XƏBƏRLƏR

Bakı Şəhər Mədəniyyət Baş İdarəsinin Əli Əmirov adına Mədəniyyət Sarayının təşkilatçılığı ilə Zəfər Gününə həsr olunmuş “Mən Azərbaycanlıyam” adlı intellektual bilik yarışı keçirilib.

Baş İdarədən AZƏRTAC-a bildirilib ki, əvvəlcə Azərbaycan Respublikasının Dövlət Himni səsləndirilib.

Yarışda Qaradağ rayon məktəblilərindən ibarət 5 komanda iştirak edib. İlk üç yerin qalibləri diplom və medallarla təltif olunublar.

“Azərbaycan: mədəniyyət və əyləncənin qovuşduğu yer” adlı qısa film 13-cü Amorqos Beynəlxalq Turizm Filmləri Festivalında “Turizm destinasiyası olan ölkələr” nominasiyası üzrə birinci yerə layiq görülüb.

Dövlət Turizm Agentliyindən AZƏRTAC-a bildirilib ki, eyni nominasiya üzrə ikinci pillədə Avstraliya, üçüncü pillədə isə Avstriya qərarlaşıb.

“Turizm destinasiyası olan ölkələr”, “Turizm destinasiyası olan şəhərlər”, “Turizm məhsulları”, “Turizm xidmətləri”, “Səyahət üzrə marketinq videosu” və “Müstəqil səyahət videosu” nominasiyalarını əhatə edən müsabiqədə 50 ölkədən 145 turizm videoçarxı iştirak edib.

Beynəlxalq münsiflər heyətinin qiymətləndirməsindən sonra 25 qısa film nominasiyalara namizəd seçilib.

Qeyd edək ki, “Azərbaycan: mədəniyyət və əyləncənin qovuşduğu yer” filmi “DARS FILMS” tərəfindən “BBC World News” üçün hazırlanıb.

Amorqos Beynəlxalq Turizm Filmləri Festivalı 2017-ci ildən Beynəlxalq Turizm Filmləri Festivalları Komitəsinin (CIFFT) rəsmi üzvüdür.

8 Noyabr -Zəfər Günü tariximizin ən böyük qalibiyyət səhifələrindəndir. Bu Zəfər Azərbaycan xalqının misli görünməmiş qəhrəmanlıq salnaməsidir.

AZƏRTAC xəbər verir ki, bu əlamətdar gün həm də Azərbaycan xalqının birlik, şərəf, məğrurluq, qürur və ədalət bayramıdır, tariximizə qızıl hərflərlə yazılan, dünya hərb elminə dair dərsliklərə düşən, ordumuzun qüdrətini bütün dünyaya tanıdan böyük hadisədir.

Mədəniyyətimizin, ruhumuzun paytaxtı olan Şuşanın 28 ildən sonra öz sahibinə qovuşmasını xalqımız böyük sevinc və iftixar hissi ilə qarşıladı. Bu münasibətə çoxlu sayda mahnılar bəstələndi, şeirlər yazıldı, kitablar işıq üzü gördü. Tarixi Qələbəmizdən iki il ötməsinə baxmayaraq bu gün də Zəfər dolu, yurd-torpaq sevdalı, Şuşa sevincli əsərlər yaranmaqdadır. Bu günlərdə təqdim olunan “Salam ay Şuşa” mahnısı da bu qəbildəndir.

Emil Qədirovun ifa etdiyi mahnının musiqisi Stalik Xankişiyevə, sözləri Tərlan Zülalova məxsusdur.

Noyabrın 11-də Nizami Kino Mərkəzində XIII Bakı Beynəlxalq Qısa Filmlər Festivalının açılış mərasimi təşkil olunacaq.

AZƏRTAC xəbər verir ki, Gənc Kinematoqrafçılar Mərkəzinin təsis etdiyi festival Mədəniyyət Nazirliyinin təşkilati dəstəyi ilə keçirilir.

