XƏBƏRLƏR

Sentyabrın 3-də Beynəlxalq Türk Mədəniyyəti və İrsi Fondunun təşkilatçılığı və “İçərişəhər” Dövlət Tarix-Memarlıq Qoruğu İdarəsi, Bakı Şəhər Mədəniyyət Baş İdarəsi, Bakı Xoreoqrafiya Akademiyasının dəstəyi ilə qədim memarlıq abidələrindən olan Şirvanşahlar sarayında Azərbaycanın dünyaca məşhur şairi və mütəfəkkiri Nizami Gəncəvinin 880 illik yubileyinə həsr edilmiş tədbir keçiriləcək.

AZƏRTAC xəbər verir ki, şairin unikal yaradıcılığını əks etdirən ədəbi-bədii gecə çərçivəsində Fondun himayəsində yaradılan “Dədə Qorqud” Kamera Orkestrının ifasında Azərbaycanın görkəmli bəstəkarları tərəfindən Nizami Gəncəvinin şeirlərinə bəstələnən əsərlər səsləndiriləcək.

Tədbirdə rəsmilərin, Fonda üzv və müşahidəçi ölkələrin, eləcə də Azərbaycanda akkreditə olunan səfirlərin və beynəlxalq təşkilatların nümayəndələrinin, tanınmış mədəniyyət və incəsənət xadimlərinin, eləcə də Türk Şurasının xətti ilə Bakıya və Şuşaya səfər edən bir qrup beynəlxalq media nümayəndələrinin iştirakı nəzərdə tutub.

Mərasim pandemiya şəraitinə uyğun olaraq keçiriləcək.

“Ruh ovçuları: O biri dünya” filminin yeni buraxılış tarixini açıqlanıb.

AZƏRTAC xarici KİV-lərə istinadla xəbər verir ki, Jason Reitmanın rejissorluq etdiyi Amerikanın fantastik komediya filmi "Ghostbusters: Afterlife" (“Ruh ovçuları: O biri dünya”) noyabrın 19-da nümayiş olunacaq. Qeyd edək ki, əvvəlcə filmin nümayişinin noyabrın 11-də keçirilməsi nəzərdə tutulmuşdur.

Xatırladaq ki, “Ruh ovçuları: O biri dünya” filmi bu silsilədən olan 4-cü bölümdür.

Yeni Zelandiyalı kinorejissor Ceyn Kempion Venesiya Kinofestivalında Benedikt Kamberbetç və Kirsten Danstın baş rollarda çəkildiyi “İtin hakimiyyəti” filmini təqdim edib.

AZƏRTAC TASS agentliyinə istinadla xəbər verir ki, “Netflix”lə birgə çəkilən ekran əsəri onlayn platformalarda və kinoteatrlarda yayımlanacaq.

“İtin hakimiyyəti” dramı amerikalı yazıçı Tomas Sevidcin eyniadlı əsəri əsasında yaradılıb.

“Kitabı oxudum və başa düşdüm ki, əsər inanılmazdır. Mən bir neçə romanı axıra qədər oxuya bilmişəm, amma bu kitabdan gözümü çəkə bilmədim. Həftələr sonra, xəyalən kitabda təsvir olunan səhnələrə təkrar-təkrar qayıtdım və daha sonra layihə üzərində düşünməyə başladım”, - deyə Ceyn Kempion bildirib.

Filmin çəkilişləri rejissorun vətəni Yeni Zelandiyada, “Netflix” striminq şirkətinin dəstəyi ilə aparılıb: “Netflix” mənə əvvəllər heç düşünmədiyim bir büdcə üzərində işləmək imkanı verib və buna görə şirkətə minnətdaram. Biz filmi nəinki kinoteatrlarda, eyni zamanda onlayn platformada nümayiş etdirə biləcəyik”.

