XƏBƏRLƏR

Türkiyədə VI Türk Dünyası Sənədli Film Festivalı və Yarışması keçiriləcək. Festival Türk Dünyası Jurnalistlər Federasiyasının təşəbbüsü ilə baş tutacaq.

AZƏRTAC xəbər verir ki, bu il "Türk mədəniyyəti və türkün dünyaya baxışı" mövzusunda baş tutacaq festivalda ölkəmiz həmyerlimiz, İstanbul Universitetinin kommunikasiya fakültəsinin radio, televiziya və kino bölümünün doktorantı Səidə Ömərin "Xocalıya ədalət!" sənədli filmi ilə təmsil olunacaq. Film festivala tələbə kateqoriyası üzrə təqdim edilib.

Ekran əsərində "Şuşa" filmindən və Azərbaycanın Milli Qəhrəmanı, jurnalist Çingiz Mustafayevin Xocalı soyqırımı zamanı çəkilən videogörüntülərdən istifadə edilib.

Builki festivalda dünyanın müxtəlif türkdilli dövlətlərinin peşəkar rejissorları və tələbələrinin filmləri yer alır.

“Neon” kino şirkəti “Spenser: Şahzadə Diananın sirri” filminin treylerini yayımlayıb.

AZƏRTAC TASS agentliyinə istinadla xəbər verir ki, baş rolu Kristen Stüart canlandırıb. Filmdə, həmçinin Şon Harris, Cek Fartinq, Emi Menson, Salli Hokins və başqaları rol alıblar.

Filmin rejissoru Pablo Larraindir.

Qeyd edək ki, “Spenser: Şahzadə Diananın sirri” filminin dünya premyerası sentyabrın 3-də, Venesiya kinofestivalında olacaq.

Azərbaycan Respublikasının Prezidenti İlham Əliyev və birinci xanım Mehriban Əliyeva avqustun 29-da Üzeyir Hacıbəylinin Şuşa şəhərindəki ev-muzeyində aparılacaq işlərlə tanış olublar.

"Report" xəbər verir ki, dövlətimizin başçısına və birinci xanıma burada görüləcək işlər barədə məlumat verildi.

Qeyd edək ki, görkəmli bəstəkar, peşəkar musiqi sənətimizin və milli operamızın banisi Üzeyir Hacıbəylinin ev-muzeyi Şuşa şəhərində Ermənistanın işğalınadək fəaliyyət göstərib.

Erməni işğalçı qüvvələrinin vəhşiliyi nəticəsində muzeydə dahi bəstəkarın həyat və yaradıcılığı ilə bağlı 1700 eksponatdan yalnız 100-ə yaxını salamat qalıb, qalanı məhv edilib.

Diqqətə çatdırılıb ki, Heydər Əliyev Fondu tərəfindən ev-muzeyində aparılacaq işlər üzrə layihə hazırlanıb.

Ev-muzeyində həyata keçiriləcək işlərdən sonra 1992-ci ildə muzeyin Bakıya aparılmış eksponatlarının burada yerləşdirilməsi nəzərdə tutulur. Bunlar Üzeyir Hacıbəylinin fotoşəkilləri, məktubları, əsərlərinin partituraları və şəxsi əşyalarıdır.

Azərbaycan musiqi mədəniyyətinin inkişafında böyük xidmətlər göstərmiş, professional vokal məktəbinin təşəkkülü və təkamülündə mühüm rol oynamış Xalq artisti Bülbülün avqustun 29-da Şuşa şəhərindəki ev-muzeyinin bərpa işlərindən sonra açılışı olub.

"Report" xəbər verir ki, Azərbaycan Respublikasının Prezidenti İlham Əliyev və birinci xanım Mehriban Əliyeva açılış mərasimində iştirak ediblər.

Qeyd edək ki, görkəmli musiqiçi 1982-ci ildən ev-muzeyi kimi fəaliyyət göstərən bu evdə anadan olub və uşaqlıq illərini burada keçirib.

Ümummilli lider Heydər Əliyevin göstərişi əsasında Şuşa Şəhər Xalq Deputatları Sovetinin İcraiyyə Komitəsi 1982-ci il 31 avqust tarixli qərarı ilə Bülbülün doğulduğu və yaşadığı evin ev-muzeyinə çevrilməsi barədə qərar qəbul edib. Bina 1982-1983-cü illərdə təmir olunub, muzey ekspozisiyası qurulub və önündə inzibati bina inşa edilib.

