XƏBƏRLƏR

Mədəniyyət Nazirliyinin “İslam irsimizi tanıyaq” layihəsi çərçivəsində Təzəpir məscidi ilə bağlı geniş material hazırlanıb.

Bu barədə AZƏRTAC-a nazirlikdən bildirilib.

Təzəpir məscidi Abşeron ərazisində yerləşən ziyarətgah timsallı memarlıq abidəsidir. Məscid təkcə Azərbaycanın deyil, bütün Qafqazın dini mərkəzi hesab olunur. Qafqaz Müsəlmanları İdarəsi burada yerləşir.

Təzəpir məscidi Hacı Nabat xanım Aşurbəyova tərəfindən 1905-1915-ci illərdə inşa edilib. Nabat xanım tikiləcək məscidin memarının azərbaycanlı olmasına xüsusi əhəmiyyət verib. Bu məqsədlə Peterburqda təhsil almış ilk azərbaycanlı memar, əslən Şamaxıdan olan Zivər bəy Əhmədbəyovu dəvət edərək ona böyük miqdarda pul verib, İstanbula və ərəb ölkələrinə göndərib. Ezamiyyətin məqsədi bu ölkələrin məşhur məscidlərinin memarlığı ilə tanış olmaq idi. Əhmədbəyovun Təzəpir məscidinin layihəsinə dair ideyası da belə yaranıb.

SSRİ dövründə dini məkanlar digər müəssisələrə çevrildiyi üçün 1934-cü ildə Təzəpir məscidi çay fabriki, yay kinoteatrı, anbar və s. kimi istifadə edilib. Sonralar Zaqafqaziya Müsəlmanları Ruhani İdarəsi bərpa olunub və məscid fəaliyyətini davam etdirib.

2005-ci ildə Prezident İlham Əliyevin göstərişi əsasında məscidin bərpası və ətraf ərazilərin yenidən qurulması layihəsi hazırlanıb, 2007-2009-cu illərdə əsaslı şəkildə yenidən təmir olunub və dövlət başçısının iştirakı ilə məscidin təntənəli açılış mərasimi keçirilib.

Videomaterialı bu linkə daxil olaraq izləmək mümkündür: https://youtu.be/-OTuc2fqyFA 

C.Cabbarlı adına “Azərbaycanfilm” Kinostudiyası və Türkiyənin “Dada Yapım” şirkətinin birgə istehsalı olan “Fulya” sənədli filminin çəkilişləri başa çatıb.

AZƏRTAC xəbər verir ki, filmdə 2020-ci ilin 44 günlük Vətən müharibəsi dövründə müharibənin acı həqiqətlərini dünyaya çatdıran ”CNN Türk” televiziyasının hərbi müxbiri Fulya Öztürkün fəaliyyətindən bəhs olunur.

Oktyabrın 8-də ekran əsərinin Türkiyədə premyerası olacaq. Sənədli filmin Azərbaycanda nümayişinin vaxtı isə hələlik dəqiqləşməyib.

Nyu-York şəhərində keçirilən “New York Indepedent Cinema Awards” festivalında kiprlı rejissor Dərviş Zaimin “Flaşbellek” filmi “Ən yaxşı beynəlxalq film” mükafatına layiq görülüb.

AZƏRTAC xarici KİV-ə istinadla xəbər verir ki, 2019-cu ildə Gaziantep və Konyada çəkilən film Suriyada yaşanan hadisələrdən bəhs edir.

Film Suriyada yaşayan Əhməd adlı bir nəfərin başına gələnlərdən bəhs edir. Belə ki, o, bir hücum nəticəsində danışıq qabiliyyətini itirir. Bu faciədən sonra Əhməd münaqişələrdə ölən insanların fotoşəkillərinin çəkməyə başlayır və gördüklərini dünyaya çatdırmaq qərarına gəlir. Bu qərar onu böyük bir seçimlə üz-üz qoyur. Əhməd özünü və ailəsini qorumaqla, insanlıq qarşısında vəzifələrini yerinə yetirmək arasında seçim etmək məcburiyyətində qalır.

Qeyd edək ki, 2022-ci ildə nümayiş ediləcək film bundan əvvəl 27-ci Sedona Film Festivalında “Ən yaxşı beynəlxalq film” mükafatını və Fransada Cinemed Montpellier Film Festivalında "Gənc jüri mükafatını" qazanmışdı.

XVII Kazan Beynəlxalq Müsəlman Filmləri Festivalında rejissor Rüfət Həsənovun “Daxildəki ada” filminin müsabiqədənkənar təqdimatı baş tutub.

Dövlət Film Fondundan Report-a verilən məlumata görə, film Azərbaycanı festivalın “Türk dünyası” bölməsində təmsil edir.

Filmin “Rodina” kinoteatrında baş tutan nümayişindən sonra əsas rollardan birinin ifaçısı Xalq artisti Vidadi Həsənov tamaşaçıların suallarını cavablandırıb.

