XƏBƏRLƏR

Çoxəsrlik aşıq sənəti ənənələrinə yeni məzmun qazandıran, xalq ruhuyla səsləşən əsərlər yaradaraq həm də Azərbaycan ədəbiyyatında özünəməxsus yer tutan Aşıq Ələsgərin zəngin poetik irsinə həmişə böyük diqqət göstərilib, əsərləri nəşr olunub, sözləri aşıqlarımızın repertuarında daim mühüm yer tutmaqla yanaşı, bəstəkarların da diqqətini çəkib, mahnılar bəstələnib. Milli-mənəvi dəyərlərimizə həmişə böyük qayğı göstərən ümummilli lider Heydər Əliyevin təşəbbüsü ilə bu böyük saz və söz ustadının 150 illik yubileyi respublikamızla yanaşı, Moskvada da tənətənəli şəlikdə qeyd olunub. Bu il ölkəmizdə Aşiq Ələsgərin anadan olmasının 200 illik yubileyi qeyd olunur. Bununla bağlı 2021-ci il fevralın 18-də Azərbaycan Respublikası Prezidentinin müvafiq Sərəncamdan irəli gələn vəzifələrin həyata keçirilməsi istiqamətində ölkəmizdə indiyədək bir sıra işlər görülüb. Azərbaycan Aşıqlar Birliyi də yubileylə bağlı hələ ilin əvvəlindən geniş tədbirlər planı hazırlayıb. İlk dəfə olaraq hər şeirin hansı aşıq havaları üstə oxunması və yabançı sözlərin izahı verilməklə Aşıq Ələsgərin lirik şeirlərindən ibarət ayrıca kitab hazırlanıb. Klassik və müasir aşıqalrın ifasında Aşıq Ələsgərin sözlərindən və ustadla bağlı dastan-rəvayətlərdən ibarət video və audiodisk buraxılıb.

Bu yaxınlarda Azərbaycan Aşıqlar Birliyinin yeni bir yubiley töhfəsi işıq üzü görüb – “Aşıq Ələsgərlə bağlı dastan-rəvayətlər” adlı kitab sənətsevərlərin, elmi ictimaiyyətin və geniş oxucu kütləsinin ixtiyarına verilib.

Bu barədə məlumat verən Azərbaycan Aşıqlar Birliyinin katibi, Əməkdar mədəniyyət işçisi Musa Nəbioğlu AZƏRTAC-a bildirib ki, kitabda ustad sənətkar Aşıq Ələsgərin ömür və sənət yolunun maraqlı, unudulmaz məqamlarından söz açılan 30-a yaxın dastan-rəvayət yer alıb. Bu dastan-rəvayətlərin bəziləri hələ aşığın sağlığında, daha böyük hissəsi isə sonrakı dönəmlərdə aşıqlar tərəfindən düzülüb-qoşulmuşdur. Burada xronoloji-bioqrafik əhvalatlar, eləcə də, xalq təxəyyülündən doğan epik mətnlər, aşıqların, o cümlədən də el-camaatın arzu-istəklərindən irəli gələn xoşməramlı səfərlər və qarşılaşmalar yer alıb.

Kitabda dastan-rəvayətlərdə işlənmiş ərəb və fars mənşəli sözlərin, eləcə də arxaizm və məhəlli sözlərin izahı, “Qeydlər və izahlar” bölümündə isə kitabda yer almış dastan və rəvayətlərin yaranma tarixi, hansı aşıqların dilindən yazıya alınması və indiyədək nəşr olunduğu mənbələr haqqında məlumat verilir ki, bu da folklorşünas alimlər, eləcə də aşıq sənəti üzrə təhsil alan bakalavr və magistrlər üçün əhəmiyyətlidir.

Kitabı nəşrə hazırlayanlar Azərbaycan Aşıqlar Birliyinin sədri, Dövlət mükafatı laureatı, Əməkdar elm xadimi, professor Məhərrəm Qasımlı, filologiya elmləri doktoru, professor Mahmud Allahmanlı və filologiya üzrə fəlsəfə doktoru Aynur Xəlilova, elmi məsləhətçi AMEA Nizami Gəncəvi adına Ədəbiyyat İnstitutunun direktoru, Əməkdar elm xadimi, akademik İsa Həbibbəyli, redaktoru filologiya üzrə fəlsəfə doktoru, dosent Altay Məmmədlidir.

İtaliyalı rejissor Paolo Sorrentinonun “Allahın əli” dramı Venesiya Kinofestivalının tənqidçilər reytinqində liderliyini saxlayır.

AZƏRTAC TASS agentliyinə istinadla xəbər verir ki, bu barədə İtaliyanın “Ciak” nəşri məlumat yayıb.