Muzeydə Bülbülün uşaqlıq illərinə aid şəkillər, şəxsi əşyalarından bəziləri, o cümlədən onun qavalı da nümayiş etdirilirdi. Muzeydə Bülbülün yaradıcılıq, elmi-tədqiqat, pedaqoji, ictimai fəaliyyətini əks etdirən 9 minə yaxın sənəd toplanmışdı. Burada, həmçinin Azərbaycanda yeni vokal məktəbinin yaradılmasında, xalq musiqisinin öyrənilməsi və təbliğində Bülbülün çoxillik səmərəli yaradıcı işini təsdiq edən materiallar nümayiş etdirilirdi.

Ev-muzeyi 1992-ci ildə Birinci Qarabağ müharibəsi zamanı erməni vandalizminə məruz qalaraq fəaliyyətini dayandırıb.

Bu il yanvarın 14-də Şuşa şəhərinə səfəri zamanı ev-muzeyini ziyarət edən Azərbaycan Prezidenti İlham Əliyevin tapşırığına əsasən muzeydə aparılan təmir-bərpa və yenidənqurma işləri artıq başa çatıb.

Bərpa işləri zamanı eyvana çıxan divarlarda suvaq altından daş üzərində yonulmuş ərəb əlifbası ilə iki yazı və günəş simvolunu əks etdirən təsvir aşkar olunub. Yazıların birində Qurandan ayə, digərində isə evin tikilmə tarixi qeyd edilib. Divarın üzərində yeni aşkar olunmuş yazıda göstərilir ki, bina 1788-ci ildə inşa edilib. Bina tipoloji mənsubiyyətinə görə Qarabağ və Azərbaycanın tarixi yaşayış binalarının xüsusiyyətini özündə əks etdirir, otaqların daxili quruluşu Azərbaycanın ənənəvi evlərinə xasdır.

Şuşa şəhərinin işğalı zamanı ev yararsız hala salınıb, yükdaşıyıcı divarlarında çatlar əmələ gəlib və divarlar çöküb. Bərpa zamanı bütün yükdaşıyıcı divarların bünövrəsi möhkəmləndirilib, çat olan divar hissələrində yenidənqurma işləri aparılıb. Binanın daxili otaqlarında çürümüş taxta döşəmələr yeniləri ilə əvəz olunub. Dam örtüyü, qapı və pəncərələri çürüdüyündən və istismara yararsız halda olduğundan, binanın tarixi görkəmini qorumaq şərti ilə yenisi ilə əvəz edilib.

Bülbülün ev-muzeyinə məxsus həyətyanı sahə ilkin görkəmi saxlanılmaqla bərpa olunub.

Hazırda binada Bülbülün muzey ekspozisiyası qurulub. Ev-muzeyinin həyətində Bülbülün yeni hazırlanan büstü ucaldılıb.

Şuşa şəhəri işğalda olduğu dövrdə Bülbülün vandalizmə məruz qalmış büstü isə erməni vəhşiliyini nümayiş etdirmək məqsədilə saxlanılıb.