Avqustun 30-da Şuşada böyük Azərbaycan şairi, dövlət xadimi, Qarabağ xanının vəziri Molla Pənah Vaqifin məqbərəsinin önündə Vaqif Poeziya Günlərinin açılış mərasimi keçirildi. Azərbaycan Prezidenti İlham Əliyevin göstərişi ilə təşkil olunan Vaqif Poeziya Günləri yeni reallığı nümayiş etdirdi, Azərbaycan xalqının mədəniyyətinə, milli kimliyinə sadiqliyini sübuta yetirdi.

Bu fikirləri AZƏRTAC-a açıqlamasında Milli Məclisin deputatı Pərvin Kərimzadə ifadə edib.

Deputat bildirib ki, Molla Pənah Vaqifin məqbərəsinin Şuşada ucaldılması qərarını ulu öndər Heydər Əliyev vermişdir. Ulu Öndərin təşəbbüsü ilə 1982-ci il yanvarın 14-də Şuşada məqbərənin açılışı olmuşdur. Şuşa şəhərinin işğal olunması ilə Vaqifin məqbərəsi dağıdıldı, Vaqif Poeziya Günlərinin keçirilməsi mümkün olmadı. Böyük Qələbəni bizlərə bəxş edən, "Şuşasız Qarabağ, Qarabağsız Azərbaycan yoxdur" deyən ulu öndər Heydər Əliyevin arzusunu yerinə yetirən Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə Azərbaycan Ordusu Şuşanı işğaldan azad etdi. 2020-ci il noyabrın 8-də Prezident İlham Əliyevin Şəhidlər xiyabanında Şuşa şəhərinin işğaldan azad edilməsi xəbərini xalqımıza çatdırdığı gün müstəqil Azərbaycan dövlətinin tarixinin ən şanlı, qürurlu günlərindən oldu. Dövlətimizin başçısının “Əziz Şuşa, sən azadsan” sözləri böyükdən kiçiyə hər kəsin dilinin əzbərinə çevrilib. “Şuşa işğaldan azad olundu" sözləri insanların qulaqlarından hələ də getməyib.

P.Kərimzadə qeyd edib ki, Prezident İlham Əliyevin Şuşanın işğaldan azad olunduğu xəbərini verərkən söylədiyi “Mən xoşbəxt adamam ki, atamın vəsiyyətini yerinə yetirdim” fikri Şuşanın mədəniyyət paytaxtı elan olunması ilə bir daha öz təsdiqini tapdı.

“Şuşasız bizim işimiz yarımçıq olar” söyləyən Prezident İlham Əliyev bu qədim şəhəri mədəniyyətimizin paytaxtı elan etməklə Şuşanın tarixi kimliyini özünə qaytardı. Azərbaycana Qasım bəy Zakir, Xurşidbanu Natəvan, Əbdürrəhim bəy Haqverdiyev, Üzeyir Hacıbəyli, Bülbül, Cabbar Qaryağdıoğlu, Xan Şuşinski, Rəşid Behbudov kimi şəxsiyyətlər bəxş edən şəhərin dəyəri, qiyməti bütün dünyaya bir daha bəyan edildi. Dünyaya Azərbaycanın mədəniyyət paytaxtının öz sahiblərinə qaytarıldıqdan sonra necə möhtəşəm şəkildə dəyişiləcəyi mesajı verildi.

“Şuşanın bərpası yanvarın 14-də başladı və 7 ay ərzində böyük işlər görüldü. İlk növbədə, inkişafın və azad olunmuş torpaqlara həyatın qaytarılmasının rəmzinə çevrilən Zəfər yolu çəkildi. Füzuli şəhərindən tunellər daxil olmaqla, magistral yol inşa edilir, Şuşanın elektrik təsərrüfatı, suyun verilməsi bərpa olundu. Şuşanın tarixi abidələrinin bərpasına start verildi. Üç məsciddə təmir-bərpa işləri gedir. Bu məscidlərin təmirini Heydər Əliyev Fondu öz üzərinə götürmüşdür. Natəvan bulağı bərpa edildi. “Xarıbülbül” hoteli istifadəyə verildi, artıq may-iyun aylarında ilk qonaqlarını qəbul etdi, Üzeyir Hacıbəylinin abidəsi yenidən qoyuldu. Üzeyir Hacıbəylinin dağıdılmış evinin bərpası ilə bağlı göstəriş verildi. “Qarabağ” hoteli əsaslı təmirdən sonra öz qapılarını yenidən qonaqların üzünə açdı”, - deyə deputat əlavə edib.

