XƏBƏRLƏR

UNESCO İcraiyyə Şurasının 219-cu sessiyası çərçivəsində üzv ölkələrin bəyanatları səsləndirilib.

AZƏRTAC xəbər verir ki, İcraiyyə Şurasının 219-cu sessiyasının bugünkü plenar iclasında ölkəmizin UNESCO yanında daimi nümayəndəsi Elman Abdullayev Azərbaycanın milli bəyanatını təqdim edib.

Bəyanatda Azərbaycan tərəfindən təşkilatın gender bərabərliyi, Prioritet Afrika və İnkişaf etməkdə olan Kiçik Ada Dövlətləri (SIDS) istiqamətlərinə böyük əhəmiyyət verdiyi bildirilib. Ölkəmizin Afrikanın mədəni irsinin qorunmasına verdiyi töhfələr, eləcə də bu qitədə həyata keçirilən uğurlu layihələrdən söz açılıb. Ölkəmizin UNESCO-nun mədəniyyətlərarası dialoq və İpək yolları proqramını, eləcə də irqi ayrı-seçkiliyə qarşı mübarizədə həyata keçirdiyi layihələri dəstəklədiyi diqqətə çatdırılıb.

Daimi nümayəndə Azərbaycanın Ümumdünya İrs Komitəsinin 2025-2029-cu illər üzrə üzvlüyünə namizədliyi haqda da məlumat verib. “Mədəni irs bəşər tarixinin ayrılmaz hissəsidir və gələcək nəsillər üçün qorunmalıdır”, - deyən E.Abdullayev mədəni irs abidələri ətrafında minaların yerləşdirilməsinin milyonlarla insanın həyatı üçün böyük təhlükə yaradığını vurğulayıb.

İqlim dəyişikliyinin mədəni irsə təsiri mövzusuna toxunan E.Abdullayev ölkəmizin beynəlxalq birliyin etibarlı və məsuliyyətli üzvü kimi iqlim dəyişikliyinə qarşı mübarizəyə fəal töhfə verdiyini qeyd edib, Prezident İlham Əliyev tərəfindən 2024-cü ilin ölkədə “Yaşıl dünya naminə həmrəylik ili” elan edilməsi haqqında Sərəncam imzaladığını bildirib. O, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasına ev sahibliyi etmək üçün Azərbaycanın namizədliyinin yekdilliklə dəstəklənməsinin beynəlxalq ictimaiyyətin ölkəmizə dərin hörmət və etimadının bariz nümunəsi olduğunu diqqətə çatdırıb.

Ermənistan tərəfindən ölkəmizə qarşı 30 ildən artıq davam edən təcavüz və işğal müddətində Azərbaycanın mədəni irsinin tamamilə dağıdıldığı, arxeoloji abidələrin, muzeylərin və kitabxanaların talanaraq tamamilə dağıdıldığı, bu vandallıq aktlarının 1954-cü il Haaqa Konvensiyası və onun İki Protokoluna, eləcə də 1970-ci il Konvensiyası da daxil olmaqla, beynəlxalq hüququn prinsiplərinə zidd olduğunu və onların kobud şəkildə pozulduğu qeyd edilib.

E.Abdullayev Ermənistanın ölkəmizə qarşı hərbi təcavüzü nəticəsində Azərbaycanın təhsil infrastrukturuna vurulmuş ciddi ziyandan söz açıb, 2000-dən artıq təhsil müəssisəsinin dağıdıldığını vurğulayıb.

Torpaqlarımızın işğaldan azad edilməsindən sonra həmin ərazilərdə ölkəmiz tərəfindən genişmiqyaslı yenidənqurma və bərpa işlərinə başlanıldığını deyən daimi nümayəndə Ermənistan tərəfindən bu ölkədə Azərbaycan xalqına məxsus mədəni irs nümunələrinin tamamilə dağıdılması prosesinin davam etdiyini bildirib. Qeyd edilib ki, Ermənistanda bütün Azərbaycan toponimləri dəyişdirilib, ölkəmizin tarixi-mədəni irsi, məscidləri və qəbiristanlıqları qəsdən məhv edilib. Bu vandalizmin əsas məqsədi əsrlər boyu həmin torpaqlarda yaşamış azərbaycanlıların izlərini o ərazilərdən tamamilə silməkdir. İrəvanın Təpəbaşı məhəlləsinin də eyni aqibətlə üzləşdiyi vurğulanıb, Ermənistan hökuməti tərəfindən həmin ərazinin tamamilə məhv edildiyi sessiya iştirakçılarının diqqətinə çatdırılıb.

