XƏBƏRLƏR

Azərbaycan stendi Moskvada keçirilən “OTDYKH Leisure” beynəlxalq sərgi və forumunda beynəlxalq mükafata layiq görülüb.

Dövlət Turizm Agentliyindən AZƏRTAC-a bildirilib ki, turizm potensialını sərgiləyən digər iştirakçı ölkələrdən fərqliliyi ilə seçilmiş Azərbaycan stendinə “Ən yaxşı təqdimat” nominasiyası üzrə mükafat təqdim olunub.

27-ci dəfə təşkil olunan forum-sərgidə Azərbaycan tərəfindən “Azərbaycan Hava Yolları” QSC (AZAL), Azərbaycan Hotel Assosiasiyası, Naxçıvan Turizm Departamentinin nümayəndələri, eləcə də 11 yerli turizm şirkəti iştirak edib. Forum çərçivəsində ölkəmizə həsr olunmuş “Azərbaycanın turizm imkanları və yeni marşrutların inkişafı” mövzusunda xüsusi sessiya keçirilib. 2 mindən çox iştirakçının qatıldığı tədbir çərçivəsində 40 müxtəlif mövzulu sessiyada 15 ölkədən 200-dən çox spiker çıxış edib.

Qeyd edək ki, sərgidə Azərbaycan, Moldova, Bolqarıstan, Belarus, Rusiya, Almaniya, İspaniya, Kipr, Misir, Tunis, Hindistan, Şri-Lanka, Çin, Yaponiya, Tayland, Tanzaniya, Braziliya, Kuba kimi 18 xarici ölkədən 350-dən çox şirkət iştirak edib.

Hər il keçirilən sərgi turizm təşkilatları və agentliklərinin, turizm üzrə ixtisaslaşmış dövlət və ictimai qurumların nümayəndələrini bir araya toplayır.

“Azərxalça” ASC sentyabrın 14-dən 16-dək Moskvada təşkil olunacaq beynəlxalq ev tekstili sərgisi “Heimtextil”də iştirak edəcək.

Bu barədə AZƏRTAC-a “Azərxalça” ASC-nin mətbuat xidmətindən bildirilib.

Qeyd edilib ki, sərgidə klassik Azərbaycan xalçaları ilə yanaşı, yeni dizayn üslubunda toxunan modern tərzli əsl əl xalçalarımız da nümayiş olunacaq.

Xatırladaq ki, “Azərxalça” ASC dünya və yerli bazara yalnız klassik Azərbaycan xalçalarını deyil, modern tərzdə də xalçalar təqdim edir. Həmin xalçaların dizayn üslubu dəyişilsə də, naxış elementləri, toxunma texnikası olduğu kimi saxlanılır.

Xalçaların keyfiyyətinin yüksəldilməsi üçün atılan addımlardan biri də müəssisədə yeni strukturun – keyfiyyətə nəzarət qrupunun formalaşdırılmasıdır. Qrup birbaşa müəssisələrdə istehsal prosesində keyfiyyətə xəta yetirən hər hansı bir qüsurun yerindəcə aradan qaldırılması ilə yanaşı, hazır məhsul anbara daxil olmamışdan qabaq da istənilən xətanı görüb tədbirini görür.

AZƏRTAC xəbər verir ki, bu sözləri jurnalistlərə müsahibəsində “Azərxalça” ASC-nin mətbuat katibi Xatuna Abdullayeva deyib.

“Keyfiyyətə nəzarət qrupu yüksəkkeyfiyyətli texnoloqlar, toxucu və ekspertlərdən ibarətdir. Texnoloqlar keyfiyyətə, iplərin dövriyyəyə buraxılmasına, xammalın hərəkətinə xüsusi diqqət yetirir. Bu proses izafi xammalın yerlərdə, anbarlarda toplanıb qalmasının da qarşısını alır. Əvvəlki xalçalara nisbətdə hazırkılar daha keyfiyyətlidir. Biz qarşımıza məqsəd qoymuşuq ki, yüksəkkeyfiyyətli məhsulların ümumi payı 90 faizi aşsın”, - deyə X.Abdullayeva bildirib.

Mətbuat katibi, həmçinin deyib ki, satılan hər bir xalçaya yapışdırılmış QR kod vasitəsilə alıcı məhsul haqqında bütün məlumatları - xalçanın adı, növü, hansı materialdan toxunduğu, ölçüsü, toxunma yeri və tarixi, hansı toxucu tərəfindən toxunduğu və xalçanın orijinal olduğunu öyrənə bilər.

