XƏBƏRLƏR

“Şuşa İli” elan olunması ilə əlaqədar Azərbaycan İstiqlal Muzeyi tərəfindən həyata keçirilən “Şuşa - Qarabağın dünəni, bu günü, sabahı” adlı layihə çərçivəsində müxtəlif mövzular üzrə təqdimatlar davam edir.

Muzeydən AZƏRTAC-a bildirilib ki, layihənin növbəti təqdimatı mədəniyyət paytaxtımız Şuşanın zərgərlik məmulatlarına həsr olunub.

Şuşa xalqımızın varlığını özündə yaşadan tarixi, mədəniyyət abidələri, o cümlədən sənətkarlıq nümunələri – onun tərkib hissəsi olan zərgərlik məmulatları ilə də zəngindir.

XVIII əsrdən başlayaraq Şuşada daha rəvan inkişaf etmiş sənət sahələrindən biri də zərgərlik olub. XX əsrin əvvəllərində isə bu sənət öz inkişafında ən yüksək zirvəyə çatıb. Yerli zərgərlərin emalatxanalarında hazırlanan zinət əşyaları daima yüksək qiymətləndirilib. Hər bir azərbaycanlı xanım onlara sahib olmağı arzulamış, tacirlər onları Çin, Rusiya bazarlarında uğurla satmışlar. Bu gün türk ənənələrinə uyğun hazırlanmış fantastik zərgərliyə malik həmin məmulatları dünyanın aparıcı muzey ekspozisiyalarının ən hörmətli yerlərində görmək mümkündür.

Qızıl, gümüş, qiymətli daşlardan hazırlanan bəzək əşyaları bir neçə qrupa bölünürdü. Diademalar, alın və gicgah bəzəyən əşyalar, sırğalar və qulaq halqaları, baş zinətlərinə halsedon, yaqut, firuzə, mirvaridən düzəldilən kulonlar və muncuqlar, sikkə və lövhələrdən hazırlanan boyunbağılar boyun- sinə zinətlərinə, müxtəlif şəkilli toqqaları olan qızıl və gümüş kəmərlər isə bel zinətlərinə aid idi.

Noyabrın 4-də “Azərxalça” ASC 8 Noyabr - Zəfər Günü ərəfəsində həyata keçirilən tədbirləri sırasına əlavə olaraq ikinci ən böyük satış və nümayiş qalereyasının açılışını edib.

AZƏRTAC xəbər verir ki, tədbirdə çıxış edən “Azərxalça” İdarə Heyətinin sədri Emin Məmmədov Azərbaycanın çox zəngin irsə sahib olduğunu vurğulayıb. O deyib: “Məqsədimiz qədim adət-ənənələrimizi qorumaq və bununla da gələcək nəslin əcdadlarımızın dəyərli bacarıq və sənətlərindən zövq almasına imkan yaratmaqdır. Bu məkana gələcək qonaqlar xalçaların necə yarandığını əyani görə biləcək, eləcə də bu çətin əl əməyinin pərdəarxası görüntüləri ilə tanış olaraq, xalçatoxuma prosesindən zövq alacaqlar”.

Bundan əlavə, “Azərxalça” ilə əməkdaşlıq çərçivəsində “Four Seasons Hotel Baku”nun foyesinin 8 Noyabr - Zəfər Günü münasibətilə görülən işlər çərçivəsində noyabrın 4-dən 18-dək heyrətamiz mərkəz elementi ilə bəzədiləcəyini vurğulayan E.Məmmədov hər biri dünyaca məşhur 4 növ Qarabağ xalçasından (Çələbi, Malıbəyli, Xətai və Qasımuşağı) hazırlanmış dörd uçan Qarabağ atının instalyasiyasının 30 illik işğaldan azad edilmiş qədim Qarabağ torpaqlarının unikal mədəniyyətinin dirçəlişini simvollaşdırmasından bəhs edib: “Çarpışan Qarabağ atları dünyanın ən qədim və ən qiymətli cinslərindən olub, Azərbaycan xalqının milli irsinin və qürurunun simvolu kimi təqdim edilir”.