Parisdə, UNESCO-nun mənzil-qərargahında təşkilatın İcraiyyə Şurasının 219-cu sessiyası davam edir.

AZƏRTAC xəbər verir ki, UNESCO-nun 219-cu sessiyasında Azərbaycan qurumun yanındakı daimi nümayəndəliklə təmsil olunur.

İcraiyyə Şurasının 219-cu sessiyasında qurumun Bürosunun, eləcə də Baş Konfransın qəbul etdiyi proqramın icrası ilə bağlı hesabatlar dinlənilib.

Həmçinin İcraiyyə Şurasının və Baş Konfransın əvvəlki sessiyalarında qəbul edilmiş qərar və qətnamələrin tətbiqi, proqram məsələləri, dünyada irqi ayrı-seçkiliyin, irqi nifrətin və irqi nifrət cinayətlərinin aradan qaldırılması kimi məsələlər müzakirə olunacaq. “Hamı üçün velosiped”: davamlı və sağlam həyat tərzi “, e-media və informasiya savadlılığının (MIL) qlobal maliyyələşdirilməsinin artırılması istiqamətində UNESCO tərəfindən görülən tədbirlər də sessiyanın gündəliyində yer alır. Sessiya çərçivəsində üzv ölkələrin təqdimatı da keçiriləcək.

UNESCO İcraiyyə Şurasının 219-cu sessiyası işini martın 27-dək davam etdirəcək.

İsmayıl Şıxlının anadan olmasının 105 illiyi qeyd olunub. Azərbaycan Ədəbiyyat Fondu bu münasibətilə Azərbaycan Yazıçılar Birliyinin (AYB), Milli Məclisin Mədəniyyət Komitəsinin və “Qazax” Xeyriyyə İctimai Birliyinin təşkilati dəstəyi ilə “Onun ölməyən dünyası” adlı tədbir keçirib. Tədbirdə tanınmış ədəbiyyat və elm xadimləri, eləcə də İsmayıl Şıxlının ailə üzvləri iştirak ediblər.

AZƏRTAC xəbər verir ki, AYB-nin “Natəvan” klubunda keçirilən tədbirin aparıcısı - Azərbaycan Ədəbiyyat Fondunun baş direktoru Varis Yolçiyev Azərbaycan nəsrində İsmayıl Şıxlının rolundan danışıb, öz timsalında böyük ədibin gənclərin ədəbiyyata gəlişinə göstərdiyi dəstəyindən söz açıb.

Xalq yazıçısı Anar İsmayıl Şıxlı yaradıcılığının bədii və ictimai əhəmiyyəti barədə məlumat verib, yazıçının “Ölən dünyam” romanı barədə ilk resenziyanı necə yazması, romanda haqqında bəhs edilən ana babası Xudadat bəy Rəfibəyov barədə arxiv sənədlərinin əldə edilməsinə necə kömək göstərdiyini yada salıb.

“Qazax” Xeyriyyə İctimai Birliyinin sədri İlham Pirməmmədov Qazax mahalından çıxan böyük ədiblərdən söz açaraq, burada İsmayıl Şıxlı zirvəsini ayrıca qeyd edib. O, hər il martın 21-də İctimai Birliyin təşkilatçılığı ilə Səməd Vurğunun, İsmayıl Şıxlının, Mehdi Hüseynin və digər görkəmli söz ustalarının Fəxri xiyabanda anım mərasimlərinin keçirildiyini diqqətə çatdırıb.

İsmayıl Şıxlının tələbəsi olmuş Azərbaycan Dövlət Pedaqoji Universitetinin prorektoru Mahirə Nağıqızı çıxışında ədibin həm də böyük pedaqoq olduğunu, tələbələrə necə həssaslıqla, qayğıyla yanaşdığını vurğulayıb.

