XƏBƏRLƏR

Latviyanın Yurmala şəhərində ənənəvi 18-ci Kremerata Baltika Beynəlxalq Festivalı keçirilib.

AZƏRTAC xəbər verir ki, konsert proqramı “Kremerata Baltica” kamera orkestrinin yaradılmasının 25, məşhur latviyalı skripkaçı və orkestrin yaradıcısı Gidon Kremerin isə 75 illik yubileyinə həsr edilib.

Tədbirdə dinləyicilərə Azərbaycanın tanınmış dirijoru Fuad İbrahimovun rəhbərliyi ilə geniş konsert repertuarı təqdim olunub.

Konsertdə bir sıra tanınmış bəstəkarların əsərləri, o cümlədən böyük bəstəkarımız Fikrət Əmirovun 880 illik yubileyini qeyd etdiyimiz dahi Azərbaycan şairi və mütəfəkkiri Nizami Gəncəviyə həsr etdiyi “Nizami” simfoniyası ifa olunub. Əsər dinləyicilər tərəfindən böyük maraq və alqışlarla qarşılanıb.

Azərbaycan incəsənəti və musiqisinin şah əsərlərindən hesab olunan sözügedən simfoniyanın beynəlxalq festivalda ifası Nizami Gəncəvi ilinə gözəl töhfədir və Azərbaycan-Latviya mədəni əlaqələrinin inkişafında mühüm hadisədir.

Belarusun Mogilyov Vilayətində Pavel Maslenikov adına Regional İncəsənət Muzeyində "Vətənin İncəsənətdə Təsviri" adlı 25-ci beynəlxalq yaradıcılıq müsabiqəsi keçirilib.

Azərbaycanın Belarusdakı səfirliyindən AZƏRTAC-a bildiriblər ki, müsabiqədə Belarus, Rusiya, Moldova, Azərbaycan, Özbəkistan və Misirdən olan onlarla rəssamın rəsm əsərləri nümayiş etdirilib. Müsabiqə üç nominasiyada keçirilib. "Təsvirin poetik təcəssümü" nominasiyasında – Azərbaycanı təmsil edən Kamal Hacıyevin "Fəth edilməmiş" əsəri qalib seçilib.

Qeyd edək ki, Kamal Hacıyev 1977–1981-ci illərdə Əzim Əzimzadə adına Bakı Rəssamlıq Məktəbini fərqlənmə diplomu ilə bitirib. 1981-1983-ci illərdə Repin Sankt-Peterburqdakı Rəssamlıq Akademiyasının Rəssamlıq fakültəsində təhsil alıb. 1984-1990-cı illərdə Belarus Dövlət Rəssamlıq Akademiyasında təhsilini davam etdirib. 1991-ci ildə Belarus Rəssamlar İttifaqına qəbul edilib. Belarus Dövlət Rəssamlıq Akademiyasında, Maksim Tank adına Belarus Dövlət Pedaqoji İnstitutunda pedaqoji fəaliyyətlə məşğul olub.

Bakı Şəhər Mədəniyyət Baş İdarəsi Nizami rayon Mərkəzləşdirilmiş Kitabxana Sistemi Mərkəzi Kitabxanası “Şəhidlik şərəf, qeyrət zirvəsidir!” adlı videoçarx hazırlayıb.

İdarədən AZƏRTAC-a bildirilib ki, kitabxananın sosial hesablarında paylaşılan videoçarx Ruslan Abbasova həsr edilib.

Videoçarxda igid qəhrəmanımız qısa, ancaq şərəfli ömür yolundan bəhs olunur. Qeyd edilir ki, Ruslan Hikmət oğlu Abbasov 25 may 2000-ci ildə Bakı şəhərinin Sahil qəsəbəsində anadan olub. O, orta təhsilini Sahil qəsəbəsindəki Əliheydər Kazımov adına tam orta məktəbdə alıb. 2019-cu ilin aprelində Ruslan müddətli həqiqi hərbi xidmətə çağırılıb. Azərbaycan Ordusunun çavuşu olan Ruslan Abbasov ötən il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və ərazi bütövlüyümüzün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə iştirak edərək şücaət göstərib. 14 oktyabr 2020-ci ildə cəbhənin Füzuli istiqamətində şəhid olub.