Avqustun 27-də Azərbaycan Respublikası mədəniyyət nazirinin birinci müavini Vaqif Əliyev Gürcüstanın Dini Məsələlər üzrə Dövlət Agentliyinin sədri Zaza Vaşaxmadzenin rəhbərlik etdiyi nümayəndə heyəti ilə görüşüb. Qonaqları səmimi salamlayan mədəniyyət nazirinin birinci müavini Vaqif Əliyev Azərbaycan ilə Gürcüstan arasında əlaqələrin zəngin tarixə malik olduğunu, iki ölkənin dostluq münasibətlərinin müxtəlif sahələrdə uğurla inkişaf etdiyini bildirib. Azərbaycan ilə Gürcüstanın fəal əməkdaşlığı nəticəsində həyata keçirilən bir sıra mühüm qlobal iqtisadi layihələrin əhəmiyyəti vurğulanıb. Söhbət zamanı Vaqif Əliyev Azərbaycan xalqının 44 günlük Vətən müharibəsindəki Zəfəri barədə söz açıb, qonşu və dost Gürcüstanın Azərbaycana verdiyi siyasi dəstəyə görə təşəkkürünü bildirib. O, həmçinin 30 ilə yaxın Ermənistanın işğalı altında qalan torpaqlarımızda yaşayış məntəqələrinin talan olunduğu, mədəniyyət müəssisələrinin, tarixi abidələrin məhv edilməsi barədə qonaqlara məlumat verib. Qeyd olunub ki, Azərbaycan Respublikasının Prezidenti tərəfindən dövlət qurumları qarşısında ilk növbədə işğaldan azad edilmiş ərazilərdə geniş quruculuq işlərinin aparılması, infrastrukturun yaradılması kimi vəzifələr qoyulub. Hazırda azad olunmuş ərazilərdə tarixi-mədəni abidələrin bərpası, müasir standartlara cavab verən yeni mədəniyyət obyektlərinin inşası kimi məsələlər Mədəniyyət Nazirliyinin əsas fəaliyyət istiqamətlərindən biridir. Eyni zamanda həmin ərazilərdə ermənilər tərəfindən Azərbaycan xalqının mədəni irsinə qarşı törədilmiş cinayətlərin beynəlxalq təşkilatlara çatdırılması xüsusi əhəmiyyətə malikdir və Azərbaycan bu istiqamətdə UNESCO, İCESCO, BMT-nin Sivilizasiyalar Alyansı və digər təşkilatlarla əməkdaşlıq edir. Gürcüstanla mədəni əlaqələrin də yüksək səviyyəsindən məmnunluğunu ifadə edən nazirin birinci müavini hər il ölkəmizdə keçirilən müxtəlif beynəlxalq festival və müsabiqələrdə Gürcüstan təmsilçilərinin fəal iştirak etdiyini diqqətə çatdırıb. Vaqif Əliyev mədəniyyət naziri Anar Kərimovun bu ilin 6-9 iyul tarixində Gürcüstana səfəri çərçivəsində ölkənin dövlət rəsmiləri ilə keçirdiyi görüşlərdən və müzakirə olunan məsələlərdən söz açıb. Gürcüstanın Dini Məsələlər üzrə Dövlət Agentliyinin sədri Zaza Vaşaxmadze səmimi qəbula görə Vaqif Əliyevə təşəkkürünü bildirib. Azərbaycana ilk rəsmi səfərindən məmnunluğunu ifadə edən qonaq 44 günlük müharibənin Zəfərlə başa çatması münasibətilə Azərbaycan xalqına təbriklərini çatdırıb. Z.Vaşaxmadze Azərbaycanın bütün beynəlxalq səviyyələrdə Gürcüstanın ərazi bütövlüyünü tanıdığına və dəstək olduğuna görə minnətdarlığını dilə gətirib. O, ölkəsinin də Azərbaycan kimi multikultural olduğunu və orada müxtəlif xalqların yaşadıqlarını vurğulayıb, Gürcüstan hökuməti tərəfindən müxtəlif dini etiqadı olan vətəndaşlara qayğı və diqqət göstərildiyini qeyd edib. Z.Vaşaxmadze Azərbaycanla Gürcüstan arasında dostluq ənənələrinin qədim tarixə söykəndiyini və mədəni əlaqələrin bundan sonra da uğurla inkişaf etdiriləcəyinə əminliyini bildirib.

“YARAT” Müasir İncəsənət Məkanının Gəncə şəhəri, Məhsəti Gəncəvi Mərkəzində (Əttarlar küçəsi,1) açdığı yerli rəssamların və fotoqrafların əsərlərindən ibarət “Dumanlar başımda dastana döndü” adlı qrup sərgisi davam edir. İkinci Qarabağ müharibəsi dövründə Gəncə şəhəri, dinc əhaliyə qarşı törədilmiş hərbi cinayətlərin episentrilərindən biri olub.

“YARAT”dan AZƏRTAC-a bildirilib ki, bu məqsədlə Dağlıq Qarabağ münaqişəsinə və zəfər hadisələrinə həsr olunmuş bu sərgi, ilk dəfə olaraq Gəncə şəhərinə səyahət edib.

Dağlıq Qarabağ münaqişəsi tarixə Cənubi Qafqazda cərəyan edən ən faciəli toqquşmalardan biri kimi daxil olmaqla, regionun latent konfliktlərindən biri idi. Son ayların hadisələri bu münaqişənin aktiv fazaya keçərək, əldə olunmuş nəticələrlə bütün regionun geosiyasi xəritəsini dəyişdirdi. Donmuş münaqişə statusundan çıxaraq, Azərbaycanın həm hərbi, həm də siyasi müstəvidə qələbəsi ilə yekunlaşan 44 günlük Vətən müharibəsi, ən yeni tariximizə qızıl hərflərlə yazılmış ilk səhifələrindən oldu...

