Facebook Pixel Code
GoMap XƏRITƏ

XƏBƏRLƏR


  • XVI Beynəlxalq Bakı Caz Festivalı başlayır
    2021-ci ilin 10-18 sentyabr tarixlərində Mədəniyyət Nazirliyinin dəstəyi ilə XVI Beynəlxalq Bakı Caz Festivalı keçiriləcək. İkiillik fasilədən sonra keçirilən builki Bakı Caz Festivalı Azərbaycanın qəhrəman şəhidlərinin əziz xatirəsinə, eləcə də çətin zamanların ağırlığı altında əyilməyən caz musiqisinin ruhuna həsr olunur. Bu il Bakı Caz Festivalı, həmçinin mövcud epidemioloji vəziyyət nəzərə alınaraq karantin qaydalarına uyğun şəkildə keçirilməsi ilə fərqlənəcək. Bütün çətinliklərə baxmayaraq, Bakı Caz Festivalı beynəlxalq səviyyədə qalır və dünyanın hər yerindən ən yaxşı musiqiçiləri öz ətrafına toplayaraq yüksək standartlara uyğun təşkil olunacaq. Festivalın konsertləri “Beer Hall and Music Club” və “Art Tower Gallery”də, 18 sentyabrda qala konsert isə “Shahdag Night Club”da keçiriləcək. Bu il festivala Hollandiya, Macarıstan, Türkiyə, Rusiya, İsrail, Almaniya, Lüksemburq və Gürcüstandan qruplar qatılacaq. Festivalda xarici həmkarları ilə birlikdə azərbaycanlı cazmenlər – Əməkdar artistlər Rain Sultanov, İsfar Sarabski, musiqiçilər Elbəy Məmmədzadə, Elvin Bəşirov, Diana Hacıyeva, Əfqan Rəsul, Nicat Aslanov və başqaları çıxış edəcəklər. Bakı Caz Festivalı ənənəvi olaraq uzun illərdir keçirilən və artıq istedadlı musiqiçilər nəslini yetişdirən caz ifaçıları yarışmasına xüsusi diqqət yetirir. Builki festival çərçivəsində də gənc istedadlar üçün müsabiqə təşkil olunacaq. Sentyabrın 10-da festival çərçivəsində azərbaycanlı rəssamlar Hüseyn Haqverdiyev, Bəhram Xəlilov, Rüstəm Hüseynov, Arif Quluzadə “İmprovised by İndustry” layihəsini təqdim edəcəklər. Sentyabrın 17-də isə dizayner Leyla Əhmədovanın moda nümayişi – caz mövzusunda tamamilə yeni bir kolleksiyası təqdim olunacaq. 11 və 12 sentyabr tarixlərində “İncəsənət qülləsi” (“Art Tower”) qalereyasında caz-kino proqramı – keçən əsrin əfsanəvi filmlərinin nümayişi olacaq. Bu il də Bakı Caz Festivalının ayrılmaz hissəsi olaraq ustad dərsləri və cem-seyşnlər (jam-session) təşkil ediləcək. Qeyd edək ki, Bakı Caz Festivalı axırıncı dəfə 2019-cu il 18–27 oktyabr tarixlərində “Daha çox caz, daha çox intellekt” şüarı altında keçirilmişdi.
  • Xalq Təsərrüfatı Nailiyyətləri Sərgisində Moskvanın 874-cü ildönümünə həsr edilmiş “Moskva-Bakı: qəlblər qoşa döyünür" adlı tədbir keçiriləcək

    Sentyabrın 11-12-də Moskvadakı Xalq Təsərrüfatı Nailiyyətləri Sərgisinin (XTNS) "Azərbaycan" pavilyonunda Moskvanın 874-cü ildönümünə həsr olunmuş "Moskva-Bakı: qəlblər qoşa döyünür " adlı bayram tədbiri keçiriləcək.

    AZƏRTAC xəbər verir ki, tədbirdə moskvalıların və Rusiya paytaxtının qonaqlarının, eləcə də diaspor nümayəndələrinin iştirakı gözlənilir. Tədbirin qonaqları sərgi-yarmarka zonasında Azərbaycan məhsulları ilə tanış olmaq, məşhur Azərbaycan çayının dadına baxmaq, milli üslubda tərtib olunmuş foto zonasında yaddaqalan fotolar çəkdirmək imkanı əldə edəcək, Azərbaycanın paytaxtı Bakının siluetlərinin və sevimli Moskvanın görməli yerlərinin rəsmlərini çəkmək bacarıqlarını sınaqdan keçirə biləcəklər.