Masallı Regional Mədəniyyət İdarəsinin rəisi Bəxtiyar Qılıncov, idarənin və Cəlilabad rayonunda fəaliyyət göstərən mədəniyyət müəssisələri əməkdaşlarının iştirakı ilə təmizlik-abadlıq aksiyası keçirilib. İməcilik tədbirləri rayonun Günəşli kəndindəki XIX əsrə aid kilsənin ərazisində aparılıb.

AZƏRTAC xəbər verir ki, Masallı rayon Mərkəzi Kitabxanasında Xalq artisti, görkəmli teatr və kino aktyoru Yaşar Nurinin anadan olmasının 70 illiyi ilə əlaqədar tədbir keçirilib. Kitabxananın direktoru Əlhəddin Nəzərov sənətkarın özünəməxsus koloriti ilə seçilən, lirik, komik və dramatik rolların məharətli ifaçısı kimi yaddaşlarda iz qoyduğunu bildirib.

Sabirabad Regional Mədəniyyət İdarəsi Sabirabad rayon Mədəniyyət Mərkəzinin tabeliyindəki Yeni Güdəcühür qəsəbə Klub-icma mərkəzində “Tokio-2020” Yay Paralimpiya Oyunlarında pauerliftinq idman növündə bürünc medal qazanan Pərvin Məmmədovla görüş təşkil olunub.

Bərdə Regional Mədəniyyət İdarəsi Bərdə rayon MKS-nin Hüseynbəyli kənd kitabxana filialı “Bacarıqlı əllər” layihəsi çərçivəsində kitabxananın oxucusu Nazlı Vəlizadənin rəsm işlərindən ibarət “Qızıl əllər” adlı videoçarx hazırlayıb.

Xaçmaz Regional Mədəniyyət İdarəsi Quba rayon MKS-nin Qorxmazoba kənd və Qonaqkənd qəsəbə kitabxana filiallarının əməkdaşları tərəfindən açıq səma altında “mütaliə günü” təşkil edilib.

Şəmkir Regional Mədəniyyət İdarəsi Göygöl rayonu üzrə nümayəndəliyin təşkilatçılığı ilə Göygöl MKS-nin S.Vurğun adına Mərkəzi Kitabxanasının oxu zalında “Rəsm çəkməyi öyrənək” adlı məşğələ keçirilib. MKS-nin tərtibatçı rəssamı Xanlar Nəzərəliyev uşaqlara rəsm çəkmək üçün lazım olan ləvazimatlardan düzgün istifadə etmək və sənətin ilk sirləri haqqında məlumat verib.

Biləsuvar Regional Mədəniyyət İdarəsi Salyan rayon Mədəniyyət Mərkəzinin Noxudlu kənd Sənətkarlıq evində Aşıq Ələsgərin 200 illik yubileyi ilə əlaqədar tədbir keçirilib.

Gəncə Regional Mədəniyyət İdarəsinin rəisi Vasif Cənnətovun təşəbbüsü ilə Gəncə şəhərində yaşayıb-yaradan rəssam və dekorativ-tətbiqi sənət ustalarının bir qrupu ilə görüş təşkil olunub. Görüşdə Gəncə şəhərindən deputat seçilmiş Müşfiq Cəfərov, Gəncə İctimai İştirakçılıq Məclisi idarə heyətinin üzvləri, “Cavad xan” Tarix-Mədəniyyət Fondunun vitse-prezidenti Müzadil Həsənov və başqaları iştirak ediblər.

Ağcabədi Regional Mədəniyyət İdarəsi Ağcabədi rayon Mərkəzi Kitabxanasında “Ulu öndərin siyasi irsi daim öyrənilməlidir” mövzusunda dəyirmi masa təşkil edilib. Tədbir çərçivəsində ümummilli liderin xatirəsinə həsr olunmuş sərgiyə baxış olub.

Şəki Regional Mədəniyyət İdarəsi Balakən rayon MKS-nin Qaysa kənd kitabxana filialı kənddəki uşaq bağçasında “nağıl saatı” təşkil edib. MKS-nin Qullar kənd kitabxana filialında isə saz-söz ustadı Aşıq Ələsgərin 200 illik yubileyi münasibətilə “Ələsgər ocağı” adlı “mütaliə saatı” təşkil olunub.

Ağdaş Regional Mədəniyyət İdarəsi Zərdab rayon MKS-nin Gəndəbil kənd kitabxana filialının əməkdaşları poçt şöbəsinin işçilərinə və abonentlərə səyyar kitabxana xidməti göstəriblər.

Azərbaycan Dövlət Film Fondunda tanınmış aktyor və rejissor, Xalq artisti Şahmar Ələkbərovun şəxsi arxiv fondu yaradılıb.

AZƏRTAC xəbər veririk, şəxsi arxiv fonduna mərhum sənətkarın həyat və yaradıcılığını əks etdirən 200-dən artıq nadir fotoşəkil, həmçinin qəzet məqalələri, plakatlar, jurnallar, rejissor ssenariləri və başqa arxiv materialları daxildir.

Qeyd edək ki, arxivin böyük hissəsi Ş.Ələkbərovun ailəsi tərəfindən təhvil verilib.

