XƏBƏRLƏR

Ötən aylarda ifaçılıq istedadı olan gənclər üçün bütün respublika üzrə elan olunan “SƏHNƏDƏ” müsabiqəsinin canlı dinləmələri yekunlaşıb. Müsabiqənin Lənkəran, Quba, Şəki, Gəncə, Yevlax, Bakı və Naxçıvan şəhərlərində keçirilən kastinq mərhələsində iştirak haqqı qazanan 100-dən çox gənc münsiflər heyəti qarşısında çıxış edərək ifaçılıq bacarıqlarını nümayiş etdiriblər.  Münsiflər kürsüsündə olan ölkəmizin musiqi sahəsində tanınan və peşəkar simaları Sevda Ələkbərzadə, Pərviz İsaqov və hər kastinq üzrə dəvət olunan ulduz qonaqları - İlhamə Qasımova, Zamiq Hüseynov, Aytən İsmixanova, Natavan Həbibi, Muxtar Abseynov, Nigar Kərimbəyova və türkiyəli müğənni Ferman Akgülün iştirakı ilə  “Səhnədə” müsabiqəsinin final mərhələsinə 10 gənc seçilib. Müsabiqənin bundan sonrakı mərhələsində kastinqlərdəki dinləmələrin yekununda öz istedadı ilə münsiflərin diqqətini cəlb edən və seçim meyarlarına uyğun gələn 10 gəncin Bakıda baş tutacaq qala konsertində çıxış etmək şansı olacaq. Konsertin yekununda münsiflərin qərarı ilə seçilən 3 gənclə “RÄNG” leyblı arasında 1 illik prodüsserlik müqaviləsi imzalanacaq. Müsabiqənin kastinq mərhələləri və möhtəşəm “Böyük Final” Azərbaycan Dövlət Televiziyasında (AzTV) teleşou formatında yayımlanacaq. Xatırladaq ki, “SƏHNƏDƏ” Gənc İstedadlar Müsabiqəsi Azərbaycan Respublikası Gənclər Fondunun dəstəyi, Mədəniyyət Nazirliyi və “RÄNG” leyblın tərəfdaşlığı, “GəncSİMA” İctimai Birliyinin təşkilatçılığı ilə keçirilir. Müsabiqənin məqsədi dövlət gənclər siyasətinin vacib hissəsi olan paytaxt və regionlarda xüsusi istedada malik olan gənc ifaçıları aşkar etmək, onların qabiliyyətlərinin inkişafı və sənətdə öz yerini tapmasına dəstək göstərməkdir.  

