XƏBƏRLƏR

Teatr O2 məkanında Uilyam Qibsonun “İki nəfər yelləncəkdə” pyesi əsasında səhnələşdirilmiş “İki nəfər” tamaşasının premyerası olub. Tamaşaya rejissorlar Konstantin Soldatov və İrina Yakubenko quruluş veriblər. Rolları Yevgeni Maksimov və Tatyana Selivyorstova ifa ediblər.

“İki nəfər yelləncəkdə” pyesi mövzu etibarilə öz həyəcanlarının müxtəlifliyi fonunda insan ruhunun tədqiqini göstərən ekzistensial dramdır. Bu, iki tənha adamın - vəkil Cerri və rəqqasə Qitelin hekayəsidir. Təsadüfi görüş onlar üçün qurtuluş və cəzaya çevrilir. Qeyri-sabit münasibət qəhrəmanların həyatını alt-üst edir.

Tamaşanın rejissorlarından biri İrina Yakubenko AZƏRTAC-ın müxbiri ilə söhbətində tamaşa üzərində işlərin necə aparılmasından və tamaşaçıya nəyin çatdırılmasının vacibliyindən danışıb.

Rejissor vurğulayıb: “Uzun müddətdir ki, bu tamaşaya diqqət yetirirəm. İnsani münasibətləri göstərmək mənim üçün çox vacib idi. Bundan əlavə, hekayə teatrımızın kamera formatına çox uyğundur. Tamaşanın üzərində iş ay yarım davam edib. Tamaşada iki aktyor iştirak edir. Gənc aktyorlar - Jenya və Tanya rolları əla ifa ediblər. Onlar çox çalışdılar və bu gün özlərini tamaşaçılara tam şəkildə göstərdilər. İnsanların tamaşaya, bir-birinə, rejissora inanması çox vacibdir. Aktyorların səhnədə bir-birini nə dərəcədə hiss edə bilmələri, özlərini işlərinə hansı səviyyədə həsr etmələri də önəmlidir”.

Aktrisa Tatyana Selivyorstova da premyera ilə bağlı təəssüratlarını bölüşüb: “Premyera əla keçdi. Tam zal – bu, min faiz sizi də əhatə edir. Sanki özünlə, xarakterinlə yenidən tanış olursan və başa düşürsən ki, təkcə sənin deyil, həm də oynadığın qəhrəmanın həyat təcrübəsi baqajı var. Birdən-birə o, öz təcrübəsini sizə çatdırmağa başlayır. Bu, yəqin ki, teatrın və aktyorluq peşəsinin sehridir, burada hansısa yeni həyatı yaşayırsan. Müəyyən mənada, səhnədə canlandırdığın xarakterə yazığın gəlir, bəzən ona nifrət edirsən, bəzi hallarda tərəfdaşından zəhlən gedir, yaxud ayrı-ayrı məqamlarda ona aşiq olursan. Bu, həqiqətən gözəldir. Və sizə bir şey öyrətdikləri üçün qəhrəmanlarıma təşəkkür etmək istəyirəm”.

Aktyor Yevgeni Maksimov da tamaşanın premyerası ilə bağlı hisslərini ifadə edib: “Tamaşaçı tərəfindən güclü diqqət hiss olunurdu. Çox sakit danışanda anlaya bilirsən ki, ətrafında hətta pıçıldaya biləcəyin və bu replikanın eşidiləcəyi bir sükunət hökm sürür. Zalda belə bir diqqət varsa, bu, insanların mümkün qədər tamaşanın mahiyyətinə qərq olması deməkdir və belə ab-hava bizim üçün çox xoşdur. Tamaşa Brodvey komediyası üslubunda yazılıb, baxmayaraq ki, əslində o, zarafat və məzəli detalları ehtiva edən dramdır və müəllif bəzi məqamlarda tamaşaçılardan müəyyən reaksiya - məsələn, gülüş selinin gəlməsini nəzərdə tutub. Pyesi oxuyanda, özüm də bəzi yerlərdə gülümsəyirdim. Amma səhnədə bu hekayəni yaşayırsan və baş verənlər sənin üçün çox ciddidir”.

Teatr məkanının xüsusi olaraq “İki nəfər” tamaşası üçün necə təşkil edildiyini xüsusi qeyd etmək lazımdır. Zalda keçidlərdən, işıqlandırmadan, səs və video proyeksiyalardan üzvi və orijinal istifadə edilməsi tamaşaya istehsal dinamikası verib, gözəl vizual effekt yaradıb.