Şəhid 16 oktyabrda doğulduğu rayona gətirilərək, Lökbatan qəsəbəsinin Şəhidlər xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Ruslan Abbasov ölümündən sonra ölkə başçısının müvafiq sərəncamları ilə “Vətən uğrunda” və “Füzulinin azad olunmasına görə” medalları ilə təltif edilib.

Marvel studiyası “Şahin gözü” adlı ilk mini serialın treylerini yayımlayıb.

AZƏRTAC TASS agentliyinə istinadla xəbər verir ki, video studiyanın yutub kanalında verilib.

Serial xüsusi agent və “Qisasçılar” komandasının qəhrəmanı, oxatan Klint Barton və tələbəsi Keyt Bişopdan bəhs edəcək.

Filmin premyerası noyabrın 24-də, sonuncu seriya isə Milad bayramından bir neçə gün sonra, dekabrın 29-da “Disney+” kanalında nümayiş olunacaq.

Moskvada açılan “HEIMTEXTILE 2021” Beynəlxalq Sərgisində “Azərxalça” ASC böyük stendlə iştirak edir. Əsas üstünlük isə Qarabağ xalçalarına verilib.

Bu barədə AZƏRTAC-a müsahibəsində “Azərxalça” ASC-nin İdarə Heyətinin sədri Emin Məmmədov məlumat verib.

O deyib: “Azərxalça” Moskva şəhərində keçirilən “HEIMTEXTILE 2021” sərgisində ilk dəfə iştirak edir. Ekspozisiyada 71 Azərbaycan xalçası nümayiş olunur. Biz istərdik ki, sərgiyə gələn qonaqlar Azərbaycanın müxtəlif xalçaçılıq məktəbləri ilə tanış olsunlar. Lakin bu dəfə biz əsasən Qarabağ xalçalarına üstünlük vermişik. Ali Baş Komandan, Prezident İlham Əliyevin rəhbərliyi ilə Azərbaycan ordusu torpaqlarımızı işğaldan azad edib. Bu gün biz fəxrlə həm klassik, həm də müasir Qarabağ xalçalarını sərgi ziyarətçilərinə təqdim edirik”.

E.Məmmədov əlavə edib ki, “Azərxalça” bu gün sərgiyə həm də yeniliklərlə gəlib. “Bu yeniliklərdən biri də müəssisəmizin bütün xalçalarının “QR” kodlu etiketlə təchiz edilməsidir. Həmin “QR” kodları telefona yükləməklə hər bir xalçanın toxunma tarixçəsi - toxunduğu yer və tarix, xalçanın adı barədə məlumat almaq mümkündür. Bu, Azərbaycan xalçaçılığında olduqca mühüm bir yenilikdir”, - deyə Emin Məmmədov vurğulayıb.

Azərbaycan Bəstəkarlar İttifaqı (ABİ) XIII Üzeyir Hacibəyli Beynəlxalq Musiqi Festivalı zamanı keçirəcəyi tədbirləri açıqlayıb.

ABİ-dən AZƏRTAC-a bildirilib ki, tədbirlər sentyabrın 22-i və 24-də gerçəkləşəcək. Sentyabrın 22-də Üzeyir Hacibəyli XIII Beynəlxalq Musiqi Festivalı çərçivəsində ABİ-nin Üzeyir Hacıbəyli adına Konsert Salonunda “Üzeyir Hacıbəyli və Müslüm Maqomayev” mövzusunda elmi konfrans və konsert, sentyabrın 24-də isə görkəmli musiqişünas-alim, akademik, Əməkdar incəsənət xadimi və Əməkdar elm xadimi, professor Zemfira Səfərovanın yeni kitablarının təqdimatı keçiriləcək.