O, eyni zamanda, vurğulayıb ki, 44 günlük Vətən müharibəsində Ali Baş Komandan İlham Əliyevin rəhbərliyi ilə qəhrəman Azərbaycan Ordusu işğal altındakı torpaqlarımızı azad etdi və ərazi bütövlüyümüz bərpa olundu. Otuz ilə yaxın müddətdə işğal altında olmuş ərazilər dağıdılmış, erməni barbarlığı və vandalizmi ilə üz-üzə qalmışdı. Artıq tarixi ədalət bərpa olunub, işğal altında olan torpaqlar əsl sahibinə qayıdıb. İşğaldan azad olunan ərazilərdə böyük quruculuq layihələri həyata keçirilir. Bu layihələr azad olunan ərazilərin, inzibati, tarixi və mədəni abidələrin bərpası ilə yanaşı, həm də tarixi torpaqlarımızda illərdir keçirilməyən mədəni tədbirlərimizin, ənənələrimizin bərpasını əhatə edir. İşğaldan azad olunan torpaqlarımız hazırda mənən də dirçəlir. Ölkə Başçısının rəhbərliyi ilə regionun mədəniyyət mərkəzinin yenidən dirçəldilməsi, düşmən tərəfindən gülləbaran edilən, uzun illərdir Bakıda İncəsənət Muzeyinin həyətində saxlanılan dahi şəxsiyyətlərimizin – Xurşidbanu Natəvanın, Üzeyir Hacıbəylinin və Bülbülün büstlərinin Şuşaya qaytarılması, Heydər Əliyev Fondunun təşkilatçılığı ilə Xarıbülbül festivalının, Vaqif poeziya günlərinin keçirilməsi, yenə də Heydər Əliyev Fondu tərəfindən Vaqifin məqbərəsinin bərpası tarixi ədalətin bərqərar olmasının daha bir təsdiqi, Qarabağa qayıdışımızın təntənəsi oldu.

Azərbaycan Dövlət Akademik Opera və Balet Teatrının baş dirijoru və musiqi rəhbəri, respublikanın Əməkdar artisti Əyyub Quliyev Almaniyada İmmlinq Opera Sənəti Festivalında iştirak edib.

AZƏRTAC xəbər verir ki, Almaniyanın ən füsunkar bölgələrindən biri olan Bavariyada – Qut İmmlinq şəhərində keçirilən festival hər il Avropa, ABŞ, Latın Amerikası, Çin və Yaponiyadan dəvət olunmuş tanınmış opera müğənniləri, dirijor və rejissorları bir yerə toplayır. 25-ci dəfə keçirilən festival müxtəlif uğurlu və yeni lahiyələri ilə diqqəti cəlb edib – C.Rossininin “Cenerentola” və C.Puççinin “Madam Batterflay” operalarının yeni quruluşu, V.A.Mosartın musiqisinə həsr olunmuş “Mozarts Eskapaden” gecəsi, “Tanqo və trio”, “Çelissimo” instrumental konsertləri ilə bərabər festival çərçivəsində vokal ifaçılarının beynəlxalq müsabiqəsi də baş tutub. Avqust ayının sonuna qədər davam edən festivalın son 3 günü azərbaycanlı dirijor Əyyub Quliyev və Bavariya Festival Orkestrinin çıxışları ilə yadda qalıb. Konsertlərdə Bavariya orkestri ilə bərabər beynəlxalq ifaçılardan ibarət xor və ABŞ, Litva, Danimarka, Rusiya, Çin və Qırğızıstandan dəvət olunmuş istedadlı opera müğənnilərinin yer aldığı konsertlərdə C.Puççinin “Turandot”, “Bohema”, Q.Donisettinin “Sevgi şərbəti”, C.Verdinin “Maqbet”, “Traviata” və “Luiza Miller”, A.Dvorjakın “Rusalka” və A.Tomanın “Hamlet” operalarından nümunələr səsləndirilib. Konsertlərin əsas yaddaqalan hadisələrindən biri Bavariya Festivalı Orkestri tərəfindən səsləndirilən dahi Azərbaycan bəstəkarı Üzeyir Hacıbəylinin “Koroğlu” operasından uvertüranın səslənməsi olub. Müxtəlif ölkələrdən – Almaniya, Avstriya, İtaliya, Rumıniya və Gürcüstandan dəvət olunmuş tanınmış musiqiçilərdən ibarət orkestrin bu ifası alqışlarla qarşılanıb. Azərbaycanlı dirijorla bərabər festivalın bədii rəhbəri Korneliya fon Kersenbrok və Gürcüstanın tanınmış xormeysterləri – Arçil Uşveridze və Mixail Edişeraşvilinin konsertlərdə iştirakı isə gecənin dostluq və birlik simvoluna çevrilməsinə səbəb olub. 3 saata qədər davam edən konsertin sonunda dinləyicilərin xüsusi marağını nəzərə alaraq Əyyub Quliyev və konsertin digər iştirakçıları proqrama əlavə olaraq opera nümunələrini ifa ediblər.