“Warner Bros.” kinostudiyası “Matrix: Dirilmə” filminin yeni tizerini təqdim edib.

AZƏRTAC TASS agnetliyinə istinadla xəbər verir ki, qısa videoda tamaşaçılar “seçim sənindir” sözü ilə müşayiət olunan qırmızı və göy həblərin təsvirini görə bilər.

“Warner Bros.”, həmçinin iki həb arasında seçim etmək üçün filmin mikro saytını da buraxıb. Seçimdən asılı olaraq tizerin variantlarından birini görmək olacaq.

Türkiyənin Kahramanmaraş vilayətinin Türkoğlu rayonundaki “Domuztepe Höyüğü” qazıntıları zamanı 7500 il əvvələ aid olduğu ehtimal edilən yaşayış yeri aşkarlanıb.

AZƏRTAC Anadolu Agentliyinə istinadla xəbər verir ki, arxeoloq Halil Tekinin başçılığı altında davam edən qazıntılar zamanı Şumerlərdən əvvəlki dövrə aid olduğu müəyyən edilən tarixi binalar da aşkarlanıb. Qazıntilar zamanı 22 hektar ərazini əhatə edən bu yaşayış yerindən qədim saxsı qablar, vulkanik şüşə alətləri, cilalanmış şüşə alətləri, cilalanmış daşlar tapılıb.

Dördüncü Stokholm Beynəlxalq Moda Sərgisində (Stockholm International Fashion Fair) Azərbaycan Milli Geyim Mərkəzinin rəhbəri, sənətşünaslıq üzrə fəlsəfə doktoru Gülnarə Xəlilovanın “Qarabağ Azərbaycandır!” kolleksiyası videoformatda təqdim edilib.

AZƏRTAC xəbər verir ki, təqdimatdan əvvəl Gülnarə Xəlilova qonaqları salamlayaraq kolleksiyanın Azərbaycanın Vətən müharibəsindəki qələbəsi şərəfinə yaradıldığını söyləyib. Onun sözlərinə görə, kolleksiyadakı hər bir obraz azad edilmiş Azərbaycanın azad edilmiş şəhərlərinə həsr olunub.

Xatırladırıq ki, bundan əvvəl Gülnarə Xəlilovanın kolleksiyaları moda həftələrində və beynəlxalq tədbirlərdə Türkiyə, Rusiya, Çin, Avstriya, Rumıniya, Böyük Britaniya, Qazaxıstan, Qırğızıstan, Özbəkistan, ABŞ, Bolqarıstan və digər ölkələrdə uğurla təqdim olunmuşdu.

Qeyd edək ki, moda sərgisi çərçivəsində İsveç Milli Muzeyində və “Volvo Studio Stockholm”da ABŞ, İsveç, Serbiya, İspaniya, İtaliya, Tunis, BƏƏ, Mərakeş, Qazaxıstan, Küveyt, Argentina, Bruney, Kamboca, İndoneziya, Malayziya, Myanma, Laos, Filippin, Sinqapur, Tayland, Çin, Vyetnam və digər ölkələr dizaynerlərinin kolleksiyaları təqdim olunub.

  Təzəpir məscidi Abşeron ərazisində yerləşən ziyarətgah timsallı memarlıq abidəsidir. Məscid təkcə Azərbaycanın deyil, bütün Qafqazın dini mərkəzi hesab olunur. Qafqaz Müsəlmanları İdarəsi burada yerləşir. Təzəpir məscidi Hacı Nabat xanım Aşurbəyova tərəfindən 1905-1915-ci illərdə inşa edilib. Nabat xanım tikiləcək məscidin memarının azərbaycanlı olmasına xüsusi əhəmiyyət verib. Bu məqsədlə Peterburqda təhsil almış ilk azərbaycanlı memar, əslən Şamaxıdan olan Zivər bəy Əhmədbəyovu dəvət edərək ona böyük miqdarda pul verib, İstanbula və ərəb ölkələrinə göndərib. Ezamiyyətin məqsədi bu ölkələrin məşhur məscidlərinin memarlığı ilə tanış olmaq idi.  Əhmədbəyovun Təzəpir məscidinin layihəsinə dair ideyası da belə yaranıb. SSRİ dövründə dini məkanlar digər müəssisələrə çevrildiyi üçün 1934-cü ildə Təzəpir məscidi çay fabriki, yay kinoteatrı, anbar və s. kimi istifadə edilib. Sonralar Zaqafqaziya Müsəlmanları Ruhani İdarəsi bərpa olunub və məscid fəaliyyətini davam etdirib. 2005-ci ildə Prezident İlham Əliyevin göstərişi əsasında məscidin bərpası və ətraf ərazilərin yenidən qurulması layihəsi hazırlanıb, 2007-2009-cu illərdə əsaslı şəkildə yenidən təmir olunub və dövlət başçısının iştirakı ilə məscidin təntənəli açılış mərasimi keçirilib. Videomaterialı bu linkə daxil olaraq izləmək mümkündür: https://youtu.be/-OTuc2fqyFA