Premyeradan sonra Teatr O2 tamaşaçıları ilə tamaşanın ənənəvi müzakirəsi aparılıb. Gecənin qonaqları aktyor və rejissorlarla ünsiyyətdə olub, tamaşa haqqında təəssüratlarını bölüşüb, suallar verib və bütün kollektivi uğurları münasibətilə təbrik ediblər.

Cəfər Cabbarlı adına “Azərbaycanfilm” kinostudiyasının direktoru Nazim Hüseynov Tatarıstanda ilk kinematoqrafiya təşkilatı olan “Tatkino”nun 100 illiyi münasibətilə keçirilən tədbirlərdə iştirak edib.

Kinostudiyadan AZƏRTAC-a bildirilib ki, “Tatarkino” assosiasiyasının bu münasibətlə planlaşdırdığı tədbir çərçivəsində Özbəkistan, Qazaxıstan, Tacikistan, Belarus, Qırğızıstan və Azərbaycanın kinostudiya rəhbərlərinin Kazana səfəri baş tutub.

Yubiley tədbirlərinə “Birgə istehsal kino sənayesinin inkişafının aparıcı amili kimi” adlı dəyirmi masa ilə start verilib. Dəyirmi masada Rusiya və digər MDB ölkələrinin kinostudiyaları arasında əməkdaşlıq əlaqələri müzakirə olunub.

Kinostudiya rəhbərləri Tatarıstan Respublikasının mədəniyyət naziri İrada Ayupova ilə də görüşüblər. Görüşdə MDB ölkələri və Gürcüstan kinostudiyalarını birləşdirəcək beynəlxalq qurumun fəaliyyəti müzakirə olunub.

Gələcək layihələrlə bağlı müzakirələrin aparılması məqsədilə tatarıstanlı rejissor və prodüserlər, eyni zamanda, kino mütəxəssisləri və mədəniyyət müəssisələrinin direktorları ilə Kazan Dövlət Mədəniyyət İnstitutunda görüş keçirilib. Müzakirənin moderatoru, “Tatarkino”nun direktoru, Kino və televiziya rejissorluğu kafedrasının professoru Milyauşa Aytuqanova birgə istehsalın hazırda qlobal tendensiya olduğunu vurğulayıb. Bildirilib ki, MDB ölkələri yüksək keyfiyyətli məhsul yaratmaq üçün güclərini birləşdirir, birgə filmlərin təbliği, filmlərin yayımı imkanlarının genişləndirilməsi və keyfiyyətli tamaşaçı auditoriyasının tapılması üzərində işləyirlər.

“Gənclik” metrostansiyasının yanında sərnişinlərin rahat gediş-gəlişinin təmin edilməsi məqsədilə yeni nəqliyyat mübadilə mərkəzi yaradılıb.

Bu barədə "Report"a Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyindən (AYNA) bildirilib.

Məlumata görə, yeni HUB sərnişinlərin rahatlığı və təhlükəsizliyi, avtobuslar üçün nəqliyyat şəraitinin yaxşılaşdırılması ilə yanaşı, Fətəli Xan Xoyski küçəsində yaranan sıxlıq və tıxac hallarının azaldılmasında da böyük əhəmiyyətə malikdir.

Tofiq Bəhramov adına Respublika Stadionunun qarşısında müvafiq nəqliyyat infrastrukturu yaradılıb. Müntəzəm marşrut avtobusları üçün dayanacaq məntəqələri quraşdırılıb, işıq dirəkləri yeniləri ilə əvəzlənib, yeni yol salınıb, yol nişanları quraşdırılıb və nişanlanma xətləri çəkilib. Avtobusların hərəkət etməsi üçün təhlükəsizlik adacığında zolaq təşkil olunub. “Gənclik Mall” ticarət mərkəzinin yeraltı parkinqinin girişində svetofor quraşdırılıb.

İlkin mərhələdə nəqliyyat mübadilə mərkəzi ərazisində gün ərzində 12 müntəzəm marşrut xətti üzrə 181 avtobus fəaliyyət göstərəcək.

Azərbaycanla İraq arasında biznes forumunun keçirilməsi müzakirə edilib.

“Report” xəbər verir ki, bunu iqtisadiyyat naziri Mikayıl Cabbarov "X" sosial şəbəkəsindəki hesabında bildirib.