Mətbuat Şurasının sədri, AYB-in sədrinin müavini Rəşad Məcid İsmayıl Şıxlının ədəbiyyatda qoyduğu ənənələrdən, eləcə də onun sərgilədiyi vətəndaş mövqeyindən danışıb.

“Azərbaycan” jurnalının baş redaktoru İntiqam Qasımzadə İsmayıl Şıxlı ilə bağlı xatirələrini bölüşüb, jurnalda birgə çalışdıqları dönəmdə onun necə tələbkar olduğunu, boz ədəbiyyatın dərc edilməməsi naminə kimlərlə üz-üzə qaldığını dilə gətirib.

Şair, publisist Əkbər Qoşalı İsmayıl Şıxlı yaradıcılığının Türk dünyasında əks-sədasına toxunub, onun nəsrini vətəndaş nəsri, vətənpərvərlik nəsri adlandırıb.

İsmayıl Şıxlının tədqiqatçıları - professorlar Təyyar Salamoğlu və Mahmud Alamanlı, eləcə də ədəbiyyatşünas Məti Osmanoğlu, filologiya üzrə fəlsəfə doktoru Natəvan Dəmirçioğlu ədibin yaradıcılığının xarakterik xüsusiyyətlərindən söz açaraq, onun ədəbiyyat tariximizdəki xüsusi rolunu diqqətə çatdırıblar.

Xalq artisti Həmidə Ömərova “Dəli Kür” romanının yeni nəslə düzlük, mərdlik, mübarizlik kimi xüsusiyyətləri aşılamasından danışıb, professor Qulu Məhərrəmli “Ölən dünyam” romanını İsmayıl Şıxlı yaradıcılığının kulminasiyası hesab edib.

İsmayıl Şıxlının yadigarı - Azərbaycan Jurnalistlər Birliyinin sədri Elçin Şıxlı ailələri adından tədbirin təşkilatçılarına və gələn qonaqlara minnətdarlığını bildirib, atasının ömür yolundan, ömrünün son günlərindən bəhs edib, onun çox ağır xəstə olmasına rəğmən “Ölən dünyam” romanını necə bitirməsini və son nöqtəni qoyduqdan sonra “indi rahat ölə bilərəm” kəlmələrini söyləməsini kövrək notlarla dilə gətirib.

Tədbirdə həm də böyük yazara həsr edilmiş şeirlər səsləndirilib, 105 illik münasibətlə elan edilmiş ən yaxşı esse müsabiqəsinin qalibi Nurəddin Ədiloğlu mükafatlandırılıb.

Qeyd edək ki, martın 22-də Azərbaycan nəsrinin görkəmli nümayəndəsi, Xalq yazıçısı İsmayıl Şıxlının anadan olmasının 105-ci ildönümü tamam olacaq. Ədəbiyyat tariximizə “Dəli Kür”, “Ölən dünyam” kimi möhtəşəm romanlar bəxş etmiş İsmayıl Şıxlı həm də azərbaycançılıq məfkurəsinin formalaşmasında, müstəqillik hərəkatında müstəsna fəaliyyət göstərmiş, fəal ictimai-siyasi xadim olub.

Fikrət Əmirov adına Gəncə Dövlət Filarmoniyası martın 27-dən 29-dək Mədəniyyət Nazirliyinin dəstəyi, Gəncə-Daşkəsən və Mərkəzi Aran Regional Mədəniyyət İdarəsinin təşkilatçılığı ilə “Xalqın mədəni sərvəti” layihəsini təqdim edəcək.

AZƏRTAC xəbər verir ki, üçüncü dəfə keçiriləcək layihə Azərbaycan xanəndəlik sənətinin görkəmli nümayəndəsi Cabbar Qaryağdıoğlunun əziz xatirəsinə həsr olunacaq.

Xatırladaq ki, "Xalqın mədəni sərvəti" layihəsi yanvarın 8-dən 14-dək simfonik muğam janrının banisi Fikrət Əmirova, fevralın 14-dən 16-dək görkəmli bəstəkarımız Qara Qarayevə həsr edilib.