    Milli xoreoqrafiya kollektivlərinin ifasında Azərbaycan rəqsləri və xalq çalğı alətlərində canlı musiqi heç bir qonağı laqeyd qoymayacaq. Azərbaycanın paytaxtı və respublikanın tarixi yerləri üzrə virtual tur bütün sərhədləri qısa müddət ərzində silmək və qonaqpərvər ölkəmizdə olmaq üçün unikal şans olacaq.

    Tədbirin açılışı sentyabrın 11-də saat 13:00-dan 19:00-dək davam edəcək.

  • Növbəti “Qızıl şir” mükafatı Ceymi Li Kertisə verilib

    “Hellouin”, “Yerləri dəyişmək”, “Vanda adında balıq” filmləri ilə tanınan amerikalı aktrisa Ceymi Li Kertis karyerasında qazandığı uğura görə Venesiya Kinofestivalının “Qızıl şir” mükafatı ilə təltif olunub.

    AZƏRTAC TASS agentliyinə istinadla xəbər verir ki, təntənəli mükafatlandırma mərasimi ötən gün – sentyabrın 8-də keçirilib.

    “Çox təsirlənmişəm. Bu gün ürəyim sizinlədir. Mükafata görə festivala minnətdaram”,- deyə aktrisa bildirib.

    O, öz valideynləri aktyor Toni Kertis və aktrisa Canet Lini xatırlayaraq bildirib ki, onlar öz qızını belə mötəbər festivalda mükafat qazandığını görsəydilər qürur hissi keçirərdilər: “Məni mükafatlandırmaqla siz həm də valideynlərimi mükafatladırırsınız”.

    Aktrisa “Hellouin” ekran əsərinin rejissoru Con Karpenter və ssenarist Debra Hillə də təşəkkürlərini bildirməyi unutmayıb. Qeyd edib ki, məhz bu filmin sayəsində onun karyerası yüksəlişə doğru gedib.

  • Özbəkistanda UNESCO-nun iştirakı ilə beynəlxalq forum və mədəni irs həftəsi keçiriləcək

    Sentyabrın 14-15-də Özbəkistanın qədim Xivə şəhərində UNESCO-nun iştirakı ilə “Mərkəzi Asiya dünya sivilizasiyasının ayrıcında” adlı beynəlxalq mədəniyyət Forumu keçiriləcək . Sentyabrın 13-dən 21-dək isə Daşkənddə, Xivədə və Nukusda Mədəni İrs Həftəsi baş tutacaq.

    AZƏRTAC xəbər verir ki, tədbirdə sosial və humanitar elmlər üzrə alimlər, filosoflar, tarixçilər, şərqşünaslar, linqvistlər, sənətşünaslar, antropoloqlar, əlyazmalar və miniatürlər üzrə ixtisaslaşmış mütəxəssislər iştirak edəcək.

    Ümumiyyətlə foruma dünyanın 46 ölkəsindən gələn 350-dən artıq nümayəndə qatılacaq.

    Forumda Azərbaycanın mədəniyyət naziri Anar Kərimovun iştirakı da nəzərdə tutulur.

    Mədəni İrs Həftəsi çərçivəsində “Özbəkistanın mədəni irsi-yeni Renessansın bünövrəsi” adlı beşinci konqres də keçiriləcək.

  • Özbəkistan portalı Azərbaycan muğamları haqqında məqalə çap edib

    Özbəkistanın “ishonch.uz” portalı Azərbaycan muğamları haqqında AZƏRTAC-ın materialını özbək dilində yerləşdirib.

    Məqalədə “Mirzə Hüseyn segahı”, “Şahnaz”, “Kürdü Şahnaz”, “Qatar”, “Rast”, “Mahur-hindi” və digər muğamlarımızın yaranma tarixindən danışılır, bu muğamları ifa edən xanəndələr haqqında məlumat verilir.

    Qeyd olunur ki, “Segah” muğamını şuşalı xanəndə Mirzə Hüseyn elə məharətlə oxuyub ki, muğam onun adı ilə “Mirzə Hüseyn segahı” kimi musiqi tarixinə düşüb. Sonralar bu muğamı Cabbar Qaryağdıoğlu, Keçəçi oğlu Məhəmməd və Xan Şuşinski məharətlə ifa ediblər.

    Bildirilir ki, “Şahnaz” və “Kürdü” muğamları əsasında XIX əsrdə məşhur xanəndə Hacı Hüsü “Kürdü Şahnaz” yaradıb. Bu muğamlar Şahnaz Abbas və Xan Şuşinskinin ifasında yadda qalıb.