Azərbaycanın sevilən “Telefonçu qız” filmində Mehriban obrazını canlandıran Ukraynanın Xalq artisti Raisa Nedaşkovskaya daha bir mükafata layiq görülüb.

AZƏRTAC xəbər verir ki, Raisa Nedaşkovskaya teatr sənətinin inkişafındakı xidmətinə görə “Kiyevskaya Pektoral” mükafatı alıb.

Mükafatlandırma mərasimindən öncə Kiyevin bir neçə teatrlarının aktyorları tərəfindən səhnəciklər göstərilib. Mükafat təqdim edildikdən sonra çıxış edən R.Nedaşkovskaya göstərdikləri etimada görə təşəkkürünü bildirib. Karyerası haqqında danışan aktrisa kino və teatr sənətini seçdiyi üçün xoşbəxt olduğunu vurğulayıb. O, çıxışında çəkildiyi filmlər haqqında məlumat verərkən Azərbaycan istehsalı olan “Telefonçu qız” filmi haqqında xoş xatirələrini danışıb.

Tədbirin sonunda Ukraynada Müslüm Maqomayev adına Mədəniyyət Mərkəzinin rəhbəri, Ukraynanın Xalq artisti Qurban Abbasov və müğənni Natalya Kudyaşova musiqili kompozisiya ilə çıxış ediblər.

Şair, Azərbaycan Yazıçılar Birliyinin Mətbuat xidmətinin katibi Xəyal Rza Serbiyada iki ədəbiyyat festivalında ölkəmizi təmsil edir.

Bu barədə AZƏRTAC-a məlumat verən şair deyib ki, festivallardan biri İnciya Beynəlxalq Poeziya Festivalı (İNDJIJA Pro Poet, 2021), digəri isə Serbiya Beynəlxalq Sənət və Ədəbiyyat Festivalıdır (LİTERA ARS PANEVECO, 2021).

Onun sözlərinə görə, festivallar Belqrad, İnciya, Novi Sad və Paneveka şəhərlərində müxtəlif ölkələrdən 40-dan artıq yazarın iştirakı ilə keçirilir. İnciyada keçirilən festivalın ilk mükafatı serb yazıçı Lyubivoje Rsumoviçə veriləcək. Festivalda iştirakçılarının əsərlərindən ibarət serb dilində kitab da oxuculara təqdim olunacaq.

Qeyd edək ki, festivallara Çexiya, Böyük Britaniya, Rumıniya, İtaliya, İspaniya, İsrail, Rusiya Macarıstan, Portuqaliya və digər ölkələrdən tanınmış yazarlar dəvət alıb.

Dünyanın ən zəngin 5 muzeyindən biri olan İstanbul Arxeologiya Muzeyində 5 min sənət əsərindən ibarət sərgi açılacaq.

AZƏRTAC “TRT”yə istinadla xəbər verir ki, sərgidə xronoloji olaraq hazırlanmış Ellinizm dövrünə məxsus ilk imperator Augustusdan başlayaraq, 26 Roma imperatorunun və onların ailələrinin heykəlləri və nadir kolleksiyalardan biri olan Yunan və Roma sikkələri nümayiş olunacaq. Bununla yanaşı, əsərləri daha yaxşı müşahidə etmək üçün o dövrü əks etdirən tematik şəkil lövhələri də hazırlanıb.

Osmanlı İmperiyasından Türkiyə Cümhuriyyətinə miras qalan İstanbul Arxeologiya Muzeyi Türkiyədəki ilk muzeyşünaslıq işlərini özündə birləşdirir. Muzeyin kolleksiyasında Balkan yarımadasından Afrikaya, Anadolu və Mesopotamiyadan Ərəb Yarımadasına və Əfqanıstana qədər, Osmanlı İmperiyasına daxil olan bütün mədəniyyətlərə aid əsərlər mövcuddur. Muzey üç əsas binadan (Arxeologiya Muzeyi, Qədim Şərq Əsərləri Muzeyi, Çinili Köşk Muzeyi) ibarət olduğu üçün İstanbul Arxeologiya Muzeyləri adlandırılır.

Sentyabrın 10-da Azərbaycan Milli Xalça Muzeyində Qarabağın “Çələbi” xalçasının qədim ənənələrə uyğun şəkildə hanadan kəsimi mərasimi keçiriləcək.