“Azərxalça” yaradıcı qrupunun direktoru Əsmər Abdullayeva “Azərxalça”nın Qarabağ lobbisinin instalyasiyasını konseptuallaşdırdığını bildirərək deyib: “İnstalyasiya böyük qələbədən sonra Qarabağın çiçəklənməsi və inkişafının simvolu kimi qaçan atların ifadəsini göstərir. Nümayiş olunan naxışların hər biri ölkəmizin zəngin tarixini əks etdirir. Bəzi naxışlar XVII əsrə aiddir və Səfəvilər sülaləsi dövründə toxunub. Dizaynları butikimizdən əldə etmək mümkün olacaq”, - deyə Ə.Abdullayeva vurğulayıb.

Sonda “Azərxalça” İdarə Heyətinin sədri Emin Məmmədov və hotelin baş meneceri Bob Suri “Four Seasons Hotel Bakı”da təşkil olunan lobbi vitrininin açılışını ediblər.

UNESCO-nun 70 illik Proqramı çərçivəsində qurumun dəyərlərinin təşviqinə töhfə verən incəsənət xadimlərinin, tanınmış şəxsiyyətlərin yubileyi qeyd olunur. Azərbaycanın dahi bəstəkarı Fikrət Əmirov da UNESCO-nun həmrəylik, qarşılıqlı anlaşma kimi dəyərlərinə böyük töhfə verib. Bu gün onun anadan olmasının 100 illiyini qeyd edirik.

Bu fikirləri UNESCO-nun Baş direktorunun xarici əlaqələr və Afrika prioriteti üzrə müavini Firmin Eduard Matoko Azərbaycanın tanınmış bəstəkarı Fikrət Əmirovun anadan olmasının 100 illiyinə həsr edilmiş konsertdən sonra AZƏRTAC-a müsahibəsində ifadə edib.

Firmin Eduard Maotoko gecənin təşkilinə görə Azərbaycan Mədəniyyət Nazirliyinə və təşkilat yanındakı daimi nümayəndəliyinə təşəkkür edərək, belə bir gecənin təşkilindən çox şad olduqlarını bildirib.

“Belə bir gecənin təşkili, həmçinin Azərbaycan ilə UNESCO arasında sıx əməkdaşlığı əks etdirir. Azərbaycanın dahi bəstəkarı Fikrət Əmirov öz musiqisi vasitəsilə UNESCO-nun həmrəylik, qarşılıqlı anlaşma kimi dəyərlərinin təşviqinə töhfə verib.

Musiqi bütün dillər üçün əlçatandır və bədii ifadə baxımından mühüm dəstəkdir. Musiqi universal xarakterə malik mesajdır. Mədəniyyətlərin qarşılıqlı zənginləşməsinə töhfə vermiş görkəmli şəxsiyyətlərin, əsərlərin, eləcə də hadisələrin qeyd olunması beynəlxalq anlaşmaya, xalqlar arasında yaxınlaşmaya və sülhə kömək edir. UNESCO-nun artıq 70 ildir həyata keçirdiyi Proqram vasitəsilə qurumun dəyərlərinin təşviqinə töhfə vermiş və verən incəsənət xadimlərinin, tanınmış vacib şəxsiyyətlərin yubileyi qeyd olunur”, - deyə F. E. Matoko vurğulayıb.

Qeyd edilib ki, bu tədbir mədəni irs, dialoq, mədəniyyət müxtəlifliyi əks etdirir.

"Bakı metrosunun şərti adı "Y 14" olan stansiyasının layihə sənədləri artıq hazırdır, maliyyə və digər məsələlər həll edilsə, onun tikintisinə başlayacağıq".

Report xəbər verir ki, bunu jurnalistlərə açıqlamasında "Bakı Metropoliteni" QSC-nin İstismar üzrə Baş mühəndisi Əlixan Osmanov deyib.

