XƏBƏRLƏR

Parisin Müqəddəs Merri kilsəsində istedadlı azərbaycanlı fleytaçı Ağarəhim Quliyevin xeyriyyə konserti olub.

AZƏRTAC xəbər verir ki, konsertdə 150 -dən çox musiqisevər iştirak edib.

Azərbaycanlı gənc ifaçını konsertdə braziliyalı fleytaçı Eduardo Rosa və ingilis pianoçu Julyan Miles müşayiət edib. Konsertdə müxtəlif kamera musiqi parçaları səsləndirilib.

Gənc musiqiçilər danimarkalı pianoçu və bəstəkar Frederik Kulavın “”Grand trio”, macar fleyta virtuozu və bəstəkarı F. Dopplerin “Andante et Rondo”, fransız bəstəkarı və pianoçusu Kamil Sent-Saensin (Camille Saint-Saens) “Le Cygne” əsərlərini ifa edilib.

Musiqiçilərin ifası alqışlarla qarşılanıb.

Prezident təqaüdçüsü Ağarəhim Quliyev Bakıda musiqiçi ailəsində anadan olub. Hələ 9 yaşında L. M. Rostropoviç musiqi məktəbində fleyta üzrə dərslərə başlamış gənc musiqiçi qısa zamanda istedadlı olduğunu göstərib və “İlin kəşfi” mükafatı laureatı, eləcə də nəfəs alətləri üzrə dövlət müsabiqəsinin qalibi olub.

2012-ci ildə İslam ölkələrinin gənc musiqiçiləri üçün keçirilən ilk beynəlxalq müsabiqədə Qran-pri mükafatına layiq görülüb. Müsabiqədən sonra Samaradakı (Rusiya) Yuri Başmet Musiqi Akademiyasına daxil olub. Ağarəhim 2013-cü ildə Estoniyanın "Baltik ulduzları" beynəlxalq yarışmasında birinci yeri, Gürcüstanda keçirilən "Gələcəyin ulduzları" beynəlxalq müsabiqəsinin Qran-Prisini qazanıb.

Azərbaycanlı gənc fleytaçının Parisdə UNESCO mənzil qərargahı, Hall Corto, Kremlin konsert salonu, Notre Dame des Blanc Manteaux, Saint Merry, Saint Eustache kilsələrində konsertləri olub. O, “Sir James Galway” beynəlxalq fleyta festivalı, İtaliyadakı Severino Gazelloni Festivalında iştirak edib.

Gənc fleytaçı Ağarəhim 2018-ci ildən Paris Ecole Normale de Musique-də məşhur fleytaçı Patricia Naglenin sinfində təhsilini davam etdirir. Elə həmin il Parisdə keçirilən "Clés d'Or" beynəlxalq yarışmasında birincilik qazanıb.

2021-ci ildə Ağarəhim ən çətin müsabiqəni fərqlənmə ilə başa vuraraq, Paris Regional Konservatoriyasına daxil olub.

Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin Mərkəzi Kitabxanası “Yubileylər silsiləsi” layihəsi əsasında sərgilər və videoçarxlar hazırlamağa və tədbirlər keçirməyə davam edir.

AZƏRTAC xəbər verir ki, Mərkəzi Kitabxanada oxuculara xidmət şöbəsi tərəfindən Azərbaycan Respublikasının Xalq şairi Söhrab Tahirin 95 illik yubileyinə həsr olunmuş kitab sərgisi hazırlanıb.

Həmçinin kitabxananın Metodika və biblioqrafiya şöbəsinin böyük metodisti İradə Hüseynova isə nasir, publisist Söhrab Tahirin yaradıcılığından “Ürək” şeirini səsləndirib.

Misirin Hurqada Beynəlxalq Hava Limanı 6 illik fasilədən sonra Rusiyadan 300 nəfərlik ilk turist qrupunu qəbul edib. İki ölkə arasında aviareyslər 2015-ci ilin oktyabrında – Sinay yarımadasında turistləri daşıyan rus təyyarəsinin partladılması və 224 nəfərin həlak olmasından sonra dayandırılmışdı.

AZƏRTAC xəbər verir ki, Misirin Hurqada kurort şəhərində rusiyalı turistləri gül-çiçəklə qarşılayıblar. “EgyptAir” aviaşirkəti Moskvadan turistləri daşımağı öz öhdəsinə götürüb. Aviaşirkətin icraçı direktoru Amr Abul-Eneyin bildirib ki, bu turizm mövsümündə Rusiyadan 10 min 800 turistin Şarm əl-Şeyx və Hurqadaya gəlməsi nəzərdə tutulur. Bundan başqa, aviaşirkət Moskva ilə Qahirə arasında da birbaşa aviareyslər həyata keçiriləcək. Misir paytaxtına 2018-ci ildə bərpa olunan uçuşları Rusiyanın “Aeroflot” aviaşirkəti həyata keçirirdi.

