Soyadlarını qeyd etdiyimiz Şuşa bəyləri bu qrupa aiddir.

    İkinci qrup bəyləri isə Şuşanın mədəni və iqtisadi həyatı ilə az maraqlanırdılar, günlərini əyləncələrdə və cıdırda keçirirdilər. Bu qrup arasında pambıqçılıqla pul qazanan nuvoriş bəyləri də vardı. Onlara “pambıq bəyləri” də deyirdilər.

    Müflisləşmiş və yarımmüflisləşmiş bəylər də var idi. Şuşada onları “pişxurd bəylər” və yaxud “quru bəylər” adlandırırdılar. Onlar camaatın gözündə öz bəy mənliklərini saxlamağa çalışırdılar.

    Şuşa bəyləri böyük at həvəskarları idilər. Bəylərin əksəriyyəti atoynatma ilə məşğul olur və günün çox hissəsini at belində keçirirdilər. Şuşa bəyləri hərbi qulluğu sevir, zəngin silahları,hərbi qıvraqlıqları və intizamları ilə seçilirdilər. Döyüşlərdə onlar həmişə birinci olurdular.

  • Prezident “Azərbaycan” İstilik Elektrik Stansiyasının modernizasiyası ilə bağlı sərəncam imzalayıb

    Prezident İlham Əliyev Azərbaycan Respublikasında elektrik enerjisi təminatının yaxşılaşdırılması ilə bağlı əlavə tədbirlərin həyata keçirilməsi haqqında sərəncam imzalayıb.

    Reportun xəbərinə görə, sərəncamda deyilir ki, “Azərenerji” Açıq Səhmdar Cəmiyyətinin “Azərbaycan” İstilik Elektrik Stansiyasının modernizasiyası ölkənin enerji dayanıqlığının təmin olunması, əlavə generasiya güclərinin yaradılması, enerji tələbatının qarşılanması, ixrac imkanlarının artırılması, ətraf mühitin qorunması, elektrik enerjisinin istehsalında təbii qaza qənaət edilməsi, iqlim dəyişiklikləri ilə bağlı baş verən kataklizmlərin qarşısının alınması və regionda yeni iş yerlərinin açılması baxımından xüsusi əhəmiyyətə malikdir. “Azərbaycan” İstilik Elektrik Stansiyasının mövcud avadanlıqlarına əlavə müasir texnologiyalar tətbiq edilərək, 600 MVt gücündə olan 7-ci və 8-ci enerji bloklarının gücünün daha 1280 MVt artırılması ilə əlaqədar rasional modernləşmənin həyata keçirilməsi iqtisadi, texniki, enerji sisteminin etibarlılığı, dayanıqlılığı və təhlükəsizliyi cəhətdən zəruridir.

    Sərəncamla “Azərenerji” Açıq Səhmdar Cəmiyyətinə “Azərbaycan” İstilik Elektrik Stansiyasının modernizasiyası çərçivəsində əlavə generasiya gücünün yaradılması üçün zəruri tədbirlər görmək tapşırılıb.

    Nazirlər Kabinetinə “Azərbaycan” İstilik Elektrik Stansiyasının modernizasiyası çərçivəsində əlavə generasiya gücünün yaradılması məqsədilə maliyyə vəsaitinin cəlb edilməsi, idxal olunacaq avadanlıqların və ehtiyat hissələrinin idxal gömrük rüsumlarından azad olunması, habelə “Dövlət satınalmaları haqqında” Azərbaycan Respublikasının Qanununa uyğun olaraq istehsalçı müəssisələrdən elektrik qurğu və avadanlıqların alınması və modernizasiya işlərinə podratçı təşkilatların cəlb olunması ilə əlaqədar tədbirlər görmək; “Azərbaycan” İstilik Elektrik Stansiyasının modernizasiyası çərçivəsində görülən işlərlə əlaqədar avadanlıqların və ehtiyat hissələrinin alınması üçün Azərbaycan Respublikası Prezidentinin 2018-ci il 18 dekabr tarixli 410 nömrəli Fərmanı ilə təsdiq edilmiş “Azərbaycan Respublikası adından borc alınması və zəmanət verilməsi Qaydası”na uyğun olaraq dövlət zəmanətli kreditlərin cəlb edilməsi ilə bağlı məsələləri həll etmək tapşırılıb.

  • Tanınmış türk reper Bakıya gəlir

    "Heyecanı yok” mahnısı ilə populyarlaşan türk reper Gazapizm Azərbaycana gələcək.

    AZƏRTAC xəbər verir ki, əsl adı Anıl Acar olan sənətçi noyabrın 19-da ilk dəfə Bakıda konsert verəcək. O, “Elektra Events Hall”da Radio TMB 100.5 FM-in birilliyində səhnədə çıxış edəcək.

    Böyük uğurlara imza atan Gazapizm, ölkəmizdə də ən çox izlənən seriallardan biri olan "Çukur" serialının sevilən musiqilərinin müəllifidir.