O, həmçinin deyib ki, "Y 15 stansiyasının artıq çalası qazılıb, "Y 16" stansiyasının isə 50 % hissəsində tikinti işləri yekunlaşıb.

"Bakı Metropoliteni"nin gələcək inkişaf sxemində Qırmızı xəttin daha da böyüməsi, Mavi xəttin tikilməsi və digər işlər nəzərdə tutulur. Biz addım-addım bu planla gedirik. Bənövşəyi xəttin artıq 4-cü stansiyasında tikinti davam edir. Yaşıl xəttin davamı olaraq "Xətai" metrostansiyası ilə "Həzi Aslanov" metrostansiyası arasında şərti adı "Y 14", "Y 15", "Y 16" olan stansiyaların tikintisi hazırda getmir. Amma biz Y 15 stansiyasının böyük bir hissəsini tikmişik. Gələn il müəyyən şərtlər daxilində onun tikintisini davam etdirə bilərik. Eyni zamanda bizim "Dərnəgül" stansiyasından "Koroğlu" stansiyasına qədər Yaşıl xətdə də üç stansiyamız nəzərdə tutulub. Onların layihəsini hazırlamışıq. Start veriləndə işlərə başlaya bilərik. Bu stansiyaları tikmək üçün "Bakı Metropoliteni"nin kifayət qədər texniki və zehni potensialı var", - deyə Baş mühəndis qeyd edib.

"B 4" stansiyasında da hazırda qazıntı işləri aparılır. "8 Noyabr" stansiyasından ora qədər tunellər qazılıb. Hazırda tunellərin içində quraşdırma işləri gedir. Gələn ilin sonuna, ən gec halda 2024-cü ilin əvvəlinə "B 4" stansiyasının tikintisini başa çatdıra bilərik", - deyə Ə.Osmanov əlavə edib.

Sabahdan başlayaraq noyabrın 20-nə qədər "Azərbaycan Pərakəndə Geyim İdxalçıları Assosiasiyası" (AFRA) İctimai Birliyinin təşkilatçılığı ilə ölkəmizin paytaxtında “Bakı Alış-Veriş Festivalı” ("Baku Shopping Festival") keçiriləcək.

Report quruma istinadən xəbər verir ki, festival Bakının seçilən Ticarət Mərkəzlərini və mağazalarını əhatə edəcək.

Assosiasiyanın İdarə Heyətinin sədri Fərid Novruzinin sözlərinə görə, festivalın keçirilməsində məqsəd bu sahədə fəaliyyət göstərən sahibkarların fəaliyyətinə dəstək verməklə yanaşı, istehlakçılar üçün brend geyimləri daha sərfəli və əlçatan etməkdən ibarətdir.

“Assosiasiya olaraq bu bizim ilk müştərək işimizdir, əgər festivalın nəticələri gözləntilərimizi doğrultsa, gələcəkdə belə tədbirlərin və festivalda təmsil olunan dünya brendlərinin sayı artırılacaq. Müşayiət olunan turizm axınına dəstək, ölkə iqtisadiyyatının inkişafına tövhə vermək festivalın məqsədlərindəndir”, - deyə o, qeyd edib.

Festivalda 68 dünya geyim brendi iştirak edir. Alıcılara brenddən asılı olaraq 20%-dən 50%-ə qədər endirimlər, eləcə də, xüsusi endirim aksiyaları və endirim kuponları təklif ediləcək.

Zəfər Günü ərəfəsində qürurverici addım Azərbaycanın ən böyük pərakəndə satış şəbəkələrindən biri olan “Kontakt” mağazalar şəbəkəsindən gəldi. Aktiv vətənpərvərlik fəaliyyəti ilə seçilən şəbəkə bu dəfə də “Qarabağ Proqramı”na sadiq qalaraq doğma yurdlarına qayıdan Zəngilan rayonu, Ağalı kənd sakinlərinin sevincinə sevinc qatıb.