Qırımızı dənizin kurort şəhərlərinə isə turistlərin gedişi Rusiya Prezidenti Vladimir Putinin göstərişindən sonra bərpa olunub.

Ölkəmiz 1992-ci ildən UNESCO-ya üzv qəbul olunub. 1996-cı ildə isə UNESCO ilə Azərbaycan arasında əməkdaşlıq sahəsində memorandum imzalanıb. Həmin vaxtdan etibarən BMT-nin elm, təhsil və mədəniyyət üzrə bu nüfuzlu təşkilatı ilə əlaqələrimiz genişlənməkdədir. Ötən dövr ərzində ölkəmizin 15 qeyri-maddi mədəni irs elementi UNESCO-nun müvafiq siyahısında yer alır. Hazırda da bu istiqamətdə işlər davam etdirilir.

AZƏRTAC Mədəniyyət Nazirliyinə UNESCO-ya qeyri-maddi mədəni irs elementlərimizi təmsil edən hansı yeni nominasiyaları təqdim etməsi ilə əlaqədar sorğu ünvanlayıb.

Həmin sorğuya alınan cavabda deyilir: “UNESCO-ya yeni təqdim edilmiş 1 milli və 3 çoxmillətli nominasiya dosyemizin Qeyri-maddi mədəni irsin qorunması üzrə Hökumətlərarası Komitənin 2022-ci ildə keçiriləcək sessiyasında müzakirəyə çıxarılacağı təsdiqlənib. Beləliklə, komitənin 2022-ci ildə keçiriləcək sessiyasında daha 4 elementin - Türkiyə və Azərbaycanın birgə təqdim etdiyi “Çay mədəniyyəti: kimliyin, qonaqpərvərliyin və sosial təmasın simvolu”; Əfqanıstan, Azərbaycan, İran Tacikistan, Türkiyə, Türkmənistan və Özbəkistanın birgə təqdim etdiyi “Baramaçılıq, ipəkçilik və toxuculuq üçün ənənəvi ipək istehsalı”; Azərbaycan, Qazaxıstan, Qırğızıstan, Tacikistan, Türkiyə, Türkmənistan və Özbəkistanın birgə təqdim etdiyi “Molla Nəsrəddin lətifələrinin şifahi ənənəsi” çoxmillətli nominasiya fayllarının və “Pəhləvanlıq, ənənəvi zorxana oyunları və idman növləri” milli nominasiya (Azərbaycan) faylımızın UNESCO Siyahına salınması məsələsi müzakirə olunacaq”.

Avqustun 10-da saat 16:00-da Beynəlxalq Türk Mədəniyyəti və İrsi Fondunda Qazaxıstanın və bütövlükdə türk dünyasının böyük şairi, yazıçısı, bəstəkarı, ictimai xadimi, müasir qazax yazılı ədəbiyyatının banisi Abay Kunanbayevə həsr olunmuş Abay Gününün qeyd edilməsi və İspaniyada onun 175 illik yubileyi münasibətilə nəşr olunmuş poçt markalarının təqdimatı keçiriləcək.

AZƏRTAC xəbər verir ki, markalar Beynəlxalq Türk Mədəniyyəti və İrsi Fondunun himayəsi ilə türk dünyasının görkəmli nümayəndəsinin zəngin yaradıcılığını daha geniş beynəlxalq auditoriyada tanış etdirmək məqsədilə çap olunub. Abay Kunanbayevin təsviri olan poçt markasında onun yaradıcılıq nümunələri, həmçinin türk dünyasının mədəni dəyərləri və milli musiqi alətləri əks olunub.

Tədbirdə poçt markalarının möhürlənməsi mərasimi olacaq, həmçinin Azərbaycanın və Qazaxıstanın incəsənət nümayəndələrinin ifasında Abay Kunanbayevin əsərləri səsləndiriləcək.

Avqustun 10-da saat 16:00-da Beynəlxalq Türk Mədəniyyəti və İrsi Fondunda Qazaxıstanın və bütövlükdə türk dünyasının böyük şairi, yazıçısı, bəstəkarı, ictimai xadimi, müasir qazax yazılı ədəbiyyatının banisi Abay Kunanbayevə həsr olunmuş Abay Gününün qeyd edilməsi və İspaniyada onun 175 illik yubileyi münasibətilə nəşr olunmuş poçt markalarının təqdimatı keçiriləcək.