Elmi konfransda respublikanın tanınmış musiqişünasları Üzeyir Hacıbəyli və onun məsləkdaşı görkəmli bəstəkar Müslüm Maqomayevin yaradıcılığına dair məruzələri təqdim edəcəklər. ABİ-nın məsul katibi, sənətşünaslıq elmləri doktoru, professor Cəmilə Həsənovanın “Üzeyir Hacıbəylinin və Müslüm Maqomayevin Azərbaycan etnomusiqişünaslığında rolu”, Əməkdar incəsənət xadimi, sənətşünaslıq elmləri doktoru, professor İmruz Əfəndiyevanın “Məmməd Sadıq Əfəndiyevin Üzeyir Hacıbəylinin “Koroğlu” operası haqqında ilk elmi-tədqiqat məqaləsinə dair fikirlər”, sənətşünaslıq üzrə fəlsəfə doktoru, dosent Güllü İsmailovanın “Üzeyir Hacıbəylinin yaradıcılığında milli məfkurə və türkçülük ideyalarının təcəssümü”, Əməkdar mədəniyyət işçisi, sənətşünaslıq üzrə fəlsəfə doktoru Alla Bayramovanın “Müslüm Maqomayevin arxiv materialları Azərbaycan Musiqi Mədəniyyəti Dövlət Muzeyində”, Bakı Musiqi Kollecinin və Bülbül adına Orta-İxtisas Musiqi Məktəbinin müəllimi Raya Abbasovanın “Üzeyir Hacıbəyli ənənələri Əşrəf Abbasovun yaradıcılığında və rəhbərlik fəaliyyətində” mövzularında məruzələri konfrans iştirakçılarının diqqətinə çatdırılacaq.

Elmi konfransda, həmçinin Nizami Gəncəvinin anadan olmasının 880 illiyi münasibətilə Üzeyir Hacıbəylinin “Sənsiz” və “Sevgili canan” əsərləri ilə təməlini qoyduğu qəzəl-romans janrının ənənələrinin davam və inkişaf etdirilməsi məqsədilə, ABİ tərəfindən keçirilmiş “Nizami Gəncəvi İli”nə həsr olunmuş qəzəl-romans müsabiqəsi laureatlarının əsərləri, o cümlədən Lalə Cəfərovanın “Səbr et” (solist - Əməkdar artist Fərid Əliyev) və Azər Dadaşovun “Sevqi qanaddır” (solist - Nigar Cəlilova) qəzəl-romansları ifa olunacaq.

Sentyabrın 24-də Bəstəkarlar İttifaqının, Mədəniyyət Nazirliyi və Azərbaycan Milli Elmlər Akademiyasının birgə təşkilatçılığı ilə keçirəcək tədbirdə akademik Zemfira Səfərovanın yeni kitabları, o cümlədən layihənin rəhbəri və elmi redaktoru, bir çox oçerklərin, “Ön söz” və şərhlərin müəllifi olduğu “Azərbaycan musiqi tarixi” çoxcildliyinin V cildi, “Şuşa Azərbaycanın musiqi qalasıdır” (Azərbaycan və rus dillərində), habelə “Türk dünyasının Müzik Yıldızı – Üzeyir Hacıbəyli” kitabları musiqi ictimaiyyətinə təqdim ediləcək.

Respublikanın tanınmış elm və mədəniyyət xadimlərinin iştirak edəcəyi təqdimat mərasimində Qədim Musiqi Alətləri Dövlət Ansamblı (bədii rəhbər - Xalq artisti Munis Şərifov), Xalq artisti Gülnaz İsmayılova (soprano) və beynəlxalq müsabiqələr laureatı Fəqan Həsənli (piano) Azərbaycanın klassik bəstəkarlarının əsərlərini ifa edəcəklər.

Mədəniyyət Nazirliyinin dəstəyi ilə keçirilən XVI Beynəlxalq Bakı Caz Festivalı davam edir.

AZƏRTAC xəbər verir ki, konsertlər “Beer Hall and Music Club”da keçirilir.

Bu gün saat 19:00-da başlanacaq növbəti konsert proqramına yerli və əcnəbi musiqiçilər qatılacaq. Belə ki, “Beer Hall and Music Club”da Azərbaycandan Diana Hacıyeva və Əfqan Rəsul, Almaniyadan “Kristof Lauer trio”su çıxış edəcək.