Belə ki, “Kontakt” nümayəndələri Ağalı kənd sakinlərinin evlərini ziyarət edib və öz doğma kəndlərinə qayıdan 66 ailənin hər birinə onların təməl ehtiyaclarına uyğun dəyərli məişət əşyaları hədiyyə edib:

“Əgər 2 il əvvələ qədər Qarabağa gəlmək, Qarabağa onun həqiqi sakinlərinin qayıtmağı xəyal kimi görünürdüsə bu gün biz Zəngilanda o xəyalları yaşayırıq. Nə xoş təsadüf ki, məhz bu gün Ağalı kəndinin işğaldan azad olunduğu tarixə təsadüf edir. Bizim şəbəkənin sloqanı “Kontakt sevindirir”dir. Biz getdiyimiz hər yerə sevinc daşımağı özümüzə missiya seçmişik. Ümid edirik ki, Ağalı kəndinin sakinlərinə gətirdiyimiz sovqatlar da onların gündəlik həyatlarını asanlaşdıracaq və həyatlarına sevinc qatacaq.” – bu sözləri “Kontakt”ın İctimaiyyətlə Əlaqələr Şöbəsinin rəhbəri Vəfa Rüstəmova bildirib.

Zəngilan sakinləri də 30 illik böyük həsrətin xoşbəxt sonluğunu fərəh dolu hislərlə ifadə ediblər. Onlar həm Ağalıya qayıtmaqlarını, həm də “Kontakt”ın təqdirəlayiq jestini xoş emosiyalar ilə dilə gətirərək təşəkkürlərini bildiriblər.

Noyabrın 7-də Xətai Sənət Mərkəzində “IWS Azerbaijan” və “IWS Khatai Art Center” tərəfindən “IWS Azerbaijan” akvarel cəmiyyətinin üzvü olan bir sıra rəssamlar tərəfindən Zəfər Günü münasibətilə akvarel vorkşop tədbiri keçiriləcək.

Xətai Sənət Mərkəzindən AZƏRTAC-a bildirilib ki, tədbir Mədəniyyət Nazirliyi, Azərbaycan Rəssamlar İttifaqının və Azərbaycan Dövlət Rəsm Qalereyasının dəstəyi ilə təşkil olunacaq.

Bu tədbirdə rəssamlar akvarel texnikasında öz iş proseslərini nümayiş edəcəklər.

Akvarelist rəssamlar Azərbaycan mövzusunda əsərlər yaradacaq, bu əsərlərdə qalıb və qürurlu vətənimizin gözəl guşələrini və ənənələrini əks etdirəcəklər. Vorkşop rəssamlarımız tərəfindən Vətən uğrunda canlarını fəda etmiş qəhrəman oğul və qızlarımızın xatirəsinə həsr edilib.

İştirakçılar akvarel əsərlərinin yaranma proseslərini izləyərək, rəssamlara suallar verməklə akvarel texnikası ilə yaxından tanış ola biləcəklər.

Azərbaycan Respublikası Prezidentinin İşlər İdarəsinin Prezident Kitabxanasının əməkdaşlarının hazırladıqları “8 noyabr - Zəfər Günü. Qarabağ Azərbaycandır!” adlı elektron nəşr istifadəçilərin ixtiyarlına verilib.

Prezident Kitabxanasından AZƏRTAC-a bildirilib ki, Azərbaycan, ingilis və rus dillərində hazırlanan elektron nəşr 9 bölmədən ibarətdir.