“İçərişəhər” Dövlət Tarix-Memarlıq Qoruğu İdarəsinin (DTMQİ) təşkilatçılığı ilə Bakı Fotoqrafiya Evində “Fotolarda canlanan tarix” adlı sərginin açılışı olub.

AZƏRTAC xəbər verir ki, tədbirdə “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə, Almaniya səfiri Ralf Horlemann, mədəniyyət xadimləri, eləcə də ölkəmizdə fəaliyyət göstərən digər səfirliklərin nümayəndələri iştirak ediblər.

Sərgidə nümayiş olunan nadir fotolar Azərbaycanda ilk dəfə olaraq “İçərişəhər” DTMQİ-nin nəzdində fəaliyyət göstərən “İçərişəhər” Muzey Mərkəzinin fonduna məxsus 1860-cı illərin ortalarından 1970-ci illərə qədər olan dövrü əhatə edən şüşə neqativlərin və nadir fotoların bərpa və konservasiya edilməsi, rəqəmsallaşdırılması nəticəsində işıq üzü görüb.

Tarixi abidələri, onların bərpa prosesini əks etdirən bu nadir fotoların bərpası ilə Bakı, İçərişəhər, Azərbaycanın bölgələrindəki binaların bu günədək məlum olmayan görüntüləri əldə edilib.

Qeyd edək ki, “Fotolarda canlanan tarix” layihəsi Almaniya Federativ Respublikasının dəstəyi ilə “Mədəniyyətin qorunması” proqramı çərçivəsində ərsəyə gəlib.

Sərgi bir ay müddətində Bakı Fotoqrafiya Evində davam edəcək.

“Ulduz” jurnalının 2024-cü il üçün ilk sayı çapdan çıxıb.

AZƏRTAC xəbər verir ki, “Ulduz” jurnalının yanvar sayı filologiya üzrə fəlsəfə doktoru, dosent Elnarə Qaragözovanın “Postmodern poetika: “Əlahəzrət mətn” yazısı ilə açılır. Jurnalda İlham Abbasov “Nobel mükafatı laureatları” məqaləsində ingilis ədəbiyyatının amerikalı nümayəndəsi Tomas Eliotun həyat və yaradıcılığını incələyir. Filologiya üzrə fəlsəfə doktoru Gülnar Səma “Yeni nəsil: tənqid” rubrikasında Ramil Mərzilinin “Qadağan olunmuş şeirlər”ini təhlil edir. Həmçinin “Tribuna”da Mirzə Fətəli Axundzadənin “Nəzm və nəsr haqqında” yazısı yer alıb.

Bundan başqa, jurnalda Çingiz Aytmatovun “Dəniz kənarıyla qaçan alabaş” əsərindəki mif və gerçəklikdən, Firudin bəy Köçərlinin Abdulla Şaiqə məktublarından söz açılır, “Bir qış gecəsi əgər bir yolçu və postmodernizm” yazısı təqdim edilir.

Oxucular yanvar sayında “Paris üçbucağı” romanı haqqında düşüncələrlə, Əbülfət Mədətoğlunun yaradıcılığı, Mirzə Şəfi Vazehin lirik şeirləri, maraqlı müsahibələr və yazılarla da tanış ola bilərlər.

Azərbaycan Milli Kitabxanasında Novruz bayramı münasibətilə elektron məlumat bazası yaradılıb.

Kitabxanadan AZƏRTAC-a bildirilib ki, “Novruz bayramı” adlı elektron məlumat bazası onlayn formada istifadəçilərə təqdim edilib.

Kitabxana əməkdaşlarının hazırladığı materiallarda Novruz haqqında nəşrlər, adət-ənənələr və deyimləri əks etdirən foto və videolar nümayiş olunub. Məlumat bazası ilə tanış olmaq istəyənlər https://anl.az/el/emb/Novruz/index.html linkindən istifadə edə bilərlər.

Martın 17-də Heydər Əliyev Mərkəzində “İlmələrdə yaşayan irs: Özbəkistan tikmələrinə səyahət” adlı sərgi açılıb.