İtaliyanın Lido adasında keçirilən Beynəlxalq Venesiya Kinofestivalı sentyabrın 11-dək davam edəcək. Müsabiqənin əsas proqramına 21 film daxil edilib. Kinotənqidçilər altı gün ərzində 11 filmə baxıblar. Onlar ən yaxşı qiyməti Paolo Sorrentinonun gəncliyində baş verən faciəvi hadisədən bəhs edən “Allahın əli” filinə veriblər. Ekran əsəri hazırda 3.9 bal qazanıb.

Siyahıda ikinci yeri ilk dəfə ana olmağa hazırlaşan iki qadın haqqında Pedro Almodovarın ekranlaşdırdığı “Paralel analar” filmi və Pol Şrederin “Kart oyunçusu” filmi tutub. Hər iki film 3.5 bal dəyərində qiymətləndirilib.

Onore de Balzakın əsəri əsasında italiyalı rejissor Ksave Cannolinin çəkdiyi “İtirilmiş illüziyalar” filmi reytinq cədvəlində üçüncü yeri tutub. Benjamen Vuazen, Sesil de Frans, Ksave Dolanın rol aldığı ekran əsərinə tənqidçilər 3.4 bal dəyərində qiymət verib.

Azərbaycan Milli Xalça Muzeyinin direktoru, ICOM Azərbaycan Milli Komitəsinin sədri Şirin Məlikova Selvedge Dünya Satış Sərgisi çərçivəsində təşkil olunan “Yaradıcılıq günü” proqramının sessiyasına moderatorluq edib.

Xalça Muzeyindən AZƏRTAC-a bildirilib ki, onlayn şəkildə keçirilən sessiyada Finlandiyadan tekstil üzrə rəssam Maya Esko, Hindistandan tekstil üzrə dizayneri Şayviya Qupta, Şri Lankanın BAREFOOT dizayn və tekstil evindən Dominik Sansoni, Meksikadan yerli toxuculara və sənətkarlara dəstək olan hüquq müdafiəçisi Patris Perilli maraqlı təqdimatlarla çıxış ediblər.

Ş.Məlikova sessiyada Azərbaycan mədəniyyətinin simvolu, xalqımızın həyat tərzində əsas rol oynayan xalça sənəti haqqında məlumat verib. O, iştirakçılara muzeyin yeni layihələri, inklüziv proqramları, boyama sənətinin inkişafı və qədim xalçatoxuma texnikalarının dirçəldilməsi istiqamətində fəaliyyətindən ətraflı bəhs edib.

Sonra izləyicilər muzeyin Beynəlxalq Əlaqələr və İnnovasiyalar Departamentinin müdiri Firahnaz Musayevanın bələdçiliyi ilə dünyanın ilk Xalça Muzeyinə virtual tura dəvət olunublar. Xalq rəssamı Eldar Mikayılzadə ilə isə onun emalatxanasında onlayn görüş təşkil edilib. Xalçaçı-rəssam ölkəmizdə xalçaçılıq ənənənələrinin yaşadılması, inkişaf etdirilməsi haqqında məlumat verib, həmçinin yeni yun və ipək xalçaların toxunma prosesini nümayiş etdirib.

24 saat davam edən “Yaradıcılıq günü” proqramında Yeni Zelandiya, Honq-Konq, Yaponiya, Hindistan, Misir, Avstriya, Böyük Britaniya, Kolumbiya, Çili, Meksika, Kanadadan sənətkarlar təmsil olunublar.

Qeyd edək ki, geyim mədəniyyətinin və yaradıcılığının bayramı sayılan Selvedge Dünya Satış Sərgisi sentyabrın 5-dək davam edib. Sərgidə 75 ölkədən 150-dən çox sənətkar öz milli mədəni irsini, tekstil ənənələrini öz kolleksiyaları vasitəsilə nümayiş etdiriblər.

“Azərbaycanfilm” Kinostudiyasının istehsal etdiyi “Quyu” qısametrajlı bədii filminin çəkilişləri sona çatıb.

Kinostudiyadan AZƏRTAC-a bildirilib ki, çəkilişləri əsasən Bakı şəhərinin Lökbatan qəsəbəsi və İsmayıllı rayonunda baş tutan film dram janrındadır. Film insan və yaradılış fəlsəfəsini teoloji yanaşmalara toxunaraq özündə əks etdirir.

Filmin mövzusu həyatın tamamilə öldüyü bir məkanda quyu qazaraq varlığın mənbəyi və əsası olan su axtarışında olan insandır. Amma suyu tapdıqdan sonra nəfsinə güc gələ bilməyən qəhrəmanın səyahəti tamamən fərqli və gözlənilməyən istiqamətdə dəyişir.