“Şanlı qələbə” adlanan birinci bölmədə qeyd edilir ki, 30 ilə yaxın müddətdə ərazimizin 20 faizini işğal edən Ermənistan xalqımıza qarşı etnik təmizləmə və soyqırımı həyata keçirib. Lakin Azərbaycan dövləti və xalqı heç vaxt işğalla barışmadı və ərazi bütövlüyünü bərpa etmək üçün ciddi hazırlıqlar gördü. 1993-cü ildən bəri icra edilməyən BMT Təhlükəsizlik Şurasının qətnamələrini özü yerinə yetirdi. Azərbaycan Respublikasının Prezidenti, Ali Baş Komandan İlham Əliyevin xalqı bir yumruq kimi birləşdirməsi nəticəsində ərazi bütövlüyümüz bərpa edildi. 100 ildən artıq müddətdə özlərini “qalib” və “məğlubedilməz” sayan ermənilər Azərbaycan əsgəri tərəfindən diz çökdürüldü. Bununla tariximizin yeni mərhələsi başlandı. 44 günlük Vətən müharibəsində Qələbəmiz 3 minə yaxın Azərbaycan əsgər və zabitinin şəhidliyi bahasına başa gəldi. Noyabrın 8-i, Şuşa şəhərinin erməni quldurlarından təmizləndiyi gün Azərbaycan tarixinə qızıl hərflərlə Zəfər Günü kimi yazıldı. Hazırda Azərbaycan son 200 illik tarixinin ən şərəfli günlərini yaşayır. Bu günlərə Prezident, xalq və ordunun birliyi sayəsində nail olmuşuq.

Elektron nəşrin “44 günlük Zəfər Salnaməsi” adlanan ikinci bölməsində 2020-ci il sentyabrın 27-dən başlayaraq 2021-ci il aprelin 12-də Hərbi Qənimətlər Parkının açılışı da daxil olmaqla, Azərbaycanın şanlı Qələbəsini və diplomatik mübarizəsini xroniki ardıcıllıqla özündə əks etdirən rəsmi materiallar və digər əlaqəli mətnlər öz əksini tapır.

“Vətən müharibəsi şəhidləri” adlanan üçüncü bölmədə İkinci Qarabağ müharibəsində şəhid olmuş 2908 nəfər hərbi qulluqçuların, müharibə zamanı itkin düşmüş 6 nəfər hərbi qulluqçuların, həmçinin 2022-ci il sentyabrın 12-dən etibarən Ermənistan silahlı qüvvələrinin törətdiyi genişmiqyaslı təxribatlarının qarşısının alınması zamanı şəhid olan 80 nəfər hərbi qulluqçunun siyahısı ayrı-ayrı alt başlıqlar şəklində təqdim edilir.

“İşğaldan azad edilmiş ərazilər” adlanan bölmənin materialları həm “Rayonlar” üzrə, həm də “Xronologiya” üzrə əks etdirilir.

“Müsahibələr, çıxışlar, müraciətlər” bölməsində Prezident, Müzəffər Ali Baş Komandan İlham Əliyevin Vətən müharibəsi dövründə müraciətlərinin, çıxışlarının və müsahibələrinin mətnləri öz əksini tapır.

44 günlük Vətən müharibəsi dövründə Ermənistan silahlı qüvvələrinin Azərbaycan Respublikasının mülki əhalisini bombalaması nəticəsində yaralanan 404 nəfərin və 93 şəhidin siyahısı ayrı-ayrı rayonlar və şəhərlər üzrə “Mülki əhaliyə qarşı terror” bölməsində təqdim edilir.

“Təltiflər” bölməsinin “Ordenlər və medallar” alt bölməsində Vətən müharibəsində Qələbə münasibətilə Azərbaycan Respublikasının orden və medallarının təsis edilməsi ilə əlaqədar Azərbaycan Respublikasının qanunlarının mətnləri toplanılıb. “Təlltif olunanlar” alt bölməsində isə Silahlı Qüvvələrin hərbi qulluqçularının təltif edilmələri haqqında Azərbaycan Respublikası Prezidentinin sərəncamlarının tam mətnləri istifadəçilərə təqdim edilir.

“Elektron resurslar” bölməsində Vətən müharibəsinə həsr edilən 60 adda kitabın elektron versiyası və 500-ə yaxın seçmə məqalənin tam mətnləri öz əksini tapır.

