XƏBƏRLƏR

Qırğızıstanın müstəqilliyinin 30 illiyi ilə əlaqədar Bişkek şəhərində Müstəqil Dövlətlər Birliyinin gənclərdən ibarət simfonik orkestrinin iki günlük konserti keçirilib.

AZƏRTAC xəbər verir ki, Abdılas Moldıbayev adına Akademik Opera və Balet teatrında keçirilən konsertdə Qırğızıstanın mədəniyyət, informasiya, idman və gənclər siyasəti naziri Kayrat İmanaliyev, Rusiya Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy, Azərbaycanın Rusiyadakı səfiri Polad Bülbüloğlu, MDB Dövlətlərarası Humanitar Əməkdaşlıq Fondun (DHƏF) icraçı direktoru Anatoli İksanov, ölkəmizin Qırğızıstandakı səfiri Hidayət Orucov və digər rəsmi şəxslər də iştirak ediblər.

Bildirilib ki, Qırğızıstan və DHƏF-in birgə təşkilatçılığı ilə keçirilən konsertin məqsədi MDB ölkələri arasında mədəniyyətlərarası dialoqun inkişaf etdirilməsi, istedadlı gənclərin üzə çıxarılması və cəmiyyətdə tanınmasıdır.

Konsertə Rusiya Federasiyasının Xalq artisti Sergey Skripkanın rəhbərliyi ilə MDB ölkələri və Gürcüstanın istedadlı musiqiçiləri də qatılıb.

Konsertdə Polad Bülbüloğlunun ifaları alqışlarla qarşılanıb. Sonda qonaqlara qırğız milli geyimi hədiyyə olunub.

Xatırladırıq ki, bir gün əvvəl Qırğızıstan Prezidenti Sadır Japarov Mixail Şvıdkoya “Danaker”, Polad Bülbüloğluna “Dostluq” ordeni təqdim edib.

Uzun illərdən sonra işğaldan azad edilmiş Şuşa şəhərimizdə böyük Azərbaycan şairi, dövlət xadimi, Qarabağ xanının vəziri Molla Pənah Vaqifin məqbərəsinin önündə Vaqif Poeziya Günləri keçirildi. Poeziya Günlərinin açılışında Prezident İlham Əliyev və birinci xanım Mehriban Əliyeva iştirak etdilər. Bu tarixi tədbir mədəni irsimizə və milli təfəkkürümüzə ehtiramın təzahürü olmaqla yanaşı, həm də ölkəmizin həyatında əlamətdar hadisə idi.

Bunu AZƏRTAC-a açıqlamasında Milli Məclisin deputatı Jalə Əhmədova bildirib.

Deputat deyib: “Xatırlatmaq yerinə düşər ki, təməli 1752-ci ildə Pənahəli xan tərəfindən qoyulmuş Şuşa şəhəri tarixin bir çox keşməkeşli hadisələrinin şahidi olub. Gələn il biz Şuşanın 270-ci ildönümünü təntənəli şəkildə qeyd edəcəyik. 30 ilə yaxın Ermənistanın işğalına məruz qalmasına baxmayaraq, doğma şəhərimiz Şuşa hətta dağılmış vəziyyətdə, vandalizmə məruz qalmış şəkildə də öz ruhunu, öz qamətini saxlaya bildi, əyilmədi, sınmadı, bizi gözlədi”.