“Report” xəbər verir ki, sərginin açılışında Azərbaycan Respublikasının Birinci vitse-prezidenti Mehriban Əliyeva və Özbəkistan Respublikası Prezidentinin köməkçisi Saida Mirziyoyeva iştirak ediblər.

Azərbaycan Respublikası Prezidentinin köməkçisi, Heydər Əliyev Mərkəzinin direktoru Anar Ələkbərov sərginin açılış mərasimində çıxış edərək Azərbaycan və Özbəkistan arasında əsrlərə söykənən dostluq və qardaşlıq münasibətlərinin xüsusilə son illər Prezident İlham Əliyevin və Prezident Şavkat Mirziyoyevin şəxsi münasibətləri əsasında uğurla inkişaf etdiyini vurğulayıb. Azərbaycan-Özbəkistan münasibətlərində mədəni əlaqələrin xüsusi yer tutduğunu qeyd edən Prezidentin köməkçisi ölkələrimizin mədəniyyət günlərinin uğurla təşkil olunduğunu xatırladıb.

Bu sərginin ölkələrimiz arasında dostluq və qardaşlıq münasibətlərinin daha bir göstəricisi olduğunu qeyd edən Anar Ələkbərov deyib: “Heydər Əliyev Mərkəzi hazırda beynəlxalq konfransların, sərgilərin keçirilməsi üçün platformaya çevrilib. Bu tədbirin keçirilməsinə göstərdiyi dəstəyə görə Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevaya təşəkkürümüzü bildirmək istərdik. Bu gün biz Özbəkistan Respublikası Prezidentinin köməkçisi Saida Mirziyoyevanın və Özbəkistan Mədəniyyətinin və İncəsənətinin İnkişafı Fondunun sayəsində Heydər Əliyev Mərkəzində Özbəkistana həsr olunan birinci tədbiri keçiririk. Dünən “Lazgi. Qəlb və sevginin rəqsi” adlı balet tamaşasının təqdimatı oldu. Bu, UNESCO-nun Qeyri-maddi mədəni irs siyahısına daxil olan rəqsdir. Bildiyiniz kimi, gələn həftə Novruz bayramıdır. Bu bayram günlərində ziyarətçilərimiz həm bu gün açılan sərgi, həm də bu sərgi ərəfəsində Mərkəzdə Daniel Vürtzelin nümayiş etdirilən “Hava fontanı” instalyasiyası ilə tanış ola biləcəklər”.

Özbəkistan Prezidentinin köməkçisi Saida Mirziyoyeva tədbirdə çıxış edərək Azərbaycanda olmaqdan və bu sərginin təşkilindən məmnunluğunu ifadə edib: “Bu gün Bakıda, Heydər Əliyev Mərkəzində “İlmələrdə yaşayan irs: Özbəkistan tikmələrinə səyahət” adlı böyük sərgi açılır. Bu sərgi təkcə dekorativ-tətbiqi sənət kolleksiyasını nümayiş etdirmir, həm də Özbəkistanın mədəni irsinin zəngin müxtəlifliyinin canlı şahidi, onun tarixi dərinliyinin və mədəni təkamülünün təcəssümüdür”.

Özbəkistan ilə Azərbaycan arasında bənzərsiz tarixi əlaqələrin mövcudluğunu qeyd edən Saida Mirziyoyeva vurğulayıb: “Hər iki dövlət çoxəsrlik tarixə və zəngin mədəni ənənələrə malikdir. Özbəkistanı və Azərbaycanı tarixdə, mədəniyyətdə və ənənələrdə çoxsaylı ortaq məqamlar birləşdirir. Hər iki xalq qonaqpərvərliyi, zəngin milli mətbəxi və tikmə, ağac üzərində oyma, keramika kimi nadir xalq sənəti irsinə sahibdir. Qoy bu böyük tədbir xalqlarımız arasında daha bir körpüyə, gözəllik və harmoniya ilə bağlı ortaq səylərimizin sübutuna çevrilsin”.