Azərbaycan Respublikasının mədəniyyət naziri Anar Kərimov İraq Respublikasının ölkəmizdə rəsmi səfərdə olan rabitə naziri Arkan Şihab Əhməd Əl-Şaibani ilə görüşüb. Qonağı salamlayan nazir Anar Kərimov ölkələrimiz arasında münasibətlərin tarixi, mədəni və dini bağlar üzərində inkişaf etdiyini vurğulayaraq, həm ikitərəfli, həm də çoxtərəfli çərçivələrdə əməkdaşlığın həyata keçirildiyini qeyd edib. Azərbaycan və İraq arasında münasibətlərin inkişafında qarşılıqlı səfərlərin əhəmiyyətini vurğulayan nazir hazırkı səfərin də faydalı müzakirələrin aparılması üçün imkanlar yaratdığını bildirib. 2011-ci ildə Azərbaycan Respublikasının Mədəniyyət və Turizm Nazirliyi və İraq Respublikasının Mədəniyyət Nazirliyi arasında imzalanmış mədəniyyət sahəsində əməkdaşlıq haqqında Anlaşma Memorandumundan söz açan Anar Kərimov bu sahədə əlaqələrin daha da inkişaf etdirilməsinin əhəmiyyətini qeyd edib. İraqın Azərbaycanın ərazi bütövlüyünə hər zaman dəstək verdiyinə görə qarşı tərəfə təşəkkürünü bildirən Anar Kərimov ölkəmizin ərazisinin bir hissəsinin 30 ilə yaxın Ermənistanın işğalı altında olduğu dövrdə mədəniyyətimizə və tarixi irsimizə dəymiş ziyan, vandalizm aktları barədə qonağı məlumatlandırıb. Nazir İraqın Azərbaycandakı səfirinin də işğaldan azad olunan ərazilərə baş çəkdiyini xatırladaraq bu ərazilərdə mədəniyyətlə bağlı bütün infrastrukturun, eləcə də qəbiristanlıqlar, məscidlər, xristian abidələri və digər məkanların erməni işğalçı qüvvələri tərəfindən məqsədli şəkildə dağıdıldığını diqqətə çatdırıb. Anar Kərimov qeyd edib ki, hazırda Azərbaycan dövləti işğaldan azad olunan torpaqlarda geniş yenidənqurma və bərpa işləri həyata keçirir. Həmin ərazilərdə, o cümlədən Azərbaycanın mədəniyyət paytaxtı Şuşa şəhərində dini-etnik mənsubiyyətindən asılı olmayaraq bütün inanc yerləri qorunur, islam irsi ilə yanaşı xristian abidələrinin, qədim kilsələrin bərpasına başlanılıb. Mədəniyyət Nazirliyinin beynəlxalq tərəfdaşlarla birgə başladığı “Mədəniyyət naminə sülh” (Peace4Culture) qlobal kampaniyasından danışan Anar Kərimov bildirib ki, bu kampaniyanın əsas məqsədi Azərbaycanın işğaldan azad olunmuş ərazilərində mədəniyyətə qarşı törədilmiş soyqırımını, habelə ölkəmizin işğaldan azad olunmuş ərazilərində sülhün bərqərar olması ilə mədəniyyətin və həyatın dirçəlməsinin başqa regionlara da nümunə ola biləcəyini dünyaya çatdırmaqdır. Qəbula görə təşəkkürünü bildirən İraqın rabitə naziri ölkələrimiz arasında ikitərəfli münasibətlərin mövcud inkişaf səviyyəsindən məmnunluğunu ifadə edib. Qonaq  Azərbaycan Respublikası Hökuməti və İraq Respublikası Hökuməti arasında ticarət, iqtisadi, elmi, texniki və mədəni əməkdaşlıq üzrə Birgə Komissiyanın iclasından söz açaraq qarşılılıqlı əlaqələrin genişləndirilməsi imkanları barədə fikirlərini bölüşüb. Arkan Şihab Əhməd Əl-Şaibani qədim sivilizasiyaların məkanı olan İraqda tarix boyu çoxsaylı müharibələrin olduğunu, bu ərazidə yerləşən tarixi abidə və tikililərin dağıntıya məruz qaldığını, mədəni irsə dair eksponatların oğurlandığını, talan edildiyini vurğulayaraq bu baxımdan Azərbaycanın qarşılaşdığı vəziyyəti aydın şəkildə anladığını bildirib. Anar Kərimov söhbət zamanı İraq Respublikasının mədəniyyət nazirinin Azərbaycana dəvət olunması, iki ölkə arasında mədəniyyət sahəsində yeni sazişin imzalanması, İraq ərazisində yaşayan türkmənlərlə Azərbaycan xalqının tarixi-mədəni bağlılığı, dahi Azərbaycan şairi Məhəmməd Füzulinin İraqın Kərbəla şəhərindəki məqbərəsinin bərpası məsələlərinə də toxunub. Görüş qarşılıqlı maraq doğuran digər məsələlərin müzakirəsi ilə davam edib.