Bu il festivala 79 ölkədən 814 film qatılıb. Bunlardan 91 film yerli müsabiqəyə təqdim edilib. Seçim Komissiyasının qərarına əsasən 32 film festivalın beynəlxalq, 40 film isə yerli müsabiqəsində iştirak hüququ qazanıb. Bu filmlər festivalın əsas mükafatı “Qızıl Nar” uğrunda yarışacaqlar.

Bu ilki festivalın önəmli proqramlarından biri də “Asiya istedadları” müsabiqə proqramıdır. Yalnız Asiya ölkələrinin bədii filmlərinin yarışdığı müsabiqədə on film yer alır. Qalibləri Azərbaycan kino tənqidinin yeni dalğasının formalaşmasında birbaşa əməyi olan müəlliflərdən biri Aliyə Dadaşova və Əməkdar rəssam Rəşad Ələkbərzadə seçəcək.

Mobil telefonla çəkilən filmlərdən ibarət “Cinemobil” müsabiqəsində isə 4 film yarışacaq. Onlayn keçiriləcək müsabiqənin qalibini tamaşaçılar seçəcək.

Festivalın müsabiqədənkənar maraqlı bölmələri də var. Belə ki, “British Council”la əməkdaşlığın nəticəsi olaraq festival çərçivəsində İngiltərə Kino və Televiziya Sənətləri Akademiyası tərəfindən verilən dünyanın ən məşhur mükafatı – “Bafta” namizədlərinin xüsusi təqdimatı olacaq.

Həmçinin “Dili bizim” müsabiqə proqramı Bakı Beynəlxalq Qısa Filmlər Festivalının nümayiş xarakterli proqramıdır. Burada dünyanın müxtəlif ölkələrində yaşayan həmyerlilərimizin Azərbaycan dilində çəkdikləri filmlər nümayiş olunur.

Festivalda yer alan yerli və xarici qısa filmlər 5 gün müddətində Nizami Kino Mərkəzində nümayiş olunacaq. Eyni zamanda festival çərçivəsində noyabrın 13-də türkiyəli prodüser Əmrah Kılıçla ustad dərsi keçiriləcək. Qaliblərin mükafatlandırılması mərasimi noyabrın 15-də eyni məkanda təşkil olunacaq.

Qeyd edək ki, Kann, Venesiya, Berlin Film Festivallarında, həmçinin “Oskar” mükafatlandırma mərasimində mükafat və uğur qazanmış filmləri ölkəmizə gətirən Bakı Beynəlxalq Qısa Filmlər Festivalı hazırda Azərbaycanın uzunömürlü film festivalıdır.

Noyabrın 26-da “Mirvarid Dilbazi Poeziya Məclisi” İctimai Birliyi (İB) Beynəlxalq Muğam Mərkəzində “Azərbaycan kəlağayısı min illərin yadigarı” adlı konsert proqramı təqdim ediləcək.

“Mirvarid Dilbazi Poeziya Məclisi” İctimai Birliyi, eyni zamanda, həmin gün “Azərbaycan kəlağayısı min illərin yadigarı” adlı kitabın və sənədli filmin təqdimatını keçirəcək. Film Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə layihə çərçivəsində ekranlaşdırılıb.

Bu barədə AZƏRTAC-a İB-nin sədri, şair-publisist Güllü Eldar Tomarlı məlumat verib.

O deyib ki, 2014-cü il noyabrın 26-da Azərbaycan kəlağayı sənəti “Kəlağayı simvolizmi və ənənəvi sənəti” adı ilə UNESCO-nun Qeyri-Maddi Mədəni İrs üzrə Reprezentativ Siyahısına daxil edilib. Həmin vaxtdan noyabrın 26-sı ölkəmizdə “Azərbaycan kəlağayısı günü” kimi qeyd olunmağa başlayıb.