Jalə Əhmədova qeyd edib ki, Molla Pənah Vaqifin məqbərəsinin Şuşada ucaldılması ulu öndər Heydər Əliyevin təşəbbüsü ilə həyata keçirilib və 1982-ci il yanvarın 14-də qarlı, şaxtalı havada bu məqbərənin açılışı olub. Ulu Öndərin uzaqgörən siyasətinin təzahürü olan bu məqbərənin ucaldılması sıradan bir hadisə deyildi və həm də siyasi məqsəd daşıyırdı. Çünki bu hadisə o vaxt ermənilərin Dağlıq Qarabağ Muxtar Vilayətinin bir hissəsi olan Şuşaya olan əsassız iddialarının qarşısının alınması üçün mühüm əhəmiyyət kəsb etdi. O dövrdə belə bir məqbərənin ucaldılması həm də ona görə çətin idi ki, Molla Pənah Vaqif təkcə şair yox, eyni zamanda, Qarabağ xanının vəziri olmuşdu. Sovet dövründə isə ideologiya belə idi ki, xanlıqlar tarixin qara ləkəsi kimi qələmə verilirdi. Bütün bunlara baxmayaraq, Ulu Öndərin iradəsi və qətiyyəti nəticəsində bu məqbərə ucaldıldı və bir daha Şuşanın Azərbaycan şəhəri kimi təsdiqi öz yerini tapdı.

Deputat bildirib ki, Ermənistanın 30 ilə yaxın işğalı dövründə erməni vandalizmi nəticəsində məqbərə dağıdılmışdı. Şuşa işğaldan azad olunduqdan sonra isə məqbərənin bərpasını Heydər Əliyev Fondu öz üzərinə götürdü. Vaqif Poeziya Günləri bərpa edildi, “Xarıbülbül” festivalı bərpa edildi. Artıq Şuşa şəhəri tədricən Azərbaycanın mədəniyyət paytaxtı kimi əvvəlki funksiyalarını yerinə yetirməyə başlayır.

“Şuşanın bərpasına başladığımız bu il yanvarın 14-dən keçən qısa müddət ərzində böyük işlər görülüb. Yeni çəkilmiş Zəfər yolu artıq azad olunmuş torpaqlarımızın canlandırılmasının simvoludur. Bundan başqa, Füzuli şəhərindən tunellər daxil olmaqla, magistral yol tikilir, bu daha qısa yol olacaq. Ötən qısa müddətdə Şuşanın elektrik təsərrüfatı bərpa edildi, suyun verilməsi bərpa olundu. Üç məsciddə təmir-bərpa işləri davam edir. Natəvan bulağı bərpa edildi, “Xarıbülbül”, “Qarabağ” otelləri istifadəyə verildi.

Ermənilər tərəfindən gülləbaran edilmiş dahi şəxsiyyətlərimizin – Natəvanın, Üzeyir Hacıbəylinin, Bülbülün büstləri gətirilərək mərkəzi meydanda qoyuldu. Vaqifin məqbərəsi, Vaqifin büstü yenidən açıldı, Üzeyir Hacıbəylinin abidəsi yenidən qoyuldu. Üzeyir Hacıbəylinin dağıdılmış evinin bərpası ilə bağlı göstəriş verildi.

Bundan başqa, Şuşada yeni beşulduzlu otel inşa olunacaq. Orada 150 otaq olacaq. Hazırda Şuşada “Qarabağ” və “Xarıbülbül” otellərində 150 otaq mövcuddur. Bununla yanaşı, böyük konfrans zalı və tədbirlər üçün yerlər olacaqdır. Ermənilərin “Dağlıq Qarabağ Respublikası”nın qondarma parlamenti üçün bina inşa etmək istədiyi yerdə isə beşulduzlu otel inşa olunacaqdır. Yeni yaşayış kompleksinin təməlinin qoyulması isə tezliklə Şuşada həyatın tam axarına qayıtmasına öz töhfəsini verəcəkdir.

Bütün bunlar deməyə əsas verir ki, atılan bütün zəruri addımlar nəticəsində Şuşamızda həyat tezliklə öz normal axarına qayıdacaq və Prezident İlham Əliyevin rəhbərliyi ilə bundan sonra da Azərbaycanın Mədəniyyət Paytaxtı statusunu qoruyub saxlayacaqdır”, - deyə deputat vurğulayıb.