Azərbaycan Respublikasının Mədəniyyət Nazirliyi, ICESCO üzrə Azərbaycan Respublikasının Milli Komissiyası, İslam Dünyası Təhsil, Elm və Mədəniyyət Təşkilatı (ICESCO), Bakı Ali Neft Məktəbi və “NewSpace Innovation” ICESCO-nun üzvü olan ölkələrdə akselerator proqramları vasitəsilə dinamik yaradıcı texnologiya və mədəniyyət sahələrinin inkişaf etdirilməsi məqsədilə “ICESCO akseleratoru” adlı yeni pilot layihəyə başlayırlar. Layihə Azərbaycan, Qazaxıstan və Özbəkistanda baş tutacaq və ilkin olaraq 5 sənaye sahəsini əhatə edəcəkdir: bunlar kənd təsərrüfatı, rəqəmsal media, maliyyə texnologiyaları, əyləncə və oyunlar, turizm və qida texnologiyaları sahələridir. Layihənin birinci mərhələsində milli səviyyədə keçiriləcək yarışlarda iştirak etmək üçün qeydiyyatdan keçmiş ən yaxşı startaplar yerli münsiflər heyəti tərəfindən seçiləcəkdir. Milli səviyyədə keçiriləcək yarışlar 11 sentyabr tarixində iki günlük düşərgə (bootcamp) şəklində başlayacaq və burada komandalara biznesin qurulması, biznes modelləri, müştəri araşdırmaları mövzularında təlimlər keçiriləcəkdir. İkinci mərhələdə düşərgə altı həftə ərzində intensiv mentor sessiyaları ilə davam edəcəkdir. Bu mərhələdə komandalar ideyalarını təkmilləşdirəcək, təklif və prototiplər hazırlayaraq münsiflər heyəti qarşısında çıxış edəcəklər. Hər ölkənin 3 ən yaxşı komandası final mərhələsində iştirak etmək hüququ qazanacaqdır. Üçüncü mərhələdə hər ölkədən finala çıxan komandalar investor və sahibkarlar qarşısında startap ideyalarını təqdim edərək mükafat üçün mübarizə aparacaqlar. Müsabiqədə iştirak etmək üçün qeydiyyat 6 avqust-8 sentyabr tarixləri arasında açıq olacaqdır. Qeydiyyat üçün keçid:  https://newspace.az/cla/