YARAT-ın "Dumanlar başımda dastana döndü" adı altında birləşən qrup sərgisi illərdir davam edən Qarabağ münaqişəsini təsir və nəticələr aspektindən açıqlayır. Sərgi müharibə təfərrüatlarının və siyasi münaqişələrin travmatik yaddaşını gündəmə gətirir. Ekspozisiya müharibədən qabaqkı nə sülh, nə hərb illərinə səslənərək, regionun ən həssas probleminə köklənir və bu mürəkkəb səyahətin gedişatını əks etdirir. Bununla yanaşı, tarixi analiz edərək, onun qərəzli dövr və epizodlarının qiymətləndirilməsi, cəmiyyət və mədəniyyətin uğradığı deformasiya və zədələrinin sənədləşdirilməsinə əsaslanır və xalqın bu çətin dövrlərinin müşahidəçisi qismində çıxış edir. Hərbi münaqişələrin nəticələri və siyasi böhranlarla yaxından bələd olanların simasında toplanılan əsərlər milli konteksti araşdırır və universal, fövqəlmilli səciyyə kəsb edən sualları ortaya çıxarır.

"Dumanlar başımda dastana döndü" həm şəxsi, həm də ümumi yanaşma prizmalarından keçərək, Qarabağ məsələsində yeni etapın gəlib çatmasından bəhs edir. Ümumbəşər tarix üçün çox qısa, lakin lokal kontekstdə uzun işğal dövrü kimi tarixdə qalan 27 illik bu müddət, müxtəlif nəsillərin üzləşdiyi fərqli siyasi durum və sosial reallıqları əks etdirir. Bu reallıqlar arasında kəsişən paralellərin olmadığını nəzərə çatdıraraq, nümayiş olunan əsərlər qələbəyə aparan yollardan danışır.

Sərginin adı, Vətən müharibəsində şəhid olmuş gizir Xudayar Yusifzadənin özünəməxsus ifasında Əliağa Vahidin sözlərinə yazılmış “Vətən yaxşıdır” mahnısından götürülüb. Bu mahnı, həmçinin sərgidə nümayiş olunan Rəşad Ələkbərovun instalyasiyasının tərkib hissəsidir.

Beləliklə, ekspozisiyada Ağababa Bağırov, Elnur Babayev, İlqar Cəfərov, Şahvələd Eyvazov, Erkin Ələkbərli, Rəşad Ələkbərov, Xalid Əsgərov, Mirnaib Həsənoğlu, Əli Qafarov, Cavid Qurbanov, Oleq Litvin, Əli Rza və Nurəhməd Vəliyev kimi rəssam və fotoqrafların instalyasiya, fotoqrafiya, və rəqəmsal sənət əsərləri ilə dialoqa girərək, artıq həll olunmuş Qarabağ münaqişəsinin mürəkkəb pazlını tamamlayır. Ekspozisiyaya “YARAT” Müasir İncəsənət Məkanı və Azərbaycan Fotoqraflar Birliyinin fondlarında saxlanılan əsərlər və fotomateriallar daxil edilib.

Sentyabrın 25-dək davam edəcək sərgi Mədəniyyət Nazirliyi və Məhsəti Gəncəvi Mərkəzinin təşkilati dəstəyi ilə reallaşıb.

Azərbaycanın Əməkdar incəsənət xadimi, rəssam Rafiq Əzizin doğum günü münasibətilə Türkiyə Prezidenti Rəcəb Tayyib Ərdoğana hədiyyə edilən “1071 Malazgirt meydan müharibəsi” əsəri əsasında qardaş ölkədə xatirə nişanları hazırlanıb.

AZƏRTAC xəbər verir ki, azərbaycanlı rəssam, İstanbulun Yeditəpə universitetinin professoru Rafiq Əziz tərəfindən bu il fevralın 26-da Türkiyə Prezidenti Rəcəb Tayyib Ərdoğana “1071 Malazgirt meydan müharibəsi” əsəri hədiyyə edilib.

Malazgirt zəfərinin 950-ci ildönümü münasibətlə Türkiyə Xəzinə və Maliyyə Nazirliyi Dövlət Zərbxanası həmyerlimizin yağlı boya ilə çəkilən adıgedən tablosu əsasında Türkiyə Prezidenti Administrasiyası gerbli qızıl və gümüş medalyon, eləcə də 20 türk lirəsi gümüş xatirə sikkəsi çap edib.