Bildirib ki, kəlağayı sənəti xalqımızın milli mənəvi dəyərlər sistemində və adət-ənənələrində ən mühüm mədəniyyət nümunələrindəndir. Kəlağayı təkcə baş geyimi deyil, həm də sevgi və gözəllik rəmzidir, naxış və ornamentləri xalq məişətinin bir çox xüsusiyyətlərini, milli mənəvi dünyamızla bağlı mərasim və hadisələri, xalq sənətinin müxtəlif sahələrini təcəssüm etdirir. Həmçinin müxtəlif naxışlarla zəngin olan kəlağayıların hər birinin adının və naxışlarının fəlsəfəsi, təyinatı, xalq məişətində özünəməxsus yeri var.

Güllü Eldar Tomarlı qeyd edib ki, olduqca zərif, gözoxşayan baş örtüyü- kəlağayılarda el sənətkarlarının qəlbinin hərarəti duyulur. Kəlağayı milli baş örtüyü növü kimi qadınlarımızın geyimini tamamlanıb. Kəlağayının yeləni (haşiyəsi), bəzən isə xonçası (ortası) basmanaxış üsulu ilə həndəsi və nəbati naxışlarla bəzədilir. Milli geyimlərimizin bir hissəsi olan kəlağayı Azərbaycan qadınının dəyanət, sədaqət, ləyaqət simvoludur, kəlağayı milli dəyərlərimizin daşıyıcısıdır, kəlağayıda qədim və milli ornamentlərimiz öz əksini tapıb. Nənələrimiz illərlə kəlağayını öz sandıqlarında qoruyaraq nəsildən-nəslə ötürüblər. Dövr dəyişsə də, illər keçsə də, kəlağayıdan heç vaz keçməyiblər, bu baş örtüyünü toxuduqları xalçalar tək qoruyub saxlayıblar.

Kəlağayı istehsalı Azərbaycanda qədimdən məlumdur. Təbriz, Gəncə, Şamaxı, Şəki, Naxçıvan şəhərlərində, İsmayıllı rayonunun Basqal qəsəbəsində yüksək keyfiyyətli kəlağayılar hazırlanıb. Mənbələrin məlumatına görə, hələ orta əsrlərdən Gəncə və Basqal kəlağayıları xarici ölkələrə də ixrac olunurdu. Bu kəlağayıların ən gözəl nümunələri hələ XIX əsrin ortalarından başlayaraq, Paris, London, Sankt-Peterburq, Moskva, Tbilisi və digər şəhərlərdə keçirilən beynəlxalq sərgilərin yüksək mükafatlarına layiq görülüb.

“Xalqımızın şifahi xalq ədəbiyyatı nümunələrində, dastan, qoşma, gəraylı və bayatılarımızda, xüsusilə də aşıq poeziyasında kəlağayı haqqında olduqca maraqlı, poetik fikirlər əksini tapıb. Elə bu səbəbdən də, Mirvarid Dilbazi Poeziya Məclisinin üzvləri, tanınmış müğənnilər, muğam ustaları, aşıqlar Beynəlxalq Muğam Mərkəzinin səhnəsində geniş konsert proqramı ilə çıxış edəcək və konsertdə daha çox qədim baş örtüyümüz olan kəlağayıya həsr olunmuş bayatılar, şeirlər, mahnılar səsləndiriləcək, konsertdən öncə, mənim 150 dən çox qədimi kəlağayılarım, Əməkdar incəsənət xadimi Fəxriyyə Xələfovanın milli geyim kolleksiyası və rəssam Gülnarə Məmmədovanın milliliyimizi, Zəfərimizi təcəssüm etdirən rəsm əsərlərinin sərgisi olacaq”, - deyə Güllü Eldar Tomarlı bildirib.

2022-ci ilin noyabrın 11 saat 19:00-dan noyabrın 14 saat 00:00-dək Bakı-Gəncə-Bakı sürətli sərnişin qatarına onlayn bilet satışı texniki səbəblərdən dayandırılacaq.

Report xəbər verir ki, bu barədə məlumatı "Azərbaycan Dəmir Yolları" QSC yayıb.