    Qeyd edək ki, “Heyecanı yok" mahnısı ilə dinlənmə rekordunu yeniləyən Gazapizm, eyniadlı musiqi klipi ilə 2018-ci ilin "Altın Kelebek" müsabiqəsində qalib olub. Bununla yanaşı Gazapizm “GQ” jurnalının 2018-ci il reytinqinə görə “İlin görkəmli musiqiçisi” nominasiyasını qazanıb. Onun "Unudulacaq günlər” mahnısı 2020-ci ildə Türkiyədə ən çox dinlənilən mahnılar sırasında yer alıb.

  • Bakıda Reza Deqatinin fotolarından ibarət “Caspian Dream” adlı sərgi açılacaq

    Noyabrın 1-də “The Landmark” otel və biznes mərkəzində dünyaşöhrətli fotojurnalist Reza Deqatinin fotolarından ibarət “Caspian Dream” adlı sərgi açılacaq.

    AZƏRTAC xəbər verir ki, sərgidə Reza Deqatinin 1997-ci ildə çəkdiyi mühüm 7 fotoşəkildən ibarət “Caspian Dream” adlı xüsusi vizual incəsənət instalyasiyası nümayiş olunacaq.

    Tədbir dünyaşöhrətli sənətkarın iştirakı ilə keçiriləcək və R.Deqati sərgi ətrafında dəvətliləri qəbul etməklə hər bir əsərinə tarixi konteksdə şərhlər verəcək.

    Qeyd edək ki, görkəmli fotojurnalist Reza Deqatinin karyerası haqqında danışanda ağıla üç söz gəlir: xeyriyyəçi, idealist və humanist. R.Deqati fotoqrafiyaya başlamazdan əvvəl ilk dəfə memar kimi təhsil alıb. Bəşəriyyət tarixinin əsas anlarını tuta bilməsi üçün uzun yola çıxmasının nəticəsi olaraq onun əsərləri yüzdən çox beynəlxalq mediada dərc olunub. O, bununla bütün dünyada fotolarından ibarət böyük instalyasiyalarını yaradaraq nümayiş etdirir, eyni zamanda böyük universitetlərdə və beynəlxalq təşkilatlarda keçirilən konfranslarda mühazirəçi kimi çıxış edir.

  • “Qardaşlıq dastanı”nın dünya turu

    Serhat Turakın bədii rəhbərliyi, “Alagöz Kültür Sanat”ın istehsalı və “Umya Az” MMC-nin (Umya Medya-Türkiyə) rəsmi təşkilatçılığı ilə gerçəkləşən “Qardaşlıq dastanı” teatral rəqs nümayişi layihəsi dünyada təqdim olunacaq.

    AZƏRTAC xəbər verir ki, bununla bağlı oktyabrın 25-də Bakı Yunus Əmrə İnstitutunda keçirilən mətbuat konfransında bildirilib. İlk olaraq Bakı və Gəncə şəhərlərində nümayişinə başlanan bu sənət əsəri türk xalqlarının ortaq mədəniyyətinin bir təzahürüdür.

    Bakı Yunus Əmrə İnstitutunun rəhbəri Səlçuk Karakılıç bildirib ki, “Qardaşlıq dastanı” 6 illik araşdırma və 18 aylıq səhnə məşqlərindən sonra 100-dən çox türkiyəli və azərbaycanlı rəqqas və teatr aktyorunun zəhməti ilə səhnələşdirilən möhtəşəm tarixi epik sənət əsəridir. Əsərdə eramızdan 2 min il öncə cərəyan edən qədim türk, Azərbaycan tarixi və mifologiyası, Nuh tufanından başlamış Qarabağ savaşına qədər geniş zaman kəsiyini əhatə edən, Anadolu və Qafqaz xalqlarının amansız mübarizəsi, həmrəyliyi, həyat sevgisi, sevinc və kədəri, bir sözlə Azərbaycan və Türkiyə xalqlarının sarsılmaz qardaşlığından bəhs edilir.

    Bildirib ki, “Qardaşlıq Dastanı” layihəsi 2 pərdə və 12 səhnədən ibarətdir. Film-tamaşa İlk dəfə 2021-ci ildə Türkiyədə səhnəyə qoyulub və İstanbul, Ankara, İzmir, Konya və ölkənin bir çox böyük şəhərlərdə nümayiş edilib.

    “Umya Medya” va “Umya Az”ın rəsmi təşkilatçılığı ilə bu ilin sonu dünya turuna çıxacaq ansamblın ilk dayanacağı Azərbaycan olacaq. Azərbaycandan sonra Almaniya, Şimali Avropa, Meksika, Özbəkistan, Qazaxıstan, Misir, Qətər, Çin və digər ölkələrdə turlarını 2023-cü ilin sonuna qədər davam etdirəcək. “Qardaşlıq dastanı” layihəsi dünyanın 100-dən çox ölkəsində Azərbaycan və Türkiyənin qardaşlığını, iki ölkənin zəngin mədəni irsini və tarixini sənət yolu ilə dünya xalqlarına tanıtmaq, həmçinin Azərbaycan və Türkiyəyə gələcək turistlərin sayını artırmaqla bu iki ölkənin turizm iqtisadiyyatına töhfə vermək məqsədi daşıyır”, - deyə Səlçuk Karakılıç əlavə edib.