Çıxışlardan sonra Azərbaycanın Birinci vitse-prezidenti Mehriban Əliyeva və Özbəkistan Prezidentinin köməkçisi Saida Mirziyoyeva Heydər Əliyev Fondunun dəstəyi ilə hazırlanan “Azərbaycan xalçası-ilmələrin rəqsi” və “Kukla incəsənətdə” sərgiləri ilə tanış olublar.

Qeyd edək ki, xalça kolleksiyası səkkiz il ərzində ərsəyə gəlib. Qədim sənətə yeni nəfəs verən sərginin kolleksiyasındakı “Yaranış”, “Şikargah”, “Xan ovu”, “Cəng və barış”, “Bəndi-rumi”, “Şəbəkəli”, “Adəm və Həvva”, “Ağaclı”, “Narlı“, “Göllü”, “Ləçək-turunc”, “Dörd fəsil”, “Tağlı”, “Cəmadət” xalçaları, “Cənnət quşları” və “Cənnət bağı” dəstxalı - gəbələri bənzərsiz sənət nümunələri böyük maraqla qarşılanıb. Kolleksiyadakı xalçaların hər biri naxışları, ornamentləri vasitəsilə ziyarətçilərə öz mesajlarını çatdırır.

“Kukla incəsənətdə” sərgisində isə 200-dən çox kukla nümayiş etdirilir. Ekspozisiyada nümayiş etdirilən sənət nümunələrinin əksəriyyəti tək nüsxədə hazırlanıb və yüksək bədii dəyərə malikdir. Həmin əsərlərin çoxu beynəlxalq kukla festivalları və biennalelərində qalib olub.

Daha sonra Mehriban xanım Əliyeva və Saida Mirziyoyeva “İlmələrdə yaşayan irs: Özbəkistan tikmələrinə səyahət” sərgisinin rəmzi açılışını bildirən lenti kəsdilər və ekspozisiya ilə tanış oldular.

Məlumat verildi ki, Özbəkistan Mədəniyyətinin və İncəsənətinin İnkişafı Fondu ilə birgə keçirilən sərgidə bu ölkənin muzey toplusundan olan 140-dan çox dekorativ-tətbiqi sənət nümunəsi nümayiş etdirilir. Dost ölkənin mədəni-tarixi irsinə və milli geyimlərinə həsr olunan ekspozisiya XIX-XX əsrlərdə Özbəkistana xas sənətkarlığın dirçəlişini əks etdirir. Buxaranın qızıl tikmələri hər zaman Özbəkistanda digər sənət növləri arasında xüsusi yer tutub.

“İlmələrdə yaşayan irs: Özbəkistan tikmələrinə səyahət” sərgisi bir neçə bölmədən ibarətdir: kişilərin milli geyiminin əsas elementi olan qızıl naxışlı çapanlar (uzun üst geyimi) bölməsi, Daşkənd, Cizax, Səmərqənd, Şəhrisəbz, Nurata və Buxara kimi şəhərlərdə əl ilə işlənmiş, əsasən gül və ulduz motivlərinin üstünlük təşkil etdiyi dekorativ tekstil - suzani nümunələrinin nümayiş olunduğu tikmə bölməsi, Səmərqənd, Buxara və Qaraqalpaqstandan olan qədim ustaların gümüşdən, firuzə və digər qiymətli daşlardan hazırladıqları zərgərlik nümunələri bölməsi.

Tədbirdə Özbəkistanın milli musiqisi səsləndirilib.

Bakı sakinləri və paytaxtımızın qonaqları Heydər Əliyev Mərkəzində sərgi ilə iyulun 1-dək tanış ola bilərlər.

Azərbaycan Dövlət Kukla Teatrı Lənkəran Dövlət Dram Teatrının səhnəsində “Məlikməmməd” tamaşası ilə çıxış edib.

Teatrdan AZƏRTAC-a bildirilib ki, xalq nağılı əsasında yeni tərtibat və kukla texnikasında hazırlanan səhnə əsərində canlı planda oyun ilə kiçik ölçülü kuklaların vəhdəti göstərilib.