Sentyabrın 10-da “Moskva Kitab Evi”ndə “Müasir kitab yayımı. Rusiyanın və MDB ölkələrinin kitab ticarəti müəssisələrinin təcrübəsi” mövzusunda dəyirmi masa keçiriləcək.

AZƏRTAC xəbər verir ki, dəyirmi masa iştirakçıları hazırkı dövrdə kitab ticarətinin vəziyyəti ilə bağlı aktual məsələləri müzakirə edəcəklər.

Tədbirdə Azərbaycanı Bakı Kitab Mərkəzinin direktoru Günel Rzayeva təmsil edəcək.

Müzakirələr başa çatandan sonra 2020-ci ilin yekunlarına əsasən keçirilmiş müsabiqədə qalib gəlmiş kitab ticarəti müəssisələri və kitab mağazaları MDB İcraiyyə Komitəsinin fərmanları ilə təltif ediləcək.

44 gün davam edən Vətən müharibəsi bitdikdən sonra yanvar ayının 14-dən Şuşada təmir-bərpa işlərinə başlanılıb, artıq şəhərin baş planı təsdiq olunub və bütün işlər operativ olaraq həyata keçirilir. 2021-ci ilin yanvar ayında Azərbaycan Prezidentinin ilk səfərini regionun mədəniyyət mərkəzi hesab olunan Şuşaya etməsi mədəniyyət tariximizin inkişafına göstərilən böyük diqqət və qayğının göstəricisidir.

Bunu AZƏRTAC-a açıqlamasında Milli Məclisin deputatı Məzahir Əfəndiyev söyləyib.

O deyib: “17 məscid, 6 karvansara, 3 türbə, 2 mədrəsə, bir neçə kilsə və monastr, 2 qəsr və 72 mühüm sənət və tarixi abidələrdən ibarət bütün məkan adları azərbaycanlıların adı ilə bağlı, əhalisi yarandığı dövrdən etibarən ancaq azərbaycanlılardan ibarət olan və dövlətimizin böyük səyi nəticəsində 24 oktyabr 2001-ci ildə UNESCO -nun Təcili Qorunmaya Ehtiyacı olan Maddi-Mədəni İrsin İlkin siyahısına daxil edilmiş tarixi-memarlıq qoruğuna sahib olan Şuşa şəhəri təsadüfi deyil ki, Prezident İlham Əliyevin 2021-ci il 7 may tarixli Sərəncamına əsasən bu gün öz dirçəlişinə Azərbaycanın mədəniyyət paytaxtı kimi başlayıb”.

Deputat qeyd edib ki, bu ilin 12-13 may tarixlərində “Xarıbülbül” Beynəlxalq Musiqi Festivalının uzun müddətdən sonra yenidən keçirilməsi, Prezident İlham Əliyev və Mehriban xanım Əliyevanın Şuşaya son səfərlərində Molla Pənah Vaqifin muzey-məqbərə kompleksinin yenidənqurma işlərindən sonra açılışı ilə yanaşı, Vaqif Poeziya Günlərinin bərpa olunması və “Qarabağ Azərbaycanın mədəniyyətinin incisidir”, “Yenidən doğma diyarda. Qarabağın sənət inciləri” sərgilərinin keçirilməsi Azərbaycanın mədəniyyət tarixinə göstərilmiş böyük ehtiramın bariz nümunəsidir və yeni nəsil azərbaycanlılar üçün iftixar hissidir.

“Bu səfərdə inşa ediləcək yeni obyektlərin təməllərinin qoyulması, habelə Şuşanın abadlaşdırılmasının sürətlə davam etdirilməsi artıq 30 ildir ki, didərgin düşmüş sakinlərin doğma şəhərinə tezliklə qayıtmasını təmin edəcək, eyni zamanda, Şuşanın ölkəmizin mədəniyyət paytaxtı, həmçinin UNESCO-nun Təcili Qorunmaya Ehtiyacı olan Maddi-Mədəni İrsin İlkin siyahısına daxil edilmiş tarixi-memarlıq qoruğuna sahib olaraq burada daha böyük qlobal tədbirlərin keçirilməsinə şərait yaradacaq.