Bildirilir ki, Azərbaycan Prezidenti İlham Əliyevin “Hökumət buludu”nun (G-cloud) yaradılması və “bulud” xidmətlərinin göstərilməsi sahəsində tədbirlər haqqında” 2019-cu il 03 iyun tarixli 718 nömrəli Fərmanının icrası ilə əlaqədar “Azərbaycan Dəmir Yolları” QSC-nin informasiya sistemləri və resurslarının “Hökumət buludu”na miqrasiyası nəzərdə tutulur. Onlayn biletin dayandırılması bu keçid prosesi ilə bağlıdır.

Qeyd olunan tarixlər üçün öncədən alınmış onlayn biletlər qüvvədə qalacaq və sərnişinlər həmin biletlə səyahət edə biləcəklər.

Sözügedən tarixlərdə biletlərin satışı yalnız dəmir yolu stansiyalarının bilet satışı kassalarında həyata keçiriləcəkdir. Kassalarda biletlərə dair ödənişin nağd, eyni zamanda nağdsız qaydada aparılması mümkündür.

Onlayn şəkildə alınmış biletlərin həmin tarixlərdə geri qaytarılması yalnız bilet satışı kassalarında (Bakı sərnişin, Biləcəri, Yevlax, Goran, Gəncə stansiyalarında) həyata keçirilə bilər. Biletlərin geri qaytarılması ilə əlaqədar biletlə bağlı ödənilmiş məbləğ onlayn bilet satışı bərpa olunduqdan sonra müəyyən olunmuş müddət ərzində sərnişinin ödənişi həyata keçirdiyi bank hesabına köçürüləcəkdir.

Bu müddət ərzində Abşeron dairəvi dəmir yolu xətti üzrə hərəkət edən qatarlara bilet satışında hər hansı məhdudiyyət olmayacaqdır.

“Azərbaycan Dəmir Yolları”nın informasiya resurslarının təkmilləşdirilməsi ilə əlaqədar ADY-nin “1822-Əlaqə Mərkəzi”nin işində də fasilələrin yaranması ehtimal edilir. Bu baxımdan sərnişinlər və dəmir yolu nəqliyyatından istifadə etmək istəyən şəxslər sualları və çətinlikləri ilə bağlı (012) 499 45 15 telefon nömrəsinə zəng edə bilərlər.

Qeyd edək ki, informasiya resurslarının və ehtiyatlarının “Hökumət buludu”na keçidi ilə informasiya texnologiyaları sahəsində xərclərin azalmasına, məhsuldarlığının artırılması ilə bərabər bu sistemlərin təhlükəsizliyinin daha da təkmilləşdirilməsinə, sabit və dayanıqlı infrastrukturun formalaşdırılmasına, operativ koordinasiya və daimi monitorinqin təşkilinə nail olunacaqdır.

“Azərbaycan Dəmir Yolları” (ADY) Qapalı Səhmdar Cəmiyyəti Abşeron dairəvi dəmir yolu xətti üzrə hərəkət edən elektrik qatarlarında təmassız ödəniş sisteminin təkmilləşdirilməsi üçün bu layihənin tərəfdaşları olan Azərbaycan Beynəlxalq Bankı (ABB) və "VISA" şirkəti ilə birgə işləri davam etdirir.

Bu barədə Reporta “Azərbaycan Dəmir Yolları” QSC-dən bildirilib.

Bu məqsədlə ABB ilə növbəti ilin ilk rübündən etibarən əlavə 100 ədəd validatorun alınması, eləcə də il ərzində bütün turniketlərdə təmassız ödəniş sistemindən istifadə üçün 250 yeni validator alınaraq quraşdırılması razılaşdırılıb. Bununla da Abşeron dairəvi dəmir yolu xətti boyunca 14 stansiyadakı bütün turniketlərin hamısının təmassız ödəniş sistemini dəstəkləməsi planlaşdırılır.

Azərbaycan Mərkəzi Bankının dəstəyi ilə "VISA", ABB və ADY-nin birgə tərəfdaşlığı çərçivəsində ölkə ictimai nəqliyyat sektorunda ilk dəfə olaraq təmassız ödəniş sistemi 2021-ci ilin iyun ayında Abşeron dairəvi dəmir yolu xəttində hərəkət edən elektrik qatarlarında istifadəyə verilib.

