XƏBƏRLƏR

Antik əşyaların sərgisinə ev sahibliyi edən Milanın Permanente Muzeyinin əməkdaşları italiyalı alim Alessandro Voltanın portretinin itdiyini aşkarlayıblar.

“Report” xəbər verir ki, bu barədə “ComoZero” xəbər portalı məlumat yayıb.

1840-cı ildə rəssam Qabriele Rottini tərəfindən çəkilmiş tablo mütəxəssislər tərəfindən 20 min avro dəyərində qiymətləndirilir.

Alessandro Volta (1745-1827) - italiyalı fizik və kimyaçısı, elektrik nəzəriyyəsinin banilərindən biridir. Elektrik gərginliyinin vahidi volt (V) məhz onun adını daşıyır.

Bakı Şəhər Mədəniyyət Baş İdarəsinin Səbail rayon Mərkəzləşdirilmiş Kitabxana Sisteminin Mərkəzi Kitabxanasında 44 günlük Vətən müharibəsi iştirakçıları, qazilərlə görüşə həsr olunmuş “Xalqımızın qəhrəman oğulları” adlı tədbir keçirilib.

Baş İdarədən AZƏRTAC-a bildirilib ki, tədbirdə 44 günlük Vətən müharibəsi haqqında ətraflı məlumat verilib, əsgər və zabitlər, müharibə vaxtı yaşadıqları çətinliklərdən, torpaqlarımızın azad olunmasında keçdikləri məşəqqətli döyüş yollarından danışıblar və oxucuların suallarını cavablandırıblar.

Şagird Həsən Əsədli Bəxtiyar Vahabzadənin “Şəhidlər” şeirini söyləyib.

Sonda “Bu torpağın hər qarışı Vətəndir” adlı sərgi açılıb.

“Şuşa İli” çərçivəsində Mədəniyyət Nazirliyinin təşkilatçılığı və Heydər Əliyev Fondunun dəstəyi ilə “4 seasons of Shusha” adlı beynəlxalq fotoqrafiya layihəsi keçirilir.

Mədəniyyət Nazirliyindən AZƏRTAC-a bildirilib ki, layihədə iştirak edən dünyaca məşhur fotoqraflar Şuşa şəhərinə səfərlər edir və hər fəsil üzrə fotoqraflar tərəfindən Şuşanın fotoşəkilləri lentə alınır. Layihə Almaniya, Türkiyə, Finlandiya və İsveçrənin tanınmış fotoqraflarının iştirakı ilə reallaşır. Hüseyn Taşkın (Türkiyə) və Reto Guntli (İsveçrə) bu beynəlxalq layihədə ilk olaraq iştirak edərək müvafiq olaraq yaz və yay fəsillərindən fotoları lentə alıblar.

Şuşada payız fəslindən fotoları lentə alacaq növbəti fotoqraf Tina Katriina İtkonen (Finlandiya) isə hazırda ölkəmizdə səfərdədir. O, yaxın günlərdə Şuşanı ziyarət edəcək.

Azərbaycana səfəri çərçivəsində oktyabrın 21-də Tina Katriina İtkonen ilə Mədəniyyət Nazirliyində Muzey, qalereya və sərgilər şöbəsinin müdiri Nərgiz Abdullayeva arasında görüş keçirilib, “4 seasons of Shusha” layihəsinin məqsədi və gözləntilər barədə fikir mübadiləsi aparılıb.

Qeyd edək ki, xarici fotoqrafların Qarabağın incisi olan qədim Şuşanın tarixi, mədəniyyəti, dahi şəxsiyyətləri və bu gün ölkə rəhbərliyinin tapşırığı ilə burada aparılan quruculuq işləri ilə yaxından tanış olmaları və qısa bir müddət Şuşada yaşamaları onlarda bu ecazkar şəhər haqqında tam təsəvvür yaranmasına səbəb olacaq. Azərbaycana dəvət olunan bu mütəxəssislərin çəkdiyi fotoşəkillər onların Şuşa barədə təəssüratlarının tərənnümü olacaq. Layihənin sonunda çəkilən fotoşəkillərdən ibarət kitab-kataloq nəşr olunacaq və həm Azərbaycanda, həm də fotoqrafların öz ölkələri və dünyanın digər müxtəlif ölkələrində sərgilər təşkil ediləcək.

Bu ilin yanvar-sentyabr aylarında xarici ölkələrə gedən Azərbaycan vətəndaşlarının sayı ötən ilin eyni dövrünə nisbətən 1,7 dəfə artaraq 1 110,8 min nəfər olub.