İngiltərənin məşhur “Oasis” rok qrupunun zərbçisi, 50 yaşlı MakKarroll, tvitterdəki bir mesajında ürək tutması keçirdikdən sonra xəstəxanaya girməli olduğunu və hələ də “təhlükədən çıxmadığını” yazıb.

AZƏRTAC vanguardia.com saytına istinadla xəbər verir ki, yüzlərlə izləyici bu xəbərə tez bir zamanda reaksiya verib. Onlar cavablarında 70 milyondan çox albomu satılan, Britaniya pop musiqisinin əsas memarlarından biri sayılan Oasis qrupunun zərbçisi MakKarrolun keçmişi ilə bağlı şəxsi əhvalatlarını paylaşıblar.

“44 yaşım var və hələ də sənin ritmlərini tutmaq üçün əllərimi dizimə vururam. İndi 4 uşağım var onlar da mənim kimidir”, - deyə pərəstişkarlardan biri tvitterdə cavab yazıb. Digəri isə onu “əfsanə” adlandıraraq bildirib ki, “Definitely Maybe” (1994) albomu MakKarrollsuz bu qədər uğur qazanmazdı.

Musiqiçi bu hadisədən sonra tvitter hesabını yeniləyərək vəziyyətinin qənaətbəxş olduğunu bildirib və bütün pərəstişkarlarına mesajlara görə təşəkkür edib.

Yunanıstan bəstəkarı Mikis Teodorakis ömrünün 96-cı ilində vəfat edib.

AZƏRTAC TASS agentliyinə istinadla xəbər verir ki, bu barədə Afina-Makedoniya informasiya agentliyi məlumat verib.

“Yunanıstanın müasir tarixinin böyük bəstəkarı və fədakar döyüşçüsü artıq bizimlə deyil”,- deyə agentlik bildirilib.

Mikis Teodorakis Yunanıstan milli müqavimət hərəkatının üzvü, “Xalqlar arasında sülhü gücləndirdiyinə görə” Beynəlxalq Lenin Mükafatı laureatıdır (1983). Ötən ilin aprel ayında Rusiya Federasiyasının Prezidenti Vladimir Putinin fərmanına əsasən Mikis Teodorakis “Böyük Vətən Müharibəsində Qələbənin 75 illiyi” medalı ilə təltif edilib.

Gənc yazar Anar Şamilin “Üçlü bir həyat” adlı yeni kitabı işıq üzü görüb.

AZƏRTAC xəbər verir ki, roman və hekayələrdən ibarət olan kitabda insan, cəmiyyət, tanrının vəhdəti və fərqliliklərindən irəli gələn yaşamdan bəhs edilir.