Hazırda Abşeron dairəvi dəmir yolu xəttində yerləşən 14 stansiyada sərnişinlər həm kağız bilet, həm ADY kartları, həm də təmassız ödənişi dəstəkləyən istənilən bank kartları ilə ödəniş edə bilirlər. Bu ilin oktyabr ayına olan məlumata görə, ümumi ödənişlərin 16 %-ini bank kartları təşkil edir.

Azərbaycanda ictimai nəqliyyat sektorunda ilk dəfə olaraq təmassız ödəniş layihəsi çərçivəsində “Google Pay” və “Apple Pay” üzərindən də turniketlərdə ödəniş edilməsi mümkün olacaq. Hazırda hər iki xidmət üzərindən ödəniş edilməsi sınaq mərhələsindədir. "VISA" kart istifadəçiləri üçün həm “Google Pay”, həm də “Apple Pay” xidmətlərinə inteqrasiya müvəffəqiyyətlə başa çatıb. “MasterCard” istifadəçilərinin xidmətdən istifadəsi üçün ABB və digər tərəfdaşlar arasında xüsusi texniki inteqrasiya işləri davam etdirilir. Tərəfdaşlarımızın verdiyi məlumata əsasən, texniki inteqrasiya işləri yaxın müddət ərzində tamamlanacaq.

"Google Pay" və "Apple Pay" üzərindən ödənişlə bağlı sınaq mərhələsi tam başa çatdıqdan və texniki inteqrasiya işləri tamamlandıqdan sonra bu barədə ADY sərnişinlərinə geniş məlumat təqdim edəcək.

Azərbaycanda radiotezliklərin ayrılması haqqında qərar "Lisenziyalar və icazələr haqqında" qanunla müəyyən edilmiş hallarla yanaşı, digər hallarda da ləğv ediləcək.

Report xəbər verir ki, bu, “Telekommunikasiya haqqında” qanuna əlavə və dəyişikliklərdə nəzərdə tutulub.

Müvafiq qanun layihəsinə əsasən, həmin hallar aşağıdakılardır:

Telekommunikasiya xidmətlərinin göstərilməsi üçün verilən lisenziya ləğv edildikdə, o cümlədən sellülar (mobil) telekommunikasiya xidmətləri üçün verilən lisenziyanın müddəti bitdikdə;

- O cümlədən radiotezliklərin ayrılması haqqında qərar alındıqdan sonra 1 ay müddətində radiotezlik istifadəçisi müvafiq icra hakimiyyəti orqanının müəyyən etdiyi orqanla (qurumla) radiotezliklərdən istifadəyə dair müqavilə bağlamadıqda

- Radiotezlik istifadəçisi radiotezliklərdən tərəfindən istifadəyə dair bağlanılmış müqavilədə olan öhdəliklər yerinə yetirilmədikdə, o cümlədən tezlik nominalları üçün mövcud tariflərə uyğun 2 il müddətində ödəniş tam aparılmadıqda və ayrılmış radiotezliklər 3 ay müddətində istifadə edilmədikdə.

Radiotezliklərdən istifadəyə dair müqavilənin nümunəvi formasını müvafiq icra hakimiyyəti orqanının müəyyən etdiyi orqan (qurum) müəyyən edir.

Türkiyənin Samsun şəhərində “Samsun İkiztepe Sağlıq Zirvəsi” konfransı keçirilib. Konfrans sağlamlıq turizminin inkişafı və müasir trendlərə həsr edilib.

Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) Turizm və Xidmət üzrə iş Komissiyasının, Azərbaycan Sağlamlıq və Termal Turizmə Dəstək Assosiasiyasının təşkilatçılığı ilə Azərbaycan nümayəndə heyəti konfransda təmsil olunub. Tədbir çərçivəsində Samsunun sağlamlıq turizmi imkanları ilə tanış olmaq, ikitərəfli əlaqələr qurmaq, Azərbaycanın turizmini tanıtdırmaq üçün B2B görüşlər keçirilib.