Report bu barədə Dövlət Statistika Komitəsinə istinadən xəbər verir.

Məlumata görə, ölkə vətəndaşlarının 47,3 %-i Türkiyəyə, 17,7 %-i Rusiyaya, 11,1 %-i İrana, 8,5 %-i Gürcüstana, 15,4 %-i digər ölkələrə səfər edib.

Gedənlərin 64,1 %-ni kişilər, 35,9 %-ni qadınlar təşkil edib.

Ötən ilin eyni dövrü ilə müqayisədə İrana gedənlərin sayı 3,1 dəfə, Gürcüstana gedənlərin sayı 1,8 dəfə, Türkiyəyə gedənlərin sayı 1,7 dəfə, Rusiyaya gedənlərin sayı isə 21,2 % artıb.

Mədəniyyət Nazirliyi tərəfindən “Şuşa İli” münasibətilə həyata keçirilən “Şuşa mədəniyyətinin inciləri” layihəsi yeni təqdimatlarla davam edir.

Nazirlikdən AZƏRTAC-a bildirilib ki, layihə çərçivəsində "Şuşanın memarlıq salnaməsi” bölməsi üzrə növbəti təqdimat qala-şəhərimizin Aşağı Gövhər Ağa məscidinə həsr olunub.

Aşağı Gövhər Ağa məscidi 1874-1875-ci illərdə İbrahimxəlil xanın qızı Gövhərağanın maddi vəsaiti ilə memar Kərbəlayi Səfixan Qarabaği tərəfindən inşa edilib. Məscid xalq arasında Aşağı Gövhər Ağa kimi tanınıb.

1992-ci ilin mayında Şuşanın işğalı zamanı Aşağı Gövhər Ağa məscidinin binası və minarələri zirehli texnikanın atəşlərinə məruz qalaraq ciddi zədələnib.

Məscid Azərbaycan Respublikası Nazirlər Kabinetinin 2001-ci il 2 avqust tarixli 132 nömrəli qərarı ilə “Ölkə əhəmiyyətli daşınmaz tarix və mədəniyyət abidələrinin siyahısı”na daxil edilib.

Azərbaycan Ordusu 2020-ci il noyabrın 8-də Şuşa şəhərini işğaldan azad etdikdən sonra Aşağı Gövhər Ağa məscidində bərpa işləri həyata keçirilir.

Mədəniyyət Nazirliyinin dəstəyi ilə "Azərbaycanfilm" kinostudiyası, İctimai TV, Bakı Media Mərkəzi və Fransanın “Arizona Films” şirkətinin birgə istehsalı olan “Mərmər soyuğu” tammetrajlı bədii filmi “PÖFF | Tallinn Black Nights” (“Qara Gecələr”) Film Festivalının əsas müsabiqə proqramına daxil edilib.

Mədəniyyət Nazirliyindən AZƏRTAC-a bildirilib ki, Avropanın ən böyük film festivallarından olan “PÖFF | Tallinn Black Nights” bu il noyabrın 11-dən 27-dək keçiriləcək.

Sözügedən festivalın əsas müsabiqə proqramında ilk dəfədir ki, Azərbaycan filmi iştirak edir. “Mərmər soyuğu” festivalın əsas müsabiqə proqramında iştirak edən 23 filmdən biridir və bu, filmin dünya premyerasıdır.

Film uğursuz rəssam və sevgilisinin qarışıq münasibətlərindən bəhs edir. Həbs həyatından sonra evə qayıdan ata ən radikal yollarla oğlunun həyatına müdaxilə etməyə çalışır.

Filmin ssenari müəllifləri Asif Rüstəmov və Roelof Jan Minneboo (Hollandiya), quruluşçu rejissoru Asif Rüstəmov, təsvir rejissorları Oktay Namazov və Adil Abbasov, quruluşçu rəssamı Rafiq Nəsirov, geyim rəssamı Şahin Həsənli, qrim rəssamı Elbrus Vahidov, prodüseri Fariz Əhmədov, kreativ prodüseri İradə Bağırzadədir.

Ekran əsərində əsas rolları Elşən Əsgərov, Natavan Abbaslı və Qurban İsmayılov ifa edirlər.

Rəqəmsal İnkişaf və Nəqliyyat Nazirliyi yanında Kosmik Agentliklə ("Azərkosmos") Pakistanın Kosmos və Atmosferin Yuxarı Qatının Tədqiqi Komissiyası (SUPARCO) arasında Anlaşma Memorandumu imzalanıb.