Bu medalyonlar Malazgirt zəfərinin 950 illiyi münasibətilə keçirilən tədbirdə xarici qonaqlara xatirə nişanəsi olaraq hədiyyə edilib.

Xatırladaq ki, bu, həmyerlimizin əsərləri əsasında Türkiyə zərbxanasında çap edilən onuncu gümüş xatirə puludur. Xatirə pulu bu günlərdə İstanbul zərbxanasının mağazasında satışa çıxacaq.

Türkiyədə bu günlərdə baş tutan “Antalya Fashion Week Digital 2021”də Azərbaycanın şərəfli tarixi qələbəsinə və Qarabağın azad edilməsinə həsr olunmuş “Böyük Qayıdış” (The Great Return) adlı kolleksiya təqdim edilib.

AZƏRTAC xəbər verir ki, kolleksiya özündə bir sıra anlamlı mesajlar daşıyır. Ümumilikdə tarixi zəfərimiz noyabr ayında qazanıldığı üçün yeni kolleksiya ancaq 11 geyimdən ibarət olub. Kolleksiyanın təqdimatı isə 8 rəqəminin istifadəsi ilə Şuşanın azad edildiyi günü, əbədilik və zəfər bayramımızı özündə əks etdirir.

Yeni kolleksiyanın digər özəlliyi isə seçilən rənglərin “Xari Bülbül” rəsmlərinin və aksesuarlarının da yer aldığı libaslardan ibarət olmasıdır. Əl ilə işlənmiş saç sancaqları isə azərbaycanlı usta Nigar Nəsibli tərəfindən xüsusi olaraq bu kolleksiya üçün hazırlanıb.

Müxtəlif platforma və sosial şəbəkələrdə yayımlanan “Hörümçək adam: Geriyə yol yoxdur” filminin treyleri 24 saat ərzində 355,5 milyon baxış sayı qazanaraq rekord vurub.

AZƏRTAC TASS agentliyinə istinadla xəbər verir ki, bu barədə “Deadline” nəşri məlumat yayıb.

Bildirilib ki, əvvəlki rekord 289 milyon baxış sayı ilə “Qisasçılar: Final” filminə məxsus olub.

“Hörümçək adam” filminin əvvəlki hissəsi olan “Hörümçək adam: Evdən uzaqlarda” ekran əsəri sutka ərzində 135 milyon baxış sayı əldə etmişdi. Budəfəki hissə dekabrın 17-də ABŞ-da ekranlara çıxacaq. Bu film koronavirus pandemiyası yarandığı gündən kinoteatrlarda nümayiş olunacaq ilk bloqbaster sayılır.

Beynəlxalq Muğam Mərkəzi tərəfindən 26 avqust- Beynəlxalq Azərbaycan Muğamı və Musiqisi Günü münasibətilə qısametrajlı film istehsal edilib.

Mərkəzin mətbuat xidmətindən AZƏRTAC-a bildirilib ki, filmdə Azərbaycan muğam sənətinin inkişafı, UNESCO-nun qərarı ilə dünya mədəniyyətinin qeyri-maddi irsinin bəşəri əhəmiyyətə malik sərvətləri sırasına daxil edilməsi, ölkəmizdə muğam sənətinə göstərilən diqqət və qayğı öz əksini tapıb. Ekran əsərində Azərbaycan Respublikasının Birinci vitse-prezidenti, Heydər Əliyev Fondunun prezidenti, UNESCO-nun və ICESCO-nun xoşməramlı səfiri Mehriban Əliyevanın muğam sənətinin inkişafına göstərdiyi diqqət və qayğıya da geniş yer verilib. Həmçinin tanınmış muğam ifaçılarımızın muğam sənətini ilə bağlı fikirləri də yer alıb. Filmdə keçirilmiş muğam müsabiqələri haqqında videomateriallardan da istifadə edilib. Film Beynəlxalq Muğam Mərkəzi sosial şəbəkələrində paylaşılıb.

Filimin ideya müəllifi Beynəlxalq Muğam Mərkəzinin direktoru, Xalq artisti Murad Hüseynov, quruluşçu rejissoru və ssenari müəllifi İlqar Əkbər, operatoru Fuad Təhməzli, redaktoru isə Lalə Azəridir.