    Yazıda “Qatar” muğamının Şuşada Hacı Hüsü tərəfindən yaradıldığı bildirilir. Belə ki, xanəndə Qatar kəndindən Şuşaya gəldiyi üçün muğam da bu kəndin adı ilə tarixə düşüb. Bu muğamı sonralar Cabbar Qaryağdıoğlu, Məşədi Məmməd Fərzəliyev, Şəkili Ələsgər, Segah İslam, Cahan Talışinskaya və digər xanəndələr ifa ediblər.

  • Əlcəzair portalı Şuşanın turizm potensialından yazıb

    Əlcəzairin “Əl Hərir” portalında şərqşünas Həşim Məmmədov və Diaspor Jurnalistləri Birliyinin sədri Fuad Hüseynzadənin müəllifi olduqları Şuşa şəhərinin turizm potensialından bəhs edən məqalə yayımlanıb.

    AZƏRTAC xəbər verir ki, məqalədə Azərbaycan hakimiyyətinin işğaldan azad olunmuş Şuşa şəhərində tarixi mədəniyyət abidələrinin bərpası istiqamətində apardığı genişmiqyaslı tədbirlərdən bəhs edilib. Müəlliflər qeyd ediblər ki, bərpa-quruculuq işləri və ən yüksək standartlara uyğun olan mehmanxanaların açılması Azərbaycanın mədəniyyət paytaxtının həm də turizm mərkəzi olacağından xəbər verir.

    Məqalədə diqqətə çatdırılıb ki, Azərbaycan Prezidenti İlham Əliyev və birinci xanım Mehriban Əliyeva dəfələrlə Şuşaya səfər edib, burada həyata keçirilən layihələrin icrası ilə tanış olub, həmçinin açılışlarda iştirak ediblər. Uzunluğu 101 kilometr olan Zəfər yolunun inşasının qısa müddətdə başa çatdırılması da əlamətdar hadisədir. Yüksək komfortlu “Qarabağ” hotelinin açılışında iştirak edən Prezident İlham Əliyev bildirib ki, tezliklə dünyanın ən gözəl şəhərlərindən birinə çevriləcək Şuşa həm də xarici turistlərin diqqətini cəlb edəcək. Bu baxımdan şəhərdə “beş”, “dörd” və “üç” ulduzlu otellərin tikilməsi zəruridir. Hazırda Şuşada yenidən qurulan Park oteldə işlər başa çatdıqdan sonra otel qonaqlarını müasir səviyyədə qarşılaya biləcək. Eyni zamanda, bu şəhərdə “Otel və Konfrans Mərkəzi”nin təməli qoyulub.

    Yazıda qeyd olunub ki, Şuşada keçirilən Vaqif Poeziya Günləri və “Xarıbülbül” festivalı, bərpa olunan tarixi-mədəniyyət abidələri turistlərin böyük marağına səbəb olacaq. Həmçinin qədim mədəniyyət paytaxtında beynəlxalq və regional miqyasda müxtəlif tədbirlər də təşkil ediləcək.

  • “4.4 Qısa Tamaşalar Festivalı”na tamaşa qəbulu davam edir

    Azərbaycan Respublikasının Mədəniyyət Nazirliyi və Teatro.az sənət portalının xalqımızın Vətən müharibəsində qazandığı tarixi Zəfəri səhnə əsərlərində yaşatmaq, eləcə də pandemiya dövrünün məlum reallıqları üzündən durğunlaşmış milli teatr prosesini canlandırmaq, teatr sənətçilərini yeni yaradıcı təşəbbüslərə təşviq etmək məqsədilə elan etdiyi “4.4 Qısa Tamaşalar Festivalı”na (QTF) tamaşa qəbulu davam edir.

    Otuz ilə yaxın işğal altında olan torpaqlarımızın rəşadətli Azərbaycan Ordusu tərəfindən 2020-ci ilin 44 günlük müharibəsində azad edilməsi və ölkəmizin ərazi bütövlüyünün bərpa olunması milli teatr sənətində də öz təcəssümünü tapmalıdır. Digər tərəfdən, artıq ikinci ildir davam edən pandemiya ilə bağlı tətbiq edilən karantin şəraitinə görə teatrlarımız, demək olar ki, fəaliyyətsizdir.

    AZƏRTAC xəbər verir ki, bu mənada, “4.4 Qısa Tamaşalar Festivalı” xalqımızın haqq savaşındakı qalibiyyətini Azərbaycan teatr tarixində əbədiləşdirməklə yanaşı, teatr mühitindəki sükunəti də aradan qaldırmağa, teatr sənətinin təbliğinə və inkişafına xidmət edəcək. Festival təkcə dövlət teatrlarını deyil, həmçinin özəl teatr kollektivlərini, müstəqil sənətçiləri əhatə etməklə, yeni istedadların aşkarlanmasına da zəmin yaradacaq.