Report bu barədə nazirliyə istinadən xəbər verir.

Məlumata görə, sənəd kosmosun müxtəlif sahələri üzrə əməkdaşlığı nəzərdə tutur. Buraya kosmik elm, texnologiya və tətbiqlər, kadr potensialının formalaşdırılması üzrə birgə fəaliyyət, həmçinin təcrübə mübadiləsi daxildir.

"Azərkosmos"un İdarə Heyətinin sədri Saməddin Əsədov bildirib ki, memorandum Azərbaycan və Pakistan arasında kosmos yönümlü xidmətlərin təkmilləşdirilməsi, kosmik proqramın daha da genişləndirilməsi, o cümlədən məkan məlumatları sahəsinin inkişafı baxımından əhəmiyyət daşıyır.

SUPARCO-nun sədri Amer Nadem bu memorandumun ölkələrimizin firavan gələcəyi naminə birgə fəaliyyətə geniş imkanlar yaradacağını vurğulayıb.

Oktyabrın 24-də “Baku Marriot Hotel Boulevard”da Milli Kulinariya Konqresi işə başlayıb.

AZƏRTAC xəbər verir ki, konqresdə Dövlət Turizm Agentliyinin sədri Fuad Nağıyev ölkə rəhbərliyi tərəfindən turizmin inkişafına xüsusi diqqət ayrıldığını bildirib.

“Ölkəyə gələn xarici turistlərə təqdim etməyə çoxçeşidli turizm məhsullarımız var. Azərbaycanın “Qastronomiya ölkəsi” kimi tanınması üçün böyük potensiala malikdir. Təbiətimiz zəngindir. Əlverişli iqlim şəraiti, məhsuldar torpaqlarımız təbii məhsulların həm çeşidinə, həm dadına öz təsirini göstərir. Qastronomiya turizminin inkişafı yalnız milli mətbəximizi deyil, həmçinin zəngin maddi-mədəni irsimizi, tarixi ənənələrimizi, mədəniyyətimizi də dünyaya tanıtmağa kömək edir. Ölkəmizin təmsil olunduğu bütün beynəlxalq tədbirlərdə milli kulinariyamız, bu sahədə olan turizm potensialı çox geniş şəkildə beynəlxalq ictimaiyyətə təqdim olunur və maraq doğurur", - deyə o qeyd edib.

Bu ilin mayında Heydər Əliyev Fondu və Agentliyin təşkilatçılığı ilə Şuşada I Beynəlxalq Kulinariya Festivalı keçirildiyini xatırladan F.Nağıyev Ali Baş Komandanın rəhbərliyi ilə igid əsgərlərimizin qəhrəmancasına azad etdiyi, Qarabağın incisi olan Şuşada belə bir festivalın təşkil olunmasının tarixi hadisə olduğunu qeyd edib: “Festivalda 11 ölkədən, Azərbaycanın 14 bölgəsindən olan kulinariya nümunələri nümayiş etdirildi. Qastronomiya turizmi həm regional turizm, həm də aqro və eko turizm növləri ilə ahəngdar olaraq inkişaf edir. Bu baxımdan Agentliyin dəstək verdiyi layihələrdən biri “Azərbaycanda Böyük Qafqaz Dağları Ərazisində İcma Əsaslı Dəyər Zəncirinin Genişləndirilməsi” - “Slow Food” pilot layihəsini qeyd etmək olar. Layihə Şamaxı, İsmayıllı, Qəbələ, Şəki və Qaxı əhatə etdi. Gələcəkdə digər turizm dəhlizləri üzrə də bu növ marşrutların yaradılması planlaşdırıla bilər. Regionların unudulmuş, qədim yeməklərini üzə çıxartmaq, biomüxtəlifliyini qorumaq və yerli qastronomiyanın tanınmasına nail olmaq baxımından bu kimi layihələr önəm kəsb edir. Həmçinin qastronomiya turizmi ölkəmiz üçün çox vacib iki sahəni - turizm və kənd təsərrüfatını birləşdirdiyi üçün regionlarda kiçik sahibkarlığın və ailə biznesinin dəstəklənməsinə, nəticə etibarilə yerli əhalinin gəlirlərinin artması və rifah halının yüksəlməsinə də töhfə verə bilər. Agentlik olaraq turizm sahəsində fəaliyyət göstərən bütün ictimai təşkilatlar kimi, kulinariya sahəsində fəaliyyət göstərən ictimai birlikləri də dəstəkləyirik. Hər zaman qeyd etdiyimiz kimi, gücümüz birliyimizdədir. Sənayenin birgə fəaliyyəti çox önəmli faktordur. Eyni hədəfə vurmaq üçün çalışmalıyıq. Agentlik bu istiqamətdə sizə hərtərəfli dəstək verməyə hər zaman hazırdır. Hesab edirik ki, bugünkü konqres, xüsusilə bu cəhətdən mühüm əhəmiyyət kəsb edir”.