Xüsusi qeyd olunmalıdır ki, Azərbaycanda keçirilən mədəniyyətlərarası forumlar, UNESCO ilə mədəni əməkdaşlıq, beynəlxalq konvensiyaların ölkəmizdə icrası, milli mədəniyyətimizin dünyaya tanıdılmasında göstərilən səylər əsrlərdən bəri dünyanın mədəni irsinə öz miraslarını vermiş multikultural Azərbaycan xalqının bu gün də mədəni diplomatiyaya verdiyi dəyərin göstəricisidir. Bu gün doğma Qarabağımızda, Şuşada bu irsin qorunub saxlanılması tək Azərbaycanın deyil, UNESCO və üzv dövlətlərin də öhdəliyidir.

Məzahir Əfəndiyev bildirib ki, bu günlərdə Azərbaycan Prezidenti BMT-nin ölkəmizdə təyin olunmuş yeni rezident əlaqələndiricisini qəbul edərkən UNESCO-nun ölkəyə dəvətli olduğunu bildirdi. UNESCO beynəlxalq təşkilat olaraq üzərinə götürdüyü vəzifələri yerinə yetirərkən, eyni zamanda, Azərbaycanın UNESCO vasitəsi ilə dünya mədəni irsinin nümunələrinin qorunmasında göstərdiyi fəallığa ən azından diqqətlə yanaşmalıdır.

Azərbaycanda tarixən mövcud olmuş və bu gün də dövlət siyasətinin əsas istiqamətlərindən biri olan multikultural və tolerant cəmiyyət anlayışı inkişaf etdirilir. İşğaldan azad edilmiş ərazilərdə çoxsaylı müsəlman icması ilə yanaşı, digər dinlərə məxsus abidələr, ibadət yerləri mənşəyindən asılı olmayaraq Azərbaycan dövləti tərəfindən mühafizə olunur, təmir və bərpa edilir. Bu isə öz növbəsində UNESCO-nun ona üzv dövlətlərin qarşısında səsləndirdiyi təlimatlardandır və bu iş Azərbaycanın işğaldan azad olunmuş ərazilərində də şamil olunmalıdır.

Hələ 2005-ci ilin oktyabrında UNESCO-nun 60 illiyinə həsr edilmiş “Sivilizasiyalararası dialoq” həftəsi çərçivəsində Parisdə keçirilmiş “Azərbaycan: mədəniyyətlərin və sivilizasiyaların qovşağında” adlı tədbirdə çıxış edən Heydər Əliyev Fondunun prezidenti, UNESCO-nun və ICESCO-nun xoşməramlı səfiri Mehriban xanım Əliyeva Şərqlə Qərbin qovuşduğu bir məkan olaraq Azərbaycanın qlobal mədəni dialoqa öz töhfəsini verməyə hazır olduğunu vurğulamışdır.

“Əldə olunan uğurlara və illərdir aparılan qarşılıqlı əməkdaşlığa baxmayaraq, əfsuslar olsun ki, bu dəfə azad edilmiş ərazilərində tarixi, mədəni, dini irsin qorunması və saxlanması üzrə beynəlxalq öhdəliyinə sadiq qalan Azərbaycan Respublikası islamofob və ikili standartlarla qarşı-qarşıya qaldı.

Azərbaycan işğaldan azad olunmuş ərazilərdə törədilən dağıntıların müvafiq şəkildə sənədləşdirilməsi üçün bu ərazilərə müstəqil və hərtərəfli beynəlxalq missiyanın göndərilməsində ən maraqlı tərəf olaraq UNESCO ilə konstruktiv dialoqlar aparmışdır. Əsas missiyası mədəni dəyərlərlə bağlı məsələlərə öz münasibətini bildirmək və bəşər svilizasiyasına aid olan abidələrin qorunmasında iştirak etmək olan UNESCO nəinki erməni vandalizminin dünyaya çatdırılmasında aktiv rol oynamış, həmçinin ölkəmiz tərəfindən göndərilən dəvətlərdən yayınmışdır.