Birhissəli uşaq tamaşasının quruluşçu rejissoru Anar Məmmədov, quruluşçu rəssamı İqbal Əliyevdir. Musiqi tərtibatlı tamaşada rolları Aygül Ağayeva, Elgün Həmidov, Elnur Xəlilov, İqbal Əliyev, Səbinə Məmmədova və digər aktyorlar ifa edib. Qəhrəmanlıq, cəsarət və dürüstlük aşılayan səhnə işi tamaşaçılar tərəfindən böyük maraqla qarşılanıb.

Müslüm Maqomayev adına Azərbaycan Dövlət Akademik Filarmoniyasının səhnəsində “Mystery Ensemble” beynəlxalq musiqi layihəsi çərçivəsində “Miyadzakinin arzuları” adlı konsert proqramı təqdim olunub.

AZƏRTAC xəbər verir ki, tədbir Azərbaycan, Böyük Britaniya, Rusiya və digər ölkələrin ərazilərində yerləşən qədim malikanələrdə şam işığında, damlarda, istixanalarda, planetariumlarda və atmosfer məkanlarında unikal mədəni tədbirlər yaradan “RED EVENTS & Distribution ltd” kreativ agentliyi tərəfindən təşkil olunub.

“Mystery Ensemble”də musiqiçilərin tərkibi daim yenilənir, buna görə də hər konsert xüsusi harmoniya ilə orijinal müstəvidə səslənir. Bu axşam müasir orkestrin ifasında tamaşaçılara görkəmli müasir yapon bəstəkarı Czyo Hisaişinin dünyaca məşhur cizgi filmlərinə bəstələdiyi saundtreklərin daxil edildiyi “Miyadzakinin yuxuları” proqramı təqdim olunub.

Hisaişinin uzun və məhsuldar karyerası kino, animasiya, kompüter oyunları, televiziya və reklam üçün musiqi də daxil olmaqla, dünyaya bir çox heyrətamiz əsərlər bəxş edib. O, 1998-ci ildə Naqanoda keçirilən Paralimpiya Oyunlarının musiqisini də bəstələyib. Lakin bəstəkar ən məşhur əsərlərini Takeshi Kitanonun kult filmləri və təbii ki, Hayao Miyadzakinin cizgi filmləri üçün yaradıb.

“Mystery Ensemble” peşəkarlarının sənətkarlığı və həvəsi, onların yerinə yetirdiyi aranjemanlar Bakının ən atmosferli salonlarından birində sehrli əhvali-ruhiyyə yaradıb. Belə ki, burada musiqiçilər dinləyiciləri bir daha “Studio Ghibl”in animasiya şah əsərlərinin füsunkar dünyasına qərq olmağa dəvət ediblər.

“Yeriyən qəsr” və “Küləklər vadisindən olan Navsikaya”, “Kabuslarla sovrulanlar” və “Totoro mənim qonşumdur” əsərləri filarmoniyanın qübbəsi altında sanki yenidən canlanır, dinləyiciləri fantaziyalar, uşaq nağılları və stimpank aləminə qərq edirdi.

Konsert proqramına Czyo Hisaişinin müxtəlif ekran əsərlərinə yazdığı “Summer”, “Kiki's Delivery Service”, “Path of The Wind Totoro”, “One Summer Day”, “Howl”, “Legend of Ashitaka”, “Carrying You”, “Nausikaa”, “The Sixth Station Spirited Away” musiqi kompozisiyaları daxil edilib. Bununla yanaşı, bəstəkarın “Samuray Çamplu” cizgi filminə bəstələdiyi “Obokuri-Eeumi” və başqa animasiya ekran əsəri üçün yazdığı “In a Landscape” əsərləri də təqdim edilib.

Simli alətlərin canlı səsi və “Mystery Ensemble” musiqiçilərinin virtuoz ifası dinləyicilərə eyni dərəcədə görkəmli ustadların - Hisaişinin və Miyadzakinin yaradıcılıq vəhdətini qiymətləndirməyə imkan verib. Bu heyrətamiz cütlüyə heyran olandan sonra Hisaişinin musiqisinin Miyadzakinin filmləri sayəsində dahi kimi tanındığını və ya Miyadzakinin filmlərinin Hisaişinin musiqisi sayəsində şah əsər adlandırıldığını başa düşmək çətindir.