Elektron nəşrin “Biblioqrafiya” bölməsində Vətən müharibəsi mövzusuna aid Prezident Kitabxanasının fondunda saxlanılan 120 adda kitabın və 11 minə yaxın məqalənin biblioqrafik təsviri verilir.

Eyni zamanda, kitabxanada “Şuşa – Azərbaycanın mədəniyyət paytaxtı” adlı kitab sərgisi və “Şuşa – 270 il” adlı foto-sərgi oxuculara təqdim edilir.

Zəfər Günü münasibətilə M.F.Axundzadə adına Azərbaycan Milli Kitabxanasında “8 Noyabr – Zəfər Günü” adlı virtual sərgi açılıb.

Kitabxanadan AZƏRTAC-a bildirilib ki, sərgidə rəsmi sənədlər, fotolar, mövzu ilə əlaqədar kitablar və dövri mətbuat səhifələrində dərc olunan məqalələr nümayiş olunur.

Virtual sərgi ilə tanış olmaq istəyənlər http://anl.az/el/vsb/Zefer_gunu/index.htm linkindən istifadə edə bilərlər.

Xatırladaq ki, 2020-ci il sentyabrın 27-də Ermənistan silahlı qüvvələrinin növbəti təcavüz aktından sonra Azərbaycan Respublikası BMT-nin Nizamnaməsinin verdiyi özünümüdafiə hüququndan istifadə edərək təcavüzkarı sülhə məcbur etmək, Azərbaycan torpaqlarının işğalına son qoymaq məqsədi ilə əks-hücum əməliyyatına başlayıb.

Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Silahlı Qüvvələri 44 gün davam edən Vətən müharibəsində heyrətamiz qələbələr əldə edərək dünya hərb tarixinə yeni şanlı səhifələr yazıb. İşğalçı qüvvələrə ağır zərbələr endirilib, onların çoxlu sayda canlı qüvvəsi və hərbi texnikası məhv edilib. Ölkəmizin işğal altında olan ərazisinin böyük bir hissəsi, o cümlədən Füzuli, Cəbrayıl, Zəngilan, Qubadlı rayonları, Hadrut və Suqovuşan qəsəbələri, ümumən 300-ə yaxın yaşayış məntəqəsi azad edilib. Vətən müharibəsinin ən şərəfli səhifələrindən biri noyabr ayının 8-də Qarabağın incisi və tacı, Azərbaycan mədəniyyətinin beşiyi olan Şuşanın əsarətdən xilas edildiyi gündür.

Azərbaycan Silahlı Qüvvələri qarşısında duruş gətirə bilməyəcəyini, məhvə məhkum olduğunu anlayan Ermənistan məğlubiyyətini etiraf edib. Azərbaycan Silahlı Qüvvələrinin əldə etdiyi hərbi Zəfər siyasi müstəvidə qazanılan Qələbə ilə tamamlanıb.

8 noyabr Zəfəri Müzəffər Ali Baş Komandanın yenilməz iradəsinin və böyük sərkərdəlik məharətinin, Azərbaycan Silahlı Qüvvələrinin döyüş əzminin, rəşadətinin, yüksək hərbi-texniki, mənəvi-psixoloji hazırlığının və peşəkarlığının təntənəsidir.

Parisdə, UNESCO-nun mənzil-qərargahında Azərbaycanın Mədəniyyət Nazirliyi və UNESCO yanında Daimi Nümayəndəliyinin birgə təşkilatçılığı ilə bəstəkar Fikrət Əmirovun anadan olmasının 100 illiyi təntənəli şəkildə qeyd olunub.

AZƏRTAC xəbər verir ki, UNESCO-nun 2022-2023-cü illər üzrə yubileylər proqramı çərçivəsində dünya şöhrətli Azərbaycan bəstəkarı F.Əmirovun anadan olmasının 100 illiyinə həsr edilmiş konsert keçirilib.