Bu ayrı-seçkilik və UNESCO tərəfindən göstərilən iradəsizlik isə BMT-nin dünyada olan nüfuzuna xələl gətirməklə yanaşı, 1993-cü ildən etibarən ikitərəfli əməkdaşlıq üzrə inkişaf edən UNESCO və Azərbaycan münasibətlərində mənfi təsirsiz ötüşməyəcək”, - deyə deputat vurğulayıb.

Sentyabrın 1-də Azərbaycan Kinematoqrafçılar İttifaqında Bakıda keçiriləcək IV “Animafilm” Beynəlxalq Animasiya Festivalı ilə əlaqədar mətbuat konfransı təşkil olunub.

AZƏRTAC xəbər verir ki, mətbuat konfransında çıxış edən festivalın direktoru Rəşid Ağamalıyev sentyabrın 3-7-də keçiriləcək “Animafilm”də uşaqlar və böyüklər üçün çəkilmiş yerli və xarici animasiya filmlərinin nümayiş etdiriləcəyini bildirib. Qeyd edib ki, builki festivalın mövzusu “Əlillik” olacaq.

Festival çərçivəsində keçiriləcək müsabiqədə 40 ölkədən 134 əsər iştirak edəcək. Müsabiqədə iştirakçılar 12 yerli və xarici kateqoriya üzrə mükafat uğrunda mübarizə aparacaqlar. Eyni zamanda, festivalda müsabiqədənkənar proqramlar da nəzərdə tutulub. Festivalda iştirak ödənişlidir, əldə olunan gəlir fiziki məhdudiyyətli uşaqların ehtiyacları üçün sərf ediləcək.

Təqdim olunan filmlər orijinal dildə, bəzi filmlər isə Azərbaycan və ingilis dillərində alt yazılarla Azərbaycan Kinematoqrafçılar İttifaqında və “Salaam Cinema”da nümayiş etdiriləcək.

Digər çıxış edənlər də animasiya festivalının əhəmiyyətindən danışıblar. Məlumat verilib ki, builki festivalda “Ən yaxşı Azərbaycan qısametrajlı animasiya filmi”, “Qısametrajlı animasiya filmi üçün ən yaxşı Azərbaycan ssenarisi”, eyni zamanda, beynəlxalq müsabiqədə iştirak etmək üçün “Ən yaxşı tammetrajlı animasiya filmi - Grand Prix”, “Ən yaxşı qısametrajlı animasiya filmi - Grand Prix”, “Qısametrajlı animasiya filmi üçün ən yaxşı ssenari - Grand Prix” və digər kateqoriyalar üzrə qaliblər seçiləcək.

Müsabiqədə uşaqlar münsiflər heyətində təmsil olunur. Festivalda, eləcə də “Ən yaxşı Azərbaycan qısametrajlı animasiya film” kateqoriyası üzrə mükafat da təqdim ediləcək. Mükafatın qalibi 2022-ci ildə Fransada keçiriləcək “Annecy” festivalına səyahət və “MIFA” adlı peşəkar akkreditasiya əldə edəcək.

Festivalın təşkilatçıları göstərdikləri dəstəyə görə Mədəniyyət Nazirliyinə, Azərbaycan Kinematoqrafçılar İttifaqına, “YARAT” Müasir İncəsənət Mərkəzinə, Kreativ Azərbaycan portalına, Fransanın və Çexiyanın ölkəmizdəki səfirliklərinə və digər təşkilatlara minnətdarlıqlarını çatdırıblar. Festivalın pandemiya şəraiti nəzərə alınaraq Nazirlər Kabineti yanında Operativ Qərargahın qərarları əsasında təşkil olunması planlaşdırılır.