AZƏRTAC xəbər verir ki, muzeyin Ənənəvi texnologiya şöbəsində toxunan bu xalça 2019-cu ildə UNESCO-nun Ümumdünya İrs Komitəsinin 43-cü sessiyası çərçivəsində keçirilən “Azərbaycan mədəni irsi Luvr Muzeyində” adlı sərgidə nümayiş etdirilən unikal xalçanın tam replikasıdır.

Xalçada ara sahənin mərkəzində “Çələbi” xalçalarına xas eyni quruluşlu iki göl elementi verilib. Qarabağ xalçaçılığında geniş yayılmış “Günəş” və ya “Çələbi” adlı göl elementi hər tərəfə şüalarını yayan günəşin rəmzi olub, həm də ilahi nura işarədir.

Azərbaycandan olan “Nakhish” musiqi kollektivi Vladimir şəhərində (Rusiya) keçirilən X Beynəlxalq “Qızıl Dairə-2021” Xalq Yaradıcılığı Festivalında iştirak edir.

Bakıdakı Rus Evinin mətbuat mərkəzindən AZƏRTAC-a bildiriblər ki, tədbirin təşkilatçıları Rusiya Federasiyasının Mədəniyyət Nazirliyi, Rusiyanın UNESCO üzrə Komitəsi yanında Qeyri-Maddi Mədəni İrsin Qorunması Komitəsi, V.D.Polenov adına Dövlət Rusiya Xalq Yaradıcılığı Evi, Vladimir vilayəti Mədəniyyət Departamenti və Regional Xalq Yaradıcılığı Mərkəzidir.

Bu il festivalda Azərbaycan, Rusiya, Belarus, İran, Hindistan və digər ölkələrdən olan iştirakçı kollektivlər bir araya gəlib.

Azərbaycandan olan ansambl fəal konsert fəaliyyəti ilə məşğuldur, respublikanın böyük bayram tədbirlərində çıxış edir.

Kollektivin bədii rəhbəri beynəlxalq musiqi və poeziya layihələrinin müəllifi və təşkilatçısı, musiqi filmlərinin quruluşçu rejissoru, müəllif mahnılarının müxtəlif beynəlxalq festivallarının laureatı Vəfa Məmmədovadır.

Dünya şöhrətli fotojurnalist Reza Deqati erməni vandalları tərəfindən talan edilmiş Kəlbəcər Muzeyindən fotolarını instaqram səhifəsində paylaşıb.

AZƏRTAC xəbər verir ki, Reza Deqati paylaşımında yazıb: “Kəlbəcər Muzeyi əsrlər boyu Kəlbəcərin qiymətli daşları və qızılı ilə yaradılan inanılmaz heykəlləri və əsərləri ilə məşhur idi.

1979-cu ildə əhalinin ən son siyahıya alınması zamanı burada 5604 nəfər yaşayırdı - 99.4 faiz azərbaycanlı, 0.1 faiz erməni, 0.1 faiz isə rus. 1993-cü il aprelin 2-də erməni qüvvələri şəhəri ələ keçirdi. Əhaliyə çıxmaq üçün 10 saat verdilər. Bir çoxu ayaqqabı olmadan belə piyada 3480 metr hündürlüyündə dağı keçərək qarda ayaqlarını itirdi və ya öldü. Şəhər kül oldu, yaşamaq üçün bir neçə ev saxlanıldı. Erməni qüvvələri 2020-ci ilin noyabrında məğlub olduqdan sonra Azərbaycan onlara Kəlbəcəri tərk etmək üçün 25 gün vaxt verdi və onlar istədiklərini götürə bildilər.

Ayrılmazdan əvvəl isə hətta evləri yandırdılar, ağacları kəsdilər, heyvanları öldürdülər və Ermənistana getdilər. Qurtuluşdan sonra şəhərə gələndə, bir çox başqa görməli yerlər arasında məşhur muzeyi axtardım. Muzeyi tamamilə yer üzündən sildiklərini gördükdə isə kədərləndim və şoka düşdüm... Bütün qiymətli və qədim heykəlləri və əsərləri, qızılları götürmüşdülər. Yalnız bir neçə heykəl qalmışdı ki, yəqin ki, onları da ağır olduqları üçün aparmamışdılar. O əvəzolunmaz muzey əşyaları haradadır? Bütün Qarabağ muzeylərindən, tarixi abidələrdən və evlərdən talan edilmiş bütün bu əsərlərin və minlərlə digər əşyaların siyahısı sovet arxivlərində mövcuddur.