ASK-dan AZƏRTAC-a bildirilib ki, açılış mərasimində Anadolu Aslanları İş Adamları Dərnəyinin (ASKON) sədri Orxan Aydın Türkiyənin sağlamlıq ilə bağlı turizm potensialının yüksək olduğunu və Qaradəniz bölgəsində Samsunun tibbi mərkəzə çevrildiyini vurğulayıb. Onun sözlərinə görə, hazırda hər 100 dərmandan 68-i yerli istehsaldır. Türkiyənin əczaçılıq sənayesinin inkişafı nəticəsində ölkə ixracda idxalı üstələyib və ixrac 55 faiz ilə önə çıxıb. Eyni zamanda, dünyada tibbi cihazların istehsalı sahəsində Türkiyə üçüncüdür və təqribən 100 milyard TL sağlamlıq turizmindən gəlir əldə edəcək.

Azərbaycan Sahibkarlar Konfederasiyasının Turizm və Xidmət üzrə iş Komissiyasının sədri Ruslan Quliyev Azərbaycan nümayəndə heyəti və Azərbaycan Sahibkarlar Konfederasiyasının prezidenti Məmməd Musayev adından Samsun Bələdiyyə Başkanı Mustafa Dəmirə xatirə plaketini təqdim edib. Mustafa Dəmir öz növbəsində təşəkkürünü bildirib və qardaş Azərbaycan xalqına dərin sevgi və salamlarını çatdırıb. O, xüsusilə Samsun və Sumqayıtın qardaşlaşmış şəhərlər olduğunu vurğulayıb.

Azərbaycan Sağlamlıq və Termal Turizmə Dəstək Assosiasiyasının prezidenti Ruslan Quliyev bildirib ki, Qaradəniz bölgəsinə Azərbaycan böyük bir heyətlə səfər edib. “Əsas məsələ əlaqələrin davamlı olmasını təmin etməkdir”, – deyən R.Quliyev Azərbaycan və Türkiyənin sağlamlıq turizmi sahəsində qarşılıqlı turist cəlb etmək imkanlarının olduğunu vurğulayıb.

Bunun üçün avtobus, dəmiryolu vasitəsilə sərnişindaşımanın işə düşməsi və Samsun-Bakı birbaşa hava reyslərinin açılmasının tibbi turizminin axınına təkan verəcəyini xüsusi qeyd edib.

Bakı Şəhər Mədəniyyət Baş İdarəsinin nəzdindəki Mədəni Tədbirlərin Təşkili və Yaradıcı Gənclərlə İş üzrə Mərkəzin və Mərdəkan Mədəniyyət Sarayının birgə təşkilatçılığı ilə Zəfər bayramına həsr olunmuş “Sən qalibsən, Azərbaycan!” adlı musiqili tədbir keçirilib.

AZƏRTAC xəbər verir ki, əvvəlcə dövlət himni səsləndirilib, Vətən uğrunda həlak olan şəhidlərin əziz ruhu bir dəqiqəlik sükutla yad edilib, Zəfər Gününə həsr olunmuş videoçarx nümayiş olunub.

Tədbirdə qazilər, şəhid anaları, N saylı Hərbi Hissənin əsgər və zabit heyəti, Xəzər rayonunda yerləşən idarə və müəssisələrin əməkdaşları, rayon ictimaiyyəti iştirak ediblər.

Baş İdarənin rəisi İbrahim Əliyev xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-nin respublikamızda Zəfər Günü kimi qeyd edildiyini vurğulayıb.

Sonra tədbir konsert proqramı ilə davam edib. Konsert zamanı Mədəniyyət evinin “Lalələr”, “Mələklər”, “Azad” rəqs qruplarının çıxışları maraqla qarşılanıb. Vətən müharibəsinin qazisi Məbud Əhmədovun, “Zəfər” qrupunun, gənc müğənnilər Vüsal Hacıyev, Rilayə Hüseyinzadənin ifaları konsertə xüsusi rəng qatıb.