Konfransın sonunda autizim xəstəliyindən əziyyət çəkən gəncin həyat və sevgisindən bəhs edən animasiya filmi nümayiş olunub.

Lido adasında Beynəlxalq Venesiya Kinofestivalının 78-ci açılış mərasimi keçirilib.

AZƏRTAC TASS agentliyinə istinadla xəbər verir ki, açılış mərasimində italiyalı rejissor və aktyor Roberto Benini dünya kinematoqrafiyasına verdiyi töhfəyə görə “Müqəddəs Markın qızıl şiri” mükafatı ilə təltif olunub.

Gecədə Benininin ifa etdiyi səhnələrdən ibarət videoçarx nümayiş olunub, qonaqlar aktyoru alqışlarla qarşılayıb. “Mən emosiya, minnətdarlıq və sevgi hissləri ilə əhatə olunmuşam. Rejissorlar məni öz filmlərinə dəvət edib və bu filmlər ictimaiyyət tərəfindən rəğbətlə qarşılanıb”, - deyə aktyor bildirib.

Roberto Benini peşəkar karyerası boyu 30-dan çox filmdə rol alıb. Çəkildiyi filmlər sırasında Bernardo Bertoluçinin “Ay”, Cim Carmuşun “Kofe və siqaret” və “Qanundan kənar” ekran əsərlərinin adlarını çəkmək olar.

“YARAT” Müasir İncəsənət Məkanının təşkilatçılığı ilə Azərbaycan Rəngkarlıq Muzeyində açılan sərgilər yay rejimində fəaliyyətini davam etdirir.

“YARAT”dan AZƏRTAC-a bildirilib ki, sərgi ilə tanış olmaq istəyənlər çərşənbə axşamı və bazar günü olmaqla saat 12:00 –dan 20:00-dək bələdçi ilə sərgiyə baxış keçirə bilərlər. Eyni zamanda saat 21:00 – dan 22:00-dək sərgiyə sərbəst (bələdçisiz) baxmaq mümkündür.

Qeyd edək ki, hazırda muzeydə rəssam Rəşad Ələkbərovun "Özünsən!" solo sərgisi və "XX əsrin son çiçəkləri: Y nəsli" qrup sərgisi, eləcə də "Öz adanı kəşf et" adlı sərgi ziyarətçilər üçün açıqdır.

“YARAT” Film Klubu Rusiya İnformasiya və Mədəniyyət Mərkəzinin əməkdaşlığı ilə Rusiya kinorejissorlarının "Səmadan dərhal döyüşə" və "Afrika" adlı tammetrajlı filmlərini təqdim edəcək.

AZƏRTAC xəbər verir ki, bu filmlər “YARAT”da açılan cari sərginin konsepsiyasına uyğun olaraq müxtəlif nəsillər arasında fərqliliyi təcəssüm edir.

Bu gün saat 19:00-da nümayiş ediləcək "Səmadan dərhal döyüşə" filmi İkinci Dünya müharibəsi və Qış müharibələri zamanı hava-desant qoşunlarının komandanı, ordu generalı, Sovet İttifaqı Qəhrəmanı Vasili Margelovun taleyindən bəhs edir. Film, desantçılar arasında kulta çevrilmiş "Batya" adlı seriala istinadən çəkilib.

Sentyabrın 3-də saat 16:00-da göstəriləcək “Afrika” adlı filimdə isə hadisələr 1943-cü ilin qışında, Leninqradın ağır blokadası vaxtında cərəyan edir. Yemək axtarışı zamanı can verən hərbi iti tapan kənd uşağı Yeqorka çətin seçim qarşısındadır – ailəsini, yoxsa iti xilas etsin...

Filmlərin nümayişində iştirak etmək istəyənlər qeydiyyatdan keçməlidirlər.