"İraqa səfəri çərçivəsində bu ölkənin ticarət naziri Ater Davud Əl-Ğureyri ilə görüşdük. Ölkələrimizin biznes dairələri arasında əməkdaşlığın gücləndirilməsi, infrastruktur layihələri üzrə birgə fəaliyyət ilə bağlı məsələləri nəzərdən keçirdik. İraqlı iş adamlarını Azərbaycandakı biznes və ixrac imkanlarını dəyərləndirmək məqsədilə ölkəyə səfərə dəvət etdik”, - deyə o qeyd edib.

Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) Bakıda Xaqani bağına yaxın küçələrdə nəqliyyat vasitələrinin hərəkətinə tətbiq edilən məhdudiyyətlə bağlı təhlillər aparıb.

"Report" bu barədə nazirliyə istinadən xəbər verir.

Təhlillərə əsasən, böyük piyada axını müşahidə edilən ərazidə nəqliyyat vasitələrinin hərəkətinin məhdudlaşdırılması effektiv olub. Belə ki, nəqliyyat vasitələrinin hərəkətinə məhdudiyyət qoyulan küçələrin xüsusi tranzit əhəmiyyəti yoxdur. Bu küçələr, əsasən, parklanma məqsədilə istifadə edilir.

Müsbət nəticələr nəzərə alınaraq, 20-26 mart tarixlərində – Novruz bayramı günlərində də paytaxtın Zərifə Əliyeva (Rəsul Rza küçəsi ilə kəsişmədən sonra), Əbdülkərim Əlizadə, Tərlan Əliyarbəyov və Yusif Məmmədəliyev küçələrində avtomobillərin hərəkətinin məhdudlaşdırılması ilə bağlı qərar qəbul edilib.

Sözügedən küçələrdəki binalarda yaşayan sakinlərin avtomobilləri üçün nömrətanıma sistemi tətbiq edilməklə əraziyə giriş təmin olunur. “AzParking” mobil tətbiqində fərdi parklanma talonu olan sakinlər xidmətdən yararlana bilirlər. Bu şəxslərin avtomobilləri sistem tərəfindən tanınır və onlar əraziyə buraxılır. Ərazidə yaşayan sakinlərə məhdudiyyət qoyulacaq əraziyə avtomobilləri ilə daxil olmaq üçün “AzParking” mobil tətbiqi üzərindən müraciət edərək fərdi parklanma talonu almaları tövsiyə edilir.

Sakinlər üçün nəqliyyat vasitələri ilə əraziyə giriş Neftçilər prospektindən Tərlan Əliyarbəyov, çıxış isə Yusif Məmmədəliyev küçələrindən təmin olunur.

Azərbaycanda Novruz bayramının qeyd ediləcəyi 20-21 martda "Bakı Metropoliteni" QSC-nin iş rejimində dəyişikliklər ediləcək.

"Report" bu barədə səhmdar cəmiyyətinə istinadən xəbər verir.

Məlumata görə, sərnişin məmnunluğu və metro istifadəçilərinin rahat hərəkəti nəzərə alınaraq, bayram günlərində şəhər mərkəzinə, bayram gəzintisi və müxtəlif tədbirlərin keçiriləcəyi məkanlara yaxın stansiyalarda növbətçilik cədvəli tərtib olunacaq.

Qeyd edilən iki gün ərzində saat 07:00-dan 21:00-dək “Həzi Aslanov-28 May” sahəsində qatarların hərəkəti 2,5 dəqiqəlik intervalla tənzimlənəcək. Martın 22-dən 26-dək həmin sahədə interval 3 dəqiqə təşkil edəcək.

Yaşıl və Qırmızı xətlərin kəsişərək birləşdiyi “28 May” stansiyasından “İçərişəhər” və “Dərnəgül” istiqamətlərində qatarların hərəkət intervalı iki dəfə artıq olacaq.

“Bakmil” istiqamətində hərəkət edən sərnişinlər martın 20-21-də şənbə gününün, martın 22-26-da isə bazar gününün hərəkət cədvəllərindən istifadə edə bilər.

Bununla yanaşı, qeyri-iş günlərində ehtiyat qatarlar, zərurət yaranacağı təqdirdə xəttə buraxılmaq üçün hazır vəziyyətdə saxlanılacaq.

Bakıda Novruz bayramı qeyd olunur, bu münasibətlə paytaxt rayonlarında abad məhəllələrdə şənliklər və konsert proqramları təşkil edilir.

Bu barədə "Report"a Bakı Şəhər İcra Hakimiyyətindən məlumat verilib.