    Layihənin texniki tərəfi və məqsədi barədə danışan “Umya Medya” şirkətin baş meneceri Valeh Əlizadə bildirib ki, dünyada kino sənayesinin liderləri olan Qərb ölkələri öz mədəniyyətini tanıtmaqla külli miqdarda vəsait qazanırlar. Türkiyə, Azərbaycan bu mənada Qərb dünyasından geri qalır: “Məqsədimiz ortaq media qurmaqla özümüzü dünyaya tanıtmaqdır. Buna görə də əsərin dünya turunu Azərbaycandan başlamağa qərar verdik. Biz hər bir qarşılıqlı səhnələrdə bir tərəfdən Nizami Gəncəvini digər tərəfdən Mövlana Cəlaləddin Rumini tanıtmağa çalışırıq. Hər bir 10 dəqiqəlik səhnələrdə biz vacib mesajları ötürməyə çalışırıq. Çünki insanlar qalın kitablar oxumadığı üçün ekranda göstərilən səhnələrə baxmağa üstünlük verir. Bu, həm böyük, həm də azyaşlı uşaqlar tərəfindən izlənilə bilər”.

    Bildirib ki, layihə siyasi deyil, daha çox ortaq türk mədəniyyətini tanıtmaq məqsədi daşıyır: “Məqsədimiz türk xalqları arasında mədəni köpü yaratmaq, həm də onları mədəni müstəviyə çıxartmaqdır. Filmdəki bəzi səhnələr ölkələrə görə dəyişəcək. Azərbaycan üçün hazırlanan film-tamaşada Nuru Paşanın ötən əsrin əvvəllərində bolşevik-daşnak qüvvələrinə qarşı mübarizəsi, Heydər Əliyev və Atatürk qardaş ölkələrin böyük liderləri kimi təqdim edilir”.

    Qeyd edək ki, Mədəniyyət Nazirliyi və Bakı Yunus Əmrə İnstitutunun dəstək verdiyi bu layihə ilk çıxışını dekabrın 20-21-22-də Bakida, Heydər Əliyev Sarayında, dekabrın 17-18-də isə Gəncə Dövlət Filarmoniyasında gerçəkləşdirəcək.

  • Xətai rayon kitabxanasının şəhidlərin xatirəsinə həsr etdiyi layihə davam edir

    Bakı Şəhər Mədəniyyət Baş İdarəsi Xətai rayon Mərkəzləşdirilmiş Kitabxana Sisteminin Mərkəzi Kitabxanasında "Əbədi yaşayanlar" adlı şəhidlərimizə həsr olunan layihə davam edir.

    AZƏRTAC xəbər verir ki, layihədə bu dəfə şəhid mayor Səyavuş Kəlbalıyevdən bəhs edilib.

    Mayor Səyavuş Hümbət oğlu Kəlbalıyev 1987-ci il oktyabrın 16-da Cəbrayıl rayonunun Horovlu kəndində anadan olub. İlk təhsilini Bakı şəhəri Sabunçu rayonu Pirşağı qəsəbəsində fəaliyyət göstərən Şuşa şəhər 6 nömrəli tam orta məktəbində alıb. 2005-2009-cu illərdə Heydər Əliyev adına Azərbaycan Ali Hərbi Məktəbinə təhsilini davam etdirib. Ailəli idi. 2 övladı yadigar qalıb.

    2009-cu ildə Ali Hərbi Məktəbi bitirən Səyavuş Kəlbalıyevə leytenant hərbi rütbəsi verilir. 2009-2010-cu illərdə Sərhəd Qoşunlarının Təlim Tədris Mərkəzində ixtisasartırma kursunu keçdikdən sonra hərbi vəzifəsinə başlayıb. 2012-ci ildə kəşfiyyat ixtisası üzrə kurs keçib, xidmətini xüsusi hərbi hissədə davam etdirib.

    2020-ci il sentyabrın 27-də Səyavuş Kəlbalıyev kəşfiyyat rəisi olaraq Cəbrayıl istiqamətində gedən döyüşlərdə vuruşub. 29 sentyabr 2020-ci ildə Cəbrayıl-Füzuli istiqamətində gedən döyüşlərdə döyüş tapşırığının yerinə yetirilməsi zamanı şəhid olub.

    Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən, Səyavuş Kərbalıyev ölümündən sonra "Vətən uğrunda", "İgidliyə görə", "Füzulinin azad olunmasına görə" medalları və "Azərbaycan Bayrağı" ordeni ilə təltif edilib.