AZƏRTAC xəbər verir ki, markalar Beynəlxalq Türk Mədəniyyəti və İrsi Fondunun himayəsi ilə türk dünyasının görkəmli nümayəndəsinin zəngin yaradıcılığını daha geniş beynəlxalq auditoriyada tanış etdirmək məqsədilə çap olunub. Abay Kunanbayevin təsviri olan poçt markasında onun yaradıcılıq nümunələri, həmçinin türk dünyasının mədəni dəyərləri və milli musiqi alətləri əks olunub.

Tədbirdə poçt markalarının möhürlənməsi mərasimi olacaq, həmçinin Azərbaycanın və Qazaxıstanın incəsənət nümayəndələrinin ifasında Abay Kunanbayevin əsərləri səsləndiriləcək.

Mədəniyyət naziri Anar Kərimov avqustun 6-da videoformatda vətəndaşların qəbulunu keçirib. Nazir onlayn görüşdə növbəlilik əsasında qəbula yazılmış vətəndaşların müraciətlərini dinləyib, suallarını cavablandırıb. Görüşdə ümumilikdə on bir vətəndaşın müraciəti dinlənilib. Qəbulda iştirak edən vətəndaşların müraciətləri müxtəlif mövzuları əhatə edib. O cümlədən yaradıcı əməyin qiymətləndirilməsi, mədəniyyət və incəsənət xadimlərinə fəxri adların, fərdi təqaüdlərin verilməsi, mənzil-məişət şəraitinin yaxşılaşdırılması, işlə təmin olunma kimi məsələlərə dair müraciətlər olub. Anar Kərimov ölkəmizdə mədəniyyət sahəsinin idarə olunması ilə bağlı görülən işlərin, bu sahədə islahatların, eyni zamanda nazirlik tərəfindən icrasına başlanılan layihə və təşəbbüslərin ictimaiyyət tərəfindən rəğbətlə qarşılandığını diqqətə çatdırıb. Nazir, həmçinin incəsənət xadimlərinin, Azərbaycan mədəniyyətinə töhfə verən şəxslərin daima diqqət mərkəzində saxlanıldığını vurğulayıb. Qeyd olunub ki, artıq bu sahədə yeni bir mexanizmin tətbiq olunması üçün işlər aparılır. Bu prosesin həyata keçirilməsində məqsəd gələcəkdə həmin şəxslərin peşəkar və yaradıcı fəaliyyətinin, zəhmətinin, mədəniyyət sahəsində xidmətlərinin qiymətləndirilməsinin ədalətli, şəffaf şəkildə və müstəqil bir komissiya vasitəsilə aparılmasıdır. Tətbiq olunan mexanizm sayəsində bu sahədə çalışan və mədəniyyətimizin inkişafında, təbliğində xidmətləri olan şəxslər gələcəkdə layiqincə dəyərləndiriləcəklər. Vətəndaşların bütün müraciətləri dinlənildikdən sonra qaldırılan məsələlər müvafiq qaydada qeydə alınıb. Anar Kərimov bir sıra məsələlərlə əlaqədar lazımi tədbirlərin görülməsi üçün tapşırıqlar verib.