Nizami Gəncəvinin 880 illiyinə həsr edilmiş 12 bölümdən ibarət “Xosrov və Şirin” bədii teleserialının çəkilişləri artıq başa çatıb.

“Azərbaycanfilm” Kinostudiyasından AZƏRTAC-a bildirilib ki, “Xosrov və Şirin” serialında poemadakı hadisələrin kompozisiyası və süjeti saxlanılmaqla müasir dövrümüzə proyeksiya olunub.

Çəkilişləri Bakı şəhərinin Mərdəkan, Şüvəlan və Maştağa qəsəbələrində və Qobustan rayonunda aparılan serialın rejissorları Xəyyam Abdullazadə və Elməddin Alıyev, ssenari müəllifləri isə İlqar Fəhmi və Xəyyam Abdullzadədir. Xosrov obrazını Rüstəm Cəbrayılov, Şirin obrazını Kəmalə Piriyeva, Fərhadı isə Bəhruz Vaqifoğlu canlandırır.

Layihə Azərbaycan Respublikası Mədəniyyət Nazirliyinin dəstəyi ilə “Azərbaycanfilm” Kinostudiyası və İctimai Televiziya və Radio Yayımları Şirkətinin birgə istehsalıdır.

Sentyabrın 1-də paytaxtın Binəqədi rayonunda Vətən müharibəsinin şəhid mədəniyyət işçisi Zamin Vahid oğlu Rəhimovun adına xatirə abidə bulaq kompleksinin açılışı keçirildi. Mərasimdə Milli Məclisin deputatı Ceyhun Məmmədov, Cəbrayıl Rayon İcra Hakimiyyəti başçısının birinci müavini Arif Fərzəliyev, Biləsuvar Regional Mədəniyyət İdarəsinin rəisi Əlisultan Sadıxov, Qarabağ Müharibəsi Əlilləri, Veteranları və Şəhid Ailələri İctimai Birliyi Cəbrayıl rayon filialının sədri Səbuhi Hüseynov, Biləsuvar Regional Mədəniyyət İdarəsinin tabeliyində fəaliyyət göstərən Cəbrayıl rayonu Mahmudlu kənd Uşaq musiqi məktəbinin kollektivi, rayon ictimaiyyəti və şəhidin ailə üzvləri iştirak edirdilər. Azərbaycan Respublikasının Dövlət Himni səsləndirildikdən sonra Cəbrayıl Rayon İcra Hakimiyyəti başçısının birinci müavini Arif Fərzəliyev mərasimi açaraq qeyd etdi ki, Zamin Rəhimov kimi igid oğullarımızın göstərdiyi qəhrəmanlıqlar gələcək nəsillər üçün nümunə olmalıdır: “Vətənin çağırışına səs verən igid oğullarımızdan biri də Zamin idi. O, Vətən uğrunda döyüşlərdə ali mərtəbəyə – şəhidliyə ucaldı. Zaminin valideynləri başlarını hər zaman dik tutsunlar. Çünki şəhid valideyni olmaq böyük bir şərəfdir. Bütün şəhidlərimizə Allahdan rəhmət diləyirəm”. Milli Məclisin deputatı Ceyhun Məmmədov bildirdi ki, ölkəmiz tarixinin ən şanlı günlərini yaşayır: “Bu gün sevinirik ki, torpaqlarımız işğaldan azad olunub. Avqustun 23-də biz hər il Cəbrayıl rayonunun işğal günü kimi qeyd edirdik. Artıq bu gün yoxdur, 4 oktyabr var. Biz hər il 4 oktyabrı Cəbrayıl rayonunun azad olunması günü kimi qeyd edəcəyik. Vətən müharibəsində bir daha sübut etdik ki, bizim xalq böyük və cəsarətli, qələbəyə layiq xalqdır. Bu Qələbəni Prezident İlham Əliyevin diplomatik və hərbi müstəvidə həyata