Azərbaycanın dilbər guşələrindən olan Qəbələ şəhəri yenidən öz qapılarını sənətsevərlərin, Musiqi Festivalı iştirakçılarının üzünə açdı. Heydər Əliyev Fondunun dəstəyi və təşkilatçılığı, Azərbaycan Respublikasının Təhsil və Mədəniyyət nazirliklərinin və Bakı Musiqi Akademiyasının  dəstəyi ilə iyulun 31-də başlayan XII Qəbələ Musiqi Festivalı avqustun 4-dək davam etdi. Builki festival əlamətdar hadisəyə - Üzeyir Hacıbəyli adına Bakı Musiqi Akademiyasının 100 illik yubileyinə həsr olunmuşdu. Yubileyin keçirilməsi ilə bağlı Azərbaycan Respublikasının Prezidenti İlham Əliyev 2021-ci il mayın 26-da Sərəncam imzaladı. Bununla bağlı respublikamızın bir çox bölgələrində, musiqi-tədris ocaqlarında müxtəlif tədbirlərin keçirilməsi nəzərdə tutulub. XII Qəbələ Musiqi Festivalı da yubileyə həsr olunmuş tədbirlərdən biri idi. Musiqi ictimaiyyəti arasında böyük rəğbətlə qarşılanan Qəbələ Musiqi Festivalının proqramı bu il də çox zəngin oldu. Musiqisevərlər festival günlərində bir çox musiqi kollektivlərinin maraqlı konsert proqramından zövq aldılar. Festivalda klassik musiqi ilə yanaşı, muğam, vokal, kamera musiqisi axşamları da təşkil olundu. Bu ilki Qəbələ Musiqi Festivalının ən başlıca məziyyətlərindən biri o oldu ki, ölkəmizin aparıcı musiqi təhsil ocaqlarının müəllim və tələbələri, eləcə də müxtəlif ifaçı kollektivləri geniş səpkidə iştirak etdilər. İyulun 31-də XII Qəbələ Musiqi Festivalının təntənəli açılış mərasimi oldu. Əvvəlcə ölkəmizdə musiqi mədəniyyətinin inkişafında və təbliğində müstəsna xidmətləri olan Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın festival iştirakçılarına təbrik məktubu oxundu. Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyevanın, mədəniyyət naziri Anar Kərimovun iştirak etdikləri açılış mərasimində təhsil naziri Emin Əmrullayev, Bakı Musiqi Akademiyasının rektoru, Qəbələ Musiqi Festivalının bədii rəhbəri Fərhad Bədəlbəyli çıxış etdilər. Açılış mərasimindən sonra Müdafiə Nazirliyinin Əlahiddə Nümunəvi Hərbi Orkestrin ifasında geniş konsert proqramı təqdim olundu. Avqustun 1-də Konqres Mərkəzində BMA-nın müəllim və tələbələrinin iştirakilə kamera-instrumental musiqi gecəsi keçirildi. Respublika və beynəlxalq müsabiqələr laureatları olan tələbələr – pianoçular Fəqan Həsənli, Vüsalə Babayeva, Ləman Seyidova, Elxan Niftiyev, Leyla Zeynalova, Cəmalə Abdinzadə, Jalə İslamova, qoboy ifaçısı Əziz Pənah, vokalçılar Lalə İbrahimova, Mahir Tağızadə, Rza Xosrovzadə, violonçelist Ərol Rzayev və digər gənc ifaçılar konsertin məxsusi təravətli ab-havasını yaratdılar. Həmin gün baş tutan kamera musiqi axşamında Respublikanın xalq və əməkdar artistləri, BMA-nın müəllimləri olan Zəhra Quliyeva, Yeganə Axundova, Murad Hüseynov, İlham Nəzərov, “Bakı Kamera Orkestri” və onun dirijoru Fuad İbrahimov, Cavad Tağızadə, gənc qoboy ifaçısı Əziz Pənah konsertin əsas iştirakçıları oldular. Gənc bəstəkar, II Qarabağ Müharibəsi qazisi Vüqar Məmmədzadənin “Şəhidlərə ithaf” adlı əsəri konsertin məxsusi qəhrəmani və zəfər ovqatını ifadə edə bildi. 2 avqust tarixində BMA-nın müəllim və tələbələri digər bir maraqlı kamera konsertini təqdim etdilər. Gənc bəstəkar Vüqar Məmmədzadənin (prof.A.Əzimovun sinfi) “Ay üzlü Nigarım” əsərinin ilk ifası, respublikanın Xalq artisti Ülviyyə Hacıbəyovanın ifasında Azərbaycan klassik musqi inciləri, Əməkdar müəllim Nəzakət Rimazi ilə Elnarə Kəbirlinskayanın duet ifasında səslənən Ravel, BMA-nın  “Lumineux” vokal ansamblı və onun bədii rəhbəri, BMA-nın Əməkdar müəllimi Naala Barateliya, gənc pianoçular –Züleyxa Abdulla, Fəqan Həsənli, Səidə Tağızadə, Nərgiz Kəngərli, Leyla Əhmədxanova, “Clarte” klarnet kvartetinin parlaq ifaları alqışlandı. Eyni gündə açıq səhnədə keçirilən “Zəfər muğam kompozisiyası” adlı konsert – festivalın əlamətdar musiqi gecələrindən biri oldu. Respublikanın Xalq artistləri Mənsum İbrahimov, Elçin Həşimov, Əməkdar artistlər Təyyar Bayramov, Elnur Əhmədovun ifalarında muğamlar və Nazim Əliverdibəyovun “Muğam” xoreoqrafik miniatürü (R.Axundova və M.Məmmədovun quruluşunda) səsləndi.   Avqustun 3-də Konqres Mərkəzində respublikanın tanınmış ifaçıları, xalq və əməkdar artistlər Murad Adıgözəlzadə ilə Əvəz Abdullanın, vokalçı Gülnaz İsmayılova ilə bəstəkar Ceyhun Allahverdiyevin, messo-soprano müğənni Fəridə Məmmədova ilə bəstəkar Elnarə Dadaşovanın duet ifaları, respublika və beynəlxalq müsabiqələr laureatı Nərmin Nəcəflinin iştirakı ilə  baş tutan kamera-vokal musiqi axşamı XII Qəbələ Musiqi Festivalını uğurla başa vurdu.

Avqustun 6-da “YARAT” Film Klubu “Artım” layihə məkanında "Nəsli kəsən yarış" filmini təqdim edəcək.