Qeyd edək ki, bu kitab müəllifin il ərzində çap edilən ikinci kitabıdır. Belə ki, bu ilin fevral ayında Anar Şamilin Xocalı faciəsi ilə bağlı həmmüəllifi olduğu kitab Türkiyədə çap edilib.

Onu da qeyd edək ki, kitabın satışından əldə edilən gəlir bütövlükdə “YAŞAT” Fondunun hesabına köçürüləcək.

Avqustun 30-dan sentyabrın 4-dək İtaliya Xarici İşlər və Beynəlxalq Əməkdaşlıq Nazirliyi, İtaliya Ticarət Agentliyi (İCE) və İtaliyanın Memarlıq, İncəsənət və Şəhərlərin Bərpası Assosiasiyasının (Assorestauro) birgə təşkilatçılığı ilə İtaliyanın müxtəlif şəhərlərində “Bərpa həftəsi - 2021” çərçivəsində silsilə tədbirlər keçirilir. Sözügedən tədbirlərdə Azərbaycandan Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Azad Cəfərli və “İçərişəhər” Dövlət Tarix-Memarlıq Qoruğu İdarəsinin aparat rəhbəri Read Qasımov iştirak edirlər.

Mədəni İrsin Qorunması, İnkişafı və Bərpası üzrə Dövlət Xidmətindən AZƏRTAC-a bildirilib ki, tədbirə Azərbaycanla yanaşı, Albaniya, Livan, Kuba, Səudiyyə Ərəbistanı Krallığı və İsraildən olan nümayəndə heyətləri də qatılıb.

“Bərpa həftəsi - 2021” çərçivəsində Bari şəhərinin Fiera del Levante sərgi kompleksində keçirilmiş tədbirinin açılış mərasimində Bari şəhər rəhbərliyi, Xarici İşlər və Beynəlxalq Əməkdaşlıq Nazirliyinin, Assorestauronun, Bari Vilayətinin memarlar, landşaft dizaynerləri və bərpaçılar Assosiasiyasının, Fiera del Levante Sərgisinin, Ferrara Sərgi Konqresinin rəhbər şəxsləri çıxış ediblər.

Sentyabrın 2-də “Bərpa həftəsi - 2021 çərçivəsində Azərbaycanla bağlı ölkə təqdimatı təşkil olunub. Açılış nitqi ilə Azərbaycanın İtaliyadakı səfiri Məmməd Əhmədzadə, İtaliya Ticarət Agentliyinin Sənaye Tərəfdaşlığı və Beynəlxalq Qurumlarla Əlaqələr Departamentinin müdiri Roberto Lovato və Assosrestauronun texniki direktoru Andrea Qriletto çıxış edərək Azərbaycan-İtaliya strateji tərəfdaşlığı, müxtəlif sahələrdə mövcud olan yüksək səviyyəli əlaqələrdən və qarşılıqlı faydalı mübadilələrdən, mədəniyyət abidələrinin qorunması və bərpası sahəsində əməkdaşlıq imkanları, o cümlədən Azərbaycanın işğaldan azad olunmuş ərazilərinin yenidən qurulması və bərpası çərçivəsindəki imkanlardan danışıblar.

Tədbirdə Dövlət Xidmətinin rəisi Azad Cəfərli Azərbaycan Respublikasının işğaldan azad olunmuş ərazilərinə “Böyük qayıdış” və mədəni irsin bərpasına yönəlmiş davamlı proses haqqında geniş təqdimatla çıxış edib. Ermənistan Respublikası tərəfindən 30 il ərzində işğal altında saxlanılan ərazilərimizdə tarix və mədəniyyət abidələrinin dağıdılmasına, mənimsənilməsinə və vandalizmə məruz qalmasına, qeyri-qanuni arxeoloji qazıntıların aparılmasına dair ətraflı məlumatlar və fotofaktlar təqdim edib, mədəni irsimizə qarşı törədilmiş vəhşilikləri nümayiş olunub. Həmçinin Azərbaycan tərəfindən bərpa prosesinə başlanıldığı, çoxsaylı minalardan təmizləmə fəaliyyətinin davam etdiyi diqqətə çatdırılıb. Vurğulayıb ki, post-konflikt dövründə davamlı sülhün və rifahın tam bərqərar olması məqsədilə infrastruktur və şəhərsalma layihələri həyata keçirilir. Bunun məntiqi davamı olaraq Azərbaycan tərəfindən BMT-nin Sivilizasiyalar Alyansı ilə birlikdə “Mədəniyyət naminə sülh” kampaniyasına bağlanıldığı qeyd olunub. Təqdimatda abidələrin dağıdılmasının miqyası barədə statistik məlumat, Ağdam şəhərinin və azad olunmuş digər ərazilərimizin acınacaqlı durumu diqqətə çatdırılıb.