Gənclər və idman naziri Fərid Qayıbov konqresin qastroturizmin inkişafı baxımından faydalı olacağını bildirib. Qeyd edib ki, gün ərzində panel iclasların keçirilməsi mövcud olan çatışmazlıqların aradan qaldırılmasına kömək edir.

Ölkədə gənclərin sayının üstünlük təşkil etdiyini deyən Fərid Qayıbov bildirib ki, gənclərin peşə sahəsində inkişafı olduqca vacibdir: “Gənc kulinarların beynəlxalq yarışlarda dəstəklənməsi Gənclər və İdman Nazirliyinin prioritet istiqamətlərindəndir”.

Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov deyib ki, milli mətbəx deyəndə ağıla dadlı təamlar gəlir: “Kulinariya tarixi kökləri ilə, özünəməxsusluğu ilə bizi hər zaman fərəhləndirib. Bu gün milli mətbəximiz artıq dünyada tanınır. Bir çox ölkələrdə, restoranlarda Azərbaycan mətbəxi təqdim olunur”.

Azərbaycan Turizm Bürosunun baş icraçı direktoru Florian Zenqstşmid dünya və yerli bazarda qastroturizmin təbliği prosesi barədə danışıb: “Şərabçılıq sahəsi qastroturizmin tərkibində özünəməxsus yer tutur. Bu sahəsini inkişaf etdirmək üçün bir neçə istiqamətdə fəaliyyət göstərilir. Ölkə daxilində səyahət etmək istəyən turistlər üçün milli mətbəx əlçatan olmalıdır. Azərbaycan mətbəxi çoxçeşidlidir və onu bütün regionlarda təqdim etmək lazımdır.

“Caspian Event Organisers” şirkətinin baş direktoru Fərid Məmmədov, Milli Kulinariya Mərkəzinin rəhbəri Orxan Fikrətoğlu bildiriblər ki, Kulinariya Mütəxəssisləri Assosiasiyası yeni yaranan qurumdur və özünə istedadlı aşpazları cəlb edir. Milli Kulinariya Mərkəzi özünü bu sahədə görmək istəyən aşpazları və biznes sahiblərini dəvət edir. Çünki Kulinariya bizə qalan bir irsdir və büdcəyə gəlir gətirir.

Sonra konqres panel müzakirələrlə davam edib.

Bakıda ilk dəfə noyabrın 2-də Heydər Əliyev Sarayının səhnəsində müasir dövrün ən gözəl İrlandiya şoularının üçlüyünə daxil olan “Rhythm of the Dance” adlı əfsanəvi rəqs şousu təşkil olunacaq.

AZƏRTAC xəbər verir ki, tamaşaçıları özünəməxsus keltik melodiyalarından, İrlandiya stepindən, canlı musiqidən və solistlərin heyranedici ifasından ibarət füsunkar rəqs şousu gözləyir.

İnanılmaz hərəkət enerjisi, dəqiqlik və sinxronluq, xalq elementlərinin müasir meqapolis ritmləri ilə birləşməsi - bütün bunlar “Rhythm Of The Dance” rəqs şousunu dünyanın ən məşhur və tələb olunan layihələrindən birinə çevirir.

Azərbaycan hazırda istismarda olmayan Bakı-Supsa neft kəmərindən istifadə etmək istəyir.

Report xəbər verir ki, bunu Prezident İlham Əliyev Gürcüstanın Baş naziri İrakli Qaribaşvili ilə keçirdiyi görüşdən sonra mətbuat üçün verdiyi birgə bəyanatda bildirib.

"Bu barədə danışmışıq. Mən bizim planlarımız haqqında Baş naziri məlumatlandırdım. Bunun üçün böyük ehtiyac var və böyük potensial var", - dövlət başçısı deyib.

O, həmçinin əlavə edib ki, gələn il Bakı-Tbilisi-Ceyhan əsas ixrac boru kəməri xətti ilə neft ixracı artırılacaq.