keçirdiyi siyasət, gənclərimizin qəhrəmanlığı və xalqımızın birliyi təmin etdi. Bu gün dövlət səviyyəsində şəhid ailələrinə və qazilərə yüksək diqqət-qayğı var. Şəhid ailələri bilsinlər ki, biz hər zaman onların yanındayıq”. Qarabağ Müharibəsi Əlilləri, Veteranları və Şəhid Ailələri İctimai Birliyi Cəbrayıl rayon filialının sədri Səbuhi Hüseynov vurğuladı ki, Cəbrayıl rayonu işğal olunan zaman Zaminin beş yaşı var idi: “Bu gün şəhid olan igidlərimizin bir çoxu uşaq yaşlarında doğma yurdlarından didərgin düşən gənclərdir. Məhz onların qəhrəmanlıqları sayəsində bizlər Qarabağımıza qovuşduq. Allah Zaminə və bütün şəhidlərimizə rəhmət eləsin”. Cəbrayıl rayonu Mahmudlu kənd Uşaq musiqi məktəbinin müəllimi Xankişi Səfquliyev Zamin Rəhimov haqqında xatirələrindən danışdı. Məktəbin şagirdləri Cavidan Qənbərov, Almaz Rəşidli və Yağmur Rəhimlinin ifasında şeir parçaları səsləndirildi. Daha sonra bulaq-abidənin üzərindəki örtük qaldırıldı, iştirakçılar bulaqdan su içdilər. Sonda şəhidin atası Vahid Rəhimov çıxış edərək göstərilən diqqətə görə dövlət başçısına və mərasim iştirakçılarına minnətdarlığını bildirdi. *** Qeyd edək ki, Zamin Rəhimov 1988-ci il aprelin 21-də Cəbrayıl rayonunun Məzrə kəndində dünyaya göz açıb. 1993-cü ildə Cəbrayıl yağı əlinə keçəndə ailəsi doğma yurd-yuvasından didərgin düşüb. O, 1995-ci ildə Biləsuvar rayonunda yerləşən 2 saylı məcburi köçkün qəsəbəsindəki məktəbin 1-ci sinfinə gedən Zamin daha sonra ailəsi ilə birlikdə Bakı şəhərinə köçərək orta təhsilini Abşeron rayonunun Masazır qəsəbəsində müvəqqəti yerləşən Ə.Veysəlov adına Cəbrayıl rayon Sirik kənd tam orta məktəbində davam etdirib. Orta məktəbi bitirəndən sonra 2006-cı ildə hərbi xidmətə gedib. Kiçik yaşlarından musiqiyə həvəs göstərən Zamin hərbi xidmətdən qayıtdıqdan sonra Şuşa Musiqi Texnikumunda qarmon ixtisası üzrə təhsil alıb. 2012-ci ildə Bakı şəhərində müvəqqəti yerləşən Cəbrayıl rayon Mahmudlu kənd Uşaq musiqi məktəbində qarmon müəllimi kimi fəaliyyətə başlayıb. 2020-ci il sentyabrın 27-də Vətən müharibəsi başlayanda Zamin Rəhimov da cəbhəyə yollanır. Ən böyük arzusu bütün işğal altındakı torpaqlarımızın, o cümlədən doğma yurdu Cəbrayılın düşməndən azad olunması idi. Oktyabrın 4-də Cəbrayıl şəhəri işğaldan azad edilir. Zamin oktyabrın 8-də Cəbrayıl rayonu ərazisində gedən döyüşlərdə şəhid olur. Binəqədi rayonunun Biləcəri qəsəbə qəbiristanlığında dəfn edilən Zamin Rəhimov dövlət başçısının müvafiq sərəncamları ilə ölümündən sonra “Vətən uğrunda”, “Cəbrayılın azad olunmasına görə“, “Füzulinin azad olunmasına görə“ və “Cəsur döyüşçü“ medalları ilə təltif olunub.