"Bakı şəhərində xalqımızın ən əziz və sevimli bayramı olan Novruz geniş və coşqu ilə qeyd edilir. Bu münasibətlə paytaxtın bütün rayonlarında bayram şənlikləri və konsert proqramları təşkil edilib. Bayram günlərindəki şənliklər öz kütləviliyi ilə seçilib", - İH-dən vurğulanıb.

Bildirilib ki, bu gün Novruz bayramı paytaxtın Nizami, Xətai və Binəqədi rayonlarında yerləşən Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə “Bizim həyət” layihəsi çərçivəsində yaradılan məhəllələrdə qeyd edilib: "Son illərdə paytaxtda 400-ə yaxın abadlaşdırılmış həyətlər yaradılaraq sakinlərin istifadəsinə verilib. Məhəllə sakinləri, ağsaqqallar, şəhid ailələrinin üzvləri, qazilər bayrami yüksək sevinc hissi ilə qeyd edib və rəqs ediblər. Bayramda müğənnilər müxtəlif mahnılar səsləndirib, Novruzun əsas personajları olan Kosa, Keçəl və Bahar qızı toplaşanları şənləndirib və bayram tonqalının ətrafında sakinlərlə birgə rəqs ediblər".

Qeyd edək ki, Novruz ərəfəsində abad məhəllələr bayramsayağı bəzədilib, səməni, Novruz şirniyyatları olan süfrələr açılıb, bayram abu-havası yaradılıb.

Fikrət Əmirov adına Gəncə Dövlət Filarmoniyası tezliklə yeni orkestrini təqdim edəcək.

Filarmoniyadan AZƏRTAC-a bildirilib ki, orkestrin fəaliyyəti Azərbaycanın və Qərb ölkələrinin bəstəkarlarının əsərlərinin təbliğində çox mühüm rol oynayacaq.

Kollektivin adı aprelin 28-də Gəncədə ilk dəfə keçiriləcək konsertdə açıqlanacaq.

Yeni yaradılacaq orkestrin Azərbaycanı qarış-qarış gəzərək xüsusi hazırlanmış proqramlarını təqdim etməsi nəzərdə tutulur.

Mədəniyyət Nazirliyi və Milli İncəsənət Muzeyinin təşkilatçılığı ilə keçirilən “Muzeydə musiqi” layihəsi çərçivəsində muzeydə növbəti konsert keçirilib.

Muzeydən AZƏRTAC-a bildirilib ki, "Elimizə bahar gəlir” adlı konsert proqramı Beynəlxalq Muğam Mərkəzi tərəfindən xanəndələr Nisbət Sədrayeva, Mirələm Mirələmov, Almaxanım Əhmədli, Könül Xəlilzadə, Ariz Hüseynovun iştirakı ilə təqdim olunub.

Xanəndələri tarda Rüstəm Müslümov, kamançada Elnur Salahov, balabanda Rəfael Əsgərov, qanun ifaçısı Məhta Məhəmmədəlizadə, nağarada Siyavuş Kərimov müşayiət ediblər.

“Avroviziya 2024” beynəlxalq mahnı müsabiqəsində Azərbaycan təmsilçilərinin ifa edəcəyi mahnı martın 15-i Bakı vaxtı ilə saat 12:30-da Avroviziyanın rəsmi yutub kanalında və İctimai Televiziyanın canlı yayımında təqdim olunacaq.

Bu barədə AZƏRTAC-a İctimai Televiziya və Radio Yayımları Şirkətinin mətbuat xidmətindən məlumat verilib. Öncə bildirildiyi kimi, mahnı müasir pop və ənənəvi etnik musiqi janrlarını özündə birləşdirir. Mahnının müəllifi bu il ölkəmizi Avroviziyada təmsil edəcək Fahree - Fəxri İsmayılov özüdür. Qeyd olunan vaxtda ictimaiyyətə ilk dəfə açıqlanacaq mahnı üzərində Fahree ilə birgə gənc, istedadlı yerli musiqiçilər - Mado Salikh, Edqar Ravin, Həsən Heydər və Mila Miles da işləyib.

Qeyd edək ki, mahnının muğam hissəsini “Səs Azərbaycan: Doğma nəğmələr” müsabiqəsinin finalçısı İlkin Dövlətov ifa edəcək. Xatırladaq ki, təmsilçilərimiz İsveçin Malmö şəhərində mayın 7-də səhnəyə çıxacaqlar.