Azərbaycan Respublikasının Mədəniyyət Nazirliyi və Teatro.az sənət portalı xalqımızın Vətən müharibəsində qazandığı tarixi Zəfəri səhnə əsərlərində yaşatmaq, eləcə də pandemiya dövrünün məlum reallıqları üzündən durğunlaşmış milli teatr prosesini canlandırmaq, teatr sənətçilərini yeni yaradıcı təşəbbüslərə təşviq etmək məqsədilə “4.4 Qısa Tamaşalar Festivalı”na (QTF) tamaşa qəbulu elan edir. Otuz ilə yaxın işğal altında olan torpaqlarımızın rəşadətli Azərbaycan Ordusu tərəfindən 2020-ci ilin 44 günlük müharibəsində azad edilməsi və ölkəmizin ərazi bütövlüyünün bərpa olunması milli teatr sənətində də öz təcəssümünü tapmalıdır. Digər tərəfdən, artıq ikinci ildir davam edən pandemiya ilə bağlı tətbiq edilən karantin şəraitinə görə teatrlarımız, demək olar ki, fəaliyyətsizdir. Bu mənada, “4.4 Qısa Tamaşalar Festivalı” xalqımızın haqq savaşındakı qalibiyyətini Azərbaycan teatr tarixində əbədiləşdirməklə yanaşı, teatr mühitindəki sükunəti də aradan qaldırmağa, teatr sənətinin təbliğinə və inkişafına xidmət edəcək.  Festival təkcə dövlət teatrlarını deyil, həmçinin özəl teatr kollektivlərini, müstəqil sənətçiləri əhatə etməklə, yeni istedadların aşkarlanmasına da zəmin yaradacaq. MÜSABİQƏNİN MÖVZUSU: Müharibə Mükafatlandırma: Qaliblər peşəkar teatr xadimlərindən ibarət münsiflər heyətinin qiymətləndirməsi əsasında müəyyən ediləcək. Mükafat fondu: I Yer: 1.500 AZN II Yer: 1.000 AZN III Yer: 750 AZN Qeyd: Hər yer üzrə bir qalib seçiləcək. Müsabiqəyə qəbul şərtləri: 1.Festivalda dövlət və bələdiyyə teatrları ilə yanaşı, özəl teatr kollektivləri və müstəqil sənətçilər də iştirak edə bilər. 2. Azərbaycan Respublikasının vətəndaşları və Azərbaycan Respublikasında daimi yaşayış icazəsi olan bütün şəxslər müsabiqədə iştirak edə bilər. 3. Bir kollektiv, yaxud sənətçi müsabiqəyə yalnız bir tamaşa ilə müraciət edə bilər. 4. Müsabiqəyə göndərilən tamaşalara janr məhdudiyyəti qoyulmur. 5. Müsabiqəyə təqdim edilən tamaşaların xronometrajı 15 dəqiqədən artıq olmamalıdır. 6. Müsabiqəyə təqdim edilən işlər film-tamaşa formatında da ola bilər. 7. İştirakçılar tamaşaların videoyazısını və müraciət formasını təşkilat komitəsinə təqdim etməlidirlər. 8. Müsabiqəyə təqdim edilən materiallar 15 oktyabr 2021-ci il tarixindən gec olmayaraq 4.4festival@teatro.az elektron poçt ünvanına göndərilməlidir. Qeyd: Son tarixdən (15 oktyabr 2021-ci il) gec göndərilən və texniki tələblərə cavab verməyən materiallar müsabiqəyə qəbul olunmayacaq. 9.      Təşkilat komitəsi festivala təqdim edilən tamaşaların seçimi və müsabiqə proqramının tərtibi hüququnu özündə saxlayır. 10. Təqdim edilməli materialların və sənədlərin siyahısı: Müraciət forması Tamaşanın MP4 formatında, 720p və daha yüksək görüntü keyfiyyətində videoyazısı Tamaşanın 30-60 saniyəlik treyleri. Qeyd: Tamaşaların videoyazısı və treyleri DVD diskdə, xarici yaddaş qurğusunda, yaxud internet vasitəsilə (elektron poçtla, wetransfer, filelmail, googledrive və digər fayl mübadiləsi platformalarından istifadə etməklə) göndərilməlidir. Məsul şəxsin şəxsiyyət vəsiqəsinin surəti (PDF). Tamaşadan 3 ədəd fotoşəkil (fotolar, ən azı, 300 dpi ölçüdə, 3 MB-dən böyük və jpeg formatında olmalıdır). Əlaqə vasitəsi: +994 506602025

Məlum olduğu kimi Azərbaycan Respublikasının Prezidenti İlham Əliyevin müvafiq Sərəncamı ilə 2021-ci il ölkəmizdə “Nizami Gəncəvi İli” elan olunub. Bununla əlaqədar Mədəniyyət Nazirliyi tərəfindən də müxtəlif tədbirlər həyata keçirilir. Dahi Azərbaycan şairi Nizami Gəncəvinin anadan olmasının 880 illiyi münasibət ilə nazirlik yanında Mədəni İrsin Qorunması, İnkişafı və Bərpası üzrə Dövlət Xidmətinin tabeliyində fəaliyyət göstərən “Avey” Dövlət Tarix-Mədəniyyət Qoruğunun “Göyəzən” filialında ağacəkmə aksiyası təşkil olunub. Qoruq ərazisində yaşıllıqların genişləndirilməsi və ekoloji tarazlığın qorunması üçün mütəmadi olaraq müxtəlif növ ağacların əkilməsi tədbirləri həyata keçirilir. Bu il isə Göyəzən dağının ətəklərində 880 ədəd eldar şamı və badam tingləri əkilib. Ərazidə təmizlik, səliqə-sahman işləri aparılıb. Yeni əkilən ağacların suvarılması və qorunması üçün zəruri tədbirlər görülür.

Azərbaycan Respublikası Konstitusiyasının 109-cu maddəsinin 23-cü bəndini rəhbər tutaraq qərara alıram: Azərbaycan mədəniyyətinin inkişafında xidmətlərinə görə Rəfiqə Hacı qızı Axundova “Şöhrət” ordeni ilə təltif edilsin.   İlham Əliyev Azərbaycan Respublikasının Prezidenti Bakı şəhəri, 6 avqust 2021-ci il