AZƏRTAC xəbər verir ki, film antropogen canlıların üzərinə düşən təhlükələrdən bəhs edən sənədli filmdir. Həmçinin film hadisələri alimlərin, fəalların və jurnalistlərin nəzər-nöqtəsindən göstərir.

Ekran əsəri “Beeco initiative” təşkilatının dəstəyi ilə nümayiş olunacaq.

Rejissoru Lui Psihoyos olan filmin xronometrajı 94 dəqiqədir.

O, mavi Xəzərin lacivərd sularını, sahilə çırpılıb qayıdan qırçınlı ləpələri, doğma Bakıya gecə-gündüz layla çalan dənizin pıçıltılarını çox sevirdi. Elə Bakının ədəbi keşikçisi olan Xəzəri, onun sərvətlərini, fauna və florasını da bir ana qayğısı ilə qoruyur, bir övlad kimi ona can yandırar, üstündə əsərdi...

AZƏRTAC xəbər verir ki, “Xəzərə bağlı ömür” sənədli film-portreti bütün varlığı ilə öz sevimli peşəsinə bağlı olan tanınmış ekoloq Lətifə Hüseynovaya həsr edilib.

Müxtəlif beynəlxalq festivallarda dəfələrlə uğur qazanmış istedadlı rejissor Yeganə Əbdülməmmədovanın yeni yaradıcılıq məhsulu olan film-portretdə ömrünü Azərbaycan təbiətinə, xüsusən də Xəzər dənizinin ətraf mühitinin mühafizəsinə həsr etmiş, Beynəlxalq Ekoenergetika Akademiyasının professoru, ekologiya üzrə beynəlxalq ekspert və Ekologiya və Təbii Sərvətlər Nazirliyi sistemində 40 ilə yaxın çalışmış Lətifə Hüseynovanın keçdiyi həyat yolundan, peşəkarlıq keyfiyyətlərindən söhbət açılır. Filmdə onun Xəzər dənizinin ekologiyasının qorunması sahəsində gördüyü işlər, qurduğu kompleks ekoloji monitorinq sistemi, ekoloji maarifləndirmə sahəsində fədakar fəaliyyəti öz əksini tapıb.

Lətifə Hüseynovanın "Əsrin kontraktı" sənədli filmində müxtəlif telesüjet və xronikalarda dəfələrlə ekspert kimi iştirak edib. Onun prinsipial münasibəti və analitik təhlili həmişə diqqəti cəlb edib və xalqımızın ümummilli lideri Heydər Əliyevin tapşırığı ilə “bp” şirkətinə Xəzər dənizində “Çıraq” yatağının istismarında "Saralin" qazma məhlulundan istifadəyə qadağan qoyulub, bir neçə ildən sonra bu qadağa Meksika körfəzinə də tətbiq edilib. Xəzər dənizinin ətraf mühitinin mühafizəsi haqqında Çərçivə Konvensiyasının hazırlanmasında Azərbaycan tərəfindən işçi qrupun üzvü kimi Lətifə xanımın fəal iştirakı və bu həssas su hövzəsində sərt standartların tətbiqi üzrə konstruktiv təklifləri yazılı sənədlərdə öz əksini tapıb.

Film Lətifə Hüseynovanın yazdığı “Anam Xəzərim” kitabı əsasında çəkilib və onunla birlikdə işləyən həmkarları, tanınmış ekoloq və mütəxəssislər onun peşəkarlığı və işgüzar keyfiyyətləri haqqında xatirələrini bölüşüblər.

Bakı Şəhər Mədəniyyət Baş İdarəsi Yasamal Rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasının əməkdaşları 44 günlük İkinci Qarabağ müharibəsində şəhid olmuş igid oğullarımızın Üçüncü Fəxri xiyabandakı məzarlarını ziyarət ediblər.

Kitabxanadan  AZƏRTAC-a bildirilib ki, kitabxana əməkdaşları hər bir şəhidi ayrı-ayrılıqda yad edib, onların döyüş yollarından və qəhrəmanlıqlarından danışıblar.