Konsertdən əvvəl UNESCO yanında daimi nümayəndə Elman Abdullayev çıxış edərək, Azərbaycan Mədəniyyət Nazirliyinə və UNESCO rəhbərliyinə 2022-2023-cü illər bienniumu çərçivəsində dahi Azərbaycan bəstəkarı F.Əmirovun anadan olmasının 100 illiyinə həsr edilmiş gecənin təşkilinə verdikləri töhfəyə görə təşəkkürünü bildirib. Azərbaycan xalqının musiqi xadimi, görkəmli və sevimli bəstəkarı F.Əmirovun həyat və yaradıcılığı haqqında məlumat verib. Bildirib ki, Gəncədə anadan olmuş bəstəkarın geniş çeşidli yaradıcılığında simfonik muğamın özünəməxsus yeri var. 2008-ci ildə UNESCO-nun Bəşəriyyətin Qeyri-Maddi İrs üzrə reprezentativ Siyahısına daxil edilmiş Azərbaycan klassik xalq yaradıcılığı musiqisinin əsas janrı olan muğam F.Əmirov yaradıcılığına güclü təsir göstərmişdir. Onun simfonik muğamları dünyanın ən məşhur dirijorlarının rəhbərliyi ilə Avropa ölkələrinin, eləcə də ABŞ-ın ən böyük konsert salonlarında səsləndirilib. Fikrət Əmirovun simfonik muğamları, operaları, baletləri, kamera-instrumental əsərləri, vokal əsərləri, musiqili komediyaları haqqında məlumat verilib.

UNESCO Baş direktorunun xarici əlaqələr və Afrika prioriteti üzrə müavini Firmin Eduard Matoko qurumun baş direktorunun adından tədbir iştirakçılarını salamlayıb. O, ölkəmizlə UNESCO arasındakı əlaqələrə toxunub. Bugünkü tədbirin mədəni irs, dialoq, mədəniyyət müxtəlifliyi ruhunu əks etdirdiyini diqqətə çatdırıb. Qeyd edib ki, 1956-cı ildən UNESCO tarixi hadisələrin və görkəmli şəxsiyyətlərin xatirəsini anmaq məqsədilə üzv dövlətlər və assosiativ üzvlər tərəfindən qeyd olunan anım tədbirlərində iştirak edir.

Mədəniyyətlərin qarşılıqlı zənginləşməsinə töhfə vermiş görkəmli şəxsiyyətlərin, əsərlərin, eləcə də hadisələrin qeyd edilməsi beynəlxalq anlaşmaya, xalqlar arasında yaxınlaşmaya və sülhə kömək edir. F.Əmirov da öz əsərləri ilə UNESCO dəyərlərinin təşviqinə töhfə verib.

Sonra Xalq artisti Fəxrəddin Kərimovun dirijorluğu ilə Üzeyir Hacıbəyli adına Azərbaycan Dövlət Simfonik Orkestrinin müşayiəti ilə Babək Niftəliyev (xanəndə), Səbinə Əsədova (mezzo-soprano), Selcan Nəsibli (soprano), Orxan Cəlilov (tenor) F.Əmirovun əsərlərini ifa ediblər. Həmçinin konsertdə Bakı Musiqi Akademiyasının rektoru, Xalq artisti Fərhad Bədəlbəyli (piano) çıxış edib. Azərbaycan musiqiçilərinin ifaları sürəkli alqışlarla qarşılanıb.

Qeyd edək ki, Parisdə 2021-ci ildə UNESCO-nun 41-ci Baş Konfransı çərçivəsində Azərbaycanın iki tarixi şəxsiyyəti - mesenat H. Z. Tağıyevin (1823-1924) anadan olmasının 200 illiyi və bəstəkar F.Əmirovun (1922-1984) 100 illiyi UNESCO-nun 2022-2023-cü illər üzrə yubileylər proqramına salınmış və bu yubileylərin UNESCO səviyyəsində beynəlxalq miqyasda qeyd edilməsi təsdiq edilmişdir.