İnanıram ki, UNESCO bu mövzuda müəyyən işlər görəcək”.

Sentyabrın 9-da Gəncə Şəhər İcra Hakimiyyətinin dəstəyi, Gəncə Regional Mədəniyyət İdarəsinin təşkilatçılığı ilə Heydər Əliyev meydanında dahi Azərbaycan şairi və mütəfəkkiri Nizami Gəncəvinin 880 illiyinə həsr olunmuş ümumşəhər tədbiri keçirilib. Tədbirdə şəhər İcra Hakimiyyətinin başçısı Niyazi Bayramov, Türkiyənin Gəncədəki baş konsulu Zeki Öztürk, Gürcüstanın Gəncədəki baş konsulu Nikolos İaşvili, Gəncədən millət vəkilləri Naqif Həmzəyev, Müşfiq Cəfərov, Pərvin Kərimzadə, Gəncə Regional Mədəniyyət İdarəsinin rəisi Vasif Cənnətov, AMEA Gəncə Bölməsinin rəhbəri Fuad Əliyev, şəhərin təhsil, gənclər və idman idarələrinin rəhbəri, müəssisə, təşkilat rəhbərləri və ictimaiyyət nümayəndələri iştirak ediblər. Yubiley tədbirinin iştirakçıları əvvəlcə Gəncə Regional Mədəniyyət İdarəsi tabeliyində olan Uşaq İncəsənət və Uşaq Rəssamlıq məktəblərinin, Gəncə Dövlət Rəsm Qalereyasının, Gəncə Dövlət Kukla Teatrının, eləcə də şəhər misgərlərinin nümayiş etdirdikləri sərgi ilə tanış olublar. Tədbirdə Vətən uğrunda canından keçən şəhidlərimizin ruhu bir dəqiqəlik sükutla anılıb. Çıxış edənlər Nizami Gəncəvinin zəngin yaradıcılıq irsi barədə danışıblar. Bildirilib ki, Nizami bütün ömrü boyu dövrün mühüm mədəniyyət mərkəzlərindən olan qədim Gəncədə yaşayıb, dünya ədəbi-fəlsəfi düşüncə tarixini zənginləşdirən ecazkar söz sənəti incilərini burada ərsəyə gətirib. Mütəfəkkir şair çox sayda davamçılarından ibarət böyük bir ədəbi məktəbin bünövrəsini qoyub. Nizaminin əsərlərinə çəkilən və bu gün ən məşhur kitabxana və muzeyləri bəzəyən miniatür Şərq sənətinin inkişafına təkan verib. Rəsmi hissədən sonra Gəncə Dövlət Dram Teatrının təqdimatında “Xəmsə” ədəbi-bədii kompozisiyası nümayiş etdirilib. Kompozisiyanın bədii rəhbəri Əməkdar mədəniyyət işçisi Əli Qasımov, rejissoru Elşad Əhmədovdur. Nizami obrazını Xalq artisti Alim Məmmədov canlandırıb. Gəncə Dövlət Filarmoniyası Xalq çalğı alətlərinin ansamblının (bədii rəhbər – Əməkdar artist Elçin Elçiyev)  hazırladığı konsert proqramı dahi bəstəkar Üzeyir Hacıbəylinin “Koroğlu” operasından “Uvertüra” ilə başlayıb. Konsertdə Nizaminin sözlərinə yazılmış mahnı və  romanslar, Azərbaycanı, Gəncəni vəsf eləyən mahnılar səsləndirilib. Xalq artisti Sevinc İbrahimova, Əməkdar artistlər Kəmalə Tağızadə, Mehparə Cəfərova, Tural Abdullayev və digər ifaçıların çıxışları şəhər sakinlərinin zövqünü oxşayıb. Tədbirdə Gəncə Şəhər İcra Hakimiyyətinin təşəbbüsü və dəstəyi ilə hazırlanan nizamiganjavi.az saytının yaxın günlərdə istifadəyə veriləcəyi də bildirilib. Saytda dahi şairin həyatı, yaradıcılığı, Nizami haqqında tədqiqatlar, maraqlı məlumatlar öz əksini tapacaq.