Filmin ssenari müəllifi və rejissoru Rufat Ray, təsvir rejissoru Nadir Mehdiyev, rəssamı isə Rafiq Nəsirovdur. Rollarda Pərviz Məmmədrzayev və Şamil Süleymanlı çəkilib.

Qeyd edək ki, film hazırda “post-production” mərhələsindədir və növbəti il izləyicilərə təqdim ediləcək.

Amerikalı aktyor Maykl Kennet Uilyams ömrünün 55-ci ilində vəfat edib.

AZƏRTAC TASS agentliyinə istinadla xəbər verir ki, bu barədə “New York Post” qəzeti məlumat yayıb.

Məlumatda qeyd olunub ki, aktyor Bruklindəki mənzilində ölü tapılıb. Evdə narkotik vasitələr aşkar edildiyindən aktyorun dozanı aşması səbəbindən dünyasının dəyişdiyi güman olunur.

Cəfər Cabbarlı adına Respublika Gənclər Kitabxanası əzəli Azərbaycan torpaqları olan doğma Qarabağımızın qədim tarixinin, füsunkar təbiətinin, rəngarəng mədəniyyətinin təbliği məqsədilə maarifləndirici, təbliğat xarakterli materiallar, layihələr hazırlamaqda davam edir.

Növbəti belə layihə – “Qarabağ - füsunkar təbiət, mədəniyyət və qədim tarixin qovuşduğu Azərbaycan torpağı” layihəsidir ki, bu gün bu aksiya çərçivəsində Respublika Gənclər Kitabxanası Qarabağın qədim tarixindən və təbiətindən bəhs edən virtual kitab sərgisi və videoçarx ilə izləyicilərinin görüşünə gəlib.

Kitabxanadan AZƏRTAC-a bildirilib ki, Qarabağın tarixindən bəhs edən virtual kitab sərgisinin hazırlanmasında əsas məqsəd Azərbaycanın ayrılmaz hissəsi olan Qarabağın necə qədim bir tarixə malik olmasını bir daha sübut etmək və bu tarixi əks etdirən kitabların geniş oxucu kütləsi arasında tanıtımını keçirməkdən ibarətdir.

Virtual kitab sərgisində Sabir Rüstəmxanlının “Qarabağa dönüş”, Ənvər Çingizoğlu, Rizvan Qarabağlının “Qarabağda sənət və sənətkarlar”, Səbinə Əhmədovanın “Qarabağ - ədəbi, mədəni mühiti”, Əsədulla Cəfərovun “Qarabağ ulu Vətənimizdir”, Tomas de Vallın “Qarabağ: Ermənistan və Azərbaycan sülh və savaş yollarında”, Şəmistan Nəzərlinin “1920-ci ildə Qarabağ döyüşləri”, Mirzə Camal Cavanşir Qarabağinin “Qarabağ tarixi”, Arif Hüseynovun “Qarabağnamə - tarixin səhifələri” və s.adda kitablar nümayiş olunub. Hazırlanan materialda təqdim olunan hər bir kitabın annotasiyası verilib. Bu virtual kitab sərgisində toplanan dərgilər yalnız Qarabağın qədim tarixindən deyil, həmçinin, mədəniyyətindən, 30 ilə yaxın uğrunda gedən savaşlardan, müxtəlif tarixi faktlardan bəhs edən kitabların toplusudur.

Layihə çərçivəsində hazırlanan növbəti material Qarabağın əsrarəngiz, füsunkar və təkrarolunmaz təbiətindən bəhs edən videoçarxdır. Burada kitabxana əməkdaşları Qarabağın dünyanın heç bir yerində olmayan, nadir hesab edilən təbiət özəlliklərindən bəhs etməyə çalışıblar. Belə ki, videoçarxda Qarabağın simvolu hesab edilən “Xarıbülbül”, “Qarabağ atları”, “Cıdır düzü”, “İsa bulağı”, “Topxana meşəsi” və s. haqqında məlumat verilir. Qarabağın gözəl təbiət mənzərələri, çay və şəlalələrinin görüntüləri təqdim edilir.

Virtual kitab sərgisi və videoçarxda Şövkət xanım Ələkbərovanın ifasında “Cənnətim Qarabağ” və Təyyar Bayramovun ifasında “Anadır arzulara hər zaman Qarabağ” mahnıları səsləndirilib.

İzləyicilər, xüsusilə də, gənclər üçün Azərbaycanın gözəl guşəsi, mədəniyyət ocağı olan Qarabağı tərənnüm edən bu səpkili materiallar öz dərin məzmunu və maraqlı məlumatları sayəsində böyük əhəmiyyət kəsb edir.

Respublika Gənclər Kitabxanasını “Qarabağ - füsunkar təbiət, mədəniyyət və qədim tarixin qovuşduğu Azərbaycan torpağı” layihəsi üzərində işləri davam etdirir və yaxın günlərdə yeni materiallar ilə öz istifadəçilərinin görüşünə gələcəkdir.