Qeyd edək ki, sentyabrın 18-dək davam edəcək festival “Shahdag Night Club”da qala konsertlə başa çatacaq.

Türkiyənin Malatya vilayətinin Battalqazi bölgəsindəki Arslantəpə kurqanında tunc dövrünə aid möhürlər tapılıb.

AZƏRTAC TRT-yə istinadən xəbər verir ki, Türkiyənin Malatya vilayətinin Battalqazi bölgəsindəki UNESCO-nun Dünya İrsi Siyahısına daxil edilmiş Arslantəpə kurqanında 5621 il əvvələ aid olduğu düşünülən qədim möhürlər tapılıb.

55 nəfərlik bir qrupla 10 avqustda başlayan qazıntılar nəticəsində indiyə qədər 250 ədəd nadir möhür aşkarlanıb.

Mədəni İrs Həftəsi çərçivəsində Daşkənddə keçirilən “Özbəkistanın mədəni irsi-yeni Renessansın bünövrəsi” adlı beşinci konqres öz işini davam etdirib.

AZƏRTAC xəbər verir ki, tədbirdə sosial və humanitar elmlər üzrə alimlər, filosoflar, tarixçilər, şərqşünaslar, linqvistlər, sənətşünaslar, antropoloqlar, əlyazmalar və miniatürlər üzrə mütəxəssislər iştirak edir.

Konqresin bölmələr üzrə keçirilən iclasında Azərbaycan Milli Xalça Muzeyinin direktoru, ICOM Azərbaycan Milli Komitəsinin sədri Şirin Məlikovanın “Azərbaycan mədəni irsinin qorunması və populyarlaşdırılmasında Milli Xalça Muzeyinin təcrübəsi” mövzusundakı məruzəsi maraqla qarşılanıb.

Ş.Məlikova Azərbaycan xalçalarının qorunması, onların bərpa edilməsi sahəsində muzeyin təcrübəsi haqqında məlumat verib, xalçaların xüsusiyyətləri, forma və məzmunu barədə söhbət açıb.

Mədəni İrs Həftəsi sentyabrın 21-dək Daşkənddə, Xivədə və Nukusda davam edəcək.

Cari ilin 18-24 sentyabr tarixində ölkəmizdə ənənəvi Üzeyir Hacıbəyli Beynəlxalq Musiqi Festivalının keçirilməsi nəzərdə tutulub. Əsasən Bakı şəhərində təşkil olunacaq festivalın zəngin proqramında Azərbaycanın bədii kollektivləri, solistləri ilə yanaşı, ABŞ və Polşadan dəvət olunmuş musiqiçilərin də çıxışları yer alacaq. Bundan əlavə, 44 günlük Vətən müharibəsində Ali Baş Komandanın qətiyyəti, Ordumuzun şücaəti nəticəsində tarixi ədalət bərpa edildikdən sonra Azərbaycan Respublikası Prezidentinin müvafiq Sərəncamı ilə Şuşa şəhərinin Azərbaycanın mədəniyyət paytaxtı elan olunması nəzərə alınaraq, bu ilki festivalın ilk konsertlərindən biri də Şuşa şəhərində keçiriləcək. Sentyabrın 18-də Üzeyir musiqi günündə Xalq artisti Ağaverdi Paşayevin rəhbərliyi altında F.Əmirov adına Azərbaycan Dövlət Mahnı və Rəqs Ansamblı və tanınmış solistlərin iştirakı ilə Şuşada açıq havada konsert təşkil olunacaq. Eyni zamanda, sayca XIII olan bu festivalın proqramında Gəncə və Ağdamda tədbirlərin təşkili planlaşdırılıb. Bu ilki festival çərçivəsində həmçinin ilk dəfə olaraq “Üzeyir sənətinin gənclik sədaları” adı altında yeni proqrama start veriləcək və gənclərə böyük səhnədə özlərini nümayiş etdirməyə şans yaradılacaq. Onu da vurğulamaq lazımdır ki, mövcud pandemiya şəraiti ilə əlaqədar tədbirlərə yalnız xüsusi dəvətnamələr və COVİD pasportu ilə giriş mümkün olacaq.