Vətən müharibəsi böyük Qələbəmizin ən şanlı səhifələrindən biridir. Ölməz şəhidlərin ruhlarını yad etmək hər bir kəsin vətəndaşlıq borcudur.

M.Ş.Vazeh adına Mərkəzi Kitabxanada şəhidlərə və Milli qəhrəmanlara həsr olunmuş guşələr yaradılıb, kitab sərgiləri təşkil olunub. Mərkəzi Kitabxanada “Tarix yazan igidlərimiz” layihəsi həyata keçirilir. Layihə əsasında şəhidlərə həsr olunmuş videoçarxlar və informasiya məktubları hazırlanır və oxuculara təqdim edilir, layihə əsasında tanıdılan hər bir şəhid ailəsi ilə əlaqə saxlanılır və şəhidin həyat yolu işıqlandırılır.

Kitabxananın əməkdaşları qeyd ediblər ki, hər bir şəhid bizim qürur mənbəyimizdir. Şəhidlərin məzarları önündə Qarabağ və Vətən haqqında şeirlər səsləndirilib.

Mədəniyyət naziri Anar Kərimov Yunus Əmrə İnstitutunun rəhbəri Şeref Ateşin rəhbərlik etdiyi nümayəndə heyətini qəbul edib.

Nazirlikdən AZƏRTAC-a bildirilib ki, Anar Kərimov nümayəndə heyətini səmimi salamlayıb, qardaş Türkiyədə baş vermiş meşə yanğınlarının törətdiyi fəsadlardan sarsıldığını bildirib, eləcə də yanğınlar zamanı həlak olanların ailələrinə və yaxınlarına dərin hüznlə başsağlığı çatdırıb.

İnstitutun rəhbəri isə öz növbəsində qardaş Azərbaycanın göndərdiyi yardım heyəti və texnika dəstəyinə görə minnətdarlığını bildirib.

Görüşdə Azərbaycanla Türkiyə arasında mədəniyyət, kitabxana sahəsində əməkdaşlığın inkişaf etdirilməsi, həmçinin zəngin və qədim tarixi ilə tanınan Qarabağa həsr olunmuş filmlərin çəkilməsi, ortaq mədəni irsin qorunması, qarşılıqlı uzunmüddətli təlimlərin keçirilməsi, tarixi abidələrin araşdırılması ilə bağlı müzakirələr aparılıb. Digər layihələrin icrası ilə bağlı birgə fəaliyyət planının hazırlanması məsələləri müzakirə edilib.

Şeref Ateş qəbula görə Anar Kərimova təşəkkür edib, iki ölkə arasında tarixən mövcud olan dostluq və qardaşlıq münasibətlərinin mədəniyyət sahəsində əməkdaşlıqda da ön planda olduğunu və bundan sonra da Yunus Əmrə İnstitutu ilə Mədəniyyət Nazirliyi arasında birgə fəaliyyəti bundan sonra da uğurla davam etdirməyə hazır olduqlarını bildirib.

Görüş zamanı qarşılıqlı maraq doğuran bir sıra digər məsələlər ətrafında da fikir mübadiləsi aparılıb.

Özbəkistan hədiyyə kimi Qazaxıstanın Türküstan şəhərində 5 min yerlik böyük məscid kompleksi tikir. Burada İslam Mərkəzi, kitabxana və digər obyektlər də olacaq.

AZƏRTAC Özbəkistan mətbuatına istinadla xəbər verir ki, məscid Özbəkistan Prezidenti Şavkat Mirziyoyevin dəstəyi ilə inşa edilir.

Nadir şərq memarlığı üslubunda tikilən məscidin inşasında müasir materiallardan istifadə olunur. Məscid digər tikililərlə birlikdə 20 min kvadratmetr sahəni əhatə edəcək.

Kompleksin gələn il istifadəyə verilməsi nəzərdə tutulur.

Avqustun 4-də Beynəlxalq Avrasiya Mətbuat Fondunda dünyaca məşhur müğənni, amerikalı vokalçı Della Milesin “Qarabağ Azərbaycandır” klipinin təqdimatı keçirilib.