İstifadəçilər materiallarla kitabxananın instaqram səhifəsində tanış ola bilərlər.

Azərbaycanda bir neçə dəfə olmuşam. Ölkənizi yaxşı tanıyıram, həqiqətən də ecazkar ölkədir. İnsanlar çox qonaqpərvər və mehribandırlar. Azərbaycan mədəniyyəti çox zəngindir.

Bu fikirləri AZƏRTAC-a müsahibəsində “Səfirliklər Festivalı” çərçivəsində Azərbaycan səfirliyinin stendini ziyarət etmiş “Diplomat magazine” jurnalının baş redaktoru Majelin Delara bildirib.

Azərbaycan mədəniyyətini yaxından tanıdığını deyən baş redaktor qeyd edib ki, festival çərçivəsində həmişə səfirliyimizin stendini ziyarət edir. Azərbaycan səfirliyinin stendi həmişə yüksək səviyyədə təşkil olunur. Majelin Delara vurğulayıb ki, ölkəmizə səfəri çərçivəsində zəngin və dadlı mətbəximizi çox sevib. Həmçinin o, Bakının müasirliyi və memarlığına valehdir. Bakıda abidələr, muzeylər zəngin və əsrarəngizdir. Hər dəfə Bakıya səfəri zamanı yeniliklərin və inkişafın şahidi olub.

Moskvada “OTDYKH Leisure 2021” beynəlxalq forum-sərgi işə başlayır.

AZƏRTAC xəbər verir ki, “OTDYKH Leisure”da 450 iştirakçı turizm imkanlarını təqdim edəcək. Onların arasında Azərbaycan, Rusiya, Bolqarıstan, Belarus, İspaniya, Misir və sair ölkələr yer alıb.

“OTDYKH Leisure 2021” beynəlxalq forum-sərginin rəsmi açılışı sentyabrın 7-də “Ekspotsentr” Mərkəzi Sərgi Kompleksinin “Forum” pavilyonunun Travel Arenasında olacaq.

Beynəlxalq forum-sərginin işçi proqramı çərçivəsində 160-dan çox məruzəçinin çıxış edəcəyi 30-dan çox tədbir planlaşdırılıb.

Vətən müharibəsinin başlamasının ildönümü ərəfəsində fəlsəfə elmləri doktoru, professor Rahid Uluselin “Vətən müharibəsi və ədəbiyyatda milli özünüdərk problemi” kitabı “Elm və təhsil” nəşriyyatında çap edilib.

AZƏRTAC xəbər verir ki, Azərbaycan Milli Elmlər Akademiyası Nizami Gəncəvi adına Ədəbiyyat İnstitutunun baş elmi işçisi, Azərbaycanda Atatürk Mərkəzinin elmi əməkdaşı Rahid Uluselin oxuculara təqdim olunan yeni kitabı “Qalib Azərbaycanın qalib ədəbiyyatı” paradiqmasının konseptual əsaslandırılmasından ibarətdir.

Müəllif bu kitabda ilk dəfə olaraq Vətən müharibəsinin ədəbiyyatda milli özünüdərketmə prosesini necə təsirləndirdiyini və onda hansı keyfiyyət dəyişikliyi yaratdığını, Azərbaycanda dövlət və mədəniyyət quruculuğunun qarşılıqlı stimullaşma təkamülünü araşdırır, öz siyasi tarixindən ayrılmaz olan bir ədəbiyyatın estetik mahiyyətini açır, müstəqil dövlətimizin təşəkkülünə gətirib çıxaran siyasi, mədəni, əxlaqi və ədəbi dünyagörüşünün formalaşmasını izləyir, Birinci və İkinci Qarabağ müharibəsi dövründə yaradılan ədəbiyyatın örnəklərini tədqiq edir.

Kitabın elmi redaktoru və “Ön söz” müəllifi Milli Məclisinin deputatı, akademik Nizami Cəfərovdur.

Türkiyədə muzeylərin sayı 2020-ci ildə 5,8 faiz artaraq 494-ə çatıb.

AZƏRTAC Türkiyənin Anadolu informasiya agentliyinə istinadən xəbər verir ki, həmin muzeylərin 205-i Türkiyə Mədəniyyət və Turizm Nazirliyinin tabeliyində, 289-u isə xüsusi muzey kateqoriyasında yer alır. Nazirliyin tabeliyində olan muzeylərdə 3 milyon 278 min 114 əsər qorunur.

Türkiyədə COVID-19 epidemiyasi ilə əlaqədar nazirliyə tabe olan muzeyləri ziyarət edənlərin sayı 2019-cu ilə nisbətən 2020-ci ildə 73,6 azalaraq 9 milyon 241 min 912 nəfər olub.