Dövlət Xidmətinin rəsmisi qeyd edib ki, Azərbaycan tərəfi bərpa prosesi çərçivəsində qarşılıqlı faydalı təkliflərə açıqdır və bu istiqamətdə İtaliyadan olan tərəfdaşların və şirkətlərin bu prosesə töhfə verməsini müsbət qiymətləndirir.

Daha sonra “İçərişəhər” Dövlət Tarix-Memarlıq Qoruğu İdarəsinin aparat rəhbəri Read Qasımov İçərişəhərdə aparılan bərpa işləri haqqında, gələcəkdə açılması nəzərdə tutulan unikal muzey layihəsinə dair məlumat vermişdir.

Tədbir çərçivəsində təşkil olunan Beynəlxalq Bərpa Sərgisi də öz işini davam etdirməkdədir. Sərgi çərçivəsində Azərbaycan nümayəndə heyəti İCE, Assorestauro, İtaliya Milli Tədqiqat Şurasının (CNR), habelə İBİX (abidələrin təmizlənməsi), ENEL X (memarlıq işıqlandırılması), CORES4N (abidələrin interyerinin bərpası üzrə) kimi İtaliyanın tikinti və bərpa sahələrində çalışan qabaqcıl şirkətlərinin nümayəndələri ilə görüşlər keçirib.

Azərbaycan nümayəndə heyəti “Bərpa həftəsi - 2021” çərçivəsində 3 sentyabr tarixində Matera şəhərində keçiriləcək tədbirlərdə iştirak edəcək.

Xarkov şəhərində Ukraynanın Xalq rəssamı, azərbaycanlı heykəltəraş Seyfəddin Qurbanovun “Siçovul” abidəsinin açılış mərasimi keçirilib.

AZƏRTAC xəbər verir ki, Xarkov Əczaçılıq Universitetinin 100 illiyi münasibətilə ali təhsil ocağının ərazisində yerləşən “Siçovul” abidəsi Ukraynada ilk dəfədir ucaldılır.

Açılış mərasimində çıxış edən Seyfəddin Qurbanov bildirib ki, dünyanın bir çox ölkələrində, o cümlədən ABŞ, Rusiya, Avropa dövlətlərində “Siçovul” abidəsi ucaldılıb. Ukraynada belə bir abidənin məhz Xarkovda ucaldılması şəhər sakinləri və turistlər üçün maraq doğuracaq. Onun sözlərinə görə, heykəl kompozisiyasının mənası odur ki, dünya tibbi siçovullar üzərində aparılan elmi eksperimentlər üzərində inkişaf edib. İnsanları xəstəlikdən, ölümdən qurtaran dərmanlar yaradılıb. Ona görə də heykəl kompozisiyasında “Siçovul” və kitablar, dərman əksini tapıb.

Tədbirdə çıxış edən universitetin rektoru Alla Kotvitskaya, Qazaxıstanın Xarkovdakı Fəxri konsulu, Xarkov Diplomatik Klubun prezidenti Emin Nəcəfli heykəl kompozisiyasının əhəmiyyətindən danışıblar.

Qeyd edək ki, heykəl kompozisiyasının hündürlüyü 3,5 metrdir və tuncdan hazırlanıb. Seyfəddin Qurbanov Xarkovda 60 heykəl kompozisiyası və memorial lövhənin müəllifidir.