AZƏRTAC xəbər verir ki, tədbirdə Heydər Əliyev Fondunun vitse-prezidenti Leyla Əliyevanın Şuşaya həsr etdiyi “Xarıbülbül” şeirinə bəstələnən eyniadlı musiqi əsəri ilə bağlı fikirlər səsləndirilib. “Xarıbülbül” musiqi əsərinin müəllifi Azərbaycan Bəstəkarlar İttifaqının üzvü Tural Məmmədlidir.

Tədbiri giriş sözü ilə açan Beynəlxalq Avrasiya Mətbuat Fondun prezidenti Umud Mirzəyev bildirib ki, Della Miles Mədəniyyət Nazirliyi və Beynəlxalq Avrasiya Mətbuat Fondunun dəvəti ilə Azərbaycanda səfərdədir. Səfərin məqsədi 44 günlük Vətən müharibəsindən sonra erməni işğalından azad olunmuş Qarabağ torpaqlarına səfər etmək, erməni vandalizmi ilə tanış olmaq və Heydər Əliyev Fondunun vitse-prezidenti Leyla Əliyevanın Şuşaya həsr etdiyi “Xarıbülbül” şeirinə bəstələnən eyniadlı musiqi əsərini ifa etməkdir.

Layihədə iştirak edən xanəndə Qoçaq Əsgərov bildirib ki, Della Miles Qarabağın Azərbaycanın əzəli torpağı olduğunu dünya mətbuatında səsləndirir və bu yolla dünya ictimaiyyəti Ermənistanın təxribatçı bir ölkə olduğunu görür. Bildirib ki, yaxınlarda “Xarıbülbül” mahnısını duet şəklində ifa edib, ancaq mahnı hələ ki, hazırlıq mərhələsindədir.

Azərbaycandan məmnun qaldığını deyən Della Miles söyləyib ki, dəfələrlə xarici ölkələrdə səfərdə olarkən dərisinin rənginə görə ayrı-seçkilik yaşayıb. Ancaq Azərbaycan tamamilə fərqli bir ölkədir. Burada irqçilik yoxdur, din bərabərliyi var. Qeyd edib ki, layihəyə dəvət olunanda Qarabağın tarixini oxumalı olub və bu torpaq haqqında mübarizənin səbəbini öyrənib. “Xarıbülbül” mahnısını oxumaqla mən özümü bir növ döyüşçü kimi hiss etdim”, - deyə Della Miles bildirib.

Azərbaycan Yazıçılar Birliyinin katibi Rəşad Məcid vurğulayıb ki, Della Milesin haqqın tərəfində olması bu musiqidə də əks olunur. Qeyd edib ki, Şuşa musiqiçilər diyarıdır və oraya səfər etmək növbəti mahnının yaranmasına bir stimul olacaq.

Bildirib ki, Qoçaq Əsgərov gənc olmasına baxmayaraq, Azərbaycan musiqisini dünyaya daşıyan azsaylı insanlardan biridir. “Xarıbülbül” mahnısının bəstəkarı Tural Məmmədli, onu ifa edən Della Miles və Qoçaq Əsgərov cütlüyünün əməyi uğurlu alınıb”, - deyə R.Məcid vurğulayıb.

Sonra xanəndə Qoçaq Əsgərov və Della Miles birlikdə oxuduqları mahnıdan bir parça səsləndiriblər.

Xatırladaq ki, Della Milesin bir neçə ay öncə Azərbaycanın Qarabağ Zəfərinə həsr etdiyi “Qarabağ Azərbaycandır” adlı klipi işıq üzü görüb. Amerikalı müğənni ABŞ-ın Texas ştatında musiqiçi ailəsində dünyaya gəlib. Gənc yaşlarında Los-Ancelesə köçüb. O, burada Maykl Ceksonun məşhur “Sisterella” musiqili tamaşasının baş qəhrəmanı olan “Ella” obrazını canlandırıb. Tamaşadakı ifası ilə məşhurlaşan Miles sonralar Maykl Cekson və Uitni Hyuston başda olmaqla, bir çox müğənnilərin vokalçısı olub. Hazırda Türkiyənin İstanbul şəhərində yaşayır.