    Qaliblər peşəkar teatr xadimlərindən ibarət münsiflər heyətinin qiymətləndirilməsi əsasında müəyyən ediləcək. Birinci yerin qalibinə 1500 manat, ikinci yerin qalibinə 1000 manat, üçüncü yerin qalibinə isə 750 manat pul mükafatı veriləcək. Hər yer üzrə bir qalib seçiləcək.

    Bir kollektiv, yaxud sənətçi müsabiqəyə yalnız bir tamaşa ilə müraciət edə bilər. Müsabiqəyə göndərilən tamaşalara janr məhdudiyyəti qoyulmur. Müsabiqəyə təqdim edilən tamaşaların xronometrajı 15 dəqiqədən artıq olmamalıdır. Müsabiqəyə təqdim edilən materiallar oktyabrın 15-dən gec olmayaraq 4.4festival@teatro.az elektron poçt ünvanına göndərilməlidir.

    Müsabiqə ilə bağlı daha ətraflı məlumatı nazirliyin saytından oxumaq olar.

  • “ART könüllü” proqramı davam edir

    “YARAT” Müasir İncəsənət Məkanı “ART könüllü” proqramını uğurla davam etdirir.

    AZƏRTAC xəbər verir ki, proqram müxtəlif layihələrdə iştirak etməklə yanaşı, təsviri incəsənət, teatr, kino, musiqi və digər sahələr üzrə təcrübə qazanmaq üçün əlverişli imkan yaradır.

    Təcrübə dövrü 3 ay olan proqramın iş qrafiki həftədə 2 dəfə olmaqla, 4 saat çəkir.

  • Ölkəmiz ABŞ-dakı beynəlxalq yemək festivalında təmsil olunub

    Şimali Karolina ştatının Roli şəhərində fəaliyyət göstərən Azərbaycan Dostluq Təşkilatının təşəbbüsü və təşkilatçılığı ilə ölkəmiz ABŞ-da keçirilən beynəlxalq yemək festivalında təmsil olunub.

    Diasporla İş üzrə Dövlət Komitəsindən AZƏRTAC-a bildirilib ki, müxtəlif xalqların mədəniyyətlərinin, adət-ənənələrinin və milli mətbəxlərinin təbliği məqsədilə təşkil edilən festivalda 26 ölkə iştirak edib. Onların arasında Azərbaycan, ABŞ, İtaliya, Almaniya, Yaponiya, Çin, Kolumbiya, Ekvador, Qırğızıstan, Meksika, Pakistan, Fələstin, Slovakiya, Suriya, Ukrayna, Vyetnam və digər ölkələr iştirak edib.

    Azərbaycan guşəsində ölkəmizin tarixi, mədəniyyəti, turizm potensialı və mətbəxi ilə bağlı ingilis və çex dillərində kitablar, suvenirlər nümayiş etdirilib, milli mətbəx nümunələri təqdim olunub. Azərbaycan Dostluq Təşkilatının rəhbəri, Amerika Azərbaycanlıları Koordinasiya Şurasının üzvü Adika İqbal və digər gənclərimiz yerli sakinlərə və qonaqlara ölkəmizin mədəniyyəti və mətbəxi barədə ətraflı məlumat veriblər.

    Azərbaycan guşəsi ilə tanışlıqdan məmnun qaldıqlarını söyləyən ziyarətçilər Azərbaycan mətbəxinə xüsusi maraq göstəriblər.

    Festival çərçivəsində 26 ölkənin milli rəqsi nümayiş etdirilib. Adika İqbalın rəhbərliyi ilə yaradılan “Qarabağ” rəqs qrupunun ifa etdiyi Azərbaycan rəqsini izləyicilər böyük rəğbətlə qarşılayıblar.

  • Pompeydə freskanın bərpasında robotdan istifadə ediləcək

    Sentyabr ayından etibarən Pompeydə dağılmış freskaların bərpa işlərində robotdan istifadə edilməsinə başlanılıb.

    Report  “RİA Novosti”yə istinadən xəbər verir ki, bu barədə “Euro-pulse” saytı məlumat yayıb.

    Eramızın 79-cu ilində Vezuvi vulkanının püskürməsi nəticəsində Pompey şəhərində freska və mozaikalar xeyli zədələnib və ya çoxsaylı xırda hissələrə parçalanıb. Onları əllə yığmaq mümkün olmadığından indiyədək muzeydə saxlanılıb.

    Bundan sonra incəsənət nümunələrinin bərpası ilə robot məşğul olacaq. Süni zəka ilə təchiz edilmiş robot mexaniki əlləri hesabına xırda hissələri tanıya və lazımi ardıcıllıqla düzəcək.

    Dağılmış binalardan birinin bərpasına 4 il sərf ediləcəyi bildirilir.